ਦਿਲ ਦੇ ਦੌਰੇ ਸਬੰਧੀ ਦੋ ਦਿਨਾਂ ਤੀਜੀ ਕੌਮੀ ਕਾਨਫਰੰਸ ਤਹਿਤ ਲਾਈਵ ਵਰਕਸ਼ਾਪ ਅਤੇ ਕਾਰਡੀਓਲੌਜੀ ਵਿੱਚ ਆਉਂਦੀਆਂ ਰੁਕਾਵਟਾਂ ਦੇ ਵਿਸ਼ੇ 'ਤੇ ਸੈਮੀਨਾਰ ਅੱਜ ਸ਼ੁਰੂ ਹੋਇਆ। ਦਿਲ ਦੇ ਰੋਗਾਂ ਬਾਰੇ ਪ੍ਰਸਿੱਧ ਡਾਕਟਰ ਐਚ.ਕੇ.ਬਾਲੀ ਦੀ ਅਗਵਾਈ ਹੇਠ ਚੰਡੀਗੜ੍ਹ ਹਾਰਟ ਫਾਊਡੇਸ਼ਨ ਵੱਲੋਂ ਕਰਵਾਈ ਜਾ ਰਹੀ ਇਸ ਕਾਨਫਰੰਸ ਦਾ ਸਿਰਲੇਖ ਦਿਲ ਨੂੰ ਬਚਾਓ ਰੱਖਿਆ ਗਿਆ ਹੈ।ਇਸ ਸਬੰਧੀ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਡਾ ਬਾਲੀ ਨੇ ਦੱਸਿਆ ਕਿ ਹੁਣ ਤੱਕ ਦੀ ਸਭ ਤੋਂ ਵੱਡੀ ਦਿਲ ਦੇ ਰੋਗਾਂ ਸਬੰਧੀ ਇਸ ਕਾਨਫਰੰਸ ਵਿੱਚ ਦਿੱਲੀ, ਬੈਂਗਲੂਰ, ਮੁੰਬਈ, ਕੋਲਕਾਤਾ, ਚੇਨਈ ਸਮੇਤ ਵਿਦੇਸ਼ਾਂ ਤੋਂ 113 ਫੈਕਲਟੀ ਮੈਂਬਰ ਅਤੇ 550 ਡੈਲੀਗੇਟ ਭਾਗ ਲੈਣਗੇ। ਉਨ੍ਹਾਂ ਦੱਸਿਆ ਕਿ ਕਾਨਫਰੰਸ ਦੀ ਸ਼ੁਰੂਆਤ ਦਿਲ ਦੇ ਦੌਰੇ ਸਬੰਧੀ ਇਲਾਜ਼ ਵਿਸ਼ੇ 'ਤੇ ਮਾਹਿਰਾਂ ਦੇ ਵਿਚਾਰਾਂ ਨਾਲ ਹੋਈ। ਜਿਸ ਦੌਰਾਨ ਅਜਿਹੀ ਸਥਿਤੀ ਦੇ ਵੱਖ-ਵੱਖ ਪਹਿਲੂਆਂ ਸਬੰਧੀ ਜਾਣਕਾਰੀ ਦਿੱਤੀ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਸ਼ੂਗਰ ਤੋਂ ਪੀੜਤ ਮਰੀਜ਼ ਨੂੰ ਦਿਲ ਦੇ ਰੋਗ ਤੋਂ ਬਚਾਉਣ ਸਬੰਧੀ ਯਤਨਾਂ ਤੋਂ ਇਲਾਵਾ ਕਿਡਨੀ ਫੇਲ ਹੋਣ ਅਤੇ ਨਾੜੀਆਂ ਦੇ ਬੰਦ ਹੋਣ ਆਦਿ ਵਰਗੇ ਵਿਸ਼ਿਆਂ 'ਤੇ ਮਾਹਿਰਾਂ ਨੇ ਆਪਣੇ ਵਿਚਾਰ ਪੇਸ਼ ਕੀਤੇ ਹਨ।
ਉਨ੍ਹਾਂ ਦੱਸਿਆ ਕਿ ਇਸ ਕਾਨਫਰੰਸ ਦੌਰਾਨ ਦਿਲ ਵਿੱਚ ਸਟੰਟ ਪਾਉਣ ਸਮੇਤ ਆਪਰੇਸ਼ਨ ਦੀਆਂ ਹੋਰ ਸਾਰੀਆਂ ਵਿਧੀਆਂ ਡਾਕਟਰਾਂ ਨੂੰ ਲਾਇਵ ਦਿਖਾਈਆਂ ਜਾਣਗੀਆਂ ਜਿਸ ਦੇ ਅਧਾਰ 'ਤੇ ਉਨ੍ਹਾਂ ਦੇ ਵਿਚਾਰ ਜਾਣੇ ਜਾਣਗੇ। ਜਿਹੜੇ ਉਨ੍ਹਾਂ ਵੱਲੋਂ ਫੌਰਟਿਸ ਦੀ ਕੈਥ ਲੈਬ ਵਿੱਚ ਕੀਤੇ ਜਾ ਰਹੇ ਆਪਰੇਸ਼ਨ ਨੂੰ ਹੋਟਲ ਜੇ.ਡਬਲਊ ਮੈਰੀਆਟ ਵਿੱਚ ਬੈਠੇ ਡਾਕਟਰਾਂ ਨੂੰ ਦਿਖਾਏ ਜਾਣਗੇ ਅਤੇ ਇਸ ਦੌਰਾਨ ਉਨ੍ਹਾਂ ਡਾਕਟਰਾਂ ਵੱਲੋਂ ਵੀ ਆਪਰੇਸ਼ਨ ਸਬੰਧੀ ਸਵਾਲ ਜਵਾਬ ਆਨਲਾਈਨ ਹੀ ਕੀਤੇ ਜਾਣਗੇ। ਉਨ੍ਹਾਂ ਦੱਸਿਆ ਕਿ ਅੱਜ ਪਹਿਲੇ ਦਿਨ ਇਸ ਤਰ੍ਹਾਂ ਦੇ ਦੋ ਲਾਈਵ ਸੈਸ਼ਨ ਹੋਣਗੇ। ਇਸ ਤੋਂ ਇਲਾਵਾ ਕਾਨਫਰੰਸ ਦੌਰਾਨ ਭਾਰਤੀਆਂ ਖਾਸ ਕਰਕੇ ਨੌਜਵਾਨਾਂ ਨੂੰ ਦਿਲ ਦੇ ਰੋਗਾਂ ਤੋਂ ਬਚਾਉਣ ਸਬੰਧੀ ਵੀ ਮਾਹਿਰ ਆਪਣੇ ਵਿਚਾਰ ਪੇਸ਼ ਕਰਨਗੇ। ਅੱਜ ਹਾਲ ਏ ਵਿੱਚ ਹੋਏ ਦੁਪਹਿਰ ਤੋਂ ਪਹਿਲੇ ਸੈਸ਼ਨ ਦੌਰਾਨ ਦਿਲ ਦੇ ਦੌਰੇ ਸਬੰਧੀ ਗਾਇਡਲਾਈਨ, ਕਾਰਡੀਅਕ ਰੀਸਾਇਨੋਕਰੋਨਾਈਜੇਸ਼ਨ ਥੈਰੇਪੀ ਆਦਿ ਵਿਸ਼ਿਆਂ 'ਤੇ ਵਿਚਾਰ ਚਰਚਾ ਹੋਈ। ਇਸ ਦੌਰਾਨ ਦੱਸਿਆ ਗਿਆ ਕਿ ਡਾਕਟਰ ਆਪਣੇ ਮਰੀਜ ਦੀ ਪਹਿਚਾਣ ਕਿਵੇਂ ਕਰਨ ਅਤੇ ਸੀ.ਆਰ.ਟੀ. ਜਾਂਚ ਕੀ ਹੈ। ਇਸ ਤਰ੍ਹਾਂ ਹੀ ਨਿਊਕਲੀਅਰ ਕਾਰਡਿਓਲੌਜੀ ਆਪਸ਼ਨ, ਦਿਲ ਦਾ ਦੌਰਾ ਪੈਣ ਸਮੇਂ ਬਾਇਓਮਾਰਕਰਜ਼ ਦੀ ਸਥਿਤੀ ਆਦਿ ਵਿਸ਼ੇ ਵਿਚਾਰ ਗਏ। ਇਸ ਤਰ੍ਹਾਂ ਹੀ ਹਾਲ ਬੀ ਵਿੱਚ ਚੱਲ ਰਹੇ ਸੈਸ਼ਨ ਦੌਰਾਨ ਡਾਕਟਰਾਂ ਨੇ ਦਿਲ ਦੇ ਦੌਰੇ ਸਮੇਂ ਸਹੀ ਇਲਾਜ ਕਿਵੇਂ ਕੀਤਾ ਜਾਵੇ, ਦਿਲ ਦੇ ਇਲਾਜ ਲਈ ਨਵੀਆਂ ਦਵਾਈਆਂ ਦੀ ਖੋਜ ਆਦਿ ਮਹੱਤਵਪੂਰਨ ਵਿਸ਼ਿਆਂ 'ਤੇ ਡਾਕਟਰਾਂ ਨੇ ਆਪਣੇ ਵਿਚਾਰ ਰੱਖੇ। ਦੁਪਹਿਰ ਤੋਂ ਬਾਅਦ ਵਾਲੇ ਸੈਸ਼ਨ ਦੌਰਾਨ ਸੀ.ਆਰ.ਟੀ. ਦੀਆਂ ਪ੍ਰੋਗਰਾਮਿੰਗ ਆਪਸ਼ਨਾਂ,ਈ.ਸੀ.ਜੀ., ਬ੍ਰੇਨ ਸਟਰੌਮਿੰਗ, ਈਕੋ ਕਾਰਡਿਓਗਰਾਫ਼ੀ ਆਦਿ ਵਿਸ਼ਿਆਂ 'ਤੇ ਵਿਚਾਰ ਚਰਚਾ ਹੋਈ।