ਪੰਜਾਬ ਇੰਜੀਨੀਅਰਿੰਗ ਕਾਲਜ (ਡੀਮਡ ਟੂ ਬੀ ਯੂਨੀਵਰਸਿਟੀ), ਚੰਡੀਗੜ੍ਹ ਦੇ ਸਿਵਲ ਇੰਜੀਨੀਅਰਿੰਗ ਵਿਭਾਗ ਨੇ ਅੱਜ ਉੱਚ ਪੱਧਰੀ ਭੂ-ਸਥਾਨਕ ਖੇਤਰਾਂ ਵਿੱਚ ਅਕਾਦਮਿਕ ਅਤੇ ਖੋਜ ਸਹਿਯੋਗ ਨੂੰ ਮਜ਼ਬੂਤ ਕਰਨ ਦੇ ਉਦੇਸ਼ ਨਾਲ ਸਰਵੇ ਆਫ਼ ਇੰਡੀਆ ਨਾਲ ਇੱਕ ਸਮਝੌਤਾ ਯਾਦਦਾਸ਼ਤ (ਐਮਓਯੂ) ‘ਤੇ ਦਸਤਖਤ ਕੀਤੇ। ਇਹ ਐਮਓਯੂ 24 ਫ਼ਰਵਰੀ, 2026 ਨੂੰ ਰਸਮੀ ਤੌਰ ‘ਤੇ ਸਾਈਨ ਕੀਤਾ ਗਿਆ, ਜੋ ਉਭਰਦੀਆਂ ਤਕਨੀਕਾਂ ਵਿੱਚ ਉਦਯੋਗ–ਅਕਾਦਮੀਆ ਸਹਿਯੋਗ ਵਧਾਉਣ ਵੱਲ ਇੱਕ ਮਹੱਤਵਪੂਰਨ ਕਦਮ ਹੈ।
ਐਮਓਯੂ ਸਾਈਨਿੰਗ ਸਮਾਰੋਹ ਦੌਰਾਨ ਸਰਵੇ ਆਫ਼ ਇੰਡੀਆ ਵੱਲੋਂ ਸ੍ਰੀ ਗੌਰਵ ਕੁਮਾਰ ਸਿੰਘ, ਸੁਪਰਿੰਟੈਂਡੈਂਟ ਆਫ਼ ਸਰਵੇਅਰ (ਡਾਇਰੈਕਟਰ, ਕਰੰਟ ਡਿਊਟੀ), ਪੰਜਾਬ, ਹਰਿਆਣਾ, ਹਿਮਾਚਲ ਪ੍ਰਦੇਸ਼ ਅਤੇ ਚੰਡੀਗੜ੍ਹ, ਜਿਓ-ਸਪੇਸ਼ਿਅਲ ਡਾਇਰੈਕਟਰੇਟ, ਨਾਲ ਸ੍ਰੀ ਨਿਸ਼ਾਂਤ ਵਰਮਾ ਅਤੇ ਸ੍ਰੀ ਹਰੀਸ਼ ਮਿੱਤਲ, ਡਿਪਟੀ ਸੁਪਰਿੰਟੈਂਡੈਂਟ ਆਫ਼ ਸਰਵੇਅਰ ਵੀ ਹਾਜ਼ਰ ਰਹੇ। ਪੇਕ ਵੱਲੋਂ ਇਸ ਸਮਾਰੋਹ ਵਿੱਚ ਡਾਇਰੈਕਟਰ ਪ੍ਰੋ. ਰਾਜੇਸ਼ ਕੁਮਾਰ ਭਾਟੀਆ, ਪ੍ਰੋ. ਰਾਜੇਸ਼ ਕੁਮਾਰ ਕਾਂਡਾ (ਹੈਡ, ਐਲੁਮਨਾਈ, ਕਾਰਪੋਰੇਟ ਐਂਡ ਇੰਟਰਨੈਸ਼ਨਲ ਰਿਲੇਸ਼ਨਜ਼), ਪ੍ਰੋ. ਐੱਸ.ਕੇ. ਸਿੰਘ (ਹੈਡ, ਸਿਵਲ ਇੰਜੀਨੀਅਰਿੰਗ ਵਿਭਾਗ), ਪ੍ਰੋ. ਹਰਅਮ੍ਰਿਤ ਸਿੰਘ ਸੰਧੂ, ਡਾ. ਜਿੰਮੀ ਕਰਲੂਪੀਆ (ਪ੍ਰੋਫੈਸਰ-ਇਨ-ਚਾਰਜ, ਐਲੁਮਨਾਈ, ਕਾਰਪੋਰੇਟ ਐਂਡ ਇੰਟਰਨੈਸ਼ਨਲ ਰਿਲੇਸ਼ਨਜ਼) ਅਤੇ ਡਾ. ਅਰਸ਼ਦੀਪ ਸਿੰਘ ਸ਼ਾਮਲ ਰਹੇ।
ਇਹ ਐਮਓਯੂ ਜਿਓਇੰਫੋਰਮੈਟਿਕਸ, ਆਰਟੀਫ਼ਿਸ਼ਲ ਇੰਟੈਲੀਜੈਂਸ ਅਤੇ ਮਸ਼ੀਨ ਲਰਨਿੰਗ ਆਧਾਰਿਤ ਆਟੋਮੇਟਡ ਫੀਚਰ ਐਕਸਟ੍ਰੈਕਸ਼ਨ, ਜਿਓਡੇਸੀ, ਖਗੋਲ ਵਿਗਿਆਨ ਅਤੇ ਸੰਬੰਧਿਤ ਇੰਜੀਨੀਅਰਿੰਗ ਵਿਸ਼ਿਆਂ ਵਿੱਚ ਅਕਾਦਮਿਕ ਅਤੇ ਖੋਜ ਸਹਿਯੋਗ ਨੂੰ ਉਤਸ਼ਾਹਿਤ ਕਰੇਗਾ। ਇਸ ਤਹਿਤ ਸਾਂਝੇ ਖੋਜ ਅਤੇ ਵਿਕਾਸ ਕਾਰਜ, ਸਰਵੇ ਆਫ਼ ਇੰਡੀਆ ਨੂੰ ਅਕਾਦਮਿਕ ਸਹਿਯੋਗ ਅਤੇ ਯੋਗ ਅਧਿਕਾਰੀਆਂ ਨੂੰ ਪੇਕ ਵਿੱਚ ਪੋਸਟਗ੍ਰੈਜੂਏਟ ਅਤੇ ਪੀਐਚਡੀ ਵਰਗੇ ਉੱਚ ਅਧਿਐਨ ਦੇ ਮੌਕੇ ਪ੍ਰਦਾਨ ਕੀਤੇ ਜਾਣਗੇ।
ਇਸ ਮੌਕੇ ‘ਤੇ ਡਾਇਰੈਕਟਰ ਪ੍ਰੋ. ਰਾਜੇਸ਼ ਕੁਮਾਰ ਭਾਟੀਆ ਨੇ ਕਿਹਾ ਕਿ ਅਜਿਹੇ ਰਣਨੀਤਕ ਸਹਿਯੋਗ ਵਿਦਿਆਰਥੀਆਂ ਨੂੰ ਉਦਯੋਗ-ਸੰਬੰਧੀ ਹੁਨਰ ਅਤੇ ਵਿਹਾਰਕ ਅਨੁਭਵ ਦੇਣ ਵਿੱਚ ਮਦਦਗਾਰ ਸਾਬਤ ਹੁੰਦੇ ਹਨ। ਉਨ੍ਹਾਂ ਨੇ ਪੇਕ ਕੈਂਪਸ ਵਿੱਚ ਉਪਲਬਧ ਉੱਚ ਪੱਧਰੀ ਖੋਜ ਸੁਵਿਧਾਵਾਂ ਬਾਰੇ ਵੀ ਜਾਣਕਾਰੀ ਦਿੱਤੀ।
ਪ੍ਰੋ. ਐੱਸ.ਕੇ. ਸਿੰਘ ਨੇ ਇਸ ਸਾਂਝੇਦਾਰੀ ਤੋਂ ਦੋਵਾਂ ਸੰਸਥਾਵਾਂ ਨੂੰ ਮਿਲਣ ਵਾਲੇ ਪਰਸਪਰ ਲਾਭਾਂ ਉੱਤੇ ਜ਼ੋਰ ਦਿੱਤਾ, ਜਦਕਿ ਪ੍ਰੋ. ਰਾਜੇਸ਼ ਕੁਮਾਰ ਕਾਂਡਾ ਨੇ ਲਾਗੂ ਖੋਜ ਅਤੇ ਨਵੀਨਤਾ ਨੂੰ ਮਜ਼ਬੂਤ ਕਰਨ ਵਿੱਚ ਉਦਯੋਗਕ ਸਹਿਯੋਗ ਦੀ ਮਹੱਤਤਾ ਨੂੰ ਉਭਾਰਿਆ। ਸ੍ਰੀ ਗੌਰਵ ਕੁਮਾਰ ਸਿੰਘ ਨੇ ਵੀ ਇਸ ਸਹਿਯੋਗ ਪ੍ਰਤੀ ਆਸ਼ਾਵਾਦ ਜਤਾਉਂਦਿਆਂ ਕਿਹਾ ਕਿ ਅਜਿਹੀਆਂ ਅਕਾਦਮਿਕ ਭਾਈਚਾਰਕ ਸਾਂਝਾਂ ਭੂ-ਸਥਾਨਕ ਖੋਜ ਅਤੇ ਸਮਰੱਥਾ ਵਿਕਾਸ ਲਈ ਬਹੁਤ ਜ਼ਰੂਰੀ ਹਨ ਅਤੇ ਉਨ੍ਹਾਂ ਨੇ ਸਰਵੇ ਆਫ਼ ਇੰਡੀਆ ਅਤੇ ਪੀਈਸੀ ਵਿਚਕਾਰ ਲੰਬੇ ਸਮੇਂ ਦੇ ਸਹਿਯੋਗ ਦੀ ਆਸ ਜਤਾਈ।
ਪ੍ਰੋ. ਹਰਅਮ੍ਰਿਤ ਸਿੰਘ ਸੰਧੂ ਨੇ ਇਸ ਐਮਓਯੂ ਦੀ ਤਕਨੀਕੀ ਮਹੱਤਤਾ ‘ਤੇ ਰੋਸ਼ਨੀ ਪਾਂਦਿਆਂ ਕਿਹਾ ਕਿ ਇਹ ਸਹਿਯੋਗ ਉੱਚ-ਸਟੀਕਤਾ ਵਾਲੇ ਭੂ-ਸਥਾਨਕ ਡਾਟਾ ਪ੍ਰੋਸੈਸਿੰਗ, ਆਟੋਮੇਟਡ ਫੀਚਰ ਐਕਸਟ੍ਰੈਕਸ਼ਨ ਅਤੇ ਏਆਈ ਆਧਾਰਿਤ ਜਿਓਡੇਸੀ ਐਪਲੀਕੇਸ਼ਨਾਂ ਵਿੱਚ ਉੱਚ ਪੱਧਰੀ ਖੋਜ ਨੂੰ ਉਤਸ਼ਾਹਿਤ ਕਰੇਗਾ। ਜਿਸ ਨਾਲ ਅਕਾਦਮਿਕ ਖੇਤਰ ਅਤੇ ਰਾਸ਼ਟਰੀ ਮੈਪਿੰਗ ਪਹਲਾਂ ਦੋਵਾਂ ਨੂੰ ਲਾਭ ਹੋਵੇਗਾ।
ਇਹ ਸਹਿਯੋਗ ਪ੍ਰਭਾਵਸ਼ਾਲੀ ਖੋਜ, ਸਮਰੱਥਾ ਵਿਕਾਸ ਅਤੇ ਗਿਆਨ ਦੇ ਆਦਾਨ-ਪ੍ਰਦਾਨ ਲਈ ਨਵੇਂ ਰਾਹ ਖੋਲ੍ਹੇਗਾ ਅਤੇ ਖੋਜ-ਆਧਾਰਿਤ ਸਿੱਖਿਆ ਅਤੇ ਰਾਸ਼ਟਰੀ ਵਿਕਾਸ ਪ੍ਰਤੀ ਪੀਈਸੀ ਦੀ ਵਚਨਬੱਧਤਾ ਨੂੰ ਹੋਰ ਮਜ਼ਬੂਤ ਕਰੇਗਾ।