ਭਾਰਤੀ ਜਨਤਾ ਪਾਰਟੀ ਦੇ ਹਲਕਾ ਉੱਤਰੀ ਤੋਂ ਆਗੂ ਅਕਸ਼ੈ ਸ਼ਰਮਾ ਵੱਲੋਂ “ਮੇਰਾ ਬੂਥ ਸਭ ਤੋਂ ਮਜ਼ਬੂਤ” ਅਭਿਆਨ ਤਹਿਤ ਗੰਡਾ ਸਿੰਘ ਵਾਲਾ ਅਤੇ ਆਸ-ਪਾਸ ਦੇ ਇਲਾਕਿਆਂ ਵਿੱਚ ਇੱਕ ਪ੍ਰਭਾਵਸ਼ਾਲੀ ਬੈਠਕ ਦਾ ਆਯੋਜਨ ਕੀਤਾ ਗਿਆ। ਇਸ ਮੌਕੇ ‘ਤੇ ਵੱਡੀ ਗਿਣਤੀ ਵਿੱਚ ਇਲਾਕੇ ਦੇ ਵਸਨੀਕ, ਨੌਜਵਾਨ ਅਤੇ ਬੂਥ ਵਰਕਰ ਮੌਜੂਦ ਰਹੇ।
ਅਕਸ਼ੈ ਸ਼ਰਮਾ ਨੇ ਆਪਣੇ ਸੰਬੋਧਨ ਦੌਰਾਨ ਕਿਹਾ ਕਿ ਸ਼ਹਿਰ ਦੀ ਅਸਲੀ ਤਾਕਤ ਮਿਹਨਤਕਸ਼ ਲੋਕ ਹਨ। “ਤੁਸੀਂ ਹੀ ਇਸ ਸ਼ਹਿਰ ਦੀ ਰੀੜ ਦੀ ਹੱਡੀ ਹੋ। ਤੁਹਾਡੀ ਮਿਹਨਤ ਨਾਲ ਹੀ ਇਹ ਸਿਸਟਮ ਚੱਲਦਾ ਹੈ। ਜੇ ਤੁਸੀਂ ਰੁਕ ਜਾਓ, ਤਾਂ ਸ਼ਹਿਰ ਰੁਕ ਜਾਂਦਾ ਹੈ,” ਉਨ੍ਹਾਂ ਕਿਹਾ।ਉਨ੍ਹਾਂ ਨੇ ਕਿਹਾ ਕਿ ਅੱਜ ਤੱਕ ਲੋਕਾਂ ਦੇ ਅਸਲ ਮੁੱਦਿਆਂ ਨੂੰ ਨਜ਼ਰਅੰਦਾਜ਼ ਕੀਤਾ ਗਿਆ ਹੈ।
“ਸੜਕਾਂ, ਸੀਵਰ ਅਤੇ ਲਾਈਟਾਂ ਲਗਾਉਣਾ ਹੀ ਵਿਕਾਸ ਨਹੀਂ। ਅਸਲੀ ਵਿਕਾਸ ਉਹ ਹੈ ਜਿੱਥੇ ਆਮ ਇਨਸਾਨ ਨੂੰ ਢੰਗ ਦਾ ਇਲਾਜ, ਬੱਚਿਆਂ ਨੂੰ ਸਿੱਖਿਆ ਅਤੇ ਨੌਜਵਾਨਾਂ ਨੂੰ ਰੋਜ਼ਗਾਰ ਮਿਲੇ,” ਉਨ੍ਹਾਂ ਨੇ ਜ਼ੋਰ ਦੇ ਕੇ ਕਿਹਾ। ਸਰਕਾਰੀ ਸਿਹਤ ਪ੍ਰਣਾਲੀ ‘ਤੇ ਸਵਾਲ ਉਠਾਉਂਦੇ ਹੋਏ ਅਕਸ਼ੈ ਸ਼ਰਮਾ ਨੇ ਕਿਹਾ ਕਿ ਅੱਜ ਵੀ ਗਰੀਬ ਮਰੀਜ਼ਾਂ ਨੂੰ ਦਵਾਈਆਂ ਬਾਹਰੋਂ ਖਰੀਦਣੀਆਂ ਪੈਂਦੀਆਂ ਹਨ ਅਤੇ ਕਈ ਵਾਰ ਟੈਸਟਾਂ ਦੇ ਪੈਸੇ ਨਾ ਹੋਣ ਕਰਕੇ ਬਿਨਾਂ ਇਲਾਜ ਕਰਵਾਏ ਵਾਪਸ ਜਾਣਾ ਪੈਂਦਾ ਹੈ।
ਨੌਜਵਾਨਾਂ ਨੂੰ ਸੰਦੇਸ਼ ਦਿੰਦਿਆਂ ਉਨ੍ਹਾਂ ਨੇ ਕਿਹਾ ਕਿ ਦਸਵੀਂ ਤੋਂ ਬਾਅਦ ਦੇ ਪੰਜ ਸਾਲ ਜੀਵਨ ਦੀ ਦਿਸ਼ਾ ਤੈਅ ਕਰਦੇ ਹਨ। “ਜੋ ਇਹ ਸਮਾਂ ਪੜ੍ਹਾਈ ‘ਚ ਲਗਾਉਂਦਾ ਹੈ, ਉਹ ਅੱਗੇ ਵਧਦਾ ਹੈ, ਨਹੀਂ ਤਾਂ ਉਹ ਘੱਟ ਤਨਖਾਹ ਵਾਲੀਆਂ ਨੌਕਰੀਆਂ ‘ਚ ਫਸ ਜਾਂਦਾ ਹੈ। ਅੱਜ 20-50 ਹਜ਼ਾਰ ਦੀ ਤਨਖਾਹ ਨਾਲ ਵੀ ਘਰ ਚਲਾਉਣਾ ਔਖਾ ਹੈ,” ਉਨ੍ਹਾਂ ਨੇ ਕਿਹਾ।
ਉਨ੍ਹਾਂ ਨੇ ਬੇਰੋਜ਼ਗਾਰੀ ਅਤੇ ਨਸ਼ਿਆਂ ਦੇ ਮੁੱਦੇ ‘ਤੇ ਵੀ ਚਿੰਤਾ ਜਤਾਉਂਦੇ ਹੋਏ ਕਿਹਾ ਕਿ ਨੌਜਵਾਨਾਂ ਨੂੰ ਸਹੀ ਦਿਸ਼ਾ ਦੇਣ ਲਈ ਨਵੇਂ ਉਦਯੋਗ, ਫੈਕਟਰੀਆਂ ਅਤੇ ਰੋਜ਼ਗਾਰ ਦੇ ਮੌਕੇ ਪੈਦਾ ਕਰਨੇ ਜ਼ਰੂਰੀ ਹਨ। ਅਕਸ਼ੈ ਸ਼ਰਮਾ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਜਦੋਂ ਵੀ ਕੋਈ ਨੇਤਾ ਵੋਟ ਮੰਗਣ ਆਵੇ, ਉਸਨੂੰ ਜ਼ਰੂਰ ਸਵਾਲ ਪੁੱਛੋ।
“ਰੋਜ਼ਗਾਰ, ਸਿੱਖਿਆ, ਸਿਹਤ ਅਤੇ ਸੁਰੱਖਿਆ ਬਾਰੇ ਸਵਾਲ ਪੁੱਛਣਾ ਤੁਹਾਡਾ ਹੱਕ ਹੈ,” ਉਨ੍ਹਾਂ ਨੇ ਕਿਹਾ। ਉਨ੍ਹਾਂ ਨੇ ਵੋਟ ਦੀ ਮਹੱਤਤਾ ਬਾਰੇ ਕਿਹਾ, “ਤੁਹਾਡੀ ਵੋਟ ਤੁਹਾਡੀ ਇਜ਼ਤ ਹੈ। ਇਹ ਇੱਕ ਦਿਨ ਦਾ ਨਹੀਂ, ਸਗੋਂ ਪੰਜ ਸਾਲਾਂ ਦਾ ਫੈਸਲਾ ਹੁੰਦਾ ਹੈ। ਇਸਨੂੰ ਕਦੇ ਵੀ ਛੋਟੇ ਲਾਭਾਂ ਲਈ ਨਾ ਵੇਚੋ।
ਅੰਤ ਵਿੱਚ ਉਨ੍ਹਾਂ ਨੇ ਕਿਹਾ ਕਿ ਇੱਕ ਵਿਕਸਿਤ ਪਰਿਵਾਰ, ਵਿਕਸਿਤ ਮੁਹੱਲਾ ਅਤੇ ਵਿਕਸਿਤ ਇਲਾਕਾ ਮਿਲ ਕੇ ਹੀ ਇੱਕ ਮਜ਼ਬੂਤ ਅਤੇ ਵਿਕਸਿਤ ਅੰਮ੍ਰਿਤਸਰ ਦੀ ਨੀਂਹ ਰੱਖਦੇ ਹਨ। ਮੇਰਾ ਬੂਥ ਸਭ ਤੋਂ ਮਜ਼ਬੂਤ ਅਭਿਆਨ ਤੇ ਤਹਿਤ ਅਕਸ਼ੈ ਸ਼ਰਮਾ ਵੱਲੋਂ ਅਨੰਦ ਅਵਾਇਨੂ, ਪ੍ਰੀਤ ਨਗਰ ਅਤੇ ਹਲਕਾ ਉੱਤਰੀ ਦੇ ਹੋਰ ਇਲਾਕਿਆਂ ਚ ਬੈਠਕ ਕੀਤੀ ਗਈ।
ਇਸ ਦੌਰਾਨ ਪਾਵਨ ਕੁਮਾਰ ਹੈਪੀ ਸਰਪੰਚ, ਸਮਦਿਸ਼ ਮਹਾਜਨ, ਅਭੇ ਸੁਰੀ, ਸੂਰਜ ਵਧਵਾ,ਦਿਲਬਾਗ ਸਿੰਘ, ਰਾਜਪਾਲ ਸਿੰਘ, ਬਿੱਟੂ ਪ੍ਰਧਾਨ, ਕੁਲਵੰਤ ਸਿੰਘ, ਬੇਬੀ, ਰਾਮ ਕ੍ਰਿਸ਼ਨ ਅਤੇ ਹੋਰ ਮੌਜੂਦ ਸੀ।