ਭਾਰਤੀ ਮਾਨਕ ਬਿਊਰੋ (ਬੀਆਈਐਸ) ਵੱਲੋਂ ਪੰਜਾਬ ਇੰਜੀਨੀਅਰਿੰਗ ਕਾਲਜ (ਡੀਮਡ ਟੂ ਬੀ ਯੂਨੀਵਰਸਿਟੀ), ਚੰਡੀਗੜ੍ਹ ਦੇ ਸਹਿਯੋਗ ਨਾਲ ਇੱਕ "ਫੈਕਲਟੀ ਸੰਵੇਦਨਸ਼ੀਲਤਾ ਵਰਕਸ਼ਾਪ" ਆਯੋਜਿਤ ਕੀਤੀ ਗਈ। ਇਹ ਵਰਕਸ਼ਾਪ ਬੀਆਈਐਸ ਦੇ ਐਜੂਕੇਸ਼ਨ ਆਊਟਰੀਚ ਪ੍ਰੋਗਰਾਮ ਅਧੀਨ ਹੋਈ, ਜਿਸ ਦਾ ਮਕਸਦ ਫੈਕਲਟੀ ਮੈਂਬਰਾਂ ਨੂੰ ਮਾਨਕੀਕਰਨ ਦੇ ਮਹੱਤਵ ਅਤੇ ਇਸਨੂੰ ਪਾਠਕ੍ਰਮ ਅਤੇ ਰਿਸਰਚ ਵਿੱਚ ਸ਼ਾਮਲ ਕਰਨ ਬਾਰੇ ਜਾਗਰੂਕ ਕਰਨਾ ਸੀ।
ਇਸ ਮੌਕੇ ਦੀ ਰੌਣਕ ਵਧਾਈ ਸ਼੍ਰੀ ਵਿਸ਼ਾਲ ਤੋਮਰ, ਡਾਇਰੈਕਟਰ ਤੇ ਮੁਖੀ, ਬੀਆਈਐਸ ਚੰਡੀਗੜ੍ਹ ਬ੍ਰਾਂਚ; ਪ੍ਰੋ. ਰਾਜੇਸ਼ ਕੁਮਾਰ ਭਾਟੀਆ, ਡਾਇਰੈਕਟਰ ਪੇਕ; ਪ੍ਰੋ. ਉਮੇਸ਼ ਸ਼ਰਮਾ, ਡੀਨ (ਸਪੋਂਸਰਡ ਰਿਸਰਚ ਅਤੇ ਇੰਡਸਟਰੀਅਲ ਕੌਂਸਲਟੈਂਸੀ); ਡਾ. ਮਨੋਹਰ ਸਿੰਘ, ਐਸੋਸੀਏਟ ਡੀਨ ਐਸਆਰਆਈਸੀ; ਸ਼੍ਰੀ ਵਿਚਿਤ੍ਰ ਵੀਰ ਸਿੰਘ ਅਤੇ ਸ਼੍ਰੀ ਸ਼ੁਭਮ ਤਿਵਾਰੀ, ਸੰਯੁਕਤ ਡਾਇਰੈਕਟਰ, ਬੀਆਈਐਸ ਮੁੱਖ ਦਫ਼ਤਰ, ਦਿੱਲੀ ਨੇ।
ਸ਼ੁਰੂਆਤ ਵਿੱਚ ਪ੍ਰੋ. ਉਮੇਸ਼ ਸ਼ਰਮਾ ਨੇ ਬੀਆਈਐਸ ਦੀ ਟੀਮ ਦਾ ਪੇਕ ਵਿੱਚ ਸਵਾਗਤ ਕੀਤਾ ਅਤੇ ਬੀਆਈਐਸ ਤੇ ਪੇਕ ਵਿਚਾਲੇ ਸਾਈਨ ਹੋਏ ਐਮਓਯੂ ਬਾਰੇ ਜਾਣਕਾਰੀ ਦਿੱਤੀ, ਜੋ ਇੱਕ ਮਜ਼ਬੂਤ ਉਦਯੋਗ-ਅਕੈਡਮਿਕ ਸਾਂਝ ਨੂੰ ਦਰਸਾਉਂਦਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਜਦੋਂ ਅਸੀਂ ਕੋਈ ਸਮਾਨ ਖਰੀਦਦੇ ਹਾਂ, ਤਾਂ ਸਭ ਤੋਂ ਪਹਿਲਾਂ ਆਈਐਸਆਈ ਮਾਰਕ ਵੇਖਦੇ ਹਾਂ।
ਉਨ੍ਹਾਂ ਇਹ ਵੀ ਕਿਹਾ ਕਿ ਇਹ ਵਰਕਸ਼ਾਪ ਅਧਿਆਪਕਾਂ ਲਈ ਨਵੇਂ ਗਿਆਨ ਦੇ ਦਰਵਾਜ਼ੇ ਖੋਲ੍ਹੇਗੀ। ਪ੍ਰੋ. ਰਾਜੇਸ਼ ਕੁਮਾਰ ਭਾਟੀਆ ਨੇ ਦੱਸਿਆ ਕਿ ਅਜਿਹੇ ਕੋਰਸ ਨਾ ਸਿਰਫ ਜਾਣਕਾਰੀ ਵਧਾਉਂਦੇ ਹਨ, ਸਗੋਂ ਮਾਨਕੀਕਰਨ ਦੇ ਰਾਸ਼ਟਰੀ ਪੱਖ ਨੂੰ ਸਮਝਣ ਵਿੱਚ ਵੀ ਸਹਾਇਤਾ ਕਰਦੇ ਹਨ। ਉਨ੍ਹਾਂ ਪੇਕ ਦੀ ਇਤਿਹਾਸਕ ਵਿਰਾਸਤ ਵੀ ਸਾਂਝੀ ਕੀਤੀ।
ਕਾਲਜ ਦੇ ਵੱਖ-ਵੱਖ ਵਿਭਾਗਾਂ ਤੋਂ ਕਈ ਅਧਿਆਪਕਾਂ ਨੇ ਵਰਕਸ਼ਾਪ ਵਿੱਚ ਭਾਗ ਲਿਆ। ਸ਼੍ਰੀ ਵਿਸ਼ਾਲ ਤੋਮਰ ਨੇ ਮਾਨਕੀਕਰਨ ਬਾਰੇ ਇੱਕ ਇੰਟਰਐਕਟਿਵ ਸੈਸ਼ਨ ਲੈ ਕੇ ਇਸਦੀ ਅਸਲ ਜ਼ਿੰਦਗੀ ਵਿਚ ਵਰਤੋਂ, ਲੋੜ ਤੇ ਮਹੱਤਤਾ ਉਤੇ ਚਰਚਾ ਕੀਤੀ। ਸ਼੍ਰੀ ਸ਼ੁਭਮ ਤਿਵਾਰੀ ਅਤੇ ਸ਼੍ਰੀ ਕੁਸ਼ਾਗ੍ਰ ਜਿੰਦਲ ਨੇ ਬੀਆਈਐਸ ਅਤੇ ਦੇਸ਼ ਵਿੱਚ ਮਾਨਕੀਕਰਨ ਦੀ ਪੂਰੀ ਪ੍ਰਕਿਰਿਆ ਬਾਰੇ ਜਾਣਕਾਰੀ ਦਿੱਤੀ।
ਸ਼੍ਰੀ ਅਭਿਸ਼ੇਕ ਕੁਮਾਰ ਨੇ ਬੀਆਈਐਸ ਦੀਆਂ ਡਿਜ਼ੀਟਲ ਪਹਲਾਂ ਦੀ ਚਰਚਾ ਕੀਤੀ ਜਦਕਿ ਸ਼੍ਰੀ ਆਸ਼ੂਤੋਸ਼ ਰਾਏ ਨੇ ਉਤਪਾਦ ਮਾਨਕ, ਵਿਭਾਗ ਅਨੁਸਾਰ ਮਾਨਕ ਬਣਾਉਣ ਦੀ ਪ੍ਰਕਿਰਿਆ ਅਤੇ ਰਿਸਰਚ ਪ੍ਰਾਜੈਕਟਾਂ ਦੀ ਭੂਮਿਕਾ ਉੱਤੇ ਰੋਸ਼ਨੀ ਪਾਈ। ਆਖ਼ਰ 'ਚ, ਡਾ. ਮਨੋਹਰ ਸਿੰਘ ਨੇ ਬੀਆਈਐਸ ਦੀ ਟੀਮ ਅਤੇ ਸਾਰੇ ਅਧਿਆਪਕਾਂ ਦਾ ਤਹੇਦਿਲ ਨਾਲ ਧੰਨਵਾਦ ਕੀਤਾ।