ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ ਆਪਣੇ ਸਿਆਸੀ ਵਿਰੋਧੀਆਂ ਦਾ ਮੁਕਾਬਲਾ ਜਮਹੂਰੀ ਤਰੀਕੇ ਨਾਲ ਕਰਨ ਦੀ ਥਾਂ ਪੰਜਾਬ ਦੀ ਸਿਆਸਤ ਨੂੰ ਹਿੰਸਾ ਦਾ ਲਾਬੂੰ ਲਾਉਣ ਦੀ ਕੋਸ਼ਿਸ਼ ਰਹੀਆਂ ਹਨ। ਜੇਕਰ ਚੋਣ ਕਮਿਸ਼ਨ ਨੇ ਇਹਨਾਂ ਦੀ ਲਗਾਮ ਨਾ ਕਸੀ ਤਾਂ ਇਹ ਚੋਣਾਂ ਦੌਰਾਨ ਪੰਜਾਬ ਦਾ ਮਾਹੌਲ ਵਿਗਾੜਣ ਦੀ ਕੋਸ਼ਿਸ਼ ਕਰ ਸਕਦੀਆਂ ਹਨ। ਇਹ ਸ਼ਬਦ ਸ਼੍ਰੋਮਣੀ ਅਕਾਲੀ ਦਲ ਦੇ ਸਕੱਤਰ ਜਨਰਲ ਅਤੇ ਰਾਜ ਸਭਾ ਮੈਂਬਰ ਸੁਖਦੇਵ ਸਿੰਘ ਢੀਂਡਸਾ ਨੇ ਇੱਥੇ ਪ੍ਰੈਸ ਬਿਆਨ ਜਾਰੀ ਕਰਦਿਆਂ ਕਹੇ। ਉਹ ਸੋਮਵਾਰ ਨੂੰ ਗਿੱਦੜਬਾਹਾ ਵਿਚ ਕਾਂਗਰਸ ਅਤੇ ਆਪ ਵਰਕਰਾਂ ਵਿਚਕਾਰ ਇੱਕ ਦੂਜੇ ਦੇ ਪੋਸਟਰ ਫਾੜਣ ਨੂੰ ਲੈ ਕੇ ਹੋਈ ਹਿੰਸਕ ਝੜਪ ਉੱਤੇ ਟਿੱਪਣੀ ਕਰ ਰਹੇ ਸਨ। ਸ਼ ਢੀੰਡਸਾ ਨੇ ਕਿਹਾ ਕਿ ਇਹ ਦੋਵੇਂ ਪਾਰਟੀਆਂ ਗੰਭੀਰ ਮੁੱਦਿਆਂ ਉੱਤੇ ਉਸਾਰੂ ਬਹਿਸ ਕਰਨ ਦੀ ਥਾਂ ਪੰਜਾਬ ਦੀ ਸਿਆਸਤ ਅੰਦਰ 'ਪੋਸਟਰ ਫਾੜਣ ਬਦਲੇ ਸਿਰ ਫਾੜਣ' ਵਰਗੇ ਹੋਛੇ ਰੁਝਾਣਾਂ ਨੂੰ ਹਵਾ ਦੇ ਰਹੀਆਂ ਹਨ। ਅਕਾਲੀ ਆਗੂ ਨੇ ਕਿਹਾ ਕਿ ਕਾਂਗਰਸ ਅਤੇ ਆਪ ਦੋਵਾਂ ਪਾਰਟੀਆਂ ਦੀ ਸਿਆਸਤ ਉਸ ਦਿੱਲੀ ਦੇ ਹਿੱਤਾਂ ਨੂੰ ਪੂਰਦੀ ਹੈ, ਜਿਸ ਦੀ ਪੰਜਾਬ ਨਾਲ ਮੁੱਢੋਂ ਹੀ ਦੁਸ਼ਮਣੀ ਰਹੀ ਹੈ।
ਉਹਨਾਂ ਕਿਹਾ ਕਿ ਕਾਂਗਰਸ ਆਪਣੀ ਨੀਵੇਂ ਦਰਜੇ ਦੀ ਸਿਆਸਤ ਨਾਲ ਪਹਿਲਾਂ ਵੀ ਪੰਜਾਬ ਨੂੰ ਹਿੰਸਾ ਦੀ ਅੱਗ ਵਿਚ ਸੁੱਟ ਚੁੱਕੀ ਹੈ। ਚੋਣਾਂ ਦੇ ਨੇੜੇ ਆਉਣ ਦੇ ਹਿੰਸਾ ਦੇ ਖਦਸ਼ੇ ਪ੍ਰਗਟਾਉਣਾ ਜਾਂ ਅਸਿੱਧੇ ਰੂਪ ਵਿਚ ਹਿੰਸਕ ਰਾਜਨੀਤੀ ਨੂੰ ਹਵਾ ਦੇਣਾ ਕਾਂਗਰਸ ਦੀ ਪੁਰਾਣੀ ਫਿਤਰਤ ਹੈ। ਉਹਨਾਂ ਕਿਹਾ ਕਿ ਦਿੱਲੀ ਤੋਂ ਕਾਵਾਂ ਵਾਗੂੰ ਉੱਡ ਕੇ ਆਏ ਆਪ ਆਗੂ ਜਾਣ ਗਏ ਹਨ ਕਿ ਪੰਜਾਬ ਦੇ ਲੋਕੀਂ ਹੁਣ ਉਹਨਾਂ ਦੀ ਕਾਵਾਂਰੌਲੀ ਤੋਂ ਅੱਕ ਚੁੱਕੇ ਹਨ। ਜਿਸ ਕਰਕੇ ਹੁਣ ਆਪ ਦੀ ਰੈਲੀਆਂ ਵਿਚ ਵੀ ਆਮ ਲੋਕਾਂ ਦੀ ਭੀੜ ਦੀ ਥਾਂ ਕਾਂ ਉੱਡਦੇ ਹੀ ਨਜ਼ਰ ਆਉਂਦੇ ਹਨ। ਸ਼ ਢੀਂਡਸਾ ਨੇ ਕਿਹਾ ਕਿ ਇਹ ਦੋਵੇਂ ਪਾਰਟੀਆਂ ਹੁਣ ਜਾਣ ਬੁੱਝ ਇੱਕ ਦੂਜੇ ਦੇ ਸਿਰ ਪਾੜ ਰਹੀਆਂ ਹਨ ਤਾਂ ਕਿ ਚੋਣਾਂ ਦਾ ਮਾਹੌਲ ਖਰਾਬ ਹੋ ਜਾਵੇ ਅਤੇ ਇਹਨਾਂ ਨੂੰ ਆਪਣੀ ਕੌਝੀ ਰਾਜਨੀਤੀ ਕਰਨ ਦਾ ਮੌਕਾ ਮਿਲ ਜਾਵੇ। ਕਾਂਗਰਸ ਪ੍ਰਧਾਨ ਮਹਾਰਾਜਾ ਅਮਰਿੰਦਰ ਸਿੰਘ ਨੂੰ 'ਉਲਟਾ ਚੋਰ ਕੋਤਵਾਲ ਨੂੰ ਡਾਂਟੇ' ਕਹਿ ਕੇ ਸੰਬੋਧਨ ਕਰਦੇ ਹੋਏ ਅਕਾਲੀ ਆਗੂ ਨੇ ਕਿਹਾ ਕਿ ਅਮਰਿੰਦਰ ਵਾਰ ਵਾਰ ਸਰਕਾਰ ਖਿਲਾਫ ਰੌਲਾ ਪਾਉਂਦੇ ਹਨ ਕਿ ਚੋਣਾਂ ਕਰਕੇ ਪੰਜਾਬ ਦਾ ਮਾਹੌਲ ਵਿਗਾੜਿਆ ਜਾ ਰਿਹਾ ਹੈ। ਜਦਕਿ ਅਸਲੀਅਤ ਵਿਚ ਹਿੰਸਾ ਦੀ ਸਿਆਸਤ ਕਾਂਗਰਸ ਕਰ ਰਹੀ ਹੈ ਅਤੇ ਇਸ ਗੰਦੀ ਖੇਡ ਵਿਚ ਆਪ ਵੀ ਜੋਟੀਦਾਰ ਵਜੋਂ ਸ਼ਾਮਿਲ ਹੈ।