ਸ੍ਰੀ ਆਨੰਦਪੁਰ ਸਾਹਿਬ ਤੋਂ ਕੁਝ ਦੂਰੀ ਤੇ ਸਥਿਤ ਪਿੰਡ ਬੁਰਜ ਵਿਖੇ ਪਹੁੰਚਣ ਵਾਸਤੇ ਅੱਜ 8 ਦਿਨਾਂ ਬਾਅਦ ਵੀ ਕੋਈ ਰਸਤਾ ਨਹੀਂ ਬਣ ਸਕਿਆ ਹੈ, ਜਿਸ ਕਰਕੇ ਪਿੰਡ ਨਿਵਾਸੀ ਪੌੜੀ ਲਗਾ ਕੇ ਪੁੱਲ ਨੂੰ ਪਾਰ ਕਰਨ ਲਈ ਯਤਨਸ਼ੀਲ ਹਨ। ਜਦਕਿ ਪਿੰਡ ਦੇ ਲੋਕਾਂ ਦੀ ਮੱਦਦ ਲਈ ਸਾਈਕਲਿੰਗ ਐਸੋਸੀਏਸ਼ਨ ਸ੍ਰੀ ਆਨੰਦਪੁਰ ਸਾਹਿਬ ਨਿੱਤਰ ਆਈ ਹੈ ਤੇ ਉਨ੍ਹਾਂ ਅੱਜ ਸਾਰਾ ਦਿਨ ਲਗਾ ਕੇ ਪਿੰਡ ਦੇ ਪ੍ਰਾਈਮਰੀ ਸਕੂਲ ਦੀ ਸਫਾਈ ਕੀਤੀ ਤੇ ਸਾਰੇ ਕਮਰਿਆਂ ਨੂੰ ਬੈਠਣ ਦੇ ਯੋਣ ਬਣਾਇਆ।ਜ਼ਿਕਰਯੋਗ ਹੈ ਕਿ 16 ਅਗਸਤ ਤੋਂ ਹੀ ਇਲਾਕੇ ਅੰਦਰ ਪਈ ਹੜ੍ਹਾਂ ਦੀ ਮਾਰ ਦੇ ਨਾਲ ਜਿੱਥੇ ਦਰਜਨਾਂ ਪਿੰਡਾਂ ਦੇ ਵਿੱਚ ਪਾਣੀ ਭਰ ਗਿਆ ਉੱਥੇ ਹੀ 35 ਕਰੋੜ ਦਾ ਨੁਕਸਾਨ ਇਲਾਕੇ ਅੰਦਰ ਬੁਨਿਆਦੀ ਢਾਂਚੇ, ਪਸ਼ੂਆਂ, ਝੁੱਗੀਆਂ, ਮਕਾਨਾਂ, ਪੋਲਟਰੀ ਫਾਰਮਾਂ ਆਦਿ ਦਾ ਹੋਇਆ। ਪੰਜਾਬ ਸਰਕਾਰ ਵੱਲੋਂ ਐਲਾਨੀ ਇਸ ਕੁਦਰਤੀ ਕਰੋਪੀ ਦੇ ਅੱਗੇ ਇਨਸਾਨ ਤਾਂ ਬੇਵੱਸ ਹੀ ਹੈ। ਜਦਕਿ ਹੜ੍ਹਾਂ ਦੇ ਨਾਲ ਹੋਏ ਨੁਕਸਾਨ ਦੀ ਪੂਰਤੀ ਦੇ ਲਈ ਪ੍ਰਸ਼ਾਸਨ, ਸਰਕਾਰ, ਸਮਾਜਿਕ ਤੇ ਧਾਰਮਿਕ ਜਥੇਬੰਦੀਆਂ ਆਪੋ-ਆਪਣੇ ਪੱਧਰ ਤੇ ਯਤਨ ਕਰ ਰਹੀਆਂ ਹਨ।ਜੇਕਰ ਗੱਲ ਪਿੰਡ ਬੁਰਜ ਦੀ ਕਰ ਲਈ ਜਾਵੇ ਤਾਂ ਇਹ ਪਿੰਡ ਬਿਲਕੁਲ ਸਤਲੁਜ ਦਰਿਆ ਦੇ ਕੰਢੇ ਤੇ ਵਸਿਆ ਹੈ ਤੇ ਜਦੋਂ ਵੀ ਸਤਲੁਜ ਵਿੱਚ ਪਾਣੀ ਭਰਦਾ ਹੈ ਤਾਂ ਸਭ ਤੋਂ ਵੱਧ ਮਾਰ ਇਸੇ ਪਿੰਡ ਨੂੰ ਪੈਂਦੀ ਹੈ। ਇਹੀ ਕਾਰਨ ਹੈ ਕਿ ਹੜ੍ਹਾਂ ਦੌਰਾਨ ਇਹ ਪਿੰਡ ਟਾਪੂ ਵਿੱਚ ਤਬਦੀਲ ਹੋ ਗਿਆ ਸੀ ਤੇ ਪਿੰਡ ਨੂੰ ਆਉਣ-ਜਾਣ ਵਾਲੇ ਸਾਰੇ ਰਸਤੇ ਪਾਣੀ ਦੇ ਵਹਾਅ ਵਿੱਚ ਹੜ੍ਹ ਗਏ ਸਨ ਅਤੇ ਹਾਲਾਤ ਅੱਜ ਵੀ ਜਿਉਂ ਦੇ ਤਿਉਂ ਹੀ ਹਨ।ਵਧੇਰੇ ਜਾਣਕਾਰੀ ਦਿੰਦੇ ਹੋਏ ਪਿੰਡ ਦੇ ਲੋਕ ਜਿਨ੍ਹਾਂ ਵਿੱਚ ਗਿਆਨ ਸਿੰਘ, ਰਮੇਸ਼ ਸਿੰਘ, ਜਸਵਿੰਦਰ ਸਿੰਘ ਆਦਿ ਨੇ ਦੱਸਿਆ ਕਿ ਉਹ ਹਾਲਾਤਾਂ ਦੇ ਅੱਗੇ ਬੇਵੱਸ ਹੋ ਚੁੱਕੇ ਹਨ ਕਿਉਂਕਿ ਨਾ ਤਾਂ ਉਨ੍ਹਾਂ ਦੇ ਪਿੰਡ ਤੱਕ ਪ੍ਰਸ਼ਾਸਨਿਕ ਅਧਿਕਾਰੀ ਹੀ ਪਹੁੰਚ ਪਾ ਰਹੇ ਹਨ ਤੇ ਨਾ ਹੀ ਕੋਈ ਹੋਰ ਸਮਾਜਿਕ ਜਥੇਬੰਦੀ। ਜਦਕਿ ਉਹ ਆਪਣੇ ਪੱਧਰ ਤੇ ਯਤਨ ਕਰ ਰਹੇ ਹਨ ਪਰ ਉਹ ਨਾਕਾਫੀ ਹੀ ਹਨ। ਇਸੇ ਦੌਰਾਨ ਅੱਜ ਸਾਈਕਲਿੰਗ ਐਸੋਸੀਏਸ਼ਨ ਦੇ ਨੌਜੁਆਨਾਂ ਦੀ ਟੀਮ ਨੇ ਪਿੰਡ ਬੁਰਜ ਵਿਖੇ ਪਹੁੰਚ ਕੀਤੀ ਅਤੇ ਇੱਥੋਂ ਦੇ ਸਕੂਲ ‘ਚ ਭਰੇ ਚਿੱਕੜ, ਗਾਰੇ ਦੀ ਖੁੱਦ ਸਫਾਈ ਕੀਤੀ ਅਤੇ ਸਕੂਲ ਦੇ ਸਾਰੇ ਕਮਰਿਆਂ ਨੂੰ ਬੱਚਿਆਂ ਦੇ ਬੈਠਣ ਯੋਗ ਬਣਾਇਆ। ਹਾਲਾਂਕਿ ਸਕੂਲ ਦਾ ਮੈਦਾਨ ਅਜੇ ਵੀ ਪਾਣੀ ਦੇ ਨਾਲ ਭਰਿਆ ਹੋਇਆ ਹੈ ਪਰ ਫਿਰ ਵੀ ਸਾਈਕਲਲਿੰਗ ਐਸੋਸੀਏਸ਼ਨ ਦੇ ਮੈਂਬਰਾਂ ਜਿਨ੍ਹਾਂ ਵਿੱਚ ਪ੍ਰਧਾਨ ਰਣਜੀਤ ਸਿੰਘ, ਸਕੱਤਰ ਅਜੈ ਬੈਂਸ, ਜਸਪਾਲ ਸਿੰਘ, ਨਰਿੰਦਰ ਸਿੰਘ, ਗੁਰਪ੍ਰੀਤ ਸਿੰਘ, ਹਰਦੀਪ ਹੈਰੀ, ਗੁਰਦੀਪ ਸਿੰਘ, ਮਾਸਟਰ ਕਰਮਜੀਤ ਸਿੰਘ, ਜਗਜੀਤ ਕੰਦੋਲਾ, ਸਾਹਿਲ ਅਤੇ ਹਰਪ੍ਰੀਤ ਸਿੰਘ ਆਦਿ ਵੀ ਹਾਜ਼ਰ ਸਨ।