ਆਮ ਆਦਮੀ ਪਾਰਟੀ (ਆਪ) ਨੇ ਬੀਜੇਪੀ ਛੱਡ ਕੇ ਕਾਂਗਰਸ ਵਿੱਚ ਸ਼ਾਮਿਲ ਹੋਏ ਨਵਜੋਤ ਸਿੱਧੂ ਨੂੰ ਕਰੜੇ ਹੱਥੀਂ ਲੈਦਿਆਂ ਕਿਹਾ ਕਿ ਨਵਜੋਤ ਸਿੰਘ ਸਿੱਧੂ ਨੇ ਪੰਜਾਬ ਵਿਰੋਧੀ ਤਾਕਤਾਂ ਨਾਲ ਹੱਥ ਮਿਲਾ ਲਿਆ ਹੈ ਅਤੇ ਉਹ ਭ੍ਰਿਸ਼ਟਾਚਾਰ ਦੇ ਖਿਲਾਫ ਆਮ ਲੋਕਾਂ ਦੀ ਲੜਾਈ ਨੂੰ ਕਮਜੋਰ ਕਰਨਾ ਚਾਹੁੰਦੇ ਹਨ, ਤਾਂ ਜੋ ਉਹ ਕੈਪਟਨ ਅਮਰਿੰਦਰ ਅਤੇ ਬਾਦਲ ਪਰਿਵਾਰ ਦੇ ਨਜਾਇਜ ਸਿਆਸੀ ਗਠਜੋੜ ਨੂੰ ਉਹ ਵਾਪਿਸ ਲਿਆ ਸਕਣ। ਇੱਥੋਂ ਜਾਰੀ ਇੱਕ ਪ੍ਰੈਸ ਬਿਆਨ ਵਿੱਚ ਆਮ ਆਦਮੀ ਪਾਰਟੀ ਦੇ ਸੂਬਾ ਕਨਵੀਨਰ ਗੁਰਪ੍ਰੀਤ ਸਿੰਘ ਵੜੈਚ ਨੇ ਕਿਹਾ ਕਿ ਜੇਕਰ ਸਿੱਧੂ ਦਾ ਨਿਸ਼ਾਨਾ ਬਾਦਲਾਂ ਦਾ ਭ੍ਰਿਸ਼ਟਾਚਾਰ ਸੀ, ਤਾਂ ਉਹ ਅਕਾਲੀ-ਭਾਜਪਾ ਗਠਜੋੜ ਵਿੱਚ 10 ਸਾਲ ਕਿਓਂ ਰਹੇ। ਉਨਾਂ ਦੀ ਘਰਵਾਲੀ ਮੁੱਖ ਪਾਰਲੀਮਾਨੀ ਸਕੱਤਰ ਸੀ ਅਤੇ ਸਰਕਾਰ ਤੋਂ ਬਾਹਰ ਨਹੀਂ ਆਈ। ਨਾਲ ਹੀ ਉਨਾਂ ਕਿਹਾ ਕਿ ਨਵਜੋਤ ਸਿੰਘ ਸਿੱਧੂ ਵੀ ਲਗਭਗ ਦਸ ਸਾਲ ਪੰਜਾਬ ਤੋਂ ਦੂਰ ਅੱਖਾਂ ਬੰਦ ਕਰੀ ਬੈਠੇ ਰਹੇ। ਵੜੈਚ ਨੇ ਕਿਹਾ ਕਿ ਬਾਦਲਾਂ ਦੇ ਭ੍ਰਿਸ਼ਟਾਚਾਰ ਅਤੇ ਉਨਾਂ ਦੇ ਅਪਰਾਧਾਂ ਵਿੱਚ ਸਿੱਧੂ ਵੀ ਹਿੱਸੇਦਾਰ ਸੀ। ਵੜੈਚ ਨੇ ਕਿਹਾ ਕਿ ਸਿੱਧੂ ਨੇ ਨਾ ਸਿਰਫ ਇੱਕ ਭ੍ਰਿਸ਼ਟਾਚਾਰੀ ਪਾਰਟੀ ਨੂੰ ਛੱਡ ਕੇ ਦੂਸਰੀ ਭ੍ਰਿਸ਼ਟਾਚਾਰੀ ਪਾਰਟੀ ਦਾ ਪੱਲਾ ਫੜਿਆ ਹੈ, ਬਲਕਿ ਆਪਣਾ ਸਿਆਸੀ ਪਿਤਾ ਵੀ ਬਦਲ ਲਿਆ ਹੈ। ਉਹ ਕੱਲ ਤੱਕ ਬਾਦਲ ਨੂੰ ਆਪਣਾ ਪਿਤਾ ਦਸਦੇ ਸਨ ਅਤੇ ਬਾਦਲ ਸਾਹਿਬ ਕਹਿੰਦੇ ਸਨ ਕਿ ਸਿੱਧੂ ਉਨਾਂ ਨੂੰ ਡੈਡ ਕਹਿੰਦੇ ਹਨ। ਸਿੱਧੂ ਦਾ ਨਵਾਂ ਪਿਤਾ ਵੀ ਪਹਿਲਾਂ ਵਾਲੇ ਪਿਤਾ ਵਾਂਗ ਭ੍ਰਿਸ਼ਟਾਚਾਰੀ ਹੈ।
ਵੜੈਚ ਨੇ ਸਿੱਧੂ ਨੂੰ ਇੱਕ ਮੌਕਾਪ੍ਰਸਤ, ਸਵੈਕੇਂਦ੍ਰਿਤ ਅਤੇ ਦਿਸ਼ਾਹੀਣ ਵਿਅਕਤੀ ਦੱਸਿਆ, ਜੋ ਕਿ ਇੱਕ ਬਿਨ ਪੈਂਦੇ ਦੇ ਲੋਟੇ ਤੋਂ ਵੱਧ ਕੁੱਝ ਵੀ ਨਹੀਂ ਹੈ. ਉਨਾਂ ਕਿਹਾ ਕਿ ਸਿੱਧੂ ਨੇ ਕਾਂਗਰਸ ਦਾ ਇਸ ਉਮੀਦ ਨਾਲ ਪੱਲਾ ਫੜਿਆ ਹੈ ਕਿ ਉਨਾਂ ਨੂੰ ਪੰਜਾਬ ਦੇ ਮੁੱਖ ਮੰਤਰੀ ਦਾ ਅਹੁਦਾ ਦਿੱਤਾ ਜਾਵੇਗਾ। ਉਨਾਂ ਕਿਹਾ ਕਿ ਸਿੱਧੂ ਨੇ ਪਹਿਲਾਂ ਕਾਂਗਰਸ ਨੂੰ ਭ੍ਰਿਸ਼ਟਾਚਾਰ ਦੀ ਮਾਂ ਐਲਾਨਿਆ ਸੀ ਅਤੇ 1984 ਦੇ ਸਿੱਖ ਕਤਲੇਆਮ ਲਈ ਕਾਂਗਰਸ ਨੂੰ ਜਿੰਮੇਵਾਰ ਠਹਿਰਾਇਆ ਸੀ। ਵੜੈਚ ਨੇ ਕਿਹਾ ਕਿ ਸਿੱਧੂ ਨੇ ਬਾਦਲ ਪਰਿਵਾਰ ਉਤੇ ਦਸ ਸਾਲ ਭ੍ਰਿਸ਼ਟਾਚਾਰ ਕਰਨ ਅਤੇ ਬੇਹਿਸਾਬੀ ਦੌਲਤ ਇੱਕੱਠੀ ਕਰਨ ਦਾ ਦੋਸ਼ ਮੜਿਆ ਹੈ, ਪ੍ਰੰਤੂ ਉਹ ਕੈਪਟਨ ਅਮਰਿੰਦਰ ਸਿੰਘ ਦੇ ਬਹੁ-ਕਰੋੜੀ ਘੋਟਾਲਿਆਂ ਬਾਰੇ ਕਿਓਂ ਚੁੱਪ ਹਨ। ਕਾਂਗਰਸ ਦੀ ਅਗਵਾਈ ਵਾਲੀ ਯੂਪੀਏ ਸਰਕਾਰ ਨੱਕੋ-ਨੱਕ ਭ੍ਰਿਸ਼ਟਾਚਾਰ ਵਿੱਚ ਡੁੱਬੀ ਰਹੀ, ਜਿਨਾਂ ਵਿੱਚ 2ਜੀ ਸਪੈਕਟ੍ਰਮ, ਕੋਲ ਘੋਟਾਲਾ ਅਤੇ ਕੌਮਨਵੈਲਥ ਗੇਮਸ ਘੋਟਾਲਾ ਸ਼ਾਮਿਲ ਸੀ। ਬੀਜੇਪੀ ਸਾਂਸਦ ਹੁੰਦਿਆਂ ਸਿੱਧੂ ਲੋਕ ਸਭਾ ਵਿੱਚ ਕਾਂਗਰਸ ਵੱਲੋਂ ਪੰਜਾਬ ਅਤੇ ਕੇਂਦਰ ਵਿੱਚ ਕੀਤੇ ਭ੍ਰਿਸ਼ਟਾਚਾਰ ਨੂੰ ਨਿਸ਼ਾਨਾ ਬਣਾਉਂਦੇ ਰਹੇ। ਉਨਾਂ ਸਵਾਲ ਕੀਤਾ ਕਿ ਕੀ ਕਾਂਗਰਸ ਹੁਣ ਦੁੱਧ-ਧੋਤੀ ਹੋ ਗਈ ਅਤੇ ਕੇਵਲ ਉਹੀ ਪੰਜਾਬ ਨੂੰ ਬਚਾ ਸਕਦੀ ਹੈ। ਇਸ ਦੌਰਾਨ ਆਪ ਕਨਵੀਨਰ ਨੇ ਕੈਪਟਨ ਅਮਰਿੰਦਰ ਸਿੰਘ ਉਤੇ ਸਿੱਧੂ ਬਾਰੇ ਪੈਂਤਰਾ ਬਦਲਣ ਦੇ ਦੋਸ਼ ਲਗਾਏ। ਉਨਾਂ ਕਿਹਾ ਕਿ ਕੈਪਟਨ ਅਮਰਿੰਦਰ ਸਿੰਘ ਹੁਣ ਸਿੱਧੂ ਨੂੰ ਆਪਣੀ ਟੀਮ ਦਾ ਅਨਮੋਲ ਮੈਂਬਰ ਦੱਸ ਰਹੇ ਹਨ।
ਵੜੈਚ ਨੇ ਕਿਹਾ ਕਿ ਉਸ ਸਮੇਂ ਨੂੰ ਗੁਜਰਿਆਂ ਬਹੁਤਾ ਸਮਾਂ ਨਹੀਂ ਹੋਇਆ, ਜਦੋਂ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਸਿੱਧੂ ਨੂੰ ਇੱਕ ਬੁਰਾ ਵਿਅਕਤੀ ਦੱਸਿਆ ਜਾਂਦਾ ਸੀ। ਇਸ ਤੋਂ ਇਲਾਵਾ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਸਿੱਧੂ ਜੋੜੇ ਨੂੰ ਬੇਕਾਰ ਅਤੇ ਅਨੁਸ਼ਾਸਿਤਹੀਣ ਦੱਸਿਆ ਜਾਂਦਾ ਸੀ ਅਤੇ ਕੈਪਟਨ ਕਹਿੰਦੇ ਸਨ ਕਿ ਸਿੱਧੂ ਕਮੇਡੀ ਕਰਨ ਲਈ ਹੀ ਸਹੀ ਹੈ। ਵੜੈਚ ਨੇ ਕਿਹਾ ਕਿ ਕੈਪਟਨ ਅਮਰਿੰਦਰ ਸਿੰਘ ਅਤੇ ਸਿੱਧੂ ਕੋਲ ਪੰਜਾਬ ਲਈ ਕੋਈ ਰੋਡਮੈਪ ਨਹੀਂ ਹੈ ਅਤੇ ਦੋਵੇਂ ਪੰਜਾਬ ਦਾ ਮੁੱਖ ਮੰਤਰੀ ਬਣਨਾ ਚਾਹੁੰਦੇ ਹਨ ਅਤੇ ਉਨਾਂ ਦਾ ਇਹ ਸੁਪਨਾ ਕਦੇ ਪੂਰਾ ਨਹੀਂ ਹੋਵੇਗਾ।
ਵੜੈਚ ਨੇ ਕਿਹਾ ਕਿ ਜਿਸ ਵੇਲੇ ਸਿੱਧੂ ਆਪਣੇ ਕਮੇਡੀ ਸ਼ੋਆਂ ਵਿੱਚ ਵਿਅਸਤ ਸਨ, ਉਸ ਵੇਲੇ ਪੰਜਾਬ ਵਿੱਚ ਕਿਸਾਨ ਖੁਦਕੁਸ਼ੀਆਂ ਕਰ ਰਹੇ ਸਨ, ਬੇਰੋਜਗਾਰਾਂ ਵੱਲੋਂ ਸੜਕਾਂ ਉਤੇ ਪ੍ਰਦਰਸ਼ਨ ਕੀਤਾ ਜਾ ਰਿਹਾ ਸੀ ਅਤੇ ਪ੍ਰਦਰਸ਼ਨ ਕਰ ਰਹੇ ਕਰਮਚਾਰੀਆਂ ਉਤੇ ਪੁਲਿਸ ਵੱਲੋਂ ਲਾਠੀਚਾਰਜ ਕੀਤਾ ਜਾ ਰਿਹਾ ਸੀ। ਉਨਾਂ ਕਿਹਾ ਕਿ ਬੀਜੇਪੀ ਮੈਂਬਰ ਹੁੰਦਿਆਂ ਨਵਜੋਤ ਸਿੰਘ ਸਿੱਧੂ ਨੇ ਨਸ਼ਿਆਂ ਖਿਲਾਫ ਕੋਈ ਆਵਾਜ ਨਹੀਂ ਚੁੱਕੀ ਅਤੇ ਪਾਰਟੀ ਅਨੁਸਾਸ਼ਨ ਦਾ ਬਹਾਨਾ ਮਾਰ ਕੇ ਜਵਾਬ ਦੇਣ ਤੋਂ ਬਚਦੇ ਰਹੇ।
ਉਨਾਂ ਕਿਹਾ ਕਿ ਅਕਾਲੀ-ਭਾਜਪਾ ਸਰਕਾਰ ਦੇ ਪਾਪਾਂ ਵਿੱਚ ਭਾਜਪਾ ਬਰਾਬਰ ਦੀ ਹਿੱਸੇਦਾਰ ਰਹੀ ਹੈ। ਬਿਕਰਮ ਸਿੰਘ ਮਜੀਠੀਆ ਦੇ ਡਰੱਗ ਮਾਫੀਆ ਬਾਰੇ ਨਾ ਕੇਵਲ ਨਵਜੋਤ ਸਿੱਧੂ, ਬਲਕਿ ਸਾਰੇ ਭਾਜਪਾ ਆਗੂ ਮੂਕ ਦਰਸ਼ਕ ਬਣੇ ਰਹੇ।ਵੜੈਚ ਨੇ ਸਿੱਧੂ ਨੂੰ ਯਾਦ ਕਰਵਾਇਆ ਕਿ ਕੈਪਟਨ ਅਮਰਿੰਦਰ ਸਿੰਘ ਇਕਲੌਤਾ ਕਾਂਗਰਸੀ ਆਗੂ ਸੀ, ਜਿਸਨੇ ਆਪਣੇ ਭਤੀਜੇ ਬਿਕਰਮ ਮਜੀਠੀਆਂ ਨੂੰ ਡਰੱਗ ਰੈਕੇਟ ਕੇਸ ਵਿੱਚ ਸੀਬੀਆਈ ਜਾਂਚ ਤੋਂ ਬਚਾਇਆ ਸੀ। ਇਹ ਬਹੁਤ ਹੈਰਾਨ ਕਰਨ ਵਾਲੀ ਗੱਲ ਹੈ ਕਿ ਸਿੱਧੂ ਨੇ ਪੰਜਾਬ ਦੀ ਬਰਬਾਦੀ ਕਰਨ ਵਾਲੀਆਂ ਤਾਕਤਾਂ ਨਾਲ ਹੱਥ ਮਿਲਾਇਆ ਹੈ। ਉਨਾਂ ਕਿਹਾ ਕਿ ਸਿੱਧੂ ਸਪਸ਼ਟ ਕਰਨ ਕਿ ਬਿਕਰਮ ਸਿੰਘ ਮਜੀਠੀਆ ਦੀ ਡਰੱਗ ਰੈਕੇਟ ਵਿੱਚ ਭੂਮਿਕਾ ਉਤੇ ਉਨਾਂ ਦਾ ਕੀ ਦ੍ਰਿਸ਼ਟੀਕੋਣ ਹੈ। ਆਪ ਕਨਵੀਨਰ ਨੇ ਕਿਹਾ ਕਿ ਸਿੱਧੂ ਕਾਂਗਰਸ ਦੇ ਡੁੱਬਦੇ ਬੇੜੇ ਨੂੰ ਨਹੀਂ ਬਚਾ ਸਕਦੇ। ਵੜੈਚ ਨੇ ਸਿੱਧੂ ਨੂੰ ਪੰਜਾਬ ਦੇ ਲੋਕਾਂ ਨਾਲ ਖੜੇ ਹੋਣ ਦੀ ਸਲਾਹ ਦਿੱਤੀ ਅਤੇ ਕਿਹਾ ਕਿ ਉਹ ਕੈਪਟਨ ਅਮਰਿੰਦਰ ਸਿੰਘ ਅਤੇ ਬਾਦਲ ਪਰਿਵਾਰ ਦੇ ਅਨੈਤਿਕ ਗਠਜੋੜ ਦਾ ਹਿੱਸਾ ਨਾ ਬਣਨ। ਵੜੈਚ ਨੇ ਕਿਹਾ ਕਿ ਸਿੱਧੂ ਨੂੰ ਬਾਦਲ ਪਰਿਵਾਰ ਦੇ ਪਾਪਾਂ ਉਤੇ ਚੁੱਪ ਰਹਿਣ ਲਈ ਮੁਆਫੀ ਮੰਗਣੀ ਚਾਹੀਦੀ ਹੈ।