ਸ੍ਰੋਮਣੀ ਅਕਾਲੀ ਦਲ ਵਲੋਂ ਹਲਕਾ ਦਖਣੀ ਦੇ ਇੰਚਾਰਜ ਤਲਬੀਰ ਸਿੰਘ ਗਿੱਲ ਨੇ ਸਥਾਨਕ ਸਰਕਾਰਾਂ ਅਤੇ ਸੈਰ ਸਪਾਟਾ ਵਿਭਾਗ ਦੇ ਮੰਤਰੀ ਨਵਜੋਤ ਸਿੰਘ ਸਿੱਧੂ ਅਤੇ ਕਾਂਗਰਸੀ ਵਿਧਾਇਕ ਇੰਦਰਬੀਰ ਸਿੰਘ ਬੁਲਾਰੀਆ ਉਤੇ ਸ਼ਹਿਰ ਦੇ ਦੱਖਣੀ ਹਿੱਸੇ ਲਈ ਵੱਡੀ ਪਰੇਸ਼ਾਨੀ ਦਾ ਕਾਰਨ ਬਣੇ ਭਗਤਾਂਵਾਲਾ ਕੂੜਾ ਡੰਪ ਦੇ ਮਾਮਲੇ ਨੂੰ ਲੈ ਕੇ ਚੋਣਾਂ ਮੌਕੇ ਵੋਟ ਰਾਜਨੀਤੀ ਕਰਨ ਅਤੇ ਸਥਾਨਕ ਲੋਕਾਂ ਦੇ ਅਖੀਂ ਘਟਾ ਪਾਉਦਿਆਂ ਧੋਖਾ ਕਰਨ ਦੇ ਦੋਸ਼ ਲਾਏ ਹਨ। ਉਹਨਾਂ ਸਵਾਲ ਕੀਤਾ ਕਿ ਜੇ ਚੋਣਾਂ ਸਮੇਂ ਕਾਂਗਰਸ ਆਗੂਆਂ ਵਲੋਂ ਕੀਤੇ ਗਏ ਵਾਅਦੇ ਅਨੁਸਾਰ ਡੰਪ ਚੁਕਿਆ ਜਾ ਰਿਹਾ ਹੈ ਤਾਂ ਦਸਿਆ ਜਾਵੇ ਕਿ ਕੂੜੇ ਲਈ ਨਵੇ ਡੰਪ ਦੀ ਵਿਵਸਥਾ ਕਿਥੇ ਕੀਤੀ ਗਈ?ਸ: ਗਿਲ ਨੇ ਕਿਹਾ ਕਿ ਸਿੱਧੂ ਅਤੇ ਬੁਲਾਰੀਆ ਵਲੋਂ ਕੂੜਾ ਡੰਪ ਹਟਾਉਣ ਅਤੇ ਉਥੇ ਸ਼ਾਨਦਾਰ ਪਾਰਕ ਬਣਾਉਣ ਦੇ ਨਾਮ 'ਤੇ ਨਵੀਂ ਮਸ਼ੀਨਰੀ ਦਾ ਉਦਘਾਟਨ ਕਰਨਾ ਲੋਕਾਂ ਨਾਲ ਮਹਿਜ ਧੋਖਾ ਹੈ ਅਤੇ ਲੋਕ ਸਭਾ ਚੋਣਾਂ 'ਚ ਵੋਟਾਂ ਬਟੋਰਨ ਦਾ ਢਕਵਾਂਝ ਹੈ। ਉਹਨਾਂ ਕਿਹਾ ਕਿ ਸਿਧੂ ਅਤੇ ਬੁਲਾਰੀਆ ਨੇ ਵਿਧਾਨ ਸਭਾ ਚੋਣ ਸਮੇ ਵਾਅਦਾ ਕੀਤਾ ਸੀ ਕਿ ਕਾਂਗਰਸ ਦੀ ਸਰਕਾਰ ਬਣਨ 'ਤੇ ਭਗਤਾਂਵਾਲਾ ਡੰਪ ਨੂੰ ਸ਼ਹਿਰ ਵਿੱਚੋਂ ਹਟਾ ਦਿੱਤਾ ਜਾਵੇਗਾ, ਪਰ ਪਿਛਲੇ ਦੋ ਸਾਲਾਂ ਵਿੱਚ ਕਾਂਗਰਸ ਸਰਕਾਰ ਵੱਲੋਂ ਭਗਤਾਂਵਾਲਾ ਡੰਪ ਦੇ ਮੁੱਦੇ ਵੱਲ ਕੋਈ ਧਿਆਨ ਨਹੀਂ ਦਿੱਤਾ ਗਿਆ। ਜਿਸ ਕਾਰਨ ਬੁਲਾਰੀਆ ਅਤੇ ਸਿੱਧੂ ਨੂੰ ਲੋਕਾਂ ਨੂੰ ਜਵਾਬ ਦੇਹ ਹੋਣਾ ਪੈ ਰਿਹਾ ਹੈ। ਕੀ ਬੁਲਾਰੀਆ ਨੂੰ ਯਾਦ ਕਰਾਉਣਾ ਪਵੇਗਾ ਕਿ ਉਹ ਕਿਹਾ ਕਰਦਾ ਸੀ ਕਿ ਕੂੜਾ ਡੰਪ ਸ੍ਰੀ ਹਰਿਮੰਦਰ ਸਾਹਿਬ ਅਤੇ ਗੁਰਦੁਆਰਾ ਸ਼ਹੀਦਾਂ ਸਾਹਿਬ ਦੇ ਨੇੜੇ ਹੋਣ ਕਰਕੇ ਇਸ ਦੀ ਸੜਾਂਦ ਅਤੇ ਬਦਬੂ ਉਕਤ ਪਵਿਤਰ ਅਸਥਾਨਾਂ ਤਕ ਜਾਂਦੀ ਹੈ, ਜਿਸ ਕਾਰਨ ਡੰਪ ਨੂੰ ਹਟਾਇਆ ਜਾਣਾ ਜਰੂਰੀ ਹੈ। ਕੀ ਹੁਣ ਕਾਂਗਰਸ ਦੀ ਸਰਕਾਰ ਆਉਣ ਨਾਲ ਡੰਪ ਦੀ ਬਦਬੂ ਖਤਮ ਹੋ ਗਈ ਹੈ? ਜਾਂ ਫਿਰ ਇਸ ਦੀ ਸੜਾਂਦ ਪਵਿਤਰ ਅਸਥਾਨਾਂ ਤਕ ਨਹੀਂ ਜਾਂਦੀ।
ਬੁਲਾਰੀਆ ਜੋ ਇਸ ਡੰਪ ਨੂੰ ਹਟਾਉਣ ਲਈ ਵੱਡੇ-ਵੱਡੇ ਦਆਵੇ ਕਰਦਾ ਰਿਹਾ ਅਤੇ ਆਪਣੀ ਹੀ ਸਰਕਾਰ ਦੇ ਖਿਲਾਫ਼ ਧਰਨੇ 'ਤੇ ਬੈਠੇ ਸੀ, ਪਰ ਅੱਜ ਕਾਂਗਰਸ ਦੀ ਝੋਲੀ 'ਚ ਪੈ ਕੇ ਗੁਰੂ ਘਰ ਦੇ ਮਾਣ ਸਨਮਾਨ ਤੋਂ ਲਾਂਭੇ ਹੋ ਕੇ ਡੰਪ ਵਾਲੇ ਸਥਾਨ 'ਤੇ ਸਾਲਿਡ ਵੇਸਟ ਮੈਨੇਜਮੈਂਟ ਪਲਾਂਟ ਲਗਵਾਉਣ ਲਈ ਹੁਣ ਪੱਭਾ ਭਾਰ ਕਿਉ ਹੋ ਰਿਹਾ ਹੈ?। ਉਹਨਾਂ ਬੁਲਾਰੀਆ ਨੂੰ ਇਹ ਵੀ ਯਾਦ ਕਰਾਇਆ ਕਿ ਉਸ ਵਲੋਂ ਕਾਂਗਰਸ ਦਾ ਪੱਲਾ ਫੜਣ ਪਿਛੇ ਡੰਪ ਨੂੰ ਵੀ ਮੁਦਾ ਬਣਾਇਆ ਗਿਆ ਸੀ। ਕੀ ਬੁਲਾਰੀਆ ਨੂੰ ਆਪਣਾ ਵਾਅਦਾ ਭੁਲ ਗਿਆ ਹੈ ਕਿ ਉਸ ਨੇ ਐਲਾਨ ਕੀਤਾ ਸੀ ਕਿ ਜੇ ਉਹ ਕਾਂਗਰਸ ਸਰਕਾਰ 'ਚ ਡੰਪ ਨਾ ਚੁਕਾ ਪਾਇਆ ਤਾਂ ਨਾ ਵੋਟ ਮੰਗਾਂਗਾ ਨਾ ਹੀ ਲੋਕਾਂ ਨੂੰ ਆਪਣੀ ਸ਼ਕਲ ਦਿਖਾਵੇਗਾ। ਸੋ ਬੁਲਾਰੀਆ ਹੁਣ ਦਸੇ ਕਿ ਉਹ ਕਿਸ ਮੂੰਹ ਨਾਲ ਡੰਪ ਦੀ ਮਸ਼ੀਨਰੀ ਦਾ ਉਦਘਾਟਨ ਕਰਾ ਰਹੇ ਹਨ? ਉਹਨਾਂ ਕਿਹਾ ਕਿ ਅਸਲ 'ਚ ਸਿੱਧੂ ਅਤੇ ਬੁਲਾਰੀਆ ਚੋਣਾਂ ਨਜਦੀਕ ਆਉਣ 'ਤੇ ਅਜਿਹੀ ਡਰਾਮੇਬਾਜ਼ੀ ਅਕਸਰ ਕਰਦੇ ਰਹਿੰਦੇ ਹਨ। ਸ: ਗਿੱਲ ਨੇ ਕਿਹਾ ਕਿ ਬੁਲਾਰੀਆ ਤੇ ਸਿਧੂ ਲੋਕਾਂ ਨੂੰ ਮੂਰਖ ਸਮਝਣਾ ਛੱਡ ਦੇਵੇ ਲੋਕ ਇਹਨਾਂ ਵਾਅਦਾਖਿਲਾਫੀਆਂ ਨੂੰ ਹੁਣ ਮੂਹ ਨਹੀਂ ਲਗਾਉਣਗੇ। ਸ: ਗਿੱਲ ਨੇ ਇਸ ਮੌਕੇ ਪਵਿੱਤਰ ਸਹਿਰ ਅਮ੍ਰਿਤਸਰ ਦੀ ਮਾੜੀ ਸਫ਼ਾਈ ਵਿਵਸਥਾ 'ਤੇ ਵੀ ਕਈ ਸਵਾਲ ਚੁਕੇ ਹਨ। ਉਹਨਾਂ ਕਿਹਾ ਕਿ ਸਥਾਨਕ ਸਰਕਾਰਾਂ ਅਤੇ ਸੈਰ ਸਪਟਾ ਮੰਤਰੀ ਦਾ ਜਦੀ ਸ਼ਹਿਰ 'ਚ ਕਚਰੇ ਦੇ ਢੇਰ ਆਮ ਦੇਖੇ ਜਾ ਸਕਦੇ ਹਨ। ਸ: ਗਿੱਲ ਨੇ ਕਿਹਾ ਕਿ ਡੰਪ ਨੇੜੇ ਵੱਸੀਆਂ ਕਾਲੋਨੀਆਂ ਦੇ ਵਸਨੀਕਾਂ ਦਾ ਜਿਉਣਾ ਬਹੁਤ ਦੁਸ਼ਵਾਰ ਹੋਇਆ ਹੈ ਅਤੇ ਸਾਲਿਡ ਵੇਸਟ ਮੈਨੇਜਮੈਂਟ ਪਲਾਂਟ ਦੀਆਂ ਤਿਆਰੀਆਂ ਪ੍ਰਤੀ ਸਥਾਨਕ ਲੋਕਾਂ ਵਲੋਂ ਸਖਤ ਵਿਰੋਧ ਜਤਾ ਚੁਕੇ ਹਨ। ਉਹਨਾਂ ਕੂੜਾ ਡੰਪ ਹਟਾਉਣ ਦੀ ਮੰਗ ਕਰਦਿਆਂ ਕਿਹਾ ਕਿ ਸਰਕਾਰ ਨੇ ਡੰਪ ਵਲ ਧਿਆਨ ਨਾ ਦਿਤਾ ਤਾਂ ਅਕਾਲੀ ਦਲ ਸਥਾਨਕ ਲੋਕਾਂ ਨੂੰ ਨਾਲ ਲੈ ਕੇ ਸੰਘਰਸ਼ ਵਿੱਢਣ ਲਈ ਮਜਬੂਰ ਹੋਵੇਗਾ। ਇਸ ਦੌਰਾਨ ਸ: ਗਿੱਲ ਨੇ ਡੰਪ ਦੀ ਮਸ਼ੀਨਰੀ ਉਦਘਾਟਨ ਮੌਕੇ ਸਿੱਧੂ ਅਤੇ ਬੁਲਾਰੀਆ ਦੇ ਸਮਰਥਕਾਂ ਵਲੋਂ ਪਤਰਕਾਰ ਭਾਈਚਾਰੇ ਨਾਲ ਕੀਤੀ ਗਈ ਬਦਸਲੂਕੀ ਅਤੇ ਗਾਲੀ ਗਲੋਚ ਦੀ ਵੀ ਸਖਤ ਸ਼ਬਦਾਂ ਵਿਚ ਨਿਖੇਧੀ ਕੀਤੀ ਹੈ। ਉਹਨਾਂ ਸਿਧੂ ਤੇ ਬੁਲਾਰੀਆ ਨੂੰ ਪਤਰਕਾਰਾਂ ਤੋਂ ਜਨਤਕ ਮੁਆਫੀ ਮੰਗਣ ਲਈ ਕਿਹਾ ਹੈ।