ਲੋਕਾਂ ਵਿੱਚ ਵੱਖ- ਵੱਖ ਬੀਮਾਰੀਆਂ ਪ੍ਰਤੀ ਜਾਗਰੂਕਤਾ ਅਤੇ ਬਚਾਓ ਹਿੱਤ ਸਿਹਤ ਵਿਭਾਗ ਪੰਜਾਬ ਵੱਲੋਂ ਸਮੇਂ- ਸਮੇਂ ਤੇ ਉਪਰਾਲੇ ਕੀਤੇ ਜਾਂਦੇ ਹਨ, ਇਸੇ ਕੜੀ ਤਹਿਤ ਹੀ ਅੱਜ ਰਾਜ ਪੱਧਰ ਤੋਂ ਭੇਜੀ ਗਈ ਐਚ.ਆਈ.ਵੀ. / ਏਡਜ਼ ਜਾਗਰੂਕਤਾ ਵੈਨ ਨੂੰ ਕਾਰਜਕਾਰੀ ਸਿਵਲ ਸਰਜਨ ਡਾ. ਅਵਤਾਰ ਸਿੰਘ ਵੱਲੋਂ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤਾ ਗਿਆ।ਇਹ ਵੈਨ ਅੱਜ 08 ਦਸੰਬਰ ਤੋਂ 14 ਦਸੰਬਰ ਤੱਕ ਕੁੱਲ 7 ਦਿਨਾਂ ਵਿੱਚ ਜਿਲ੍ਹੇ ਦੇ ਲੱਗਭੱਗ 35 ਪਿੰਡਾਂ ਦਾ ਦੋਰਾ ਕਰੇਗੀ ਜਿਸ ਦੋਰਾਨ ਮੁਫਤ ਐਚ.ਆਈ.ਵੀ. ਟੈਸਟ, ਗੁਪਤ ਰੋਗ ਤੇ ਨਸ਼ਿਆਂ ਨੂੰ ਰੋਕਣ ਲਈ ਕਾਂਊਸਲਿੰਗ ਅਤੇ ਸ਼ਾਮ ਨੂੰ ਨੁੱਕੜ ਨਾਟਕਾਂ ਰਾਹੀਂ ਲੋਕਾਂ ਨੂੰ ਐਚ.ਆਈ.ਵੀ. / ਏਡਜ਼ ਵਰਗੀ ਬੀਮਾਰੀ ਬਾਰੇ ਜਾਗਰੂਕ ਕੀਤਾ ਜਾਵੇਗਾ। ਇਹ ਵੈਨ ਅੱਜ ਜਿਲ੍ਹਾ ਹੈੱਡ-ਕੁਆਰਟਰ ਤੋਂ ਰਵਾਨਾ ਹੋਣ ਉਪਰੰਤ 8 ਅਤੇ 9 ਦਸੰਬਰ ਨੂੰ ਸ਼੍ਰੀ ਚਮਕੋਰ ਸਾਹਿਬ ਅਤੇ ਮੋਰਿੰਡਾ, 10 ਅਤੇ 11 ਦਸੰਬਰ ਨੂੰ ਭਰਤਗੜ, 12 ਦਸੰਬਰ ਨੂੰ ਕੀਰਤਪੁਰ ਸਾਹਿਬ , 13 ਦਸੰਬਰ ਨੂੰ ਨੂਰਪੁਰਬੇਦੀ ਅਤੇ 14 ਦਸੰਬਰ ਨੂੰ ਫਿਰ ਕੀਰਤਪੁਰ ਸਾਹਿਬ ਦੇ ਪਿੰਡਾਂ ਦਾ ਦੌਰਾ ਕਰੇਗੀ। ਇਸ ਮੌਕੇ ਸੰਬੋਧਨ ਕਰਦਿਆਂ ੳਨ੍ਹਾਂ ਨੇ ਦੱਸਿਆ ਕਿ ਏਡਜ ਇੱਕ ਲਾ-ਇਲਾਜ ਬਿਮਾਰੀ ਹੈ ਅਤੇ ਇਸ ਦਾ ਕੋਈ ਪੱਕਾ ਇਲਾਜ ਸੰਭਵ ਨਹੀ ਹੈ। ਇਸ ਬਿਮਾਰੀ ਤੋਂ ਬਚਾਅ ਹੀ ਇਸ ਦਾ ਇਲਾਜ ਹੈ। ਏਡਜ਼ (ਐਕਾਵਾਈਰਡ ਇੰਮਿਊਨੋ ਡੈਫੀਸ਼ੀਐਂਸੀ ਸਿੰਡਰੋਮ) ਫੈਲਣ ਦਾ ਕਾਰਣ ਐਚ.ਆਈ.ਵੀ ਨਾਮ ਦਾ ਵਿਸ਼ਾਣੂ ਹੈ।ਇਹ ਰੋਗ ਅਸੁਰੱਖਿਅਤ ਸਰੀਰਕ ਸਬੰਧ,ਦੂਸ਼ਿਤ ਸੂਈਆਂ ਦਾ ਇਸਤੇਮਾਲ, ਐਚ.ਆਈ.ਵੀ ਗ੍ਰਸਤ ਖੂਨ ਦੇ ਚੜਾਉਣ ਦੇ ਨਾਲ ਅਤੇ ਐਚ.ਆਈ.ਵੀ ਤੋਂ ਪੀੜਤ ਮਾਂ ਤੋਂ ਉਸਦੇ ਗਰਭ ਵਿੱਚ ਪਲ ਰਹੇ ਬੱਚੇ ਨੂੰ ਹੋ ਸਕਦਾ ਹੈ।
ਉਹਨਾਂ ਕਿਹਾ ਕਿ ਐਚ.ਆਈ.ਵੀ. ਪ੍ਰਭਾਵਿਤ ਵਿਅਕਤੀ ਐਂਟੀ ਰਿਟਰੋਵਾਇਰਲ ਦਵਾਈਆਂ ਲੈ ਕੇ ਇੱਕ ਲੰਬਾ ਅਤੇ ਸਿਹਤਮੰਦ ਜੀਵਨ ਜੀਅ ਸਕਦੇ ਹਨ।ਇਹ ਦਵਾਈਆਂ ਮਰੀਜਾਂ ਨੂੰ ਏ.ਆਰ.ਟੀ. ਕੇਂਦਰਾਂ ਵਿੱਚ ਇਲਾਜ ਸ਼ੁਰੂ ਕਰਵਾਉਣ ਤੋਂ ਬਾਅਦ ਮੁਫਤ ਦਿੱਤੀਆਂ ਜਾਂਦੀਆਂ ਹਨ।ਸਾਨੂੰ ਆਪਣੀ ਸੋਚ ਨੂੰ ਉੱਚਾ ਰੱਖਦੇ ਹੋਏ ਏਡਜ ਬਿਮਾਰੀ ਤੋਂ ਪ੍ਰਭਾਵਿਤ ਲੋਕਾਂ ਨੂੰ ਸਮਾਜ ਵਿੱਚ ਬਣਦਾ ਸਨਮਾਨ ਦੇਣਾ ਚਾਹੀਦਾ ਹੈ, ਕਿਉਂ ਜੋ ਉਹ ਵੀ ਸਾਡੇ ਸਮਾਜ ਦਾ ਇੱਕ ਹਿੱਸਾ ਹਨ। ਸਾਨੂੰ ਉਹਨਾਂ ਨਾਲ ਕਿਸੇ ਪ੍ਰਕਾਰ ਦਾ ਕੋਈ ਭੇਦਭਾਵ ਨਹੀ ਕਰਨਾ ਚਾਹੀਦਾ। ਕਿਉਂ ਕਿ ਏਡਜ ਦੀ ਬਿਮਾਰੀ ਇੱਕਠੇ ਖਾਣਾ ਖਾਣ ਨਾਲ, ਰਲ ਮਿਲਕੇ ਰਹਿਣ ਨਾਲ ਅਤੇ ਹੱਥ ਮਿਲਾਉਣ ਨਾਲ ਨਹੀ ਫੈਲਦੀ।ਓਹਨਾਂ ਕਿਹਾ ਕਿ ਸਾਡਾ ਸਭ ਦਾ ਇਹ ਫਰਜ ਬਣਦਾ ਹੈ ਕਿ ਏਡਜ ਵਰਗੀ ਘਾਤਕ ਬਿਮਾਰੀ ਬਾਰੇ ਅਸੀ ਆਪਣੇ ਸਮਾਜ ਵਿੱਚ ਵੱਧ ਤੋਂ ਵੱਧ ਜਾਗਰੂਕਤਾ ਪੈਦਾ ਕਰੀਏ ਤਾਂ ਜੋ ਇਸ ਬਿਮਾਰੀ ਤੋਂ ਬਚਿਆ ਜਾ ਸਕੇ। ਇਸ ਮੌਕੇ ਸੀਨੀਅਰ ਮੈਡੀਕਲ ਅਫਸਰ ਇੰ: ਸਿਵਲ ਹਸਪਤਾਲ ਰੂਪਨਗਰ ਡਾ. ਤਰਸੇਮ ਸਿੰਘ, ਡਾ. ਹਰਮੇਲ ਸਿੰਘ, ਡਾ. ਅਰੁਣ ਕੁਮਾਰ ਸ਼ਰਮਾ, ਮੈਡਮ ਜਸਮਨਜੀਤ ਕੋਰ, ਅਜੈ ਕੁਮਾਰ, ਗਗਨਦੀਪ ਸਿੰਘ ਅਤੇ ਜਿਲ੍ਹਾ ਬੀ.ਸੀ.ਸੀ. ਫੈਸੀਲੀਟੇਟਰ ਸੁਖਜੀਤ ਕੰਬੋਜ ਅਤੇ ਸਟਾਫ ਮੈਂਬਰ ਹਾਜਰ ਸਨ।