ਆਮ ਆਦਮੀ ਪਾਰਟੀ ਦੇ ਆਗੂ ਅਤੇ ਪੰਜਾਬ ਵਿਧਾਨ ਸਭਾ ਵਿਚ ਵਿਰੋਧੀ ਧਿਰ ਦੇ ਨੇਤਾ ਐਚ.ਐਸ. ਫੂਲਕਾ ਨੇ ਬਾਰ ਕੌਂਸਲ ਆਫ ਇੰਡੀਆ ਨੂੰ ਇਕ ਪੱਤਰ ਲਿਖ ਕੇ ਦੱਸਿਆ ਕਿ ਕਿਉ ਜੋ ਉਹ ਪੰਜਾਬ ਵਿਚ ਵਿਰੋਧੀ ਧਿਰ ਦੇ ਨੇਤਾ ਚੁਣੇ ਗਏ ਹਨ ਜੋ ਕਿ ਕੈਬਿਨੇਟ ਮੰਤਰੀ ਦੇ ਬਰਾਬਰ ਦਾ ਅਹੁਦਾ ਹੈ ਇਸ ਲਈ ਉਨਾਂ ਨੇ ਆਪਣੀ ਪ੍ਰਾਈਵੇਟ ਵਕਾਲਤ ਛੱਡ ਦਿੱਤੀ ਹੈ।ਫੂਲਕਾ ਨੇ ਪੱਤਰ ਵਿਚ ਲਿਖਿਆ ਕਿ ਉਹ ਪਿਛਲੀ 30 ਸਾਲਾਂ ਤੋਂ 1984 ਦੇ ਸਿੱਖ ਵਿਰੋਧੀ ਦੰਗਿਆਂ ਦੇ ਕੇਸ ਲੜ ਰਹੇ ਹਨ, ਇਸ ਲਈ ਕੌਂਸਲ ਉਨਾਂ ਨੂੰ ਉਹ ਕੇਸ ਬਿਨਾ ਕਿਸੇ ਪੈਸੇ ਤੋਂ ਲੜਨ ਦੀ ਇਜਾਜਤ ਦੇਵੇ। ਉਨਾਂ ਕਿਹਾ ਕਿ ਕਿਉ ਜੋ ਇਹ ਕੇਸ ਇਕ ਨਾਜੁਕ ਮੋੜ ਤੇ ਹਨ ਇਸ ਲਈ ਉਹ ਇਨਾਂ ਨੂੰ ਵਿਚਕਾਰ ਨਹੀਂ ਛੱਡ ਸਕਦੇ।ਜਿੰਨਾਂ ਸਮਾਂ ਬਾਰ ਕੌਂਸਲ ਫੂਲਕਾ ਨੂੰ ਇਹ ਕੇਸ ਲੜਨ ਦੀ ਇਜਾਜਤ ਨਹੀਂ ਦਿੰਦੀ ਉਦੋਂ ਤੱਕ ਉਹ ਕੋਰਟ ਕੰਪਲੈਕਸ ਵਿਚ ਹਾਜਰ ਰਹਿ ਕੇ ਵਕੀਲਾਂ ਦੀ ਟੀਮ ਦੀ ਅਗਵਾਈ ਕਰਦੇ ਰਹਿਣਗੇ। ਅੱਜ ਵੀ ਜਗਦੀਸ਼ ਟਾਇਟਲਰ ਨਾਲ ਸੰਬੰਧਤ ਕੇਸ ਦੌਰਾਨ ਉਹ ਕੜਕਡੁੰਮਾ ਕੋਰਟ ਵਿਚ ਹਾਜਰ ਸਨ, ਜਿਥੇ ਕਿ ਐਡਵੋਕੇਟ ਪ੍ਰਭਸਹਾਇ ਕੌਰ ਪੀੜਿਤ ਪੱਖ ਵਲੋਂ ਵਕੀਲ ਵਜੋਂ ਪੇਸ਼ ਹੋਏ ਸਨ।