ਪੰਜਾਬ ਸਰਕਾਰ ਦੇ ਸੂਰਜੀ ਤੇ ਬਾਇਓਮਾਸ ਊਰਜਾ ਦੀਆਂ ਸੰਭਾਵਨਾਵਾਂ ਨੂੰ ਵੱਧ ਤੋਂ ਵੱਧ ਅਮਲੀ ਰੂਪ ਦੇਣ ਦੀਆਂ ਕੋਸ਼ਿਸ਼ਾਂ ਨੂੰ ਉਸ ਸਮੇਂ ਬੂਰ ਪਿਆ ਜਦੋਂ ਇਤਾਲਵੀ ਸੋਲਰ ਇੰਜੀਨੀਅਰਿੰਗ ਕੰਪਨੀ 'ਸੋਲੇਸਾ' ਨੇ 'ਰੂਫ਼ ਟਾਪ ਸੋਲਰ ਫ਼ੋਟੋਵੋਲਟਿਕ ਪਲਾਂਟ' ਲਾਉਣ ਪ੍ਰਤੀ ਇੱਥੇ ਡੂੰਘੀ ਦਿਲਚਸਪੀ ਦਿਖਾਈ।ਇਹ ਸਫ਼ਲਤਾ ਇਤਾਲਵੀ ਰਾਜਦੂਤ ਡੇਨੀਅਲ ਮਾਨਸਿਨੀ ਦੀ ਅਗਵਾਈ ਵਿੱਚ, ਪੰਜਾਬ ਪ੍ਰੋਗਰੈਸਿਵ ਨਿਵੇਸ਼ ਸੰਮੇਲਨ ਦੌਰਾਨ ਆਏ ਸੋਲਰ ਤੇ ਬਾਇਓਮਾਸ ਕੰਪਨੀਆਂ ਦੇ ਵਫ਼ਦ ਅਤੇ ਗੈਰ-ਰਵਾਇਤੀ ਤੇ ਨਵਿਆਉਣਯੋਗ ਊਰਜਾ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਵਿਚਾਲੇ ਹੋਈ ਮੀਟਿੰਗ ਦੌਰਾਨ ਹਾਸਲ ਹੋਈ। ਵਫ਼ਦ ਨੂੰ ਪੰਜਾਬ ਸਰਕਾਰ ਦੀ ਪ੍ਰਦੂਸ਼ਣ-ਰਹਿਤ ਅਤੇ ਨਵਿਆਉਣਯੋਗ ਊਰਜਾ ਸੋਮਿਆਂ ਨੂੰ ਉਤਸ਼ਾਹਿਤ ਕਰਨ ਪ੍ਰਤੀ ਪ੍ਰਤੀਬੱਧਤਾ ਦਾ ਪ੍ਰਗਟਾਵਾ ਕਰਦਿਆਂ ਸ੍ਰੀ ਮਜੀਠੀਆ ਨੇ ਦੱਸਿਆ ਕਿ ਖੇਤੀ ਅਧਾਰਿਤ ਸੂਬੇ ਵਿੱਚ ਸੋਲਰ ਤੇ ਬਾਇਓਮਾਸ ਅਧਾਰਿਤ ਊਰਜਾ ਉਤਪਾਦਨ ਦਾ ਮਜ਼ਬੂਤ ਅਧਾਰ ਮੌਜੂਦ ਹੈ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਵੱਲੋਂ ਹੁਣ ਤੱਕ ਨਵਿਆਉਣਯੋਗ ਊਰਜਾ ਸੋਮਿਆਂ ਤੋਂ ਊਰਜਾ ਪ੍ਰਾਪਤ ਕਰਨ ਵਿੱਚ 569 ਮੈਗਾਵਾਟ ਦਾ ਟੀਚਾ ਹਾਸਲ ਕੀਤਾ ਜਾ ਚੁੱਕਿਆ ਹੈ, ਜਿਸ ਵਿੱਚੋਂ 134 ਮੈਗਾਵਾਟ ਲਘੂ/ਹਾਈਡਲ , 62.5 ਮੈਗਾਵਾਟ ਬਾਇਓਮਾਸ ਪਾਵਰ, 362 ਮੈਗਾਵਾਟ ਕੋ-ਜੈਨਰੇਸ਼ਨ, ਅਤੇ 10.5 ਮੈਗਾਵਾਟ ਸੋਲਰ ਫ਼ੋਟੋਵੋਲਟਿਕ ਪਾਵਰ ਪਲਾਂਟਸ ਤੋਂ ਹੋ ਰਿਹਾ ਉਤਪਾਦਨ ਸ਼ਾਮਿਲ ਹੈ। ਇਸ ਤੋਂ ਇਲਾਵਾ ਐਨ.ਆਰ.ਐਸ.ਈ. ਪਾਲਿਸੀ 2012 ਤਹਿਤ 2022 ਤੱਕ 1000 ਮੈਗਾਵਾਟ ਸੂਰਜੀ ਊਰਜਾ ਪੈਦਾਵਾਰ ਦਾ ਟੀਚਾ ਰੱਖਿਆ ਗਿਆ ਹੈ। ਇਸ ਦੇ ਨਾਲ ਹੀ 400 ਮੈਗਾਵਾਟ ਲਘੂ/ਮਿਨੀ/ਮਾਈਕ੍ਰੋ ਹਾਈਡਲ ਅਤੇ 50 ਮੈਗਾਵਾਟ ਰਹਿੰਦ-ਖੂੰਹਦ ਨੂੰ ਊਰਜਾ ਵਿ ੱਚ ਬਦਲਣ ਦੇ ਪ੍ਰਾਜੈਕਟਾਂ ਦਾ ਟੀਚਾ ਹੈ। ਉਨ੍ਹਾਂ ਦੱਸਿਆ ਕਿ ਸੂਬੇ ਨੇ ਅਗਲੇ ਤਿੰਨ ਸਾਲਾਂ ਵਿੱਚ ਬਾਇਓਮਾਸ ਪਾਵਰ ਪਲਾਂਟਾਂ ਤੋਂ 300 ਮੈਗਾਵਾਟ ਊਰਜਾ ਪ੍ਰਾਪਤੀ ਦਾ ਟੀਚਾ ਮਿੱਥਿਆ ਹੈ ਜਿਨ੍ਹਾਂ ਵਾਸਤੇ 29 ਥਾਂਵਾਂ ਸ਼ਨਾਖ਼ਤ ਕੀਤੀਆਂ ਜਾ ਚੁੱਕੀਆਂ ਹਨ।
ਉਨ੍ਹਾਂ ਅੱਗੇ ਦੱਸਿਆ ਕਿ ਪੰਜਾਬ ਊਰਜਾ ਵਿਕਾਸ ਏਜੰਸੀ ਨੇ ਹਾਲ ਹੀ ਵਿੱਚ 250 ਮੈਗਾਵਾਟ ਦੇ ਸੂਰਜੀ ਪਾਵਰ ਪ੍ਰਾਜੈਕਟਾਂ ਨੂੰ ਮਨਜ਼ੂਰੀ ਦਿੱਤੀ ਹੈ ਜਿਨ੍ਹਾਂ 'ਤੇ 2500-3000 ਕਰੋੜ ਰੁਪਏ ਦਾ ਨਿਵੇਸ਼ ਹੋਣਾ ਹੈ। ਉਨ੍ਹਾਂ ਅੱਗੇ ਦੱਸਿਆ ਕਿ ਛੱਤਾਂ 'ਤੇ ਸੋਲਰ ਫ਼ੋਟੋਵੋਲਿਟਕ ਊਰਜਾ ਪੈਦਾ ਕਰਨ ਲਈ ਸਰਕਾਰੀ ਅਦਾਰਿਆਂ ਦੀਆਂ ਛੱਤਾਂ 'ਤੇ 40 ਮੈਗਾਵਾਟ ਦੇ ਪ੍ਰਾਜੈਕਟ ਲਾਉਣ ਤੋਂ ਸ਼ੁਰੂਆਤ ਕੀਤੀ ਜਾ ਰਹੀ ਹੈ।
ਇਤਾਲਵੀ ਰਾਜਦੂਤ ਡੇਨੀਅਲ ਮਾਨਸਿਨੀ ਨੇ ਦੱਸਿਆ ਕਿ ਪ੍ਰਦੂਸ਼ਣ ਰਹਿਤ ਤੇ ਗਰੀਨ ਐਨਰਜੀ ਪੈਦਾਵਾਰ ਵਿੱਚ ਇਟਲੀ ਦੁਨੀਆ ਨੂੰ ਵੱਧ ਤੋਂ ਵੱਧ ਨਵਿਆਉਣਯੋਗ ਊਰਜਾ ਸ੍ਰੋਤਾਂ ਨਾਲ ਅਗਵਾਈ ਦੇ ਰਿਹਾ ਹੈ ਅਤੇ ਆਪਣੀ ਸਮੁੱਚੀ ਊਰਜਾ ਲੋੜ ਵਿੱਚੋਂ 7 ਫ਼ੀਸਦੀ ਛੱਤਾਂ 'ਤੇ ਲਾਏ ਪ੍ਰਾਜੈਕਟਾਂ ਤੋਂ ਪੂਰੀ ਕਰ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਇਤਾਲਵੀ ਸੋਲਰ ਤੇ ਬਾਇਓਮਾਸ ਕੰਪਨੀਆਂ ਪੰਜਾਬ ਵਿੱਚ ਨਿਵੇਸ਼ ਲਈ ਉਤਸ਼ਾਹਿਤ ਹਨ ਅਤੇ ਉਨ੍ਹਾਂ ਊਰਜਾ ਦੇ ਇਨ੍ਹਾਂ ਸ੍ਰੋਤਾਂ ਦੀ ਵੱਧ ਤੋਂ ਵੱਧ ਵਰਤੋਂ ਲਈ ਆਪਣੇ ਦੇਸ਼ ਦੇ ਅਨੁਭਵ ਦੇਣ ਦੀ ਪੇਸ਼ਕਸ਼ ਵੀ ਕੀਤੀ। ਗੱਲਬਾਤ ਵਿੱਚ ਭਾਗ ਲੈਂਦਿਆਂ ਸਟੈਫ਼ਨੋ ਫ਼ਸੀਲੋ, ਡਾਇਰੈਕਟਰ ਸੋਲੇਸਾ ਸੋਲਰ ਇੰਜੀਨੀਅਰਜ਼ ਨੇ ਸੂਬੇ ਵਿੱਚ 'ਰੂਫ਼ ਟਾਪ ਫ਼ੋਟੋਵੋਲਟਿਕ ਪਲਾਂਟ' ਲਾਉਣ ਵਿੱਚ ਗਹਿਰੀ ਦਿਲਚਸਪੀ ਦਿਖਾਈ।ਮਜੀਠੀਆ ਨੇ ਇਸ ਮੌਕੇ ਦੱਸਿਆ ਕਿ ਪੰਜਾਬ ਊਰਜਾ ਵਿਕਾਸ ਏਜੰਸੀ (ਪੇਡਾ) ਵੱਲੋਂ 600 ਮੈਗਾਵਾਟ ਦੇ ਸੋਲਰ ਤੇ ਬਾਇਓਮਾਸ ਪਲਾਂਟਾਂ ਦੀ ਸਫ਼ਲ ਟੈਂਡਰਿੰਗ ਤੋਂ ਬਾਅਦ ਪੈਦਾਵਾਰ ਵਿੱਚ ਵਾਧਾ ਹੋਵੇਗਾ ਅਤੇ ਉਸ ਤੋਂ ਬਾਅਦ ਇੱਕ ਮਹੀਨੇ ਤੱਕ 'ਰੂਫ਼ ਟਾਪ' ਸੋਲਰ ਪ੍ਰਾਜੈਕਟਾਂ ਦੀਆਂ ਸੰਭਾਵਨਾਵਾਂ ਨੂੰ ਅਮਲ ਵਿੱਚ ਲਿਆਉਣ ਦੇ ਪ੍ਰਾਜੈਕਟ 'ਤੇ ਕੰਮ ਸ਼ੁਰੂ ਕਰ ਦਿੱਤਾ ਜਾਵੇਗਾ। ਮੀਟਿੰਗ ਵਿੱਚ ਸ੍ਰੀ ਅਨੁਰਿਧ ਤਿਵਾੜੀ, ਸਕੱਤਰ ਗੈਰ-ਰਵਾਇਤੀ ਊਰਜਾ ਸੋਮੇ, ਸ੍ਰੀ ਬਲੋਰ ਸਿੰਘ ਡਾਇਰੈਕਟਰ ਪੇਡਾ ਅਤੇ ਸ੍ਰੀ ਗੌਰਵ ਸੂਦ ਮੁਖੀ (ਕਾਰਪੋਰੇਟ ਸੋਲਿਊਸ਼ਨਜ਼) ਨਿਊ ਹਾਲੈਂਡ ਵੀ ਇਸ ਮੌਕੇ ਮੌਜੂਦ ਸਨ।