ਯੋਗ ਲਾਭ ਪਾਤਰੀਆਂ ਨੂੰ ਅਪੰਗਤਾ ਸਰਟੀਫੀਕੇਟ ਜਾਰੀ ਕਰਨ ਦੀ ਪ੍ਰਕਿਰਿਆ ਨੂੰ ਹੋਰ ਸੁਚਾਰੂ ਬਣਾਉਦਿਆਂ ਪੰਜਾਬ ਸਰਕਾਰ ਵੱਲੋਂ ਸਮਰੱਥ ਅਧਿਕਾਰੀਆਂ, ਸੰਸਥਾਵਾਂ/ਹਸਪਤਾਲਾਂ ਨੂੰ ਅਪੰਗਤਾ ਸਰਟੀਫੀਕੇਟ ਜਾਰੀ ਕਰਨ ਲਈ ਨਾਮਜਦ ਕੀਤਾ ਗਿਆ ਹੈ ਤਾਂ ਜੋ ਲਾਭਪਾਤਰੀ ਨੂੰ ਸਮੇਂ ਸਿਰ ਭਲਾਈ ਸਕੀਮਾਂ ਦਾ ਲਾਭ ਪਹੁੰਚਾਉਣ ਨੂੰ ਯਕੀਨੀ ਬਣਾਇਆ ਜਾ ਸਕੇ।ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਪੰਜਾਬ ਹੈਲਥ ਸਿਸਟਮਜ਼ ਕਾਰਪੋਰੇਸ਼ਨ ਦੇ ਚੇਅਰਮੈਨ ਸ. ਅਮਰਦੀਪ ਸਿੰਘ ਚੀਮਾ ਨੇ ਕਿਹਾ ਕਿ ਹੁੁਣ ਅਪੰਗਤਾ ਵਾਲੇ ਵਿਅਕਤੀਆਂ ਨੂੰ ਅਪੰਗਤਾ ਸਰਟੀਫੀਕੇਟ ਪ੍ਰਾਪਤ ਕਰਨ ਵਿੱਚ ਖੱਜਲ-ਖੁਆਰੀ ਦਾ ਸਾਹਮਣਾ ਨਹੀਂ ਕਰਨਾ ਪਵੇਗਾ। ਉਨਾਂ ਕਿਹਾ ਕਿ ਅਪੰਗਤਾ ਸਰਟੀਫਿਕੇਟ ਵਿੱਚ ਹੁੰਦੀ ਦੇਰੀ ਦੇ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਸੂਬਾ ਸਰਕਾਰ ਨੇ ਸੰਸਥਾਵਾਂ/ ਹਸਪਤਾਲਾਂ ਅਤੇ ਸਮਰੱਥ ਅਧਿਕਾਰੀਆਂ ਨੂੰ ਨਾਮਜਦ ਕੀਤਾ ਹੈ ਤਾਂ ਜੋ ਯੋਗ ਲਾਭ ਪਾਤਰੀਆਂ ਨੂੰ ਸਮਾਂਬੱਧ ਢੰਗ ਨਾਲ ਉਕਤ ਸਰਟੀਫੀਕੇਟ ਜਾਰੀ ਕੀਤੇ ਜਾ ਸਕਣ। ਉਨਾਂ ਕਿਹਾ ਕਿ ਇਸ ਸਬੰਧੀ ਸਿਵਲ ਸਰਜਨਜ਼ ਨੂੰ ਸਖਤ ਹਦਾਇਤਾਂ ਜਾਰੀ ਕੀਤੀਆਂ ਗਈਆਂ ਹਨ ਕਿਉਂ ਜੋ ਸਿਵਲ ਸਰਜ਼ਨ, ਜ਼ਿਲਾ ਪੱਧਰ ’ਤੇ ਬੋਰਡ ਦਾ ਮੁੱਖੀ ਹੁੰਦਾ ਹੈ ਅਤੇ 19 ਮਾਰਚ, 2017 ਤੋਂ ਅਮਲ ਵਿੱਚ ਆਏ ‘ਰਾਈਟ ਆਫ ਪਰਸਨ ਵਿਦ ਡਿਸਅਬਿਲਟੀ 2016 (ਆਰ.ਪੀ.ਡਬਲਿਊ.ਡੀ-2016) ਦੀ ਪਾਲਣਾ ਨੂੰ ਯਕੀਨੀ ਬਣਾਉਣ ਲਈ ਜ਼ਿੰਮੇਵਾਰ ਹੈ।ਚੇਅਰਮੈਨ ਚੀਮਾ ਨੇ ਦੱਸਿਆ ਕਿ ਵਿਭਾਗ ਵਲੋਂ ਰਾਜ ਦੇ ਸਾਰੇ ਸਿਵਲ ਸਰਜਨਜ਼ ਨੂੰ ਹਦਾਇਤ ਕੀਤੀ ਗਈ ਹੈ ਕਿ ਉਹ ਹਫਤੇ ਵਿੱਚ ਘੱੱਟੋ ਘੱਟ ਇੱਕ ਵਾਰ ਬੋਰਡ ਦੀ ਇਕੱਤਰਤਾ ਨੂੰ ਯਕੀਨੀ ਬਣਾਉਣ ਤਾਂ ਜੋ ਅਪੰਗਤਾ ਸਰਟੀਫੀਕੇਟ ਜਾਰੀ ਕਰਨ ਸਬੰਧੀ ਸਾਰੇ ਲੰਬਿਤ ਮਾਮਲਿਆਂ ਨਾਲ ਨਜਿੱਠਿਆ ਜਾ ਸਕੇ। ਉਨਾਂ ਕਿਹਾ ਕਿ ਆਪਣੀ ਡਿਊਟੀ ਵਿੱਚ ਕਿਸੇ ਕਿਸਮ ਦੀ ਕੁਤਾਹੀ ਜਾਂ ਸਰਟੀਫੀਕੇਟ ਜਾਰੀ ਕਰਨ ਪ੍ਰਕਿਰਿਆ ਵਿੱਚ ਬਿਨਾਂ ਕਿਸੇ ਠੋਸ ਕਾਰਨ ਤੋਂ ਦੇਰੀ ਕਰਨ ਵਾਲੇ ਅਧਿਕਾਰੀਆਂ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।
ਸ. ਚੀਮਾ ਨੇ ਦੱਸਿਆ ਕਿ ਤੁਰਨ-ਫਿਰਨ ਵਿੱਚ ਅਪੰਗਤਾ ਜਿਵੇਂ ਅੰਗਾਂ, ਰੀੜ ਦੀ ਹੱਡੀ, ਪੈਰਾਂ ਦੇ ਟੇਢੇਪਨ ਆਦਿ ਦੀ ਸਥਾਈ ਅਪੰਗਤਾ, ਵਾਲੇ ਵਿਅਕਤੀਆਂ ਨੂੰ ਸਾਰੇ ਜ਼ਿਲਿਆਂ ਅਤੇ ਸਬ-ਡਵੀਜਨਲ ਹਸਪਤਾਲਾਂ ਤੋਂ ਸਰਟੀਫੀਕੇਟ ਜਾਰੀ ਕੀਤੇ ਜਾਣਗੇ। ਇਸੇ ਤਰਾਂ ਗੰਭੀਰ ਦਿਮਾਗੀ ਬਿਮਾਰੀਆਂ ਕਰਕੇ ਹੋਈ ਅਪੰਗਤਾ, ਰੀੜ ਦੀ ਹੱਡੀ ਦੀ ਸੱਟ, ਐਸਿਡ ਅਟੈਕ ਪੀੜਤਾਂ, ਅਧਰੰਗ ਤੋਂ ਪ੍ਰਭਾਵਿਤ ਵਿਅਕਤੀਆਂ, ਕੋਹੜ ਤੋਂ ਪੀੜਤ ਵਿਅਕਤੀਆਂ, ਬੌਣਾਪਨ ਜਾਂ ਪੱਠਿਆਂ ਦੀ ਕਮਜ਼ੋਰੀ ਦੇ ਸ਼ਿਕਾਰ ਵਿਅਕਤੀ ਸਾਰੇ ਜ਼ਿਲਾ ਹਸਪਤਾਲਾਂ ਤੇ ਸਬ-ਡਵੀਜ਼ਨਲ ਹਸਪਤਾਲਾਂ ਤੋਂ ਸਰਟੀਫੀਕੇਟ ਪ੍ਰਾਪਤ ਕਰ ਸਕਣਗੇ ਜਿੱਥੇ ਕਿ ਹੱਡੀਆਂ, ਮੈਡੀਕਲ, ਚਮੜੀ ਰੋਗਾਂ ਦੇ ਮਾਹਿਰ ਡਾਕਟਰ ਮੌਜੂਦ ਹਨ। ਉਨਾਂ ਅੱਗੇ ਦੱਸਿਆ ਕਿ ਅੱਖਾਂ ਦੀ ਅਪੰਗਤਾ ਵਾਲੇ ਵਿਅਕਤੀ ਸਾਰੇ ਜ਼ਿਲਾਂ ਤੇ ਸਬ-ਡਵੀਜ਼ਨਲ ਹਸਪਤਾਲਾਂ ਵਿਖੇ ਤਾਇਨਾਤ ਅੱਖਾਂ ਦੇ ਮਾਹਰਾਂ ਤੋਂ ਸਰਟੀਫੀਕੇਟ ਪ੍ਰਾਪਤ ਕਰ ਸਕਣਗੇ।ਇਸੇ ਤਰਾਂ ਸੁਣਨ, ਬੋਲਣ ਤੇ ਭਾਸ਼ਾਈ ਅਪੰਗਤਾ ਵਾਲੇ ਵਿਅਕਤੀਆਂ ਨੂੰ ਸਰਟੀਫੀਕੇਟ ਜਾਰੀ ਕਰਨ ਲਈ ਸਿਵਲ ਸਰਜਨ ਵੱਲੋਂ ਚੁਣਿਆ ਇੱਕ ਈ.ਐਨ.ਟੀ ਮਾਹਰ, 1 ਆਡੀਓਲੋਜਿਸਟ/ ਸਪੀਚ ਲੈਂਗੁਏਜ ਥੈਰਪਿਸਟ ਬੋਰਡ ਵਿੱਚ ਸ਼ਾਮਲ ਹੋਵੇਗਾ।ਇਸੇ ਤਰਾਂ ਸੂਝ-ਬੂਝ ਸਬੰਧੀ ਅਪੰਗਤਾ, ਸਿੱਖਣ ਸਬੰਧੀ ਵਿਸ਼ੇਸ਼ ਅਪੰਗਤਾ ਲਈ ਵੀ ਸਾਰੇ ਜ਼ਿਲਾਂ ਤੇ ਸਬ-ਡਵੀਜ਼ਨਲ ਹਸਪਤਾਲਾਂ ਦੇ ਪੀਡੀਆਟਿ੍ਰਕਸ ਨਿਉਰੋਲਾਜਿਸਟ/ ਮਨੋਵਿਗਿਆਨਕ ਮਾਹਰ, ਕਲੀਨੀਕਲ ਜਾਂ ਮੁੜ-ਵਸੇਬਾ ਸਾਈਕਾਲੋਜਿਸਟ ਤੇ ਸਾਈਕਾਟਿ੍ਰਸਟ ਵਰਗੇ ਮਾਹਰ ਸਰਟੀਫੀਕੇਟ ਦੇਣ ਲਈ ਬੋਰਡ ਵਿੱਚ ਮੌਜੂਦ ਰਹਿਣਗੇ। ਦਿਮਾਗੀ ਪਰੇਸ਼ਾਨੀ ਦੇ ਪੀੜਤਾਂ ਨੂੰ ਸਰਟੀਫੀਕੇਟ ਜਾਰੀ ਕਰਨ ਲਈ ਕਲੀਨੀਕਲ ਅਸੈਸਮੈਂਟ ਦੇ ਸਾਈਕਾਟਿ੍ਰਸਟ ਮਾਹਰ ਅਤੇ ਮਨੋ-ਰੋਗ ਮਾਹਰ ਸਮਰੱਥ ਹੋਣਗੇ।ਚੇਅਰਮੈਨ ਸ. ਚੀਮਾ ਨੇ ਦੱਸਿਆ ਕਿ ਗੰਭੀਰ ਦਿਮਾਗੀ ਬਿਮਾਰੀਆਂ (ਮਲਟੀਪਲ ਸਕਿਲਰੋਸਿਸ ਆਦਿ) ਵਾਲੇ ਅਪੰਗ ਵਿਅਕਤੀਆਂ, ਖੂਨ ਵਿੱਚ ਖਰਾਬੀ ਜਾਂ ਬਹਤੀਆਂ ਅਪੰਗਤਾਵਾਂ ਵਾਲੇ ਵਿਅਕਤੀ ਜ਼ਿਲਾ ਹਸਪਤਾਲਾਂ ਦੇ ਸਬੰਧਤ ਮਾਹਰਾਂ ਪਾਸੋਂ ਸਰਟੀਫੀਕੇਟ ਹਾਸਲ ਕਰ ਸਕਣਗੇ।