ਪੰਜਾਬ ਨੂੰ ਹੈਪੇਟਾਈਟਸ ਦੀ ਬਿਮਾਰੀ ਤੋਂ ਪੂਰੀ ਤਰ੍ਹਾਂ ਮੁਕਤ ਕਰਨ ਲਈ ਪੰਜਾਬ ਸਰਕਾਰ ਵੱਲੋਂ ਨੈਸ਼ਨਲ ਵਾਇਰਲ ਹੈਪੇਟਾਈਟਸ ਕੰਟਰੋਲ ਪ੍ਰੋਗਰਾਮ ਚਲਾਇਆ ਗਿਆ ਹੈ।ਇਸ ਪ੍ਰੋਗਰਾਮ ਤਹਿਤ ਪੰਜਾਬ ਦੇ ਸਾਰੇ ਸਰਕਾਰੀ ਜਿਲ੍ਹਾ ਹਸਪਤਾਲਾਂ ਵਿੱਚ ਹੈਪੇਟਾਈਟਸ-ਸੀ ਦਾ ਟੈਸਟ ਅਤੇ ਇਲਾਜ ਮੁਫਤ ਕੀਤਾ ਜਾਂਦਾ ਹੈ। ਇਸ ਸਬੰਧੀ ਜਾਣਕਾਰੀ ਦਾ ਪ੍ਰਗਟਾਵਾ ਕਰਦੇ ਹੋਏ ਸਿਵਲ ਸਰਜਨ ਰੂਪਨਗਰ ਡਾ: ਐਚ.ਐਨ.ਸਰਮਾ ਨੇ ਹੈਪੇਟਾਈਟਸ ਬੀ ਦੇ ਕਾਰਣਾਂ ਬਾਰੇ ਦੱਸਦੇ ਹੋਏ ਕਿਹਾ ਕਿ ਹੈਪੇਟਾਈਟਸ ਦੀ ਬਿਮਾਰੀ ਦੂਸ਼ਿ਼ਤ ਖੂਨ ਚੜਾਉਣ ਨਾਲ, ਦੂਸ਼ਿਤ ਸੂਈਆਂ ਦੇ ਸਾਂਝੇ ਇਸਤਮਾਲ ਕਰਨ ਨਾਲ, ਹੈਪੇਟਾਈਟਸ ਦੀ ਬਿਮਾਰੀ ਤੋਂ ਗ੍ਰਸਤ ਮਰੀਜ ਦੇ ਖੂਨ ਦੇ ਸੰਪਰਕ ਵਿੱਚ ਆਉਣ ਨਾਲ, ਹੈਪੇਟਾਈਟਸ ਦੇ ਮਰੀਜ ਦੇ ਰੇਜਰ ਕਿਸੇ ਹੋਰ ਵੱਲੋਂ ਵਰਤੇ ਜਾਣ ਨਾਲ, ਲੰਮੇ ਸਮੇਂ ਤੱਕ ਗੁਰਦਿਆਂ ਦਾ ਡਾਇਲਸਿਸ ਹੋਣ ਨਾਲ, ਸਰੀਰ ਉਪਰ ਇੰਨਫੈਕਟਡ ਮਸ਼ੀਨ ਨਾਲ ਟੈਟੂ ਬਣਵਾਉਣ ਨਾਲ, ਹੈਪੇਟਾਈਟਸ ਬੀ ਤੋ ਗ੍ਰਸਤ ਮਾਂ ਤੋਂ ਨਵ ਜੱਮੇਂ ਬੱਚੇ ਨੂੰ, ਹੈਪੇਟਾਈਟਸ ਬੀ ਦੇ ਗ੍ਰਸਤ ਵਿਅਕਤੀ ਨਾਲ ਸੰਭੋਗ ਕਰਨ ਕਾਰਣ ਹੈਪੇਟਾਈਟਸ ਬੀ ਦੀ ਬਿਮਾਰੀ ਦਾ ਖਦਸਾ ਬਣਿਆ ਰਹਿੰਦਾ ਹੈ।ਇਸ ਦੇ ਲੱਛਣਾਂ ਬਾਰੇ ਦੱਸਦੇ ਹੋਏ ਉਹਨਾਂ ਕਿਹਾ ਕਿ ਮਰੀਜ਼ ਨੂੰ ਬੁਖਾਰ ਹੋਣਾ, ਕਮਜੋਰੀ ਮਹਿਸੂਸ ਹੋਣਾ, ਭੁੱਖ ਘੱਟ ਲਗਣਾ, ਜੀ ਕੱਚਾ ਜਾਂ ਉਲਟੀ ਵਾਂਗ ਹੋਣਾ, ਅੱਖਾਂ ਅਤੇ ਪਿਸ਼ਾਬ ਦਾ ਰੰਗ ਪੀਲਾ ਹੋ ਜਾਣਾ, ਪੇਟ ਵਿੱਚ ਦਰਦ ਹੋਣਾ। ਹੈਪੇਟਾਈਟਸ ਬੀ ਦੇ ਪੁਰਾਣੇ ਮਰੀਜਾਂ ਵਿੱਚ ਲਿਵਰ ਫੇਲੀਅਰ ਅਤੇ ਲਿਵਰ ਕੈਂਸਰ ਹੋਣ ਦਾ ਖਦਸ਼ਾ ਵੀ ਰਹਿੰਦਾ ਹੈ।ਇਸ ਤੋਂ ਬਚਾਅ ਬਾਰੇ ਦੱਸਦੇ ਹੋਏ ਸਿਵਲ ਸਰਜਨ ਰੂਪਨਗਰ ਨੇ ਦੱਸਿਆ ਕਿ ਜਨ ਸਮੂਹ ਨੂੰ ਮੇਲਿਆਂ ਵਿੱਚ ਟੈਟੂ ਨਹੀਂ ਬਣਾਉਣੇ ਚਾਹੀਦੇ ਅਤੇ ਸੁਰੱਖਿਅਤ ਸੰਭੋਗ ਲਈ ਕੰਡੋਮ ਦਾ ਇਸਤਮਾਲ ਕਰਨਾ ਚਾਹੀਦਾ ਹੈ, ਸਰਕਾਰ ਤੋਂ ਮੰਨਜੂਰ ਸ਼ੁਦਾ ਬਲੱਡ ਬੈਂਕ ਤੋਂ ਟੈਸਟ ਕੀਤਾ ਖੂਨ ਹੀ ਲੋੜਵੰਦ ਮਰੀਜ਼ ਲਈ ਵਰਤਣਾ ਚਾਹੀਦਾ ਹੈ, ਰੇਜਰ ਅਤੇ ਬੁਰਸ਼ ਆਪਸ ਵਿੱਚ ਸਾਂਝੇ ਨਾ ਕੀਤੇ ਜਾਣ।ੳਹਨਾਂ ਆਮ ਜਨਤਾ ਨੂੰ ਅਪੀਲ ਕਰਦੇ ਹੋਏ ਕਿਹਾ ਹੈ ਕਿ ਉਹ ਸਾਰੇ ਮਰੀਜ ਜੰਨ੍ਹਾਂ ਦੇ ਲੱਛਣ ਹੈਪੇਟਾਈਟਸ ਬੀ ਦੀ ਬਿਮਾਰੀ ਨਾਲ ਮਿਲਦੇ ਹਨ ਉਹ ਸਮੇਂ ਸਿਰ ਨਜਦੀਕੀ ਸਰਕਾਰੀ ਸਿਹਤ ਕੇਂਦਰ ਵਿੱਚ ਮੌਜੂਦ ਮੈਡੀਕਲ ਸਪੈਸ਼ਲਿਸਟ ਕੋਲ ਮੁੱਢਲੀ ਜਾਂਚ ਕਰਵਾਉਣ ਤਾਂ ਜੋ ਇਸ ਗੰਭੀਰ ਬਿਮਾਰੀ ਤੋਂ ਸਮੇਂ ਸਿਰ ਮੁਕਤੀ ਪਾਈ ਜਾ ਸਕੇ।