ਇਨਸਾਨੀ ਰਿਸ਼ਤਿਆਂ ਵਿਚਲੇ ਅਧਿਆਤਮਕ ਪਹਿਲੂਆਂ ਤੇ ਬਾਰੇ ਵਿਚਾਰ ਚਰਚਾ ਕਰਨ ਲਈ ਬੀਤੇ ਦਿਨੀ ਆਰੀਅਨਜ਼ ਗਰੁੱਪ ਆਫ ਕਾਲਜਿਜ਼ ਚੰਡੀਗੜ੍ਹ ਵਲੋਂ ਕੈਂਪਸ ਵਿਖੇ ਵੱਖ ਵੱਖ ਹਿੱਸਿਆਂ ਤੋ ਆਈ ਬ੍ਰਹਮਕੁਮਾਰੀਆਂ ਦੀ ਟੀਮ ਨਾਲ ਇਕ ਵਿਸ਼ੇਸ਼ ਸ਼ੈਸ਼ਨ ਕਰਵਾਇਆ ਗਿਆ। ਸ਼ੈਸ਼ਨ ਦੌਰਾਨ ਰਾਜਸਥਾਨ ਦੇ ਮਾਊਂਟ ਆਬੂ, ਮਹਾਰਾਸ਼ਟਰ ਅਤੇ ਰਾਜਪੁਰਾ ਤੋਂ ਬ੍ਰਹਮਕੁਮਾਰੀਆਂ ਦੀ ਟੀਮ ਉਚੇਚੇ ਤੌਰ ਤੇ ਕੈਂਪਸ ਵਿਚ ਪਹੁੰਚੀ। ਇਸ ਟੀਮ ਨੇ ਵਿਦਿਆਰਥੀਆਂ ਨਾਲ ਅਧਿਆਤਮਕ, ਧਾਰਮਿਕ ਅਤੇ ਜੀਵਨ ਜਿਉਂਣ ਦੇ ਤਰੀਕਿਆਂ ਬਾਰੇ ਵਿਸਥਾਰ ਨਾਲ ਵਿਚਾਰ ਚਰਚਾ ਕੀਤੀ।ਇਸ ਮੌਕੇ ਬੋਲਦਿਆਂ ਮਾਊਟ ਆਬੂ ਤੋਂ ਬ੍ਰਹਮਕੁਮਾਰੀਆਂ ਦੀ ਮੁਖੀ ਗੀਤਾ ਦੀਦੀ ਨੇ ਵਿਦਿਆਰਥੀਆਂ ਨੂੰ ਤਣਾਅ ਮੁਕਤ ਜੀਵਨ ਜਿਉਂਣ ਦੇ ਢੰਗ, ਲੀਡਰਸ਼ਿਪ ਦੇ ਹੁਨਰ, ਭਾਵਨਾਵਾਂ ਨੂੰ ਕਾਬੂ ਰੱਖਣ ਦੇ ਹੁਨਰ, ਸਹੀ ਸੋਚਣ ਦੀ ਕਲਾ, ਆਪਣੇ ਅੰਦਰ ਦੀ ਸ਼ਕਤੀ ਨੂੰ ਪਹਿਚਾਨਣ, ਰਿਸ਼ਤਿਆਂ ਵਿਚਲਾ ਨਿੱਘ ਬਰਕਰਾਰ ਰੱਖਣ ਅਤੇ ਰਾਜਯੋਗ ਮੈਡੀਟੇਸ਼ਨ ਦੀਆਂ ਵਾਸਤਵਿਕ ਤਕਨੀਕਾਂ ਬਾਰੇ ਜਾਣਕਾਰੀ ਦਿੱਤੀ।ਮਹਾਰਾਸ਼ਟਰ ਦੀ ਸੈਂਟਰ ਇੰਚਾਰਜ ਬ੍ਰਹਮਕੁਮਾਰੀ ਅਨੀਤਾ ਦੀਦੀ ਨੇ ਦੱਸਿਆ ਕਿ ਕਿਸ ਤਰ੍ਹਾਂ ਆਪਣੇ ਸੋਚਣ ਦੇ ਢੰਗ ਵਿਚ ਮਾਮੂਲੀ ਜਿਹੇ ਬਦਲਾਅ ਕਰਨ ਨਾਲ ਅਸੀ ਆਪਣੇ ਜੀਵਨ ਵਿਚ ਬਦਲਾਅ ਲਿਆ ਸਕਦੇ ਹਾਂ। ਉਨ੍ਹਾ ਵਿਦਿਆਰਥੀਆਂ ਨੂੰ ਸਵਾਲ ਕੀਤਾ ਕਿ ਕਿੰਨੇ ਵਿਦਿਆਰਥੀ ਅਜਿਹੇ ਹਨ ਜੋ ਇਸ ਸ਼ੈਸ਼ਨ ਦੌਰਾਨ ਵੀ ਆਪਣੇ ਰੋਜਮਰ੍ਹਾ ਦੇ ਕੰਮ ਬਾਰੇ ਸੋਚ ਰਹੇ ਹਨ।
ਤਕਰੀਬਨ ਸਾਰੇ ਵਿਦਿਆਰਥੀਆਂ ਨੇ ਹੱਥ ਖੜੇ ਕੀਤੇ। ਜਿਸਤੇ ਅਨੀਤਾ ਦੀਦੀ ਨੇ ਕਿਹਾ ਕਿ ਅਸੀ ਸਾਰੇ ਹੀ ਅਕਸਰ ਆਪਣੇ ਭੂਤਕਾਲ ਜਾਂ ਭਵਿੱਖ ਬਾਰੇ ਹੀ ਸੋਚਦੇ ਰਹਿੰਦੇ ਹਾਂ ਜਦਕਿ ਅਸੀ ਆਪਣੇ ਵਰਤਮਾਨ ਬਾਰੇ ਕਦੇ ਵੀ ਨਹੀ ਸੋਚਦੇ। ਉਨ੍ਹਾਂ ਕਿਹਾ ਕਿ ਅਸੀ ਅਕਸਰ ਇਹ ਮੰਨ ਲੈਂਦੇ ਹਾਂ ਕਿ ਸਾਡਾ ਆਪਣੀ ਸੋਚ ਤੇ ਕਾਬੂ ਨਹੀ ਹੈ। ਜਦਕਿ ਅਜਿਹਾ ਨਹੀ ਹੈ , ਜੇਕਰ ਅਸੀ ਚਾਹੀਏ ਤਾਂ ਅਸੀ ਆਪਣੀ ਸੋਚ ਤੇ ਕਾਬੂ ਰੱਖ ਸਕਦੇ ਹਾਂ। ਉਨ੍ਹਾਂ ਦੱਸਿਆ ਕਿ ਅਸੀ ਕੀ, ਕਿਵੇਂ ਅਤੇ ਕਦੋਂ ਸੋਚਣਾ ਹੈ, ਇਸ ਦਾ ਸਿੱਧਾ ਸੰਬੰਧ ਅਧਿਆਤਮਕਤਾ ਨਾਲ ਹੇ। ਆਪਣੇ ਅੰਦਰਲੀ ਸੋਚਣ ਦੀ ਊਰਜਾ ਦਾ ਸਹੀ ਇਸਤੇਮਾਲ ਕਰਕੇ ਹੀ ਅਸੀ ਆਪਣਾ ਜੀਵਨ ਸ਼ਾਤਮਈ ਅਤੇ ਖੁਸ਼ਹਾਲੀ ਨਾਲ ਬਤੀਤ ਕਰ ਸਕਦੇ ਹਾਂ।ਇਸ ਮੌਕੇ ਰਾਜਪੁਰਾ ਸੈਂਟਰ ਦੀ ਇੰਚਾਰਜ ਮੈਡਮ ਚੰਚਲ ਜਟਾਣਾ ਅਤੇ ਡਾਕਟਰ ਰਾਮਾ ਨੇ ਵਿਦਿਆਰਥੀਆਂ ਨੂੰ ਆਪਣੀਆਂ ਸ਼ੁੱਭ ਇਛਾਵਾਂ ਦਿੰਦਿਆਂ ਹੋਇਆ ਕਿਹਾ ਕਿ ਸੱਚਾਈ, ਸ਼ਾਂਤੀ, ਪਿਆਰ ਦੀ ਭਾਵਨਾ ਨਾਲ ਹੀ ਅਸੀ ਆਪਣੇ ਸਮਾਜ ਦੀ ਬਿਹਤਰੀ ਕਰ ਸਕਦੇ ਹਾਂ। ਉਨ੍ਹਾਂ ਅਧਿਆਤਮਕ ਗਿਆਨ ਅਤੇ ਰਾਜਯੋਗ ਮੈਡੀਟੇਸ਼ਨ ਦੀ ਲਗਾਤਾਰ ਪ੍ਰੈਕਟਿਸ ਤੇ ਜੋਰ ਦਿੰਦਿਆਂ ਕਿਹਾ ਕਿ ਇਸ ਨਾਲ ਹੀ ਅਸੀ ਆਪਣੇ ਆਪ ਵਿਚ ਅਤੇ ਸਮਾਜ ਵਿਚ ਸਦਭਾਵਨਾ ਲਿਆ ਸਕਦੇ ਹਾਂ।ਅੰਤ ਵਿਚ ਪ੍ਰੋ: ਬੀਐਸ ਸਿੱਧੂ ਰਜਿਸਟਰਾਰ, ਆਰੀਅਨਜ਼ ਗਰੁੱਪ ਆਫ ਕਾਲਜਿਜ਼ ਚੰਡੀਗੜ੍ਹ ਨੇ ਬ੍ਰਹਮਕੁਮਾਰੀਆਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਅਜਿਹੇ ਸ਼ੈਸ਼ਨ ਅਜੋਕੇ ਸਮੇਂ ਦੀ ਲੋੜ ਹਨ। ਉਨ੍ਹਾਂ ਕਿਹਾ ਕਿ ਅਜਿਹੀਆਂ ਸਿੱਖਿਆਵਾਂ ਦੀ ਅੱਜ ਦੇ ਨੌਜਵਾਨ ਪੀੜੀ ਨੂੰ ਬੇਹੱਦ ਜਿਆਦਾ ਲੋੜ ਹੈ। ਅਜਿਹੀਆਂ ਸਿੱਖਿਆਵਾਂ ਨਾਲ ਵਿਦਿਆਰਥੀਆਂ ਅੰਦਰ ਸਕਾਰਾਤਮਕ ਮਾਨਸਿਕਤਾ ਦਾ ਪ੍ਰਵਾਹ ਤੇਜ ਹੁੰਦਾ ਹੈ।