ਸਾਂਸਦ ਆਦਰਸ਼ ਗਰਾਮ ਯੋਜਨਾ ਤਹਿਤ ਰੂਪਨਗਰ ਬਲਾਕ ਦੇ ਪਿੰਡ ਪ੍ਰਿਥੀਪੁਰ ਨੂੰ ਸ਼ਮਸ਼ੇਰ ਸਿੰਘ ਦੁਲੋਂ ਸਾਂਸਦ ਰਾਜ ਸਭਾ ਵਲੋਂ ਗੋਦ ਲਿਆ ਗਿਆ ਹੈ। ਇਸ ਪਿੰਡ ਦਾ ਸਰਬਪੱਖੀ ਵਿਕਾਸ ਕਰਦੇ ਹੋਏ ਇਸ ਵਿਚ ਬੁਨਿਆਦੀ ਢਾਂਚਾ ਮੁਹਈਆ ਕਰਵਾਉਣ ਦੇ ਮੰਤਵ ਨਾਲ ਸ਼ਮਸ਼ੇਰ ਸਿੰਘ ਦੂਲੋ ਸਾਂਸਦ ਨੇ ਅੱਜ ਡਿਪਟੀ ਕਮਿਸ਼ਨਰ ਰੂਪਨਗਰ ਗੁਰਨੀਤ ਤੇਜ ਨਾਲ ਵਿਚਾਰ ਵਟਾਂਦਰਾ ਕਰਦੇ ਹੋਏ ਦਸਿਆ ਕਿ ਉਨਾਂ ਵਲੋਂ ਬਾਬੂ ਕਾਂਸ਼ੀ ਰਾਮ ਦੇ ਜਨਮ ਸਥਾਨ ਇਸ ਪਿੰਡ ਨੂੰ ਗੋਦ ਲਿਆ ਗਿਆ ਹੈ ਅਤੇ ਉਨਾਂ ਦੀ ਦਿਲੀ ਤਮੰਨਾ ਹੈ ਕਿ ਇਸ ਪਿੰਡ ਦਾ ਸਰਬਪੱਖੀ ਵਿਕਾਸ ਕੀਤਾ ਜਾਵੇ। ਉਨਾਂ ਦਸਿਆ ਕਿ ਉਨਾਂ ਵਲੋਂ ਪਹਿਲਾਂ ਹੀ ਇਸ ਪਿੰਡ ਵਿਚ ਬਹੁਮੰਤਵੀ ਕਮਿਉਨਿਟੀ ਸੈਂਟਰ ਬਨਾਉਣ ਲਈ 20 ਲੱਖ ਰੁਪਏ ਦੇ ਫੰਡਜ ਜਾਰੀ ਕੀਤੇ ਗਏ ਹਨ।ਉਨਾਂ ਕਿਹਾ ਕਿ ਇਸ ਕਮਿਉਨਿਟੀ ਸੈਂਟਰ ਵਿਚ ਇਕ ਹੀ ਛੱਤ ਹੇਠ ਵਖ ਵਖ ਸਹੂਲਤਾਂ ਦਿਤੀਆਂ ਜਾਣ ਦੇ ਮੰਤਵ ਨਾਲ ਕਿਸੇ ਆਰਚੀਟੈਕਟ ਪਾਸੋਂ ਐਸਟੀਮੇਟ ਲਗਵਾ ਲਿਆ ਜਾਵੇ ਤਾਂ ਜੋ ਇਸ ਬਹੁਮੰਤਵੀ ਸੈਂਟਰ ਵਿਚ ਹੀ ਜਿਮ, ਆਂਗਣਵਾੜੀ ਕੇਂਦਰ , ਹੁਨਰ ਵਿਕਾਸ ਕੇਂਦਰ, ਗੈਸਟ ਰੂਮ ਆਦਿ ਸ਼ੁਰੂ ਕੀਤਾ ਜਾ ਸਕੇ। ੳਨਾਂ ਕਿਹਾ ਕਿ ਉਹ ਜਲਦੀ ਹੀ ਸਿਹਤ ਮੰਤਰੀ ਨਾਲ ਇਸ ਪਿੰਡ ਵਿਚ ਪੇਂਡੂ ਡਿਸਪੈਂਸਰੀ ਬਨਾਉਣ ਲਈ ਗਲਬਾਤ ਕਰਨਗੇ ਤਾਂ ਜੋ ਪਿੰਡ ਵਾਸੀਆਂ ਨੂੰ ਸਿਹਤ ਸੇਵਾਵਾਂ ਦੀ ਕੋਈ ਸਮੱਸਿਆ ਨਾ ਆਵੇ।ੳਨਾਂ ਇਹ ਵੀ ਕਿਹਾ ਕਿ ਪਿੰਡ ਵਿਚਲੇ ਪ੍ਰਾਈਮਰੀ ਸਕੂਲ ਦੇ ਨਵੀਨੀਕਰਨ ਦੇ ਤਖਮੀਨੇ ਵੀ ਲਗਵਾਏ ਜਾਣ ਤਾਂ ਜੋ ਇਸ ਸਕੂਲ ਵਿਚ ਵਿਦਿਆਰਥੀਆਂ ਦੇ ਬੈਠਣ ਲਈ ਹੋਰ ਕਮਰਿਆਂ ਦੀ ਉਸਾਰੀ ਕੀਤੀ ਜਾ ਸਕੇ। ੳਨਾਂ ਇਹ ਵੀ ਕਿਹਾ ਕਿ ਪਿੰਡ ਵਿਚ ਸੋਲਰ ਲਾਈਟਾਂ ਲਗਾਉਣ ਲਈ ਵੀ ਐਸਟੀਮੇਟ ਲਗਵਾਏ ਜਾਣ। ਉਨਾਂ ਕਿਹਾ ਕਿ ਇਸ ਪਿੰਡ ਦੇ ਵਿਕਾਸ ਲਈ ਉਹ ਕੇਂਦਰ ਪਾਸੋਂ ਵੀ ਫੰਡਜ ਮੁਹਈਆ ਕਰਾਉਣਗੇ। ਇਸ ਮੌਕੇ ਡਿਪਟੀ ਕਮਿਸ਼ਨਰ ਸ਼੍ਰੀਮਤੀ ਗੁਰਨੀਤ ਤੇਜ ਨੇ ਦਸਿਆ ਕਿ ਇਸ ਪਿੰਡ ਦੀ ਪੰਚਾਇਤ ਵਲੋਂ ਕਮਿਉਨਿਟੀ ਸੈਂਟਰ ਲਈ 12 ਮਰਲੇ ਜਮੀਨ ਦਾਨ ਦਿਤੀ ਗਈ ਹੈ ਅਤੇ ਸ਼੍ਰੀ ਸ਼ਮਸ਼ੇਰ ਸਿੰਘ ਦੁਲੋਂ ਸਾਂਸਦ ਦੇ ਦਿਸ਼ਾ ਨਿਰਦੇਸ਼ ਅਨੁਸਾਰ ਇਸ ਪਿੰਡ ਦਾ ਵਿਕਾਸ ਕਰਦੇ ਹੋਏ ਇਸ ਪਿੰਡ ਨੂੰ ਸਹੀ ਮਾਇਨਿਆਂ ਵਿਚ ਆਦਰਸ਼ ਪਿੰਡ ਬਣਾਇਆ ਜਾਵੇਗਾ।ਉਨ੍ਹਾਂ ਕਿਹਾ ਕਿ ਇਸ ਪਿੰਡ ਵਿਚ ਕਮਿਊਨਿਟੀ ਸੈਂਟਰ ਬਨਾਉਣ ਲਈ ਸ਼੍ਰੀ ਸ਼ਮਸ਼ੇਰ ਸਿੰਘ ਦੁਲੋਂ ਸਾਂਸਦ ਵਲੋਂ 20 ਲੱਖ ਰੁਪਏ ਜਾਰੀ ਕੀਤੇ ਜਾ ਚੁੱਕੇ ਹਨ ਅਤੇ ਉਨਾਂ ਦੇ ਦਿਸ਼ਾ ਨਿਰਦੇਸ਼ ਅਨੁਸਾਰ ਬਾਕੀ ਕੰਮਾਂ ਦੇ ਵੀ ਐਸਟੀਮੇਟ ਲਗਾ ਕੇ ਉਨਾਂ ਨੂੰ ਭੇਜ ਦਿਤੇ ਜਾਣਗੇ। ਇਸ ਮੀਟਿੰਗ ਦੌਰਾਨ ਹੋਰਨਾਂ ਤੋਂ ਇਲਾਵਾ ਸ਼੍ਰੀ ਅਮਰਦੀਪ ਸਿੰਘ ਗੁਜਰਾਲ ਵਧੀਕ ਡਿਪਟੀ ਕਮਿਸ਼ਨਰ '(ਵਿਕਾਸ), ਸ਼੍ਰੀ ਗੁਰਿੰਦਰ ਪਾਲ ਸਿੰਘ ਬਿੱਲਾ ਚੇਅਰਮੈਨ ਓ ਬੀ ਸੀ ਸੈਲ, ਸ਼੍ਰੀ ਤੇਜਪਾਲ ਸਿੰਘ ਕਾਰਜਕਾਰੀ ਇੰਜੀਨੀਅਰ ਤੇ ਐਡਵੋਕੇਟ ਲਖਬੀਰ ਸਿੰਘ ਹਾਜਰ ਸਨ।