ਰਾਸ਼ਟਰੀ ਖੇਤੀਬਾੜੀ ਅਤੇ ਪੇਂਡੂ ਵਿਕਾਸ ਬੈਂਕ (ਨਾਬਾਰਡ) ਵਲੋਂ ਹੁਸ਼ਿਆਰਪੁਰ ਜ਼ਿਲ੍ਹੇ ਦੇ ਵਿਤੀ ਸਾਲ 2019-20 ਲਈ ਤਿਆਰ ਕੀਤੀ ਗਈ ਸੰਭਾਵੀ ਕਰਜ਼ਾ ਯੋਜਨਾ (ਪੋਟੈਂਸ਼ੀਅਲ ਲਿੰਕਡ ਕਰੈਡਿਟ ਪਲਾਨ) ਅੱਜ ਵਧੀਕ ਡਿਪਟੀ ਕਮਿਸ਼ਨਰ (ਜ) ਅਨੁਪਮ ਕਲੇਰ ਵਲੋਂ ਜ਼ਿਲ੍ਹਾ ਸਲਾਹਕਾਰ ਕਮੇਟੀ ਦੀ ਮੀਟਿੰਗ ਦੌਰਾਨ ਜਾਰੀ ਕੀਤੀ ਗਈ। ਉਨ੍ਹਾਂ ਦੱਸਿਆ ਕਿ 12912.34 ਕਰੋੜ ਰੁਪਏ ਦੀ ਇਹ ਨਾਬਾਰਡ ਦੁਆਰਾ ਤਿਆਰ ਕਰਜ਼ਾ ਯੋਜਨਾ ਜ਼ਿਲ੍ਹੇ ਦੀ ਪ੍ਰਾਥਮਿਕ ਖੇਤਰ ਲਈ ਜ਼ਰੂਰੀ ਕਰਜ਼ੇ ਦੀ ਪੂਰਤੀ ਕਰੇਗਾ। ਬੈਂਕਾਂ ਦੁਆਰਾ ਇਹ ਰਾਸ਼ੀ ਜ਼ਰੂਰਤਮੰਦ ਕਿਸਾਨਾਂ, ਛੋਟੇ ਉਦਮੀਆਂ ਅਤੇ ਹੋਰ ਪ੍ਰਾਥਮਿਕ ਖੇਤਰ ਵਿੱਚ ਕਰਜ਼ੇ ਦੇ ਲਾਭਪਾਤਰੀਆਂ ਨੂੰ ਉਪਲਭੱਧ ਹੋਵੇਗੀ। ਨਾਬਾਰਡ ਦੇ ਜ਼ਿਲ੍ਹਾ ਵਿਕਾਸ ਪ੍ਰਬੰਧਕ ਸ਼੍ਰੀਮਤੀ ਇੰਦਰਜੀਤ ਕੌਰ ਨੇ ਇਸ ਸੰਭਾਵਿਤ ਯੋਜਨਾ ਦਾ ਵੇਰਵਾ ਦਿੰਦਿਆਂ ਦੱਸਿਆ ਕਿ ਇਸ ਕਰਜ਼ਾ ਯੋਜਨਾ ਤਹਿਤ 7264.05 ਕਰੋੜ ਫ਼ਸਲੀ ਕਰਜ਼ੇ ਲਈ ਰਾਂਖਵੇਂ ਹੋਣਗੇ, 8.75 ਕਰੋੜ ਰੁਪਏ ਖੇਤੀਬਾੜੀ ਖੇਤਰ ਵਿੱਚ ਲੰਬੇ ਸਮੇਂ ਲਈ, 552.32 ਕਰੋੜ ਰੁਪਏ ਖੇਤੀ ਦੇ ਬੁਨਿਆਦੀ ਢਾਂਚੇ ਲਈ ਅਤੇ 1549.90 ਕਰੋੜ ਰੁਪਏ ਸਹਾਇਕ ਉਦਯੋਗਾਂ ਲਈ ਰੱਖੇ ਗਏ ਹਨ। ਇਸ ਤੋਂ ਇਲਾਵਾ ਛੋਟੇ ਉਦਯੋਗਾਂ ਨੂੰ 1452.00 ਕਰੋੜ ਰੁਪਏ, ਨਿਰਯਾਤ ਕਰਜ਼ਾ ਲਈ 48.79 ਕਰੋੜ ਰੁਪਏ, ਵਿਦਿਅਕ ਖੇਤਰ ਲਈ 322.15 ਕਰੋੜ ਰੁਪਏ, ਘਰ ਬਣਾਉਣ ਲਈ 731.00 ਕਰੋੜ ਰੁਪਏ, ਨਵੀਨੀਕਰਨ ਊਰਜਾ ਲਈ 6.56 ਕਰੋੜ ਰੁਪਏ ਅਤੇ ਹੋਰ ਸਵੈ ਸੇਵੀ ਸੰਸਥਾਵਾਂ, ਪ੍ਰਧਾਨ ਮੰਤਰੀ ਜਨ ਧੰਨ ਯੋਜਨਾ, ਸਾਂਝੇ ਜ਼ਿੰਮੇਵਾਰ ਗਰੁੱਪ ਲਈ 114.42 ਕਰੋੜ ਰੁਪਏ ਅਤੇ ਸਮਾਜਿਕ ਬੁਨਿਆਦੀ ਢਾਂਚੇ ਲਈ 70.40 ਕਰੋੜ ਰੁਪਏ ਰੱਖੇ ਗਏ ਹਨ। ਇਸ ਮੌਕੇ 'ਤੇ ਡਿਪਟੀ ਜਨਰਲ ਮੈਨੇਜਰ ਪੰਜਾਬ ਨੈਸ਼ਨਲ ਬੈਂਕ ਦੇ ਸ਼੍ਰੀ ਸੰਜੀਵ ਸੇਠ, ਜ਼ਿਲ੍ਹਾ ਲੀਡ ਬੈਂਕ ਮੈਨੇਜਰ ਸ਼੍ਰੀ ਰਾਮ ਕ੍ਰਿਸ਼ਨ ਚੋਪੜਾ, ਰਿਜ਼ਰਵ ਬੈਂਕ ਆਫ਼ ਇੰਡੀਆਂ ਦੇ ਐਲ.ਡੀ.ਓ. ਸ਼੍ਰੀ ਸੰਜੀਵ ਕੈਨ ਅਤੇ ਜ਼ਿਲ੍ਹਾ ਸਲਾਹਕਾਰ ਕਮੇਟੀ ਦੇ ਮੈਂਬਰ ਮੌਜੂਦ ਸਨ।