ਪੰਜਾਬ ਡਾਕ ਪਰਿਮੰਡਲ ਵੱਲੋਂ ਅੰਮ੍ਰਿਤਸਰ ਵਿਖੇ “ਆਈ.ਟੀ. 2.0 ਲਈ ਤਿਆਰੀ” ਵਿਸ਼ੇ 'ਤੇ ਇੱਕ ਵਰਕਸ਼ਾਪ ਦਾ ਆਯੋਜਨ ਕੀਤਾ ਗਿਆ। ਇਸ ਪ੍ਰੋਗਰਾਮ ਦੀ ਅਗਵਾਈ ਸ਼੍ਰੀ ਸੁਬ੍ਰਤ ਦਾਸ, ਮੈਂਬਰ (ਤਕਨਾਲੋਜੀ), ਡਾਕ ਸੇਵਾ ਬੋਰਡ, ਡਾਕ ਵਿਭਾਗ, ਸੰਚਾਰ ਮੰਤਰਾਲਾ, ਭਾਰਤ ਸਰਕਾਰ ਵੱਲੋਂ ਕੀਤੀ ਗਈ। ਆਈ.ਟੀ. ਅਧੁਨਿਕੀਕਰਨ ਪ੍ਰਾਜੈਕਟ 2.0 ਡਾਕ ਵਿਭਾਗ ਦੀ ਇੱਕ ਵਿਸ਼ਾਲ ਡਿਜੀਟਲ ਬਦਲਾਅ ਮੁਹਿੰਮ ਹੈ, ਜਿਸ ਦਾ ਉਦੇਸ਼ ਕਾਰਜਕੁਸ਼ਲਤਾ, ਸੇਵਾ ਪ੍ਰਦਾਨਗੀ ਅਤੇ ਵਿੱਤੀ ਸਮਾਵੇਸ਼ ਨੂੰ ਮਜ਼ਬੂਤ ਕਰਨਾ ਹੈ।
ਇਸ ਵਰਕਸ਼ਾਪ ਵਿੱਚ ਕਈ ਮਹੱਤਵਪੂਰਕ ਪਹਿਲੂਆਂ 'ਤੇ ਵਿਚਾਰ ਕੀਤਾ ਗਿਆ, ਜਿਵੇਂ ਕਿ ਆਈ.ਟੀ. ਰੋਲਆਉਟ ਦੀ ਸਮਝ, ਪ੍ਰਭਾਵਸ਼ਾਲੀ ਰਣਨੀਤੀਆਂ ਦਾ ਵਿਕਾਸ ਅਤੇ ਉਨ੍ਹਾਂ ਨੂੰ ਰੋਲਆਉਟ ਦੀ ਤਿਆਰੀ, ਬੁਨਿਆਦੀ ਢਾਂਚੇ ਦੀ ਤਿਆਰੀ, ਸਮਰਥਾ ਵਿਕਾਸ ਆਦਿ ਲਈ ਵਰਤਣ ਸੰਬੰਧੀ ਵਿਚਾਰ। ਇਹ ਪੂਰੀ ਵਰਕਸ਼ਾਪ ਭਾਗੀਦਾਰਾਂ ਲਈ ਇੱਕ ਕੀਮਤੀ ਸਿੱਖਣ ਦਾ ਅਨੁਭਵ ਸਾਬਤ ਹੋਈ, ਜਿਸ ਨਾਲ ਉਨ੍ਹਾਂ ਨੂੰ ਇਸ ਤਬਦੀਲੀ ਪ੍ਰਕਿਰਿਆ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਅਪਣਾਉਣ ਲਈ ਲੋੜੀਂਦਾ ਗਿਆਨ ਅਤੇ ਹੁਨਰ ਪ੍ਰਾਪਤ ਹੋਇਆ।
ਇਸ ਵਰਕਸ਼ਾਪ ਵਿੱਚ ਡਾਕ ਨਿਦੇਸ਼ਾਲੇ ਦੀ ਟੀਮ, ਸੈਂਟਰ ਆਫ ਐਕਸੀਲੈਂਸ ਫਾਰ ਪੋਸਟਲ ਟੈਕਨੋਲੋਜੀ (CEPT) ਦੇ ਅਧਿਕਾਰੀ ਅਤੇ 08 ਡਾਕ ਪਰਿਮੰਡਲਾਂ -ਗੁਜਰਾਤ, ਹਰਿਆਣਾ, ਹਿਮਾਚਲ ਪ੍ਰਦੇਸ਼, ਜੰਮੂ-ਕਸ਼ਮੀਰ, ਕੇਰਲ, ਮੱਧ ਪ੍ਰਦੇਸ਼, ਪੰਜਾਬ ਅਤੇ ਉੱਤਰ ਪ੍ਰਦੇਸ਼ ਤੋਂ ਚੀਫ਼ ਪੋਸਟਮਾਸਟਰ ਜਨਰਲ, ਪੋਸਟਮਾਸਟਰ ਜਨਰਲ ਅਤੇ ਡਾਇਰੈਕਟਰ ਡਾਕ ਸੇਵਾਵਾਂ ਸ਼ਾਮਲ ਹੋਏ।
ਸ਼੍ਰੀ ਵਿਨੋਦ ਕੁਮਾਰ ਵਰਮਾ, ਮੁੱਖ ਪੋਸਟਮਾਸਟਰ ਜਨਰਲ, ਪੰਜਾਬ ਪਰਿਮੰਡਲ ਨੇ ਦੱਸਿਆ ਕਿ ਆਈ.ਟੀ. 2.0 ਪ੍ਰਾਜੈਕਟ ਨੂੰ ਪੜਾਅ ਦਰ ਪੜਾਅ ਲਾਗੂ ਕੀਤਾ ਜਾਵੇਗਾ। ਪਹਿਲੇ ਪੜਾਅ ਵਿੱਚ ਚੰਡੀਗੜ੍ਹ ਮੁੱਖ ਡਾਕਘਰ ਅਤੇ ਜਲੰਧਰ ਸਿਟੀ ਮੁੱਖ ਡਾਕਘਰ ਦੇ ਅਧੀਨ ਡਾਕਘਰਾਂ ਨੂੰ ਇਸ ਯੋਜਨਾ ਵਿੱਚ ਸ਼ਾਮਲ ਕੀਤਾ ਜਾਵੇਗਾ। ਇਸ ਪ੍ਰੋਗਰਾਮ ਦੀ ਸਾਰੇ ਭਾਗੀਦਾਰਾਂ ਅਤੇ ਸਾਂਝੀਦਾਰਾਂ ਵੱਲੋਂ ਭਰਪੂਰ ਸਰਾਹਣਾ ਕੀਤੀ ਗਈ।