ਵਿਧਾਨ ਸਭਾ ਹਲਕਾ ਮਜੀਠਾ ਤੋਂ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਐਡਵੋਕੇਟ ਹਿੰਮਤ ਸਿੰਘ ਸ਼ੇਰਗਿੱਲ ਨੇ ਆਪਣੇ ਹਜ਼ਾਰਾਂ ਸਮਰਥਕਾਂ ਸਮੇਤ ਆਪ ਦੇ ਕੌਮੀ ਆਗੂ ਸ੍ਰੀ ਸੰਜੇ ਸਿੰਘ ਦੀ ਅਗਵਾਈ ਹੇਠ ਅੱਜ ਐਸ.ਡੀ.ਐਮ. ਮਜੀਠਾ ਦੇ ਦਫ਼ਤਰ ਵਿੱਚ ਆਪਣੇ ਨਾਮਜ਼ਦਗੀ ਪੱਤਰ ਦਾਖ਼ਲ ਕੀਤੇ।ਐਸ.ਡੀ.ਐਮ. ਮਜੀਠਾ ਸ: ਦਮਨਜੀਤ ਸਿੰਘ ਮਾਨ ਨੇ ਐਡਵੋਕੇਟ ਸ਼ੇਰਗਿੱਲ ਕੋਲੋਂ ਉਹਨਾਂ ਦੇ ਨਾਮਜ਼ਦਗੀ ਪੱਤਰ ਹਾਸਲ ਕੀਤੇ। ਇਸ ਮੌਕੇ 'ਤੇ ਉਹਨਾਂ ਦੇ ਨਾਲ ਦਿੱਲੀ ਤੋਂ ਸ੍ਰੀ ਸੰਜੇ ਸਿੰਘ ਤੋਂ ਇਲਾਵਾ ਸਾਬਕਾ ਮੰਤਰੀ ਸੋਮਨਾਥ ਭਾਰਤੀ, ਵਿਧਾਇਕ ਜਰਨੈਲ ਸਿੰਘ, ਸਾਬਕਾ ਚੇਅਰਮੈਨ ਪ੍ਰਗਟ ਸਿੰਘ ਚੋਗਾਵਾਂ ਅਤੇ ਸਾਬਕਾ ਪੱਤਰਕਾਰ ਸੁਖਦੀਪ ਸਿੰਘ ਸਿੱਧੂ ਮੌਜੂਦ ਸਨ। ਇਸ ਤੋਂ ਪਹਿਲਾਂ ਕਸਬਾ ਮਜੀਠਾ ਵਿਖੇ ਆਪਣੇ ਸੈਂਕੜੇ ਸਮਰਥਕਾਂ ਨਾਲ ਆਮ ਆਦਮੀ ਪਾਰਟੀ ਦੇ ਵਰਕਰਾਂ ਵੱਲੋਂ ਕੱਢੇ ਗਏ ਵਿਸ਼ਾਲ ਕਾਫ਼ਲੇ ਦੀ ਅਗਵਾਈ ਕਰਦਿਆਂ ਆਪ ਦੇ ਪੰਜਾਬ ਮਾਮਲਿਆਂ ਬਾਰੇ ਇੰਚਾਰਜ ਸ੍ਰੀ ਸੰਜੇ ਸਿੰਘ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਪੰਜਾਬ ਅਤੇ ਦੇਸ਼ ਦੀ ਰਾਜਨੀਤੀ 'ਚ ਪਿਛਲੇ 70 ਸਾਲ ਤੋਂ ਫ਼ੈਲ ਚੁੱਕੀ ਗੰਦਗੀ ਨੂੰ ਸਾਫ਼ ਕਰਨ ਲਈ ਆਪ ਦੇ ਚੋਣ ਨਿਸ਼ਾਨ ਝਾੜੂ ਵਾਲਾ ਬਟਨ ਦੱਬਣਾ ਬਹੁਤ ਜ਼ਰੂਰੀ ਹੈ। ਉਹਨਾਂ ਕਿਹਾ ਕਿ ਪੰਜਾਬ ਇਸ ਵਾਰ ਇਤਿਹਾਸ ਸਿਰਜਣ ਜਾ ਰਿਹਾ ਹੈ ਅਤੇ ਪੰਜਾਬੀਆਂ ਨੂੰ ਇਸ ਮੌਕੇ 'ਤੇ ਕਿਸੇ ਗੁੰਮਰਾਹਕੁੰਨ ਪ੍ਰਚਾਰ, ਲਾਲਚ ਜਾਂ ਡਰ ਅਧੀਨ ਖੁੰਝਣਾ ਨਹੀਂ ਚਾਹੀਦਾ।
ਆਪਣੇ ਹਮਾਇਤੀਆਂ ਨੂੰ ਸੰਬੋਧਨ ਕਰਦਿਆਂ ਆਪ ਉਮੀਦਵਾਰ ਐਡਵੋਕੇਟ ਹਿੰਮਤ ਸਿੰਘ ਸ਼ੇਰਗਿੱਲ ਨੇ ਕਿਹਾ ਕਿ ਉਹਨਾਂ ਨੇ ਸ੍ਰੀ ਅਰਵਿੰਦ ਕੇਜਰੀਵਾਲ ਦੀ ਅਗਵਾਈ ਹੇਠ ਪੰਜਾਬ ਵਿੱਚੌਂ ਨਸ਼ਿਆਂ, ਭ੍ਰਿਸ਼ਟਾਚਾਰ, ਗੁੰਡਾਗਰਦੀ, ਕੁਦਰਤੀ ਸੋਮਿਆਂ ਦੀ ਲੁੱਟ, ਬੇਰੁਜ਼ਗਾਰੀ ਅਤੇ ਗ਼ੁਰਬਤ ਖਿਲਾਫ਼ ਲੜਾਈ ਲੜਨ ਦਾ ਜਿਹੜਾ ਪ੍ਰਣ ਕੀਤਾ ਹੈ, ਉਸ ਦੀ ਪੂਰਤੀ ਲਈ ਹਲਕਾ ਮਜੀਠਾ ਦੇ ਸੂਝਵਾਨ ਵੋਟਰ ਝਾੜੂ ਦੇ ਚੋਣ ਨਿਸ਼ਾਨ ਨੂੰ ਦੱਬ ਕੇ ਸ੍ਰੀ ਅਰਵਿੰਦ ਕੇਜਰੀਵਾਲ ਨੂੰ ਸ਼ਕਤੀ ਪ੍ਰਦਾਨ ਕਰਨਗੇ। ਐਡਵੋਕੇਟ ਸ਼ੇਰਗਿੱਲ ਨੇ ਇਸ ਮੌਕੇ 'ਤੇ ਉੱਥੇ ਮੌਜੂਦ ਆਪਣੀ ਮਾਤਾ ਸ੍ਰੀਮਤੀ ਜਸਜੀਤ ਕੌਰ ਸ਼ੇਰਗਿੱਲ ਕੋਲੋਂ ਆਸ਼ੀਰਵਾਦ ਲਿਆ। ਐਸ.ਡੀ.ਐਮ. ਮਜੀਠਾ ਦੇ ਦਫ਼ਤਰ ਵਿਖੇ ਇਸ ਮੌਕੇ ਸਾਬਕਾ ਚੇਅਰਮੈਨ ਪ੍ਰਗਟ ਸਿੰਘ ਚੋਗਾਵਾਂ, ਸਾਬਕਾ ਪੱਤਰਕਾਰ ਸੁਖਦੀਪ ਸਿੱਧੂ, ਐਡਵੋਕੇਟ ਫ਼ੈਰੀ ਮੋਹਾਲੀ, ਰਾਹੁਲ ਸ਼ੁਕਲਾ, ਜਸਕਰਨ ਬੰਦੇਸ਼ਾ, ਜਸਬੀਰ ਸਿੰਘ ਹਮਜਾ, ਗੁਰਭੇਜ ਸਿੱਧੂ, ਮਨਵਿੰਦਰ ਸਿੰਘ ਚੋਗਾਵਾਂ, ਸਤਨਾਮ ਜੱਜ, ਰਾਜਵਿੰਦਰ ਸਿੰਘ ਨਾਗ, ਲਖਵਿੰਦਰ ਸਿੰਘ ਬੇਗੇਵਾਲ, ਸਤਬੀਰ ਵਾਲੀਆ, ਬੂਟਾ ਸਿੰਘ ਝਾਮਕਾ, ਰਛਪਾਲ ਸ਼ਰਮਾ ਮੱਤੇਵਾਲ, ਰੰਗਾ ਸਿੰਘ ਖਿੱਦੋਵਾਲੀ, ਜੱਜਬੀਰ ਸਿੰਘ ਸੋਹੀਆਂ, ਰਣਜੀਤ ਸਿੰਘ ਚੰਡੇ, ਕਿਰਪਾਲ ਸਿੰਘ, ਜੀਵਨਜੋਤ ਕੌਰ, ਬੀਬੀ ਅਮਰਜੀਤ ਕੌਰ ਉੱਦੋਕੇ, ਸੁਰਜੀਤ ਸਿੰਘ ਭੋਏਵਾਲ, ਸੁਰਜੀਤ ਸਿੰਘ ਡਰਾਈਵਰ, ਹਰਪਾਲ ਸਿੰਘ ਭੋਏ, ਰੇਸ਼ਮ ਸਿੰਘ ਬੇਗੇਵਾਲ, ਕੁਲਵਿੰਦਰ ਸਾਹਬੂ ਗੋਪਾਲਪੁਰਾ, ਸੇਵਾਮੁਕਤ ਕੈਪਟਨ ਕੰਵਲਜੀਤ ਸਿੰਘ ਕਾਦਰਾਬਾਦ, ਸੁੱਖ ਅਬਦਾਲ, ਦਲਜੀਤ ਸਿੰਘ ਪਾਖ਼ਰਪੁਰਾ, ਭਿੰਦਾ ਸਰਹਾਲਾ, ਪਵਨਦੀਪ ਸਿੰਘ ਚਾਟੀਵਿੰਡ ਅਤੇ ਇੰਦਰਪ੍ਰੀਤ ਸਿੰਘ ਬੱਲ ਵੀ ਮੌਜੂਦ ਸਨ।