ਜਿੰਨੀ ਤੇਜੀæ ਨਾਲ ਸਰਵਣ ਸਿੰਘ ਫਿਲੌਰ ਨੇ ਟਿਕਟ ਨਾ ਮਿਲਣ 'ਤੇ ਕਾਂਗਰਸ ਵੱਲ ਛਾਲ ਮਾਰੀ ਹੈ, ਉਸ ਤੋਂ ਸਪੱਸ਼ਟ ਹੋ ਗਿਆ ਹੈ, ਉਹ ਅਕਾਲੀ ਦਲ ਦਾ 'ਸਰਵਣ ਪੁੱਤ' ਨਹੀਂ ਸੀ, ਸਿਰਫ ਸਿਆਸੀ ਲਾਭ ਲੈਣ ਵਾਸਤੇ ਪਾਰਟੀ ਨਾਲ ਜੁੜਿਆ ਹੋਇਆ ਸੀ। ਇਹ ਸ਼ਬਦ ਸ਼੍ਰੋਮਣੀ ਅਕਾਲੀ ਦਲ ਦੇ ਜਨਰਲ ਸਕੱਤਰ ਸੁਖਦੇਵ ਸਿੰਘ ਢੀਂਡਸਾ ਨੇ ਇੱਥੇ ਪ੍ਰੈਸ ਦੇ ਨਾਂ ਬਿਆਨ ਜਾਰੀ ਕਰਦਿਆਂ ਕਹੇ। ਉਹ ਅਕਾਲੀ ਆਗੂ ਸ਼ ਸਰਵਣ ਸਿੰਘ ਫਿਲੌਰ ਦੇ ਕਾਂਗਰਸ ਵਿਚ ਸ਼ਾਮਿਲ ਹੋਣ ਸੰਬੰਧੀ ਟਿੱਪਣੀ ਕਰ ਰਹੇ ਸਨ। ਸ਼ ਢੀਡਸਾ ਨੇ ਕਿਹਾ ਕਿ ਅਕਾਲੀ ਦਲ ਨੇ ਨਾ ਸਿਰਫ ਉਸ ਨੂੰ ਚੋਣ ਮੈਦਾਨ ਵਿਚ ਉਤਾਰਿਆ ਸੀ, ਸਗੋਂ 6 ਵਾਰ ਜਿਤਾ ਕੇ ਵਿਧਾਨ ਸਭਾ ਵਿਚ ਵੀ ਲਿਆਂਦਾ ਸੀ। ਪਰ ਇੱਕ ਵਾਰ ਪਾਰਟੀ ਦੁਆਰਾ ਉਸ ਨੂੰ ਉਮੀਦਵਾਰ ਨਾ ਬਣਾਏ ਜਾਣ 'ਤੇ ਉਹ ਉਸ ਕਾਂਗਰਸ ਪਾਰਟੀ ਵਿਚ ਜਾ ਰਲਿਆ, ਜਿਸ ਦੀਆਂ ਨੀਤੀਆਂ ਦੀ ਉਹ ਸਾਰੀ ਉਮਰ ਵਿਰੋਧਤਾ ਕਰਦਾ ਰਿਹਾ ਸੀ।ਇਸ ਦੇ ਨਾਲ ਹੀ ਕਾਂਗਰਸ ਪ੍ਰਧਾਨ ਮਹਾਰਾਜਾ ਅਮਰਿੰਦਰ ਸਿੰਘ ਦੁਆਰਾ ਸ਼ ਫਿਲੌਰ ਨੂੰ ਆਪਣੀ ਪਾਰਟੀ 'ਚ ਸ਼ਾਮਿਲ ਕਰਨ ਸੰਬੰਧੀ ਵਿਖਾਈ ਕਾਹਲ ਉੱਤੇ ਹੈਰਾਨੀ ਪ੍ਰਗਟ ਕਰਦਿਆਂ ਸ਼ਢੀਂਡਸਾ ਨੇ ਕਿਹਾ ਕਿ ਇਹ ਕਾਹਲ ਕਾਂਗਰਸ ਪਾਰਟੀ ਅੰਦਰ ਪਸਰੀ ਉਸ ਨਿਰਾਸ਼ਾ ਦੀ ਝਲਕ ਦਿੰਦੀ ਹੈ, ਜਿਸ ਕੋਲੋਂ ਤੇਜ਼ੀ ਨਾਲ ਸਿਆਸੀ ਜ਼ਮੀਨ ਖੁੱਸ ਰਹੀ ਹੈ ਅਤੇ ਉਹ ਕਿਸੇ ਦਾ ਵੀ ਸਮਰਥਨ ਲੈਣ ਵਾਸਤੇ ਪੱਬਾਂ-ਭਾਰ ਹੋਈ ਬੈਠੀ ਹੈ।
ਢੀਂਡਸਾ ਨੇ ਕਿਹਾ ਕਿ ਜੇ ਅਮਰਿੰਦਰ ਇਹ ਸੋਚਦਾ ਹੈ ਕਿ ਉਸ ਦੀ ਇਸ ਆਖਰੀ ਸਿਆਸੀ ਲੜਾਈ ਵਿਚ ਕੁਝ ਨਕਾਰੇ ਅਤੇ ਨਿਰਾਸ਼ ਸਿਆਸਤਦਾਨ ਉਸ ਦੀ ਬੇੜੀ ਨੂੰ ਪਾਰ ਲਾਉਣਗੇ ਤਾਂ ਉਸ ਤੋਂ ਵੱਡਾ ਨਾ-ਸਮਝ ਕੋਈ ਨਹੀਂ ਹੈ। ਉਹਨਾਂ ਕਿਹਾ ਕਿ ਮਹਾਰਾਜਾ ਕੂੜੇ 'ਚੋਂ ਚੁੱਕੇ ਆਗੂਆਂ ਦੀ ਫੌਜ ਨਾਲ ਸਿਆਸੀ ਲੜਾਈ ਨਹੀਂ ਜਿੱਤ ਪਾਵੇਗਾ। ਦਰਅਸਲ ਅਜਿਹੇ ਨਕਾਰੇ ਆਗੂਆਂ ਵੱਲ ਉੱਲਰਣਾ ਹੀ ਸਾਬਿਤ ਕਰਦਾ ਹੈ ਕਿ ਅਸਲ 'ਚ ਮਹਾਰਾਜਾ ਆਪਣੀ ਜੰਗ ਹਾਰ ਚੁੱਕਿਆ ਹੈ।
ਅਕਾਲੀ ਆਗੂ ਨੇ ਕਿਹਾ ਕਿ ਇੱਕ ਦੂਜੇ ਨੂੰ ਜੱਫੀ ਪਾ ਕੇ ਅਮਰਿੰਦਰ ਅਤੇ ਫਿਲੌਰ ਦੋਹਾਂ ਨੇ ਸਿਆਸੀ ਖੁਦਕੁਸ਼ੀ ਕੀਤੀ ਹੈ। ਫਿਲੌਰ ਦੇ ਸ਼ਾਮਿਲ ਹੋਣ ਮਗਰੋਂ ਕਾਂਗਰਸ ਕੈਂਪ ਅੰਦਰ ਉਸ ਨੂੰ ਲੈ ਕੇ ਕਾਨਾਫੂਸੀ ਸ਼ੁਰੂ ਹੋ ਚੁੱਕੀ ਹੈ। ਪਾਰਟੀ ਦੇ ਵਫਾਦਾਰ ਸਿਪਾਹੀਆਂ ਦੀ ਦਲੀਲ ਹੈ ਕਿ ਜੇਕਰ ਫਿਲੌਰ 40 ਸਾਲ ਅਕਾਲੀ ਦਲ ਨਾਲ ਰਹਿਣ ਮਗਰੋਂ ਵੀ ਇੱਕ ਝਟਕੇ ਨਾਲ ਉਸ ਪਾਰਟੀ ਨੂੰ ਧੋਖਾ ਦੇ ਸਕਦਾ ਹੈ ਤਾਂ ਕਾਂਗਰਸੀ ਉਸ ਤੇ ਕਿਵੇਂ ਭਰੋਸਾ ਕਰ ਸਕਦੇ ਹਨ?ਢੀਂਡਸਾ ਨੇ ਕਿਹਾ ਕਿ ਫਿਲੌਰ ਦਾ ਇਹ ਕਹਿਣਾ ਕਿ ਬਿਲਕੁੱਲ ਹੀ ਗਲਤ ਹੈ ਕਿ ਅਕਾਲੀ ਦਲ ਵਿਚ ਦਲਿਤਾਂ ਨਾਲ ਵਿਤਕਰਾ ਹੋਣ ਕਰਕੇ ਉਸ ਦਾ ਪਾਰਟੀ ਅੰਦਰ ਸਾਹ ਘੁਟਣ ਲੱਗ ਪਿਆ ਸੀ। ਕੀ ਇਹ ਸਭ ਉਸ ਨੂੰ ਟਿਕਟ ਨਾ ਮਿਲਣ ਮਗਰੋਂ ਮਹਿਸੂਸ ਹੋਣਾ ਸ਼ੁਰੂ ਹੋਇਆ? ਕੀ ਪਿਛਲੇ 40 ਸਾਲ ਦੌਰਾਨ ਜਦੋ ਪਾਰਟੀ ਨੇ ਉਸ ਦਾ ਸਿਆਸੀ ਕਰੀਅਰ ਖੜ੍ਹਾ ਕੀਤਾ, ਸਭ ਕੁੱਝ ਠੀਕ ਚੱਲ ਰਿਹਾ ਸੀ?
ਅਕਾਲੀ ਆਗੂ ਨੇ ਕਿਹਾ ਕਿ ਫਿਲੌਰ ਨੇ ਉਸ ਕਾਂਗਰਸ ਨੂੰ ਚੁਣਿਆ ਹੈ, ਜਿਸ ਨੇ ਦਲਿਤਾਂ ਨੂੰ ਗਰੀਬੀ 'ਚੋਂ ਬਾਹਰ ਕੱਢਣ ਦੀ ਥਾਂ ਉਹਨਾਂ ਨੂੰ ਹਮੇਸ਼ਾਂ ਵੋਟ ਬੈਂਕ ਵਜੋਂ ਹੀ ਇਸਤੇਮਾਲ ਕੀਤਾ ਹੈ। ਜੇਕਰ ਦਲਿਤ ਅੱਜ ਵੀ ਗਰੀਬ ਅਤੇ ਪਛੜੇਪਣ ਦਾ ਸ਼ਿਕਾਰ ਹਨ ਤਾਂ ਇਸ ਦੇ ਪਿੱਛੇ ਕਾਂਗਰਸ ਦੀਆਂ ਪਿਛਲੇ 60 ਸਾਲਾਂ ਤੋਂ ਚੱਲੀਆਂ ਆ ਰਹੀਆਂ ਦਲਿਤ-ਵਿਰੋਧੀ ਨੀਤੀਆਂ ਦਾ ਹੱਥ ਹੈ।ਸ਼ ਢੀਂਡਸਾ ਨੇ ਕਿਹਾ ਕਿ ਇੱਕ ਗੁਰਸਿੱਖ ਹੋਣ ਦੇ ਨਾਤੇ ਫਿਲੌਰ ਨੇ ਇੱਕ ਅਜਿਹੀ ਪਾਰਟੀ ਚੁਣੀ ਹੈ, ਜਿਸ ਨੇ ਸਿੱਖ ਕੌਮ ਖਿਲਾਫ ਬਹੁਤ ਹੀ ਘਿਨੌਣੇ ਅਪਰਾਧ ਕੀਤੇ ਹਨ। ਦਰਅਸਲ ਕਾਂਗਰਸ ਨੇ ਪੰਜਾਬ ਨਾਲ ਹਮੇਸ਼ਾਂ ਹੀ ਵਿਸ਼ਵਾਸ਼ਘਾਤ ਕੀਤਾ ਹੈ। ਇਸ ਨੇ ਸਿੱਖਾਂ ਦੇ ਪਵਿੱਤਰ ਸਥਾਨ ਸ੍ਰੀ ਦਰਬਾਰ ਸਾਹਿਬ ਉੱਤੇ ਫੌਜ ਤੋਂ ਹਮਲਾ ਕਰਵਾਇਆ, ਸਿੱਖਾਂ ਦਾ ਕਤਲੇਆਮ ਕੀਤਾ, ਪੰਜਾਬ ਨੂੰ ਇਸ ਦੀ ਰਾਜਧਾਨੀ ਅਤੇ ਪੰਜਾਬੀ ਬੋਲਦੇ ਇਲਾਕਿਆਂ ਤੋਂ ਵਾਂਝਾ ਕੀਤਾ ਅਤੇ ਪੰਜਾਬ ਤੋਂ ਇਸ ਦੇ ਪਾਣੀ ਖੋਹ ਕੇ ਪੇਂਡੂ ਆਰਥਿਕਤਾ ਨੂੰ ਸਭ ਤੋਂ ਵੱਡੀ ਢਾਹ ਲਾਈ।