ਲੁਧਿਆਣਾ ਨੂੰ ਇੰਡੀਆ ਟੂਡੇ ਗਰੁੱਪ ਦੇ ਸਰਵੇਖਣ ਦੌਰਾਨ 'ਹਾਊਸਿੰਗ' ਵਿੱਚ ਦੇਸ਼ ਦਾ ਸਭ ਤੋਂ ਉਭਰਵਾਂ ਸ਼ਹਿਰ ਕਰਾਰ ਦਿੱਤੇ ਜਾਣ ਤੋਂ ਬਾਅਦ, ਸੂਬੇ ਦੀ ਇਸ ਸਨਅਤੀ ਰਾਜਧਾਨੀ ਨੂੰ ਨਵਾਂ ਮੁਕਾਮ ਮਿਲਿਆ ਹੈ, ਜੋ ਕਿ ਇਸ ਗੱਲ ਦਾ ਪ੍ਰਤੀਕ ਹੈ ਕਿ ਆਲਮੀ ਅਤੇ ਕੌਮੀ ਆਰਥਿਕ ਮੰਦਹਾਲੀ ਦੇ ਦੌਰ ਵਿੱਚ ਵੀ ਸੂਬੇ ਵਿੱਚ 'ਰਿਐਲਟੀ ਸੈਕਟਰ' ਵਿੱਚ ਮੁੜ ਤੋਂ ਉਛਾਲ ਆ ਰਿਹਾ ਹੈ।ਇਹ ਪ੍ਰਗਟਾਵਾ ਅੱਜ ਸੂਬੇ ਦੇ ਸਿੰਚਾਈ ਮੰਤਰੀ ਸ਼ਰਨਜੀਤ ਸਿੰਘ ਢਿੱਲੋਂ ਜਿਨ੍ਹਾਂ ਨੇ ਕਿ ਪੰਜਾਬ ਸਰਕਾਰ ਦੀ ਤਰਫੋਂ ਕਲ੍ਹ ਇਹ ਐਵਾਰਡ ਪ੍ਰਾਪਤ ਕੀਤਾ, ਨੇ ਕਰਦਿਆਂ ਆਖਿਆ ਕਿ 'ਇੰਡੀਆ ਟੂਡੇ' ਗਰੁੱਪ ਦਾ ਇਹ ਐਵਾਰਡ ਸੂਬੇ ਵਿੱਚ ਮਕਾਨ ਉਸਾਰੀ ਵਪਾਰ ਵਿੱਚ ਖੜੋਤ ਦੇ ਕਾਂਗਰਸੀ ਪ੍ਰਚਾਰ 'ਤੇ ਕਰਾਰੀ ਚਪੇੜ ਹੈ। ਉਨ੍ਹਾਂ ਕਿਹਾ ਕਿ ਐਵਾਰਡ ਮੁੱਖ ਮੰਤਰੀ ਪਰਕਾਸ਼ ਸਿੰਘ ਬਾਦਲ ਅਤੇ ਉੱਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਵੱਲੋਂ ਜਾਇਦਾਦ ਵਪਾਰ ਨੂੰ ਹੁਲਾਰ ਦੇਣ ਲਈ ਕੀਤੀਆਂ ਜਾ ਰਹੀਆਂ ਪਹਿਲਕਦਮੀਆਂ ਅਤੇ ਲੋਕ ਪੱਖੀ ਨੀਤੀਆਂ ਦਾ ਨਤੀਜਾ ਹੈ।ਇਹ ਐਵਾਰਡ ਸ਼ਹਿਰੀ ਵਿਕਾਸ, ਪਾਰਲੀਮਾਨੀ ਮਾਮਲੇ ਅਤੇ ਮਕਾਨ ਤੇ ਗਰੀਬੀ ਹਟਾਓ ਮਹਿਕਮਿਆਂ ਦੇ ਕੇਂਦਰੀ ਮੰਤਰੀ ਵੈਂਕੈਯਾ ਨਾਇਡੂ ਵੱਲੋਂ ਬੀਤੀ ਸ਼ਾਮ ਨਵੀਂ ਦਿੱਲੀ ਵਿਖੇ ਇੱਕ ਸਮਾਗਮ ਦੌਰਾਨ ਦਿੱਤਾ ਗਿਆ।ਢਿੱਲੋਂ ਨੇ ਕਿਹਾ ਕਿ ਸ਼ਹਿਰੀਕਰਨ ਅਕਾਲੀ ਦਲ-ਭਾਜਪਾ ਸਰਕਾਰ ਦਾ ਪਹਿਲਾ ਏਜੰਡਾ ਹੈ ਕਿਉਂ ਜੋ ਸ਼ਹਿਰੀ ਢਾਂਚਾ ਆਰਥਿਕ ਵਾਧੇ ਦਾ ਮੁੱਖ ਕਾਰਕ ਹੋਣ ਕਾਰਨ ਅੱਜ ਦੇ ਦੌਰ ਵਿੱਚ ਅਹਿਮ ਥਾਂ ਰੱਖਦਾ ਹੈ।
ਉਨ੍ਹਾਂ ਕਿਹਾ ਕਿ ਲੁਧਿਆਣਾ ਕੇਵਲ ਸੂਬੇ ਦੀ ਵਿੱਤੀ ਰਾਜਧਾਨੀ ਹੀ ਨਹੀਂ ਬਲਕਿ ਮਕਾਨ ਉਸਾਰੀ ਵਪਾਰ ਵਿੱਚ ਸਭ ਤੋਂ ਬੇਹਤਰੀਨ ਨਿਵੇਸ਼ ਕੇਂਦਰ ਵੀ ਹੈ। ਉਨ੍ਹਾਂ ਕਿਹਾ ਕਿ ਸਾਡੀ ਸਰਕਾਰ ਨੇ ਲੁਧਿਆਣਾ ਵਿੱਚ ਸ਼ਹਿਰੀ ਗਰੀਬਾਂ ਨੂੰ ਰਹਿਣ ਲਈ ਛੱਡ ਮੁਹੱਈਆ ਕਰਵਾਉਣ ਲਈ ਵੱਖ-ਵੱਖ ਹਿੱਸਿਆਂ ਵਿੱਚ 4000 ਮਕਾਨ ਬਣਾਏ ਹਨ।ਇਸ ਤੋਂ ਇਲਾਵਾ ਵੱਡੀ ਗਿਣਤੀ ਵਿੱਚ ਨਿੱਜੀ ਖੇਤਰ ਨੇ ਮਕਾਨ ਉਸਾਰੀ ਦੇ ਕਿੱਤੇ ਵਿੱਚ ਨਿਵੇਸ਼ ਕੀਤਾ ਹੈ ਅਤੇ ਹੁਣ ਵੀ ਕਰ ਰਹੇ ਹਨ।ਨਵੀਂ ਦਿੱਲੀ ਵਿਖੇ ਐਵਾਰਡ ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਸ੍ਰੀ ਢਿੱਲੋਂ ਨੇ ਸ੍ਰੀ ਵੈਂਕੈਯਾ ਨਾਇਡੂ ਨੂੰ ਅਪੀਲ ਕੀਤੀ ਕਿ ਐਨ.ਡੀ.ਏ. ਸਰਕਾਰ ਪੇਂਡੂ ਇਲਾਕਿਆਂ ਨੂੰ ਸ਼ਹਿਰਾਂ ਦੀ ਤਰਜ਼ 'ਤੇ ਵਿਕਸਿਤ ਕਰਨ ਲਈ ਯੋਜਨਾ ਉਲੀਕੀ ਜਾਵੇ ਕਿਉਂ ਜੋ ਸਾਡੇ ਦੇਸ਼ ਦੀ 70 ਫ਼ੀਸਦੀ ਵਸੋਂ ਪਿੰਡਾਂ ਵਿੱਚ ਰਹਿੰਦੀ ਹੈ ਅਤੇ ਕੇਂਦਰ ਨੂੰ ਇਨ੍ਹਾਂ ਪਿੰਡਾਂ ਨੂੰ ਸ਼ਹਿਰੀ ਦਿੱਖ ਦੇਣ ਲਈ ਯੋਗਦਾਨ ਦੇਣ ਵਿੱਚ ਪਹਿਲ ਕਰਨੀ ਚਾਹੀਦੀ ਹੈ।ਜ਼ਿਕਰਯੋਗ ਹੈ ਕਿ ਇੰਡੀਆ ਟੂਡੇ ਵੱਲੋਂ ਸਰਵੋਤਮ ਸ਼ਹਿਰਾਂ ਦੇ ਇਸ ਸਰਵੇਖਣ ਦੇ ਦੂਸਰੇ ਐਡੀਸ਼ਨ ਦੌਰਾਨ 30 ਰਾਜਧਾਨੀ ਅਤੇ ਮੈਟਰੋ ਸ਼ਹਿਰਾਂ ਅਤੇ 20 ਉਭਰ ਰਹੇ ਸ਼ਹਿਰਾਂ ਨੂੰ ਅਧਾਰ ਬਣਾਇਆ ਗਿਆ ਸੀ, ਜਿਸ ਵਿੱਚ 12 ਮਾਪਦੰਡਾਂ ਜਿਨ੍ਹਾਂ ਵਿੱਚ ਆਰਥਿਕਤਾ, ਹਾਊਸਿੰਗ, ਟ੍ਰਾਂਸਪੋਰਟ, ਜਨਤਕ ਸੇਵਾਵਾਂ, ਸਿਹਤ ਸੇਵਾਵਾਂ, ਸਿੱਖਿਆ, ਜੁਰਮ ਤੇ ਸੁਰੱਖਿਆ, ਮਨੋਰੰਜਨ, ਵਾਤਾਵਰਣ, ਨਿਵੇਸ਼ ਤੇ ਸਾਫ਼-ਸਫ਼ਾਈ ਨੂੰ ਮੁੱਖ ਰੱਖਿਆ ਗਿਆ ਸੀ।