ਹਰਿਆਣਾ ਦੇ ਖੇਡ ਰਾਜ ਮੰਤਰੀ ਸ੍ਰੀ ਗੌਰਵ ਗੌਤਮ ਨੇ ਕਿਹਾ ਕਿ ਹਰਿਆਣਾ ਦਾ ਉਦੇਸ਼ ਓਲੰਪਿਕ 2036 ਵਿੱਚ 36 ਮੈਡਲ ਜਿੱਤਣ ਦਾ ਹੈ। ਇਨ੍ਹਾਂ ਮੈਡਲਾਂ ਲਈ ਸਾਡੇ ਗੱਭਰੂ ਖਿਡਾਰੀ ਅਥੱਕ ਮਿਹਨਤ ਕਰ ਰਹੇ ਹਨ। ਇਸ ਮਿਸ਼ਨ ਨੂੰ ਪੂਰਾ ਕਰਨ ਵਿੱਚ ਨਵ-ਨਿਯੁਕਤ ਕੋਚ ਵੀ ਅਹਿਮ ਭੂਮਿਕਾ ਨਿਭਾ ਸਕਦੇ ਹਨ।
ਕੋਚ ਗ੍ਰਾਸ ਰੂਟ (ਜ਼ਮੀਨੀ ਪੱਧਰ) ਤੋਂ ਖਿਡਾਰੀਆਂ ਨੂੰ ਓਲੰਪਿਕ ਲਈ ਤਿਆਰ ਕਰਨ ਵਿੱਚ ਪੂਰੀ ਲਗਨ ਨਾਲ ਜੁਟ ਜਾਣ। ਮੰਤਰੀ ਅੱਜ ਬਤੌਰ ਮੁੱਖ ਮਹਿਮਾਨ ਹਰਿਆਣਾ ਨਿਵਾਸ ਚੰਡੀਗੜ੍ਹ ਵਿਖੇ ਆਯੋਜਿਤ ਸਨਮਾਨ ਸਮਾਰੋਹ ਵਿੱਚ ਸੂਬੇ ਦੇ ਉੱਤਮ ਅਤੇ ਹੋਣਹਾਰ ਖਿਡਾਰੀਆਂ ਨੂੰ ਗਰੁੱਪ (ਕ), (ਖ) ਅਤੇ (ਗ) ਦੇ ਸਰਕਾਰੀ ਕੋਚਾਂ ਦੇ ਅਹੁਦਿਆਂ ਦੇ ਨਿਯੁਕਤੀ ਪੱਤਰ ਸੌਂਪਣ ਦੌਰਾਨ ਸੰਬੋਧਨ ਕਰ ਰਹੇ ਸਨ।
ਖੇਡ ਮੰਤਰੀ ਨੇ ਖਿਡਾਰੀਆਂ, ਉਨ੍ਹਾਂ ਦੇ ਮਾਪਿਆਂ ਅਤੇ ਕੋਚਾਂ ਨੂੰ ਵਧਾਈ ਦਿੰਦਿਆਂ ਇਸ ਨੂੰ ਨੌਜਵਾਨਾਂ ਦੇ ਪਸੀਨੇ, ਤਪੱਸਿਆ ਅਤੇ ਮਾਤਾ-ਪਿਤਾ ਦੇ ਤਿਆਗ ਦੀ ਜਿੱਤ ਦਾ ਉਤਸਵ ਦੱਸਿਆ। ਇਸ ਦੌਰਾਨ ਮੰਤਰੀ ਨੇ 3 ਸੀਨੀਅਰ ਅਤੇ 20 ਜੂਨੀਅਰ ਕੋਚਾਂ ਨੂੰ ਨਿਯੁਕਤੀ ਪੱਤਰ ਸੌਂਪੇ। ਖੇਡ ਵਿਭਾਗ ਨੇ ਪਿਛਲੇ ਮਹੀਨੇ ਵੀ 10 ਕੋਚਾਂ ਨੂੰ ਨਿਯੁਕਤੀ ਪੱਤਰ ਸੌਂਪੇ ਸਨ।
ਇੱਕ ਮਹੀਨੇ ਵਿੱਚ ਵਿਭਾਗ 33 ਖਿਡਾਰੀਆਂ ਨੂੰ ਕੋਚ ਦੀ ਨੌਕਰੀ ਦੇ ਚੁੱਕਾ ਹੈ। ਉਨ੍ਹਾਂ ਕਿਹਾ ਕਿ ਮੁੱਖ ਮੰਤਰੀ ਸ੍ਰੀ ਨਾਇਬ ਸਿੰਘ ਸੈਣੀ ਦੀ ਅਗਵਾਈ ਵਿੱਚ ਸਰਕਾਰ ਰਾਜ ਨੂੰ ਖੇਡਾਂ ਦੇ ਖੇਤਰ ਵਿੱਚ ਦੁਨੀਆ ਦਾ ਸਭ ਤੋਂ ਆਧੁਨਿਕ ਅਤੇ ਸਹੂਲਤਾਂ ਭਰਿਆ ਰਾਜ ਬਣਾਉਣ ਲਈ ਦਿਨ-ਰਾਤ ਕੰਮ ਕਰ ਰਹੀ ਹੈ।
ਉਨ੍ਹਾਂ ਕਿਹਾ ਕਿ ਸੂਬਾ ਸਰਕਾਰ ਖੇਡ ਨੀਤੀ ਦੇ ਤਹਿਤ ਉੱਤਮ ਖਿਡਾਰੀਆਂ ਨੂੰ ਡੀ ਗਰੁੱਪ ਦੀਆਂ ਨੌਕਰੀਆਂ ਵਿੱਚ 10 ਫੀਸਦੀ ਅਤੇ ਸੀ ਗਰੁੱਪ ਦੀਆਂ ਨੌਕਰੀਆਂ ਵਿੱਚ 3 ਫੀਸਦੀ ਦਾ ਖੇਡ ਕੋਟਾ ਦਿੰਦੀ ਹੈ।
'ਦੁੱਧ-ਦਹੀਂ ਕਾ ਖਾਣਾ' ਸਿਰਫ ਕਹਾਵਤ ਨਹੀਂ, ਸਾਡੀ ਤਾਕਤ
ਖੇਡ ਰਾਜ ਮੰਤਰੀ ਨੇ ਕਿਹਾ ਕਿ ਹਰਿਆਣਾ ਦੀ ਮਿੱਟੀ ਦੀ ਇਹ ਤਾਸੀਰ ਹੈ ਕਿ ਇੱਥੋਂ ਦਾ ਨੌਜਵਾਨ ਮੈਦਾਨ ਵਿੱਚ ਸਿਰਫ ਖੇਡਣ ਲਈ ਨਹੀਂ, ਬਲਕਿ ਤਿਰੰਗੇ ਦੀ ਸ਼ਾਨ ਵਧਾਉਣ ਲਈ ਉਤਰਦਾ ਹੈ। ਓਲੰਪਿਕ ਤੋਂ ਲੈ ਕੇ ਨੈਸ਼ਨਲ ਚੈਂਪੀਅਨਸ਼ਿਪ ਤੱਕ ਸਾਡੇ ਖਿਡਾਰੀਆਂ ਨੇ ਹਮੇਸ਼ਾ ਰਾਜ ਦਾ ਨਾਂ ਰੌਸ਼ਨ ਕੀਤਾ ਹੈ।
ਉਨ੍ਹਾਂ ਸਰਕਾਰ ਦੀ ਖੇਡ ਨੀਤੀ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ "ਸਾਡੀ 'ਮੈਡਲ ਲਿਆਓ, ਅਹੁਦਾ ਪਾਓ' (ਪਦਕ ਲਾਓ, ਪਦ ਪਾਓ) ਨੀਤੀ ਦਾ ਉਦੇਸ਼ ਖਿਡਾਰੀਆਂ ਨੂੰ ਭਵਿੱਖ ਦੀ ਚਿੰਤਾ ਤੋਂ ਮੁਕਤ ਰੱਖਣਾ ਹੈ। ਸਰਕਾਰ ਖਿਡਾਰੀਆਂ ਨੂੰ ਸਿਰਫ ਮੈਡਲ ਜਿੱਤਣ 'ਤੇ ਵਧਾਈ ਨਹੀਂ ਦਿੰਦੀ, ਬਲਕਿ ਉਨ੍ਹਾਂ ਦੇ ਸੁਰੱਖਿਅਤ ਭਵਿੱਖ ਦੀ ਗਾਰੰਟੀ ਵੀ ਦਿੰਦੀ ਹੈ, ਤਾਂ ਜੋ ਉਹ ਬਿਨਾਂ ਕਿਸੇ ਮਾਨਸਿਕ ਤਣਾਅ ਦੇ ਦੇਸ਼ ਲਈ ਖੇਡ ਸਕਣ।"
ਕੋਚਾਂ ਨੂੰ ਸੱਦਾ: ਜ਼ਮੀਨੀ ਪੱਧਰ ਤੋਂ ਤਰਾਸ਼ੋ ਨਵੇਂ ਗਲੋਬਲ ਚੈਂਪੀਅਨ
ਖੇਡ ਮੰਤਰੀ ਨੇ ਕਿਹਾ ਕਿ ਕੋਚ ਹੀ ਖਿਡਾਰੀਆਂ ਨੂੰ ਤਰਾਸ਼ ਕੇ ਹੀਰਾ ਬਣਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਉਂਦੇ ਹਨ। ਬਦਲਦੇ ਦੌਰ ਦੀ ਤਕਨੀਕ ਅਤੇ ਆਧੁਨਿਕ ਟ੍ਰੇਨਿੰਗ ਦੇ ਮਹੱਤਵ 'ਤੇ ਜ਼ੋਰ ਦਿੰਦੇ ਹੋਏ ਉਨ੍ਹਾਂ ਨੇ ਕੋਚਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਪਿੰਡਾਂ ਅਤੇ ਕਸਬਿਆਂ ਵਿੱਚੋਂ ਜ਼ਮੀਨੀ ਪੱਧਰ 'ਤੇ ਨਵੀਆਂ ਖੇਡ ਪ੍ਰਤਿਭਾਵਾਂ ਦੀ ਪਛਾਣ ਕਰਨ, ਖਿਡਾਰੀਆਂ ਨੂੰ ਕਾਮਨਵੈਲਥ, ਏਸ਼ੀਅਨ, ਵਿਸ਼ਵ ਚੈਂਪੀਅਨਸ਼ਿਪ ਅਤੇ ਅੰਤਰਰਾਸ਼ਟਰੀ ਪ੍ਰਤੀਯੋਗਤਾਵਾਂ ਲਈ ਤਿਆਰ ਕਰਨ ਵਿੱਚ ਦੁੱਗਣੀ ਮਿਹਨਤ ਕਰਨ।
ਇਸ ਦੇ ਲਈ ਸੂਬਾ ਸਰਕਾਰ ਹਰ ਆਧੁਨਿਕ ਸਹੂਲਤ, ਇੰਫਰਾਸਟਰਕਚਰ ਅਤੇ ਸਰੋਤ ਦੇਣ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹੈ।
ਖਿਡਾਰੀ ਹੁਣ ਸਰਕਾਰੀ ਸੇਵਾਵਾਂ ਵਿੱਚ ਵੀ ਬਣਨ ਰੋਲ ਮਾਡਲ
ਸਰਕਾਰੀ ਨੌਕਰੀ ਨੂੰ ਜ਼ਿੰਦਗੀ ਦੀ ਇੱਕ ਨਵੀਂ ਪਾਰੀ ਦੱਸਦਿਆਂ ਸ੍ਰੀ ਗੌਰਵ ਗੌਤਮ ਨੇ ਖਿਡਾਰੀਆਂ ਤੋਂ ਖੇਡ ਦੇ ਮੈਦਾਨ ਵਰਗਾ ਅਨੁਸ਼ਾਸਨ ਅਤੇ ਸਮਰਪਣ ਪ੍ਰਸ਼ਾਸਨਿਕ ਸੇਵਾਵਾਂ ਵਿੱਚ ਵੀ ਬਣਾਈ ਰੱਖਣ ਦੀ ਉਮੀਦ ਪ੍ਰਗਟਾਈ। ਉਨ੍ਹਾਂ ਨੇ ਕਿਹਾ ਕਿ ਖਿਡਾਰੀ ਹੁਣ ਹਰਿਆਣਾ ਦੇ ਲੱਖਾਂ ਨੌਜਵਾਨਾਂ ਦੇ 'ਰੋਲ ਮਾਡਲ' ਹਨ, ਜਿਨ੍ਹਾਂ ਨੂੰ ਦੇਖ ਕੇ ਪਿੰਡਾਂ ਦੇ ਬੱਚੇ ਖੇਡ ਦੇ ਮੈਦਾਨ ਵੱਲ ਆਕਰਸ਼ਿਤ ਹੋਣਗੇ।
ਉਨ੍ਹਾਂ ਖਿਡਾਰੀਆਂ ਨੂੰ ਸਫ਼ਲਤਾ ਦੇ ਵਿਚਕਾਰ ਹਮੇਸ਼ਾ ਨਿਮਰਤਾ ਬਣਾਈ ਰੱਖਣ ਦੀ ਸਿੱਖਿਆ ਦਿੱਤੀ। ਖੇਡ ਰਾਜ ਮੰਤਰੀ ਨੇ ਸੂਬੇ ਦੀਆਂ ਖੇਡ ਨਰਸਰੀਆਂ ਅਤੇ ਸਟੇਡੀਅਮਾਂ ਦੇ ਆਧੁਨਿਕੀਕਰਨ ਦੇ ਸੰਕਲਪ ਨੂੰ ਦੁਹਰਾਉਂਦੇ ਹੋਏ ਸਾਰਿਆਂ ਨੂੰ ਇੱਕ ਸਿਹਤਮੰਦ, ਖੁਸ਼ਹਾਲ ਅਤੇ 'ਨੰਬਰ ਵਨ' ਖੇਡ ਰਾਜ ਹਰਿਆਣਾ ਦੇ ਨਿਰਮਾਣ ਵਿੱਚ ਯੋਗਦਾਨ ਪਾਉਣ ਦਾ ਸੱਦਾ ਦਿੱਤਾ।
ਇਸ ਮੌਕੇ ਹਰਿਆਣਾ ਖੇਡ ਵਿਭਾਗ ਦੇ ਪ੍ਰਧਾਨ ਸਕੱਤਰ ਸ੍ਰੀ ਵਿਜੇ ਸਿੰਘ ਦਹੀਆ, ਐਡੀਸ਼ਨਲ ਡਾਇਰੈਕਟਰ ਸ੍ਰੀ ਅਸ਼ਵਨੀ ਮਲਿਕ ਅਤੇ ਹੋਰ ਅਧਿਕਾਰੀ ਮੌਜੂਦ ਸਨ।