ਬਹੁਕਰੋੜੀ ਰੇਤ ਖੱਡਾਂ ਦੀ ਨੀਲਾਮੀ ਵਿਚ ਭ੍ਰਿਸ਼ਟਾਚਾਰ ਦੇ ਲਗਾਤਾਰ ਲੱਗਦੇ ਦੋਸ਼ਾਂ ਅਤੇ ਨਵੇਂ-ਨਵੇਂ ਖੁਲਾਸਿਆਂ ਦੇ ਵਿਚ ਕਾਂਗਰਸ ਹਾਈਕਮਾਨ ਦੇ ਦਬਾਅ ਹੇਠ ਮੁੱਖ ਮੰਤਰੀ ਪੰਜਾਬ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਬਹੁਕਰੋੜੀ ਰੇਤ ਖੱਡ ਨੀਲਾਮੀ ਮਾਮਲੇ ਵਿਚ ਕੈਬਿਨੇਟ ਮੰਤਰੀ ਰਾਣਾ ਗੁਰਜੀਤ ਦਾ ਅਸਤੀਫ਼ਾ ਸਵੀਕਾਰ ਕਰਨਾ ਵਿਰੋਧੀ ਪਾਰਟੀਆਂ ਵੱਲੋਂ ਲਗਾਏ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਦੀ ਪੁਸ਼ਟੀ ਕਰਦਾ ਹੈ। ਇਹ ਕਹਿਣਾ ਹੈ ਭਾਰਤੀ ਜਨਤਾ ਪਾਰਟੀ ਪੰਜਾਬ ਦੇ ਪ੍ਰਧਾਨ ਵਿਜੈ ਸਾਂਪਲਾ ਦਾ, ਜੋ ਰਾਣਾ ਗੁਰਜੀਤ ਦੇ ਅਸਤੀਫ਼ੇ 'ਤੇ ਟਿੱਪਣੀ ਕਰ ਰਹੇ ਸਨ।ਸਾਂਪਲਾ ਨੇ ਕਿਹਾ ਕਿ ਕੈਪਟਨ ਅਮਰਿੰਦਰ ਸਿੰਘ ਅਪਣੇ ਚੋਣ ਵਾਅਦੇ ਮੁਤਾਬਿਕ ਕਿਸਾਨਾਂ ਦਾ ਪੂਰਾ ਕਰਜ਼ਾ ਮੁਆਫ ਕਰਨ ਅਤੇ ਪੰਜਾਬ ਤੋਂ ਇਕ ਮਹੀਨੇ ਵਿਚ ਨਸ਼ਾ ਖਤਮ ਕਰਨ ਵਿਚ ਫੇਲ ਸਾਬਿਤ ਰਹੇ, ਪਰ ਘੱਟ ਤੋਂ ਘੱਟ ਹੁਣ ਭ੍ਰਿਸ਼ਟਾਚਾਰ ਖਤਮ ਕਰਨ ਦੇ ਅਪਣੇ ਚੋਣ ਵਾਅਦੇ ਨੂੰ ਪੂਰਾ ਕਰਦੇ ਹੋਏ ਬਹੁਕਰੋੜੀ ਰੇਤ ਬੋਲੀ ਵਿਚ ਰਾਣਾ ਗੁਰਜੀਤ ਅਤੇ ਉਨ੍ਹਾਂ ਦੀ ਕੰਪਨੀ ਦੇ ਕਰਮਚਾਰੀਆਂ ਵੱਲੋਂ ਲਗਾਈ ਗਈ ਕਰੋੜਾਂ ਦੀ ਬੋਲੀ ਵਿਚ ਪੈਸੇ ਕਿੱਥੋਂ ਆਏ, ਇਸਦੀ ਜਾਂਚ ਈਡੀ ਨੂੰ ਸੌਂਪਣ। ਰਾਣਾ ਗੁਰਜੀਤ ਦੇ ਕਰਮਚਾਰੀ/ਸਾਬਕਾ ਕਰਮਚਾਰੀ ਜਿਨ੍ਹਾਂ ਦੀ ਇਕ ਸਾਲ ਦੀ ਇਨਕਮ ਟੈਕਸ ਰਿਟਰਨ ਇਕ ਲੱਖ ਰੁੱਪਏ ਜਾਂ 30 ਹਜ਼ਾਰ ਰੁੱਪਏ ਮਹੀਨਾ ਤਨਖਾਹ ਹੈ, ਉਨ੍ਹਾਂ ਕਿਸ ਤਰ੍ਹਾਂ ਕਰੋੜਾਂ ਰੁੱਪਏ ਦੀ ਬੋਲੀ ਲਗਾਈ, ਇਹ ਇਕ ਵਿਸ਼ੇ ਜਿਸਦੀ ਜਾਂਚ ਪੰਜਾਬ ਸਰਕਾਰ ਵੱਲੋਂ ਹਾਲੇ ਤੱਕ ਨਹੀਂ ਕਰਵਾਈ ਗਈ ਅਤੇ ਇਹ ਉਹ ਤੱਥ ਹਨ ਜੋ ਰਾਣਾ ਗੁਰਜੀਤ ਨੂੰ ਬਹੁਕਰੋੜੀ ਰੇਤ ਬੋਲੀ ਮਾਮਲੇ ਨਾਲ ਜੋੜਦੇ ਹਨ। ਕੈਪਟਨ ਸਰਕਾਰ ਜੇਕਰ ਈਮਾਨਦਾਰ ਹੈ ਤਾਂ ਇਨ੍ਹਾਂ ਤੱਥਾਂ ਦੀ ਈਡੀ ਤੋਂ ਜਾਂਚ ਕਰਵਾਏ।