ਪੰਜਾਬ ਸਰਕਾਰ ਵੱਲੋਂ ਸਥਾਪਿਤ ਕੀਤੀ ਮਹਾਰਾਜਾ ਰਣਜੀਤ ਸਿੰਘ ਪੰਜਾਬ ਟੈਕਨੀਕਲ ਯੂਨੀਵਰਸਿਟੀ (ਐਮ.ਆਰ.ਐਸ.-ਪੀ.ਟੀ.ਯੂ.), ਬਠਿੰਡਾ ਵਿਦਿਆਰਥੀਆਂ ਨੂੰ ਵਿਸਵ ਪੱਧਰੀ ਮਿਆਰੀ ਤਕਨੀਕੀ ਸਿੱਖਿਆ ਪ੍ਰਾਪਤ ਕਰਨ ਦਾ ਸੁਨਹਿਰੀ ਮੌਕਾ ਪ੍ਰਦਾਨ ਕਰਨ ਦੇ ਨਾਲ ਨਾਲ, ਸਰਕਾਰੀ ਅਤੇ ਨਿੱਜੀ ਖੇਤਰ ਵਿੱਚ ਵੱਕਾਰੀ ਨੌਕਰੀਆਂ ਪ੍ਰਾਪਤ ਕਰਨ ਲਈ ਵਧੀਆ ਪਲੇਸਮੈਂਟ ਅਤੇ ਪੜ੍ਹਾਈ ਲਈ ਸੁਰੱਖਿਅਤ ਅਤੇ ਅਨੁਕੂਲ ਮਾਹੌਲ ਪ੍ਰਦਾਨ ਕਰੇਗੀ।
ਯੁੱਗ ਵਿੱਚ ਬਦਲਦੇ ਰੁਝਾਨਾਂ ਨਾਲ ਆਪਣੇ ਆਪ ਨੂੰ ਅੱਪਡੇਟ ਕਰਦੇ ਹੋਏ ਜਿੱਥੇ ਨੌਜਵਾਨ ਵਿਦੇਸਾਂ ਵਿੱਚ ਪੜ੍ਹਾਈ ਕਰਨ ਦੀ ਇੱਛਾ ਰੱਖਦੇ ਹਨ, ਐਮਆਰਐਸ-ਪੀਟੀਯੂ ਨੇ ਪੰਜਾਬ ਦੇ ਨੌਜਵਾਨਾਂ ਨੂੰ ਉੱਚ ਹੁਨਰ ਅਤੇ ਅੱਪਡੇਟ ਤਕਨੀਕੀ ਗਿਆਨ ਨਾਲ ਵਿਦੇਸ ਭੇਜਣ ਦੀ ਯੋਜਨਾ ਤਿਆਰ ਕੀਤੀ ਹੈ, ਜਿਸ ਵਿੱਚ ਭਵਿੱਖ ਦੀਆਂ ਨੌਕਰੀਆਂ ਅਤੇ ਬਿਹਤਰ ਰੁਜਗਾਰ ਦੀ ਕੁੰਜੀ ਹੈ।
ਇਹ ਦਾਅਵਾ ਮੰਗਲਵਾਰ ਨੂੰ ਦੇਸ ਭਗਤ ਕਾਲਜ ਮੋਗਾ ਵਿਖੇ ਇੱਕ ਪ੍ਰੈਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ, ਐਮ.ਆਰ.ਐਸ.-ਪੀ.ਟੀ.ਯੂ., ਦੇ ਵਾਈਸ ਚਾਂਸਲਰ, ਪ੍ਰਸਿੱਧ ਅਕਾਦਮਿਕ ਅਤੇ ਖੋਜਕਾਰ ਪ੍ਰੋ: ਬੂਟਾ ਸਿੰਘ ਸਿੱਧੂ ਨੇ ਕਰਦਿਆਂ ਕਿਹਾ ਕਿ ਯੂਨੀਵਰਸਿਟੀ ਵਿੱਚ ਵਿਸਵ ਪੱਧਰੀ ਖੋਜ ਵਿਗਿਆਨੀ ਅਤੇ ਨਾਮਵਰ ਫੈਕਲਟੀ ਹੈ, ਜੋ ਵਿਦਿਆਰਥੀਆਂ ਨੂੰ ਮਿਆਰੀ ਉੱਚ ਸਿੱਖਿਆ ਪ੍ਰਾਪਤ ਕਰਨ ਦੇ ਸੁਪਨਿਆਂ ਨੂੰ ਸਾਕਾਰ ਕਰਨ ਅਤੇ ਵੱਖ-ਵੱਖ ਮਾਰਗਾਂ ਰਾਹੀਂ ਵਿਦੇਸਾਂ ਵਿੱਚ ਪੜ੍ਹਾਈ ਕਰਨ ਵਿੱਚ ਮਦਦਗਾਰ ਸਾਬਿਤ ਹੋਵੇਗੀ।
ਉਨ੍ਹਾਂ ਕਿਹਾ ਕਿ ਸਿੱਖਿਆ ਦਾ ਆਧੁਨਿਕੀਕਰਨ ਅਤੇ ਉਦਯੋਗ ਅਤੇ ਵਪਾਰ ਦੇ ਬਦਲਦੇ ਰੁਝਾਨਾਂ ਅਤੇ ਲੋੜਾਂ ਦੇ ਅਨੁਕੂਲ ਹੋਣਾ ਚਾਹੀਦਾ ਹੈ।ਯੂਨੀਵਰਸਿਟੀ ਨੇ ਹਾਲ ਹੀ ਵਿਚ ਉਭਰਦੀਆਂ ਤਕਨਾਲੋਜੀਆਂ, ਹੁਨਰ ਆਧਾਰਿਤ, ਕਿੱਤਾਮੁਖੀ ਕੋਰਸ ਅਤੇ ਇੰਡਸਟਰੀ ਅਤੇ ਹੋਰ ਵੱਖ-ਵੱਖ ਖੇਤਰਾਂ ਦੀਆਂ ਲੋੜਾਂ ਮੁਤਾਬਿਕ ਕੋਰਸ ਸੁਰੂ ਕੀਤੇ ਹਨ।
ਨਵੇਂ ਕੋਰਸਾਂ ਵਿੱਚ ਉਭਰਦੀਆਂ ਤਕਨੀਕਾਂ ਜਿਵੇਂ ਕਿ ਡੇਟਾ ਸਾਇੰਸ, ਬਲਾਕਚੈਨ, ਪ੍ਰੋਗਰਾਮਿੰਗ ਭਾਸਾਵਾਂ, ਸਾਈਬਰ ਕ੍ਰਾਈਮ, ਮਸੀਨ ਲਰਨਿੰਗ, ਪੇਟੈਂਟ ਅਤੇ ਆਈਪੀਆਰ, ਬਿਜਨਸ ਇੰਟੈਲੀਜੈਂਸ ਅਤੇ ਹੋਰ ਬਹੁਤ ਸਾਰੇ ਆਨਲਾਈਨ ਪ੍ਰਮਾਣਿਤ ਕੋਰਸ ਸਾਮਲ ਕੀਤੇ ਗਏ ਹਨ। ਉਨ੍ਹਾਂ ਕਿਹਾ ਕਿ ਐਮਆਰਐਸ-ਪੀਟੀਯੂ ਟਰੈਵਲ ਏਜੰਟਾਂ ਦੇ ਸੋਸਣ ਤੋਂ ਬਚਾਉਣ ਲਈ ਇੱਕ ਵਿਲੱਖਣ ''ਇੱਥੇ ਦਾਖਲਾ ਲਓ, ਵਿਦੇਸ ਪੜ੍ਹੋ'' ਪਾਥਵੇ ਪ੍ਰੋਗਰਾਮ ਪ੍ਰਦਾਨ ਕਰਦਾ ਹੈ।
ਇਹ ਸਕੀਮ ਵਿਦੇਸਾਂ ਵਿੱਚ ਪੜ੍ਹਨ ਦੀ ਇੱਛਾ ਰੱਖਣ ਵਾਲੇ ਵਿਦਿਆਰਥੀਆਂ ਲਈ ਵਰਦਾਨ ਸਾਬਤ ਹੋਵੇਗੀ। ਉਹਨਾਂ ਕਿਹਾ ਕਿ ਆਪਣੇ ਮਜਬੂਤ ਅੰਤਰਰਾਸਟਰੀ ਵਟਾਂਦਰਾ ਪ੍ਰੋਗਰਾਮ ਦੇ ਤਹਿਤ, ਯੂਨੀਵਰਸਿਟੀ ਨੇ ਪ੍ਰਸਿੱਧ ਯੂਨੀਵਰਸਿਟੀਆਂ ਨਾਲ ਸਮਝੌਤੇ ਕੀਤੇ ਹਨ, ਜੋ ਕਿ ਵਿਦੇਸਾਂ ਵਿੱਚ ਪੜ੍ਹਾਈ ਕਰਨ ਦੀ ਇੱਛਾ ਰੱਖਣ ਵਾਲੇ ਹੋਣਹਾਰ ਵਿਦਿਆਰਥੀਆਂ ਲਈ ਦਰਵਾਜੇ ਖੋਲ੍ਹਣ ਦਾ ਰਾਹ ਪੱਧਰਾ ਕਰਦੇ ਹਨ।
ਉਨ੍ਹਾਂ ਦੱਸਿਆ ਕਿ ਵਿਦੇਸੀ ਸੰਸਥਾਵਾਂ ਦੀ ਤਰਫੋਂ ਕੰਮ ਕਰਨ ਵਾਲੇ ਕਈ ਏਜੰਟ ਮਾਪਿਆਂ ਅਤੇ ਵਿਦਿਆਰਥੀਆਂ ਦਾ ਕਥਿਤ ਤੌਰ 'ਤੇ ਆਰਥਿਕ ਸੋਸਣ ਕਰਦੇ ਹਨ ਪਰ ਵਿਦੇਸਾਂ ਵਿੱਚ ਡਿਗਰੀਆਂ ਪ੍ਰਾਪਤ ਕਰਨ ਦੇ ਬਾਵਜੂਦ ਵਿਦਿਆਰਥੀਆਂ ਨੂੰ ਨੌਕਰੀਆਂ ਪ੍ਰਾਪਤ ਕਰਨ ਵਿੱਚ ਮੁਸਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਕਿਉਂਕਿ ਕਈ ਡਿਗਰੀਆਂ ਨੂੰ ਭਾਰਤ ਵਿੱਚ ਮਾਨਤਾ ਹੀ ਨਹੀਂ ਹੈ।
ਉਨ੍ਹਾਂ ਕਿਹਾ ਕਿ ਵਿਦਿਆਰਥੀ ਯੂਨੀਵਰਸਿਟੀ ਨਾਲ ਟੋਲ ਫਰੀ ਨੰਬਰ:- 1800-121-1833 ਅਤੇ ਵੈੱਬਸਾਈਟ:- www.mrsptu.ac.in 'ਤੇ ਸੰਪਰਕ ਕਰ ਸਕਦੇ ਹਨ।ਪੰਜਾਬ ਅਨਏਡਿਡ ਟੈਕਨੀਕਲ ਇੰਸਟੀਚਿਊਟ ਯੂਨੀਅਨ (ਪੁਟੀਆ) ਦੇ ਵਾਈਸ ਚੇਅਰਮੈਨ ਸ੍ਰੀ ਦਵਿੰਦਰ ਪਾਲ ਸਿੰਘ, ਯੂਨੀਵਰਸਿਟੀ ਦੇ ਡੀਨ ਕੰਸਲਟੈਂਸੀ ਐਂਡ ਇੰਡਸਟਰੀ ਲਿੰਕੇਜ ਡਾ.ਮਨਜੀਤ ਬਾਂਸਲ, ਪੰਜਾਬ ਇੰਸਟੀਚਿਊਟ ਆਫ ਟੈਕਨਾਲੋਜੀ (ਪੀ.ਆਈ.ਟੀ.) ਜੀ.ਟੀ.ਬੀ.ਗੜ੍ਹ, ਮੋਗਾ ਦੇ ਡਾਇਰੈਕਟਰ ਡਾ: ਅਮਿਤ ਮਨੋਚਾ ਸੀ.ਆਰ.ਸੀ., ਡਾਇਰੈਕਟਰ ਡਾ. ਰਾਜੇਸ ਗੁਪਤਾ, ਡਾਇਰੈਕਟਰ, ਲੋਕ ਸੰਪਰਕ ਸ੍ਰੀ ਹਰਜਿੰਦਰ ਸਿੱਧੂ, ਨਾਰਥਵੈਸਟ ਕਾਲਜ, ਚੇਅਰਮੈਨ, ਸ. ਲਖਬੀਰ ਸਿੰਘ ਗਿੱਲ, ਦੇਸ ਭਗਤ ਕਾਲਜ, ਪ੍ਰਧਾਨ ਸ੍ਰੀ ਅਸੋਕ ਗੁਪਤਾ, ਡਾਇਰੈਕਟਰ ਸ੍ਰੀ ਗੌਰਵ ਗੁਪਤਾ, ਸ੍ਰੀ ਅਨੁਜ ਗੁਪਤਾ ਵੀ ਇਸ ਮੌਕੇ ਹਾਜਰ ਸਨ।