ਭਾਰਤੀ ਜਨਤਾ ਪਾਰਟੀ ਦੇ ਅਹੁਦੇਦਾਰਾਂ, ਜ਼ਿਲਾ ਪ੍ਰਧਾਨਾਂ ਅਤੇ ਮਹਾਮੰਤਰੀਆਂ ਦੀ ਬੈਠਕ ਨੂੰ ਸੰਬੋਧਨ ਕਰਦਿਆਂ ਪਾਰਟੀ ਦੇ ਪੰਜਾਬ ਪ੍ਰਧਾਨ ਕਮਲ ਸ਼ਰਮਾ ਨੇ ਦੱਸਿਆ ਕਿ ਭਾਜਪਾ 21 ਲੱਖ ਮੈਂਬਰ ਬਣਾ ਕੇ ਇਤਹਾਸਕ ਉਪਲਬਧੀ ਹਾਸਿਲ ਕਰੇਗੀ। ਲੁਧਿਆਣਾ ਵਿਖੇ ਹੋਈ ਇਸ ਬੈਠਕ ਵਿਚ ਆਈ ਰਿਪੋਰਟਿੰਗ ਅਨੁਸਾਰ ਅਜੇ ਤੀਕ ਪਾਰਟੀ ਦੇ 14500 ਐਕਟਿਵ ਵਰਕਰ ਬਨ ਚੁਕੇ ਹਨ ਅਤੇ 2500 ਐਕਟਿਵ ਵਰਕਰ ਹੋਰ ਬਣਾਏ ਜਾਣਗੇ। ਇਹ ਸਾਰੇ 17000 ਐਕਟਿਵ ਵਰਕਰ ਅੰਮ੍ਰਿਤਸਰ ਵਿਚ ਹੋਣ ਵਾਲੇ ਸੰਮੇਲਨ ਵਿਚ ਸ਼ਾਮਿਲ ਹੋਣਗੇ ਜਿਸਨੂੰ ਪਾਰਟੀ ਦੇ ਰਾਸ਼ਟਰੀ ਪ੍ਰਧਾਨ ਅਮਿਤ ਸ਼ਾਹ ਸੰਬੋਧਤ ਕਰਣਗੇ। ਕਮਲ ਸ਼ਰਮਾ ਨੇ ਪਾਰਟੀ ਵਰਕਰਾਂ ਨੁੰ ਵਧਾਈ ਦਿੰਦਿਆਂ ਦੱਸਿਆ ਕਿ ਪੰਜਾਬ ਦੇਸ਼ ਦਾ ਪਹਿਲਾ ਰਾਜ ਹੋਵੇਗਾ ਜਿੱਥੇ 30 ਅਪ੍ਰੈਲ ਨੂੰ ਮੈਂਬਰਸ਼ਿਪ ਅਭਿਆਨ ਪੂਰਾ ਹੋਣ ਦੇ ਤੁਰੰਤ ਬਾਅਦ ਕਾਰਜਕਰਤਾ ਸੰਮੇਲਨ ਕਰਵਾਇਆ ਜਾਵੇਗਾ। ਇਹ ਸੰਮੇਲਨ 2 ਮਈ ਨੂੰ ਅੰਮ੍ਰਿਤਸਰ ਵਿਖੇ ਆਯੋਜਿਤ ਕੀਤਾ ਜਾਵੇਗਾ ਜਿਸਨੂੰ ਪਾਰਟੀ ਦੇ ਕੌਮੀ ਪ੍ਰਧਾਨ ਅਮਿਤ ਸ਼ਾਹ ਸੰਬੋਧਤ ਕਰਣਗੇ।
ਉਕਤ ਬੈਠਕ ਦੇ ਤੁਰੰਤ ਬਾਅਦ ਪੂਰੇ ਰਾਜ ਵਿਚੋਂ ਆਏ 150 ਵਿਸਤਾਰਕਾਂ ਦੀ ਵਰਕਸ਼ਾਪ ਲਗਾਈ ਗਈ। ਜਿਸ ਵਿਚ ਕਾਰਜਕਰਤਾਵਾਂ ਨੂੰ ਪਿੰਡਾਂ ਵਿਚ ਮੈਂਬਰਸ਼ਿਪ ਅਭਿਆਨ ਚਲਾਉਣ ਦੀ ਟ੍ਰੇਨਿੰਗ ਦਿੱਤੀ ਗਈ। ਇਸ ਮੌਕੇ ਤੇ ਪਾਰਟੀ ਦੇ ਪ੍ਰਧਾਨ ਕਮਲ ਸ਼ਰਮਾ ਨੇ ਦੱਸਿਆ ਕਿ ਰਾਜ ਵਿਚ 100 ਵਿਸਤਾਰਕ ਤਾਇਨਾਤ ਕਰਨ ਦੀ ਯੋਜਨਾ ਸੀ ਪਰੰਤੂ ਕਾਰਜਕਰਤਾਵਾਂ ਅੰਦਰ ਉਤਸ਼ਾਹ ਕਾਰਨ 250 ਨਾਂ ਸਾਹਮਣੇ ਆਏ ਹਨ। ਇਨ੍ਹਾਂ ਵਿਚ ਕੁਝ ਕਾਰਜਕਰਤਾਵਾਂ ਨੂੰ ਕਾਰਜਕਰਤਾ ਸੰਮੇਲਨ ਦੀ ਤਿਆਰੀ ਲਈ ਆਪਣੇ ਜਿਲੇ ਵਿਚ ਹੀ ਕੰਮ ਕਰਨ ਲਈ ਕਿਹਾ ਗਿਆ ਹੈ ਜਦੋਂਕਿ ਘੱਟਗਿਣਤੀ ਮੋਰਚਾ, ਕਿਸਾਨ ਮੋਰਚਾ, ਯੂਵਾ ਮੋਰਚਾ ਦੇ 150 ਕਾਰਜਕਰਤਾਵਾਂ ਨੂੰ ਉਨ੍ਹਾਂ ਦਿਹਾਤੀ ਮੰਡਲਾਂ ਅੰਦਰ ਭੇਜਿਆ ਜਾ ਰਿਹਾ ਹੈ ਜਿੱਥੇ ਕਿ ਪਾਰਟੀ ਨੂੰ ਹੋਰ ਮਜਬੂਤ ਬਨਾਉਣ ਦੀ ਲੋੜ ਹੈ। ਇਹ ਵਿਸਤਾਰਕ ਇਕ ਹਫਤੇ ਅੰਦਰ 1.5 ਲੱਖ ਨਵੇਂ ਮੈਂਬਰ ਪੇਂਡੂ ਇਲਾਕਿਆਂ ਵਿਚ ਜੋੜਨਗੇ।