ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ ਦੀਆਂ ਵੱਖ -ਵੱਖ ਟੈਕਸੀ ਯੂਨੀਅਨਾਂ ਦੀ ਲੰਮੇ ਚਿਰਾਂ ਤੋਂ ਚਲੀ ਆ ਰਹੀਂ ਮੰਗ ਦੀ ਪੁਰਤੀ ਲਈ ਟੈਕਸੀ ਯੂਨੀਅਨਾਂ ਨੂੰ ਸ਼ਹਿਰ ਵਿੱਚ ਢੁੱਕਵੀਆਂ ਥਾਵਾਂ ਅਲਾਟ ਕੀਤੀਆਂ ਜਾਣਗੀਆਂ। ਜਿਸ ਨਾਲ ਉਨ੍ਹਾਂ ਨੂੰ ਦਰਪੇਸ਼ ਮੁਸ਼ਿਕਲਾਂ ਤੋਂ ਛੁਟਕਾਰਾ ਮਿਲ ਜਾਵੇਗਾ ਅਤੇ ਇਨ੍ਹਾਂ ਥਾਵਾਂ ਨੂੰ ਨਿਯਮਤ ਕੀਤਾ ਜਾਵੇਗਾ। ਇਸ ਗੱਲ ਦੀ ਜਾਣਕਾਰੀ ਜ਼ਿਲ੍ਹਾ ਯੋਜਨਾ ਕਮੇਟੀ ਦੇ ਚੇਅਰਮੈਨ ਹਰਭਜਨ ਮਾਨ ਅਤੇ ਸਾਬਕਾ ਕੇਂਦਰੀ ਮੰਤਰੀ ਬਲਵੰਤ ਸਿੰਘ ਰਾਮੂਵਾਲੀਆਂ ਸੀਨੀਅਰ ਮੀਤ ਪ੍ਰਧਾਨ ਸ੍ਰੋਮਣੀ ਅਕਾਲੀ ਦਲ ਵੱਲੋਂ ਟੈਕਸੀ ਯੂਨੀਅਨਾਂ ਨੂੰ ਢੁੱਕਵੀਆਂ ਥਾਵਾਂ ਅਲਾਟ ਕਰਨ ਸਬੰਧੀ, ਕਮਲਾ ਮਾਰਕੀਟ ਮੋਹਾਲੀ ਅਤੇ ਮੀਟ ਮਾਰਕੀਟ ਫੇਜ਼ 6 ਨੂੰ ਢੁੱਕਵੀ ਥਾਂ ਤੇ ਤਬਦੀਲ ਕਰਨ ਸਬੰਧੀ ਮੁੱਖ ਪ੍ਰਸ਼ਾਸਕ ਗਮਾਡਾ ਏ.ਕੇ. ਸਿਨਹਾ ਨਾਲ ਵਿਸ਼ੇਸ ਮੀਟਿੰਗ ਕਰਨ ਉਪਰੰਤ ਦਿੱਤੀ। ਮਾਨ ਨੇ ਦੱਸਿਆ ਕਿ ਸ਼ਹਿਰ ਵਿੱਚ ਟੈਕਸੀ ਯੂਨੀਅਨਾਂ ਕੋਲ ਨਿਯਮਤ ਥਾਂ ਨਾ ਹੋਣ ਕਾਰਨ ਟੈਕਸੀ ਚਾਲਕਾਂ ਨੂੰ ਵੱਖ –ਵੱਖ ਪਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ ਅਤੇ ਟੈਕਸੀ ਯੂਨੀਅਨਾਂ ਦੇ ਵਫਦ ਉਨ੍ਹਾਂ ਨੂੰ ਵਾਰ ਵਾਰ ਮਿਲ ਕੇ ਢੁੱਕਵੀ ਥਾਵਾਂ ਅਲਾਟ ਕਰਨ ਲਈ ਆਖ ਰਹੇ ਸਨ। ਮਾਨ ਨੇ ਦੱਸਿਆ ਕਿ ਮੁੱਖ ਪ੍ਰਸਾਸ਼ਕ ਨੇ ਅਧਿਕਾਰੀਆਂ ਨੂੰ ਵਿਸ਼ੇਸ ਥਾਵਾਂ ਦੀ ਸਨਾਖਤ ਕਰਨ ਲਈ ਹਦਾਇਤਾ ਜਾਰੀ ਕਰ ਦਿੱਤੀਆ ਹਨ ਅਤੇ ਜਲਦੀ ਹੀ ਵੱਖ ਵੱਖ ਥਾਵਾਂ ਅਲਾਟ ਕਰ ਦਿੱਤੀਆਂ ਜਾਣਗੀਆਂ।
ਉਨ੍ਹਾਂ ਦੱਸਿਆ ਕਿ ਫੇਜ਼ 6 ਸਥਿਤ ਮੀਟ ਮਾਰਕੀਟ ਕਾਰਨ ਫੇਜ਼ 6 ਦੇ ਲੋਕਾਂ ਨੂੰ ਭਾਰੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ ਅਤੇ ਇਥੋ ਦੇ ਲੋਕ ਮੀਟ ਮਾਰਕੀਟ ਨੂੰ ਹੋਰ ਥਾਂ ਤਬਦੀਲ ਕਰਨ ਦੀ ਮੰਗ ਕਰਦੇ ਆ ਰਹੇ ਸਨ। ਮਾਨ ਨੇ ਦੱਸਿਆ ਕਿ ਫੇਜ਼ 6 ਦੀ ਮੀਟ ਮਾਰਕੀਟ ਨੂੰ ਵੀ ਤਬਦੀਲ ਕਰਨ ਦਾ ਫੈਸਲਾ ਕਰ ਲਿਆ ਗਿਆ ਹੈ ਅਤੇ ਇਸ ਨੂੰ ਜਲਦੀ ਹੀ ਕਿਸੇ ਹੋਰ ਥਾਂ ਤੇ ਤਬਦੀਲ ਕਰ ਦਿੱਤਾ ਜਾਵੇਗਾ। ਮਾਨ ਨੇ ਦੱਸਿਆ ਕਿ ਮੋਹਾਲੀ ਪਿੰਡ ਸਥਿਤ ਕਮਲਾ ਮਾਰਕੀਟ ਜਿਥੇ ਕਿ ਮੋਟਰ ਗੱਡੀਆਂ ਦੀ ਮੁਰੰਮਤ ਅਤੇ ਸਪੇਅਰ ਪਾਰਟਸ ਆਦਿ ਦੀਆਂ ਦੁਕਾਨਾਂ ਹਨ ਨੂੰ ਵੀ ਫੇਜ਼ 11 ਵਿਖੇ ਤਬਦੀਲ ਕੀਤਾ ਜਾਵੇਗਾ। ਜਿਸ ਨਾਲ ਲੰਮੇ ਚਿਰਾਂ ਤੋਂ ਆ ਰਹੀ ਮੰਗ ਪੁਰੀ ਹੋ ਜਾਵੇਗੀ। ਉਨ੍ਹਾਂ ਹੋਰ ਦੱਸਿਆ ਕਿ ਇਤਿਹਾਸਕ ਪਿੰਡ ਸੋਹਾਣਾ ਦੀਆਂ ਗਲੀਆਂ ਨਾਲੀਆਂ ਨੂੰ ਪੱਕੀਆਂ ਕਰ ਕੇ ਇਸ ਪਿੰਡ ਨੂੰ ਸਾਫ਼ ਸੁਥਰਾ ਬਣਾਇਆ ਜਾਵੇਗਾ। ਇਸ ਤੋਂ ਉਪਰੰਤ ਮਾਨ ਨੇ ਮੁੱਖ ਪ੍ਰਸਾਸ਼ਕ ਗਮਾਡਾ ਏ.ਕੇ ਸਿਨੇਹਾ ਨਾਲ ਬੋਗਿਨ ਵਿਲਿਆ ਗਾਰਡਨ ਦਾ ਦੌਰਾ ਵੀ ਕੀਤਾ। ਮਾਨ ਨੇ ਦੱਸਿਆ ਕਿ ਇਸ ਪਾਰਕ ਨੂੰ ਹੋਰ ਅਤਿ ਆਧੁਨਿਕ ਸਹੂਲਤਾਂ ਨਾਲ ਲੈਸ ਕਰਕੇ ਸ਼ਹਿਰ ਨਿਵਾਸੀਆਂ ਲਈ ਇੱਕ ਚੰਗੀ ਸੈਰਗਾਹ ਵਜੋਂ ਵਿਕਸਿਤ ਕੀਤਾ ਜਾਵੇਗਾ। ਇਸ ਮੌਕੇ ਉਨ੍ਹਾਂ ਨਾਲ ਸਾਬਕਾ ਕੇਂਦਰੀ ਮੰਤਰੀ ਬਲਵੰਤ ਸਿੰਘ ਰਾਮੂਵਾਲੀਆ, ਮਾਨ ਦੇ ਸਲਾਹਾਕਾਰ ਗੁਜਰਾਲ ਇੰਦਰ ਸਿੰਘ ਚਾਹਲ, ਗਮਾਡਾ ਦੇ ਹੋਰ ਪ੍ਰਸਾਸਨਿਕ ਅਧਿਕਾਰੀ ਵੀ ਮੌਜੂਦ ਸਨ।