ਮੁੰਬਈ ਦੀਆਂ ਸਿੱਖ ਸੰਗਤਾਂ ਵੱਲੋਂ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ ੫੫੦ ਸਾਲਾ ਪ੍ਰਕਾਸ਼ ਪੁਰਬ ਨੂੰ ਸਮਰਪਿਤ ਅਤੇ ਨਵੇਂ ਸਾਲ ਦੇ ਆਗਮਨ ਮੌਕੇ ਗੁਰੂ ਪ੍ਰਮਾਤਮਾ ਦਾ ਓਟ ਆਸਰਾ ਲੈਂਦਿਆਂ ਪੂਰੀ ਸ਼ਰਧਾ ਅਤੇ ਧੂਮ ਧਾਮ ਨਾਲ ਤਿੰਨ ਰੋਜਾ ''ਨਵੇਂ ਸਾਲ ਗੁਰੂ ਦੇ ਨਾਲ ਗੁਰਬਾਣੀ ਕੀਰਤਨ ਸਮਾਗਮ'' ਮਨਾਇਆ ਗਿਆ।ਸੁਪਰੀਮ ਕੌਂਸਲ ਨਵੀਂ ਮੁੰਬਈ ਗੁਰਦੁਆਰਾ ਅਤੇ ਦਸਮੇਸ਼ ਦਰਸ਼ਨ ਚੈਰੀਟੇਬਲ ਟਰੱਸਟ ਵੱਲੋਂ ਸਮੂਹ ਗੁਰਦੁਆਰਾ ਕਮੇਟੀਆਂ ਅਤੇ ਸੰਗਤ ਦੇ ਸਹਿਯੋਗ ਨਾਲ ਨਵੀਂ ਮੁੰਬਈ ਦੇ ਗਣਪਤ ਸੇਠ ਤਾਂਡੇਲ ਗਰਾÀੂਂਡ, ਨੇਰੂਲ ਵਿਖੇ ਦੇਰ ਰਾਤ ੮ ਤੋਂ ੨ ਵਜੇ ਤਕ ਕਰਾਏ ਗਏ ਤੀਜੇ ਦਿਨ ਅਤੇ ਸਾਲ ਦੇ ਆਖ਼ਰੀ ਕੀਰਤਨ ਸਮਾਗਮ ਵਿਚ ਠੰਡ ਦੇ ਬਾਵਜੂਦ ਸੰਗਤ ਦੀ ਸ਼ਮੂਲੀਅਤ ਰਿਕਾਰਡ ਤੋੜ ਰਹੀ। ਜਿਸ ਨਾਲ ਸਾਰਾ ਇਲਾਕਾ ਹੀ ਗੁਰਬਾਣੀ ਦੇ ਰੰਗ ਵਿਚ ਰੰਗਿਆ ਗਿਆ, ਦਰਜਨਾਂ ਰਾਗੀ ਜਥਿਆਂ ਤੋਂ ਇਲਾਵਾ ਉੱਘੇ ਧਾਰਮਿਕ ਅਤੇ ਰਾਜਨੀਤਿਕ ਸ਼ਖ਼ਸੀਅਤਾਂ ਨੇ ਵੀ ਇਸ ਮੌਕੇ ਅਪਣੀ ਹਾਜ਼ਰੀ ਲਵਾਈ।ਸਮਾਗਮ ਨੂੰ ਸੰਬੋਧਨ ਕਰਦਿਆਂ ਦਮਦਮੀ ਟਕਸਾਲ ਦੇ ਮੁਖੀ ਅਤੇ ਸੰਤ ਸਮਾਜ ਦੇ ਪ੍ਰਧਾਨ ਸੰਤ ਗਿਆਨੀ ਹਰਨਾਮ ਸਿੰਘ ਖ਼ਾਲਸਾ ਨੇ ਪ੍ਰਬੰਧਕਾਂ ਅਤੇ ਸੰਗਤ ਨੂੰ ਸਮਾਗਮ ਦੀ ਕਾਮਯਾਬੀ ਅਤੇ ਨਵੇਂ ਸਾਲ ਦੀ ਆਮਦ ਮੌਕੇ ਕਥਾ ਕੀਰਤਨ ਦੇ ਪਰਉਪਕਾਰ ਨਾਲ ਜੀਵਨ ਸਫਲਾ ਕਰਨ ਦੀ ਸ਼ਲਾਘਾ ਕੀਤੀ ਅਤੇ ਵਧਾਈ ਦਿਤੀ । ਪ੍ਰੋ: ਸਰਚਾਂਦ ਸਿੰਘ ਵੱਲੋਂ ਦਿਤੀ ਜਾਣਕਾਰੀ 'ਚ ਬਾਬਾ ਹਰਨਾਮ ਸਿੰਘ ਖ਼ਾਲਸਾ ਨੇ ਕਿਹਾ ਕਿ ਕਈ ਲੋਕ ਨਵੇਂ ਸਾਲ ਦੀ ਆਮਦ ਮੌਕੇ ਐਬਾਂ ਵਿਚ ਪੈ ਕੇ ਜ਼ਿੰਦਗੀ ਦੁਸ਼ਵਾਰ ਕਰ ਰਹੇ ਹਨ, ਪਰ ਤਸੱਲੀ ਦੀ ਗਲ ਹੈ ਕਿ ਮੁੰਬਈ ਦੀਆਂ ਸੰਗਤਾਂ ਵੱਲੋਂ ਕੀਰਤਨ ਦਰਬਾਰ ਦੇ ਪਰਉਪਕਾਰ ਰਾਹੀਂ ਗੁਰਬਾਣੀ ਨਾਲ ਜੋੜਦਿਆਂ ਨਵੀਂ ਪੀੜੀ ਨੂੰ ਚੰਗੀ ਸੇਧ ਦਿਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਨੌਜਵਾਨ ਪੀੜੀ ਸਾਡੇ ਸਮਾਜ ਦਾ ਸਰਮਾਇਆ ਹੈ, ਜਿਨ੍ਹਾਂ ਨੂੰ ਆਪਣੇ ਅਮੀਰ ਵਿਰਸੇ ਨਾਲ ਜੋੜਿਆ ਜਾਣਾ ਜ਼ਰੂਰੀ ਹੈ।
ਦਮਦਮੀ ਟਕਸਾਲ ਦੇ ਮੁਖੀ ਨੇ ਕਿਹਾ ਕਿ ਭਾਵੇਂ ਸਿਖ ਸਮਾਜ ਲਈ ਨਾਨਕਸ਼ਾਹੀ ਸੰਮਤ ਮੁਤਾਬਿਕ ਇਕ ਚੇਤ ਨੂੰ ਨਵੇਂ ਸਾਲ ਦੀ ਸ਼ੁਰੂਆਤ ਹੁੰਦੀ ਹੈ ਪਰ ਈਸਵੀ ਸੰਮਤ ਮੁਤਾਬਿਕ ਨਵਾਂ ਸਾਲ ਮਨਾਉਣ ਵਾਲੇ ਦੂਜੇ ਧਰਮਾਂ ਅਤੇ ਭਾਈਚਾਰਿਆਂ ਦਾ ਸਤਿਕਾਰ ਕਰਨਾ ਵੀ ਸਾਡਾ ਫ਼ਰਜ਼ ਹੈ। ਉਨ੍ਹਾਂ ਕਿਹਾ ਕਿ ਗੁਰਬਾਣੀ ਸਮਾਜਕ ਅਲਾਮਤਾਂ ਬੁਰਾਈਆਂ ਤੋਂ ਬਚਣ ਪ੍ਰਤੀ ਮਾਰਗ ਦਰਸ਼ਨ ਕਰਦੀ ਹੈ। ਇਸ ਮੌਕੇ ਭਾਈ ਗੁਰਸੇਵਕ ਸਿੰਘ ਅੰਮ੍ਰਿਤਸਰ, ਭਾਈ ਲਖਵਿੰਦਰ ਸਿੰਘ ਅੰਮ੍ਰਿਤਸਰ, ਭਾਈ ਰਵਿੰਦਰ ਸਿੰਘ ਅੰਮ੍ਰਿਤਸਰ, ਭਾਈ ਮਨਿੰਦਰ ਸਿੰਘ ਸ੍ਰੀਨਗਰ, ਗਿਆਨੀ ਗੱਜਣ ਸਿੰਘ ਗੜਗੱਜ, ਭਾਈ ਹਰਪਾਲ ਸਿੰਘ ਟਰਾਂਟੋ, ਭਾਈ ਜਸਵਿੰਦਰ ਸਿੰਘ ਅੰਮ੍ਰਿਤਸਰ, ਭਾਈ ਸੁਖਵਿੰਦਰ ਸਿੰਘ ਬਾਬਾ ਬਕਾਲਾ, ਭਾਈ ਜਗਤਾਰ ਸਿੰਘ ਜੰਮੂ, ਭਾਈ ਬਲ ਪ੍ਰੀਤ ਸਿੰਘ ਲੁਧਿਆਣਾ ਆਦਿ ਰਾਗੀ ਜਥਿਆਂ ਨੇ ਅਨੰਦਮਈ ਸ਼ਬਦ ਕੀਰਤਨ ਰਾਹੀਂ ਸੰਗਤ ਨੂੰ ਨਿਹਾਲ ਕੀਤਾ। ਇਸ ਮੌਕੇ ਸੁਪਰੀਮ ਕੌਂਸਲ ਦੇ ਪ੍ਰਧਾਨ ਭਾਈ ਜਸਪਾਲ ਸਿੰਘ ਸਿੱਧੂ ਅਤੇ ਦਸਮੇਸ਼ ਚੈਰੀਟੇਬਲ ਟਰੱਸਟ ਦੇ ਪ੍ਰਧਾਨ ਹਰਜਿੰਦਰ ਸਿੰਘ ਸੈਣੀ ਨੇ ਟਕਸਾਲ ਮੁਖੀ ਬਾਬਾ ਹਰਨਾਮ ਸਿੰਘ ਖ਼ਾਲਸਾ, ਗੁਰੂ ਨਾਨਕ ਹੋਸਪੀਟਲ ਚੈਰੀਟੇਬਲ ਟਰੱਸਟ ਮੁੰਬਈ ਦੇ ਮੁਖੀ ਸ: ਸਰਬਜੀਤ ਸਿੰਘ ਰੇਸ਼ਮ, ਵਿਧਾਇਕ ਸ੍ਰੀ ਪ੍ਰਸ਼ਾਂਤ ਠਾਕੁਰ, ਵਿਧਾਇਕ ਗਣੇਸ਼ ਨਾਇਕ ਅਤੇ ਸੰਤ ਕਿਸ਼ਨ ਸਿੰਘ ਕਥਾਵਾਚਕ ਅੰਮ੍ਰਿਤਸਰ ਵਾਲੇ ਨੂੰ ਸਨਮਾਨਿਤ ਕੀਤਾ। ਇਸ ਮੌਕੇ ਗੁਰੂ ਕਾ ਲੰਗਰ ਅਟੁੱਟ ਵਰਤਿਆ। ਇਸ ਮੌਕੇ ਭਾਈ ਜਸਪਾਲ ਸਿੰਘ ਸਿੱਧੂ, ਸ: ਹਰਜਿੰਦਰ ਸਿੰਘ ਸੈਣੀ ਤੋਂ ਇਲਾਵਾ ਵੱਖ ਵੱਖ ਗੁਰਦੁਆਰਾ ਕਮੇਟੀਆਂ ਦੇ ਪ੍ਰਧਾਨ ਸ: ਗਿਆਨ ਸਿੰਘ ਨੇਰੂਲ ਗੁਰਦੁਆਰਾ, ਸ: ਹਰਵਿੰਦਰ ਸਿੰਘ ਪਨਵੇਲ, ਸ: ਚਰਨਦੀਪ ਸਿੰਘ ਕਾਮੋਥੇ, ਸ: ਤਰਲੋਕ ਸਿੰਘ ਕਲੰਬੋਲੀ, ਸ: ਅਮਰਪਾਲ ਸਿੰਘ ਐਰੋਲੀ, ਸ: ਹਰਵਿੰਦਰ ਸਿੰਘ ਪਨਵੇਲ, ਸ: ਇੰਦਰਪ੍ਰੀਤ ਸਿੰਘ ਕੋਪਖਰਨੇ, ਹਰਜਿੰਦਰ ਸਿੰਘ ਸੈਣੀ, ਸ: ਮਿਹਰ ਸਿੰਘ ਰੰਧਾਵਾ,ਸ: ਸਤਨਾਮ ਸਿੰਘ ਮਾਨ ਖਰੜ, ਸ:ਹੀਰਾ ਸਿੰਘ ਪੱਡਾ, ਸ: ਪ੍ਰਤਾਪ ਸਿੰਘ, ਸ: ਮਨਰਾਜ ਸਿੰਘ ਅਤੇ ਸ: ਕੁਲਬੀਰ ਸਿੰਘ ਆਦਿ ਵੀ ਮੌਜੂਦ ਸਨ।