ਪੰਜਾਬ ਵਿਚ ਬਾਡੀ ਬਿਲਡਿੰਗ ਨੂੰ ਮਾਨਤਾ ਦਿਵਾਉਣ ਲਈ ਬਹੁਤ ਹੀ ਜਲਦ ਸੂਬੇ ਦੇ ਉਪ ਮੁੱਖ ਮੰਤਰੀ ਅਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੂੰ ਮਿਲਕੇ ਮੰਗ ਪੱਤਰ ਸੌਂਪਿਆ ਜਾਵੇਗਾ ਤਾਂ ਜੋ ਪੰਜਾਬ ਦੇ ਹੋਣਹਾਰ ਖਿਡਾਰੀਆਂ ਨੂੰ ਬਣਦਾ ਮਾਣ ਸਨਮਾਨ ਦਿਵਾਇਆ ਜਾ ਸਕੇ। ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਚੇਅਰਮੈਨ ਅਜਮੇਰ ਸਿੰਘ ਲੱਖੋਵਾਲ ਨੇ ਕੀਤਾ, ਜੋ ਕਿ ਲੁਧਿਆਣਾ ਦੁੱਗਰੀ ਰੋਡ ਸਥਿਤ ਅੱਪੂ ਜਿੰਮ ਵਿਚ ਬਾਡੀ ਬਿਲਡਰਾਂ ਨੂੰ ਸੰਬੋਧਨ ਕਰ ਰਹੇ ਸਨ। ਇਸ ਮੌਕੇ ਸ: ਲੱਖੋਵਾਲ ਨੇ ਵਰਲਡ ਗੋਲਡ ਮੈਡਲਿਸਟ ਮੁਨੀਸ਼ ਕੁਮਾਰ ਅਤੇ ਬਾਡੀ ਬਿਲਡਰ ਸੰਦੀਪ ਗੁਸਾਈਂ ਨੂੰ ਵਿਸ਼ੇਸ਼ ਸਨਮਾਨ ਵੀ ਦਿੱਤਾ ਤੇ ਕਿਹਾ ਕਿ ਅੱਜ ਲੋੜ ਹੈ ਅਜਿਹੇ ਨੌਜਵਾਨਾਂ ਤੋਂ ਸੇਧ ਲੈਣ ਦੀ, ਜੋ ਨਸ਼ਿਆਂ ਤੋਂ ਦੂਰ ਰਹਿ ਕੇ ਆਪਣੇ ਪਰਿਵਾਰ, ਸ਼ਹਿਰ ਤੇ ਸੂਬੇ ਦਾ ਪੂਰੇ ਸੰਸਾਰ ਭਰ ਵਿਚ ਨਾਮ ਰੌਸ਼ਨ ਕਰ ਰਹੇ ਹਨ।
ਇਸ ਮੌਕੇ ਪੰਜਾਬ ਰਾਜ ਘੱਟ ਗਿਣਤੀ ਕਮਿਸ਼ਨ ਦੇ ਮੈਂਬਰ ਅਲਬਰਟ ਦੂਆ ਅਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਯੂਥ ਆਗੂ ਗੁਰਦੀਪ ਸਿੰਘ ਗੋਸ਼ਾ ਵੀ ਵਿਸ਼ੇਸ਼ ਤੌਰ 'ਤੇ ਹਾਜ਼ਰ ਸਨ, ਜਿਨ੍ਹਾਂ ਨੇ ਬਾਡੀ ਬਿਲਡਿੰਗ ਖੇਡ ਪ੍ਰਤੀ ਆਪਣਾ ਸੁਝਾਅ ਦੱਸਦੇ ਹੋਏ ਕਿਹਾ ਕਿ ਇਹ ਖੇਡ ਜਿੱਥੇ ਖਿਡਾਰੀ ਨੂੰ ਸਰੀਰਿਕ ਪੱਖੋਂ ਮਜ਼ਬੂਤ ਕਰਦੀ ਹੈ, ਉਥੇ ਹੀ ਮਾਨਸਿਕ ਪੱਖੋ ਵੀ ਖਿਡਾਰੀਆਂ ਨੂੰ ਸਿਹਤਯਾਬ ਕਰਦੀ ਹੈ। ਇਸ ਲਈ ਇਸ ਖੇਡ ਨਾਲ ਹਰ ਇਕ ਖਿਡਾਰੀ ਨੂੰ ਜੁੜਣਾ ਚਾਹੀਦਾ ਹੈ। ਇਸ ਮੌਕੇ ਪ੍ਰਦੀਪ ਕੁਮਾਰ ਅੱਪੂ ਨੇ ਕਿਹਾ ਕਿ ਉਹ ਇਸ ਖੇਡ ਪ੍ਰਤੀ ਪੂਰੀ ਤਰ੍ਹਾਂ ਨਾਲ ਸਮਰਪਿਤ ਹਨ ਅਤੇ ਇਸੇ ਤਹਿਤ 27 ਦਸੰਬਰ ਨੂੰ ਨਹਿਰੂ ਸਿਧਾਂਤ ਕੇਂਦਰ ਵਿਚ ਪੰਜਾਬ ਐਮਚਿਓਰ ਬਾਡੀ ਬਿਲਡਿੰਗ ਐਸੋਸੀਏਸ਼ਨ ਦੇ ਬੈਨਰ ਹੇਠ ਜੋਸ਼ ਮਿਸਟਰ ਪੰਜਾਬ 2015 ਪ੍ਰਤੀਯੋਗਤ ਕਰਵਾਈ ਜਾਵੇਗੀ, ਜਿਸ ਵਿਚ ਪੰਜਾਬ ਭਰ ਤੋਂ 200 ਦੇ ਕਰੀਬ ਖਿਡਾਰੀ ਹਿੱਸਾ ਲੈਣਗੇ। ਇਸ ਮੌਕੇ ਪ੍ਰਦੀਪ ਕੁਮਾਰ ਅੱਪੂ, ਸੰਦੀਪ ਸੌਨੀ, ਜੌਲੀ ਸਿੰਘ, ਬੱਬਲੂ ਕੁਮਾਰ, ਅਜੈ ਕੁਮਾਰ, ਗੁਰਵਿੰਦਰ ਦੋਸਾਂਝ, ਸੰਜੀਵ ਸੋਨੂੰ, ਸ਼ੀਲਾ ਦੁੱਗਰੀ, ਬੌਨੀ ਗਰੇਵਾਲ, ਜਸਬੀਰ ਸਿੰਘ, ਮੁਨੀਸ਼ ਕੁਮਾਰ, ਅਰੁਣ ਕੁਮਾਰ, ਰੌਬਿਨ ਕੁਮਾਰ, ਮਨਿੰਦਰ ਸਿੰਘ, ਜਰਨੈਲ ਸਿੰਘ, ਬਲਬੀਰ ਸਿੰਘ, ਮੋਹਿਤ ਰਾਜਪੂਤ, ਕਰਨ ਮੌਦਗਿੱਲ, ਸਭੇਕ ਗਰੇਵਾਲ, ਪ੍ਰੀਤ ਗਿੱਲ ਆਦਿ ਹਾਜ਼ਰ ਸਨ।