ਕੈਂਸਰ ਦੇ ਇਲਾਜ ਲਈ ਨਵੀਂਆਂ ਤਕਨੀਕਾਂ ਦੇ ਵਿਕਾਸ ਲਈ ਵਿਗਿਆਨ ਅਤੇ ਤਕਨਾਲੋਜੀ ਵਿੱਚ ਨਵੀਨਤਾ ਨੂੰ ਉਤਸ਼ਾਹਿਤ ਕਰਨ ਲਈ ਯਤਨਸ਼ੀਲ ਪੰਜਾਬ ਕੇਂਦਰੀ ਯੂਨੀਵਰਸਿਟੀ (ਸੀਯੂ ਪੰਜਾਬ) ਵੱਲੋਂ ਬੁੱਧਵਾਰ ਨੂੰ ਵਾਈਸ-ਚਾਂਸਲਰ ਪ੍ਰੋ. ਰਾਘਵੇਂਦਰ ਪ੍ਰਸਾਦ ਤਿਵਾਰੀ ਦੀ ਸਰਪ੍ਰਸਤੀ ਹੇਠ “ਬਾਇਓਮੈਡੀਕਲ ਐਪਲੀਕੇਸ਼ਨਾਂ ਲਈ ਮੈਗਨੈਟਿਕ ਨੈਨੋਸਟ੍ਰਕਚਰ” ਵਿਸ਼ੇ ‘ਤੇ ਇੱਕ ਕੌਮਾਂਤਰੀ ਸੈਮੀਨਾਰ ਕਰਵਾਇਆ ਗਿਆ। ਸੀਯੂ ਪੰਜਾਬ ਦੇ ਭੌਤਿਕ ਵਿਗਿਆਨ ਵਿਭਾਗ ਦੁਆਰਾ ਸਲੋਵੇਨੀਆ ਦੇ ਜੋਜ਼ੇਫ ਸਟੀਫਨ ਇੰਸਟੀਚਿਊਟ ਦੇ ਸਹਿਯੋਗ ਨਾਲ ਆਯੋਜਿਤ ਇਸ ਸੈਮੀਨਾਰ ਵਿੱਚ ਸਲੋਵੇਨੀਆ ਅਤੇ ਭਾਰਤ ਦੇ ਮਾਹਿਰ ਬਾਇਓਮੈਡੀਕਲ ਖੇਤਰ ਵਿੱਚ ਚੁੰਬਕੀ ਨੈਨੋਸਟ੍ਰਕਚਰਜ਼ ਵਿੱਚ ਨਵੀਨਤਮ ਉੱਨਤੀਆਂ ਨੂੰ ਸਾਂਝਾ ਕੀਤਾ।
ਪ੍ਰੋਗਰਾਮ ਦੀ ਸ਼ੁਰੂਆਤ ਵਿੱਚ ਪ੍ਰੋਗਰਾਮ ਕੋਆਰਡੀਨੇਟਰ ਪ੍ਰੋ. ਸੰਤੋਸ਼ ਕੇ. ਮਹਾਪਾਤਰਾ ਨੇ ਸਲੋਵੇਨੀਅਨ ਤੋਂ ਆਏ ਮਾਹਿਰਾਂ ਪ੍ਰੋ. ਡਾਰਕੋ ਮਾਰਕੋਵੇਕ, ਡਾ. ਸੇਬੇਸਟੀਅਨ ਨੇਮੇਕ, ਪ੍ਰੋ. ਸਲਾਵਕੋ ਕ੍ਰਾਲਜ ਅਤੇ ਖੋਜਾਰਥੀ ਨੀਨਾ ਕ੍ਰੀਜਾਜ ਦਾ ਸਵਾਗਤ ਕੀਤਾ। ਭੌਤਿਕ ਵਿਗਿਆਨ ਵਿਭਾਗ ਦੇ ਮੁਖੀ ਪ੍ਰੋ. ਐੱਸ.ਕੇ. ਸ਼ਰਮਾ ਨੇ ਕਿਹਾ ਕਿ ਸੈਮੀਨਾਰ ਦਾ ਮੁੱਖ ਟੀਚਾ ਕੈਂਸਰ ਦੇ ਬਿਹਤਰ ਇਲਾਜ ਅਤੇ ਉੱਚ ਗੁਣਵੱਤਾ ਵਾਲੇ ਆਇਰਨ ਆਕਸਾਈਡ ਨੈਨੋਪਾਰਟਿਕਲ ਦੇ ਨਿਰਮਾਣ ਲਈ ਰਾਹ ਪੱਧਰਾ ਕਰਨਾ ਹੈ।
ਸੈਮੀਨਾਰ ਦਾ ਪਹਿਲਾ ਲੈਕਚਰ ਜੋਜ਼ੇਫ ਸਟੀਫਨ ਇੰਸਟੀਚਿਊਟ, ਸਲੋਵੇਨੀਆ ਤੋਂ ਪਦਾਰਥ ਵਿਗਿਆਨ ਅਤੇ ਨੈਨੋ ਟੈਕਨਾਲੋਜੀ ਦੇ ਮਾਹਿਰ ਪ੍ਰੋ. ਡਾਰਕੋ ਮਾਰਕੋਵੇਕ ਦੁਆਰਾ ਦਿੱਤਾ ਗਿਆ। ਉਹਨਾਂ ਨੇ ਬਾਇਓਮੈਡੀਕਲ ਐਪਲੀਕੇਸ਼ਨਾਂ ਲਈ ਨੈਨੋਕੰਪੋਜ਼ਿਟਸ ਵਿੱਚ ਨੈਨੋ ਕਣਾਂ ਨੂੰ ਸੰਸਲੇਸ਼ਣ ਅਤੇ ਅਸੈਂਬਲ ਕਰਨ ਦੇ ਤਰੀਕਿਆਂ ਬਾਰੇ ਚਰਚਾ ਕਰਦੇ ਹੋਏ ਸੈਮੀਨਾਰ ਦੀ ਸ਼ੁਰੂਆਤ ਕੀਤੀ। ਉਹਨਾਂ ਨੇ ਮੈਗਨੇਟੋ-ਮਕੈਨੀਕਲ 'ਤੇ ਅਧਾਰਤ ਅਤਿ-ਆਧੁਨਿਕ ਕੈਂਸਰ ਇਲਾਜ ਪ੍ਰਣਾਲੀਆਂ ਵਿੱਚ ਹਾਲੀਆ ਤਰੱਕੀ ਨੂੰ ਉਜਾਗਰ ਕੀਤਾ।
ਦੂਜੇ ਲੈਕਚਰ ਵਿੱਚ ਸਲੋਵੇਨੀਆ ਦੀ ਲੁਬਲਜਾਨਾ ਯੂਨੀਵਰਸਿਟੀ ਦੇ ਸਾਬਕਾ ਫੈਕਲਟੀ ਡਾ. ਸੇਬਾਸਟਜਾਨ ਨੇਮੇਕ ਨੇ ਬਹੁ-ਕਾਰਜਸ਼ੀਲ ਚੁੰਬਕੀ ਨੈਨੋਕੈਰੀਅਰਾਂ 'ਤੇ ਆਪਣਾ ਖੋਜ ਕਾਰਜ ਪੇਸ਼ ਕੀਤਾ। ਉਹਨਾਂ ਨੇ ਫੈਰੋਪੋਟੋਸਿਸ ਨਾਮਕ ਇੱਕ ਪ੍ਰਕਿਰਿਆ ਨੂੰ ਸਾਂਝਾ ਕੀਤਾ, ਜਿਸ ਵਿੱਚ ਆਇਰਨ ਆਕਸਾਈਡ ਨੈਨੋਪਾਰਟਿਕਲ ਅਤੇ ਲਿਪਿਡਸ ਨੂੰ ਟਾਰਗੇਟ ਸੈੱਲਾਂ ਤੱਕ ਪਹੁੰਚਾਇਆ ਜਾਂਦਾ ਹੈ, ਜਿਸ ਨਾਲ ਕੈਂਸਰ ਕਾਰਕ ਸੈੱਲ ਨਸ਼ਟ ਹੋ ਜਾਂਦੇ ਹਨ।
ਤੀਜੇ ਲੈਕਚਰ ਵਿੱਚ ਨੈਨੋਮੈਡੀਸਨ ਅਤੇ ਬਾਇਓਨੈਨੋਟੈਕਨਾਲੋਜੀ ਵਿੱਚ ਮੁਹਾਰਤ ਰੱਖਣ ਵਾਲੇ ਪ੍ਰੋ. ਸਲਾਵਕੋ ਕ੍ਰਾਲਜ ਨੇ ਡਰੱਗ ਟਾਰਗੇਟਿੰਗ ਅਤੇ ਫੋਟੋਨਿਕ ਕ੍ਰਿਸਟਲ ਐਪਲੀਕੇਸ਼ਨਾਂ ਲਈ ਚੁੰਬਕੀ ਅਸੇਮਬਲੀ ਤਕਨੀਕਾਂ ਦੀ ਵਰਤੋਂ 'ਤੇ ਧਿਆਨ ਕੇਂਦਰਿਤ ਕੀਤਾ। ਚੌਥੇ ਲੈਕਚਰ ਵਿੱਚ ਜੋਜ਼ੇਫ ਸਟੀਫਨ ਇੰਸਟੀਚਿਊਟਸ ਦੀ ਖੋਜਕਰਤਾ ਨੀਨਾ ਕ੍ਰਿਜ਼ਾ ਨੇ ਸੀਰੀਆ-ਅਧਾਰਤ ਚੁੰਬਕੀ ਨੈਨੋਕ੍ਰਿਸਟਲ ਦੀ ਵਰਤੋਂ ਕਰਨ ਬਾਰੇ ਆਪਣੀਆਂ ਖੋਜਾਂ ਸਾਂਝੀਆਂ ਕੀਤੀਆਂ।
ਪ੍ਰੋਗਰਾਮ ਦੇ ਅੰਤ ਵਿੱਚ ਪ੍ਰੋ. ਪ੍ਰਸ਼ਾਂਤ ਐਸ. ਅਲੇਗਾਂਵਕਰ ਨੇ ਮਹਿਮਾਨ ਬੁਲਾਰਿਆਂ ਦਾ ਧੰਨਵਾਦ ਕੀਤਾ। ਉਹਨਾਂ ਨੇ ਉਮੀਦ ਜ਼ਾਹਰ ਕੀਤੀ ਕਿ ਸੈਮੀਨਾਰ ਤੋਂ ਪ੍ਰਾਪਤ ਜਾਣਕਾਰੀ ਉੱਚ ਗੁਣਵੱਤਾ ਵਾਲੇ ਆਇਰਨ ਆਕਸਾਈਡ ਨੈਨੋਪਾਰਟਿਕਲ ਦੇ ਵਿਕਾਸ ਵਿੱਚ ਯੋਗਦਾਨ ਪਾਏਗੀ ਅਤੇ ਕੈਂਸਰ ਦੇ ਬਿਹਤਰ ਇਲਾਜ ਲਈ ਰਾਹ ਪੱਧਰਾ ਕਰਨਗੇ। ਪ੍ਰੋਗਰਾਮ ਦੌਰਾਨ ਯੂਨੀਵਰਸਿਟੀ ਦੇ ਭੌਤਿਕ ਵਿਗਿਆਨ ਵਿਭਾਗ ਅਤੇ ਹੋਰ ਵਿਭਾਗਾਂ ਦੇ ਫੈਕਲਟੀ ਮੈਂਬਰ ਵੀ ਮੌਜੂਦ ਸਨ। ਸੈਮੀਨਾਰ ਦੌਰਾਨ ਮੈਗਨੈਟਿਕ ਨੈਨੋਸਟ੍ਰਕਚਰਜ਼ ਦੇ ਭਵਿੱਖ ਬਾਰੇ ਚਰਚਾ ਕੀਤੀ ਗਈ।
ਇਸ ਪ੍ਰੋਗਰਾਮ ਵਿੱਚ ਯੂਨੀਵਰਸਿਟੀ ਦੇ ਵੱਖ-ਵੱਖ ਵਿਭਾਗਾਂ ਦੇ ਨਾਲ-ਨਾਲ ਹੋਰ ਉੱਚ ਵਿਦਿਅਕ ਸੰਸਥਾਵਾਂ ਦੇ ਫੈਕਲਟੀ, ਖੋਜਕਰਤਾਵਾਂ ਅਤੇ ਵਿਦਿਆਰਥੀਆਂ ਨੇ ਭਾਗ ਲਿਆ।