ਆਲਮ ਲੁਹਾਰ ਦਾ ਚੇਲਾ ਅਤੇ ਕੌਮਾਂਤਰੀ ਪੱਧਰ 'ਤੇ ਸਨਮਾਨਿਤ ਹਸਤੀ ਜਫ਼ਰ ਲੁਹਾਰ ਦਾ ਸੰਗੀਤਕ ਗਰੁਪ ਜਦੋਂ ਰਾਤੀਂ ਅੱਠ ਵਜੇ ਮੋਹਾਲੀ ਪ੍ਰੈਸ ਕਲੱਬ ਪਹੁੰਚਿਆਂ ਤਾਂ ਕਲੱਬ ਦੀ ਨਵੀਂ ਜਿੱਤੀ ਟੀਮ ਦੀ ਖੁਸ਼ੀ 'ਚ ਹੋਰ ਵਾਧਾ ਹੋ ਗਿਆ।ਹੱਥਾਂ ਵਿੱਚ ਲੰਬਾ ਚਿਮਟਾ ਵਜਾਉਂਦੇ ਤੇ ਨੱਚਦੇ ਹੋਏ ਜਦੋਂ ਜਫ਼ਰ ਲੁਹਾਰ ਨੇ 'ਬੋਲ ਮਿੱਟੀ ਦਿਆ ਬਾਵਿਆ' ਦੀ ਸੁਰ ਛੇੜੀ ਤਾਂ ਹਾਜ਼ਰ ਸਰੋਤਿਆਂ ਨੂੰ ਇੱਹ ਫਰਕ ਕਰਨਾ ਔਖਾ ਹੋ ਗਿਆ ਕਿ ਗਾਉਣ ਵਾਲਾ ਆਲਮ ਲੁਹਾਰ ਹੈ ਜਾਂ ਜਫ਼ਰ ਲੁਹਾਰ। ਅਲਗੋਜਿਆਂ ਦੀ ਜੋੜੀ ਵਜਾਉਣ ਵਾਲਾ ਮੁਹੰਮਦ ਅਸਲ, ਵੱਡੇ ਢੋਲਕ ਵਾਲਾ ਦਿਉਕੱਦ ਰਿਆਜ਼, ਛੋਟੀ ਢੋਲਕ ਵਾਲਾ ਸਾਈਂ ਵਲੈਤ ਸ਼ਾਹ ਅਤੇ ਡਾ. ਮਸੀਹ ਦੇ ਹਰਮੋਨੀਅਮ ਵਾਲੀ ਇਹ ਛੋਟੀ ਪਰ ਸੰਗੀਤ ਤੇ ਲੈਅ ਨਾਲ ਇੱਕਸੁਰ ਹੋਕੇ ਗਾਉਣ ਵਾਲੇ ਜਫ਼ਰ ਲੁਹਾਰ ਨੇ ਆਲਮ ਲੁਹਾਰ ਦੇ ਪ੍ਰਸਿੱਧ ਗੀਤ ' ਵਾਜਾਂ ਮਾਰੀਆਂ ਬੁਲਾਇਆ ਕਈ ਵਾਰ ਮੈਂ ' ਦੀ ਸੁਰ ਚੁੱਕੀ ਤਾਂ ਸਰੋਤੇ ਅੱਸ਼-ਅੱਸ਼ ਕਰ ਉਠੇ। ਫਿਰ ਇੱਕ ਤੋਂ ਬਾਅਦ ਇੱਕ ਇੱਕ ਕਰਕੇ ਜੱਗਾ, ਮਿਰਜਾ ਅਤੇ ਜੁਗਨੀ ਗਾ ਕੇ ਜਫ਼ਰ ਲੁਹਾਰ ਨੇ ਪੰਜਾਬੀ ਲੋਕ ਸੰਗੀਤ ਦੇ ਅਸਲੀ ਰੰਗ ਨੂੰ ਸ਼ਾਹਕਾਰ ਕਰ ਦਿੱਤਾ।
ਸਿਰਫ਼ ਇੱਕ ਘੰਟੇ ਦੀ ਪ੍ਰਫਾਰਮੈਂਸ ਦੇਣ ਆਏ ਫੰਨਕਾਰ ਸਮੇਂ ਦੀ ਸੀਮਾਵਾਂ ਵਿੰਚ ਸੀਮਤ ਨਾ ਰਹੇ ਸਕੇ ਅਤੇ ਉਨ੍ਹਾ ਸਰੋਤਿਆਂ ਦੇ ਪਿਆਰ ਨੂੰ ਸਿਜਦਾ ਕਰਦਿਆਂ ਲਗਾਤਾਰ ਤਿੰਨ ਘੰਟੇ ਗਾ ਕੇ ਆਪਣੀ ਗਾਇਕੀ ਦਾ ਲੋਹਾ ਮੰਨਵਾਇਆ। ਵੱਡੀ ਢੋਲਕ ਵਾਲੇ ਰਿਆਜ ਨੇ ਗਲ਼ 'ਚ ਢੋਲ ਪਾ ਕੇ ਸਿਰਫ਼ ਢੋਲ ਹੀ ਨਹੀਂ ਵਜਾਇਆ ਸਗੋਂ ਢੋਲ ਦੇ ਕਈ ਤਰ੍ਹਾਂ ਦੇ ਕਰਤੱਵ ਦਿਖਾਉਂਦਿਆਂ ਧਰਤੀ 'ਤੇ ਪਏ ਸੌ-ਸੌ ਦੇ ਦੇ ਨੋਟਾਂ ਨੂੰ ਆਪਣੀਆਂ ਦੋਵੇਂ ਅੱਖਾਂ ਵਿੱਚ ਚੁੱਕ ਸਰੋਤਿਆਂ ਨੂੰ ਤਾੜੀਆਂ ਮਾਰਨ ਲਈ ਮਜ਼ਬੂਰ ਕਰ ਦਿੱਤਾ। ਮੋਹਾਲੀ ਪ੍ਰੈਸ ਕਲੱਬ ਵੱਲੋਂ ਇਨ੍ਹਾਂ ਕੌਮਾਂਤਰੀ ਕਲਾਕਾਰਾਂ ਨੂੰ ਮੋਹਾਲੀ ਵਿੱਚ ਬੁਲਾ ਕੇ ਜਿੱਥੇ ਲਹਿੰਦੇ ਤੇ ਚੜ੍ਹਦੇ ਪੰਜਾਬ ਦੇ ਸਾਂਝੇ ਸੱਭਿਆਚਾਰ ਨੂੰ ਨੌਜਵਾਨ ਪੀੜ੍ਹੀ ਅੱਗੇ ਪੇਸ਼ ਕੀਤਾ ਗਿਆ ,ਉੱਥੇ ਹੀ ਸਾਂਝੀ ਮਾਂ ਬੋਲੀ ਪੰਜਾਬੀ ਅਤੇ ਵਿਰਾਸਤ ਦੇ ਅੰਗ ਚਿਮਟੇ , ਢੋਲ, ਅਲਗੋਜੇ ਅਤੇ ਹਰਮੋਨੀਅਮ ਨਾਲ ਪੇਸ਼ਕਾਰੀ ਦੇ ਕੇ ਪੁਰਾਣੇ ਪੰਜਾਬ ਦੇ ਮੇਲਿਆਂ ਦੀ ਯਾਦ ਤਾਜ਼ਾ ਕਰਵਾ ਦਿੱਤੀ। ਜਫ਼ਰ ਲੁਹਾਰ ਦੀ ਦਿਲਕਸ਼ ਆਵਾਜ਼, ਚਿਮਟੇ ਦਾ ਅਨੋਖਾ ਅੰਦਾਜ਼ ਅਤੇ ਅਖਾੜੇ 'ਚ ਨਚਾਰਾਂ ਵਾਂਗ ਨੱਚ ਕੇ ਪਾਈ ਜਾ ਰਹੀ ਧੁਮਾਲ ਦੀ ਸਰੋਤਿਆਂ ਨੇ ਰੱਜ ਕੇ ਦਾਦ ਦਿੱਤੀ। ਬਾਅਦ ਵਿੱਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਜਫ਼ਰ ਲੁਹਾਰ ਨੇ ਕਿਹਾ ਕਿ ਦੋਵੇਂ ਪੰਜਾਬਾਂ ਦੇ ਲੋਕ ਦਾ ਦਿਲ,ਖੂਨ ਤੇ ਪਿਆਰ ਇੱਕ ਹੈ। ਲੋਕਾਂ ਦੇ ਦਿਲਾਂ 'ਚ ਕੋਈ ਸਰਹੱਦ ਨਹੀਂ,ਸਗੋਂ ਇਹ ਤਾਂ ਹਾਕਮਾਂ ਦੀਆਂ ਬਣਾਈਆਂ ਸਰਹੱਦਾਂ ਹਨ ਜੋ ਪੰਜਾਬੀਆਂ ਨੂੰ ਕਦੇ ਤੋੜ ਨਹੀਂ ਸਕਦੀਆਂ।ਇਸ ਸਮੇਂ ਮੁਹਾਲੀ ਪ੍ਰੈਸ ਕਲੱਬ ਦੇ ਪ੍ਰਧਾਨ ਸੁਖਦੇਵ ਸਿੰਘ ਪਟਵਾਰੀ, ਜਨਰਲ ਸਕੱਤਰ ਗੁਰਮੀਤ ਸਿੰਘ ਸ਼ਾਹੀ ਅਤੇ ਸੱਭਿਆਚਾਰਕ ਕਮੇਟੀ ਦੇ ਚੇਅਰਮੈਨ ਗੁਰਜੀਤ ਸਿੰਘ ਬਿੱਲਾ ਤੇ ਨਵੀਂ ਚੁਣੀ ਪ੍ਰੈਸ ਕਲੱਬ ਦੀ ਟੀਮ ਨੇ ਸਾਰੇ ਕਲਾਕਾਰਾਂ ਨੂੰ ਮੋਮੈਂਟੋ ਤੇ ਲੋਈਆਂ ਦੇ ਕੇ ਸਨਮਾਨਿਤ ਕੀਤਾ ਗਿਆ ।