ਲੋਕ ਸਭਾ ਚੋਣਾਂ ਦੇ ਨਤੀਜਿਆ ਤੋਂ ਬਾਅਦ ਕੇਂਦਰ ਵਿੱਚ ਬਣਨ ਵਾਲੀ ਐਨ.ਡੀ.ਏ ਸਰਕਾਰ ਵਿੱਚ ਸ਼੍ਰੋਮਣੀ ਅਕਾਲੀ ਦਲ ਦੇ ਸੁਪਰੀਮੋ ਅਤੇ ਪੰਜਾਬ ਸਰਕਾਰ ਦੇ ਮੁੱਖ ਮੰਤਰੀ ਪਰਕਾਸ਼ ਸਿੰਘ ਬਾਦਲ ਵੱਡੀ ਭੂਮਿਕਾ ਹੋਵੇਗੀ। ਜਿਸ ਨਾਲ ਪੰਜਾਬ ਨੂੰ ਭਵਿੱਖ ਵਿੱਚ ਵੱਡੇ ਫਾਇਦੇ ਮਿਲਣਗੇ। ਭਾਰਤੀ ਜਨਤਾ ਪਾਰਟੀ ਦੇ ਸੀਨੀਅਰ ਆਗੂ ਅਤੇ ਕੈਬਨਿਟ ਮੰਤਰੀ ਪੰਜਾਬ ਸ਼੍ਰੀ ਮਦਨ ਮੋਹਨ ਮਿੱਤਲ ਨੇ ਕਿਹਾ ਕਿ ਐਨ.ਡੀ.ਏ ਸਰਕਾਰ ਅੰਦਰ ਅਕਾਲੀ ਦਲ ਦੀ ਭੂਮਿਕਾ ਵਜ਼ਰੀਆਂ ਲੈਣ ਵਾਲਿਆ ਵਿੱਚ ਨਹੀਂ ਬਲਕਿ ਵਜ਼ੀਆਂ ਵੰਡਣ ਵਾਲਿਆ ਵਿੱਚ ਸ਼ਾਮਿਲ ਹੋਵੇਗੀ।ਭਾਜਪਾ ਦੇ ਆਗੂ ਨੇ ਦਆਵਾ ਕੀਤਾ ਹੈ ਕਿ ਦੇਸ਼ ਦੀਆਂ ਅੱਧੀ ਦਰਜ਼ਨ ਤੋਂ ਵੱਧ ਐਨ.ਡੀ.ਏ ਤੋਂ ਬਾਹਰ ਹੋ ਕੇ ਚੋਣ ਲੜ ਰਹੀਆ ਖੇਤਰੀ ਪਾਰਟੀਆਂ ਦੇ ਮੁਖੀਆ ਨੇ ਭਾਰਤੀ ਸਿਆਸਤ ਦੇ ਬਾਬਾ ਬੋਹੜ ਸਮਝੇ ਜਾਂਦੇ ਅਕਾਲੀ ਸੁਪਰੀਮੋ ਸ. ਪਰਕਾਸ਼ ਸਿੰਘ ਬਾਦਲ ਨਾਲ ਸੰਪਰਕ ਬਣਾਇਆ ਹੋਇਆ ਹੈ। ਸ. ਪਰਕਾਸ਼ ਸਿੰਘ ਬਾਦਲ ਦੇ ਦੂਰਅੰਦੇਸ਼ੀ ਅਤੇ ਮਿਹਨਤ ਐਨ.ਡੀ.ਏ ਕੇਂਦਰ ਦੀ ਸੱਤਾ ਤੱਕ ਲਿਜਾ ਰਹੀ ਹੈ। ਜਿਸ ਵਿੱਚ ਸ. ਬਾਦਲ ਕਿੰਗ ਮੇਕਰ ਦੀ ਭੂਮਿਕਾ ਨਿਭਾਉਣ ਵਾਲੀ ਜਿੰਮੇਵਾਰੀ ਚੁੱਕਣਗੇ। ਭਾਜਪਾ ਆਗੂ ਨੇ ਕਿਹਾ ਕਿ ਐਨ.ਡੀ.ਏ ਵੱਲੋਂ ਦੇਸ਼ ਵਾਸੀਆ ਸਾਹਮਣੇ ਪ੍ਰਧਾਨ ਮੰਤਰੀ ਦੇ ਅਹੁਦੇ ਦੇ ਉਮੀਦਵਾਰ ਸ਼੍ਰੀ ਨਰਿੰਦਰ ਮੋਦੀ ਦੇ ਹੱਕ ਵਿੱਚ ਦੇਸ਼ ਭਰ ਦੇ ਵਪਾਰੀਆਂ, ਕਿਸਾਨਾਂ, ਮਜ਼ਦੂਰਾਂ, ਮੁਲਾਜ਼ਮਾਂ, ਛੋਟੇ ਦੁਕਾਨਦਾਰਾਂ ਵਿਦਿਆਰਥੀਆਂ, ਬੁੱਧੀਜੀਵੀਆ ਅਤੇ ਆਰਥਿਕ ਤੌਰ 'ਤੇ ਪਛੜੇ ਵਰਗਾਂ ਵਿੱਚ ਦੇਸ਼ ਨੂੰ ਮਜ਼ਬੂਤ ਪ੍ਰਧਾਨ ਮੰਤਰੀ ਦੀ ਲੋੜ ਮੁੱਦੇ ਉਤੇ ਜਬਰਦਸਤ ਸਿਆਸੀ ਹਵਾ ਚੱਲ ਰਹੀ ਹੈ। ਜੋ ਵੱਡੀ ਸਿਆਸੀ ਤਬਦੀਲੀ ਦੇ ਸੰਕੇਤ ਹਨ।
ਉਨ੍ਹਾਂ ਕਿਹਾ ਕਿ ਸ਼੍ਰੋਮਣੀ ਅਕਾਲੀ ਦਲ-ਭਾਜਪਾ ਦੀ ਸਾਂਝ ਵਾਲਾ ਦੇਸ਼ ਅੰਦਰ ਸਭ ਤੋਂ ਮਜਬੂਤ ਅਤੇ ਭਰੋਸੇਮੰਦ ਗਠਜੋੜ ਹੈ। ਇਸ ਗਠਜੋੜ ਦਾ ਅਧਾਰ ਵਿਸਵਾਸ਼ ਉਤੇ ਟਿਕਿਆ ਹੋਇਆ ਹੈ ਜੋ ਦਿਨ-ਬ-ਦਿਨ ਮਜਬੂਤ ਹੁੰਦਾ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਕੇਂਦਰ ਵਿੱਚ ਐਨ.ਡੀ.ਏ ਸਰਕਾਰ ਅੰਦਰ ਸ਼੍ਰੋਮਣੀ ਅਕਾਲੀ ਦਲ ਦੇ ਮੈਂਬਰ ਪਾਰਲੀਮੈਂਟ ਨੂੰ ਮਿਲਣ ਵਾਲੀਆ ਵਜ਼ੀਰੀਆ ਦੇ ਅਹੁਦੇ ਅਤੇ ਰੁਤਬੇ ਸ਼ਕਤੀ ਭਰਪੂਰ ਹੋਣਗੇ। ਜਦੋਂ ਕਿ ਕਾਂਗਰਸ ਦੀ ਯੂ.ਪੀ.ਏ ਸਰਕਾਰ ਵਿੱਚ ਪੰਜਾਬ ਦੇ ਕਾਂਗਰਸੀ ਮੈਂਬਰ ਪਾਰਲੀਮੈਂਟ ਨੂੰ ਮਿਲੇ ਹੋਏ ਵਜ਼ੀਰੀ ਦੇ ਅਹੁਦੇ ਸ਼ਕਤੀਆਂ ਤੋਂ ਸੱਖਣੇ ਸਨ। ਇਹ ਕੇਵਲ ਖਾਨਾ ਪੂਰਤੀ ਕਰਨ ਲਈ ਹੀ ਅਹੁਦੇ ਵੰਡੇ ਹੋਏ ਸਨ। ਭਾਜਪਾ ਆਗੂ ਨੇ ਯੂ.ਪੀ.ਏ ਸਰਕਾਰ ਵਿੱਚ ਕਾਂਗਰਸ ਦੀ ਪ੍ਰਤੀਨਿਧਤਾ ਕਰਨ ਵਾਲੇ ਕੇਂਦਰੀ ਵਜ਼ੀਰਾਂ ਨੂੰ ਸੋਨੀਆ ਗਾਂਧੀ ਦੇ ਜਮੂਰੇ ਕਰਾਰ ਦਿੰਦੇ ਹੋਏ ਕਿਹਾ ਕਿ ਇਨ੍ਹਾਂ ਨੇ ਪਿਛਲੇ ਦਸ ਸਾਲਾਂ ਵਿੱਚ ਕਦੇ ਵੀ ਪੰਜਾਬ ਦੇ ਹੱਕ ਵਿੱਚ ਅਵਾਜ਼ ਬੁਲੰਦ ਨਹੀਂ ਕੀਤੀ ਅਤੇ ਨਾ ਹੀ ਕੋਈ ਅਜਿਹਾ ਵੱਡਾ ਪ੍ਰੋਜੈਕਟ ਪੰਜਾਬ ਵਿੱਚ ਸਥਾਪਿਤ ਕਰਵਾ ਸਕੇ ਹਨ ਜਿਸ ਨਾਲ ਪੰਜਾਬ ਅਤੇ ਇੱਥੋਂ ਦੇ ਰਹਿਣ ਵਾਲੇ ਲੋਕਾਂ ਨੂੰ ਲਾਭ ਮਿਲਿਆ ਹੋਵੇ। ਐਨ.ਡੀ.ਏ ਸਰਕਾਰ ਬਣਨ ਨਾਲ ਜਿੱਥੇ ਭਾਰਤ ਦੀ ਕਿਸਮਤ ਬਦਲੇਗੀ ਉਤੇ ਹੀ ਪੰਜਾਬ ਵਿੱਚ ਪਹਿਲਾਂ ਹੀ ਚਲ ਰਹੀ ਤਰੱਕੀ ਵਾਲੀ ਲਹਿਰ ਹੋਰ ਵਧੇਰੇ ਤੇਜ਼ ਹੋਵੇਗੀ।