ਪੰਜਾਬ ਸਰਕਾਰ ਨੇ ਸੂਬੇ 'ਚ ਵੱਡੇ ਪੱਧਰ 'ਤੇ ਈਕੋ-ਟੂਰਿਜਮ ਨੂੰ ਉਤਸ਼ਾਹਿਤ ਕਰਨ ਦੀ ਯੋਜਨਾ ਤਿਆਰ ਕੀਤੀ ਹੈ ਅਤੇ ਇਸ ਸਬੰਧੀ ਜੰਗਲਾਤ ਅਤੇ ਵਣ ਜੀਵ ਰੱਖਿਆ ਵਿਭਾਗ ਨਾਲ ਵਿਚਾਰ ਵਟਾਂਦਰੇ ਤੋਂ ਬਾਅਦ ਇਸ ਮੰਤਵ ਲਈ ਵੱਖ-ਵੱਖ ਥਾਵਾਂ ਦੀ ਚੋਣ ਕਰ ਲਈ ਜਾਵੇਗੀ।ਇਸ ਸਬੰਧੀ ਜਿਆਦਾ ਜਾਣਕਾਰੀ ਦਿੰਦਿਆਂ ਸੈਰ-ਸਪਾਟਾ ਮੰਤਰੀ ਸਰਵਰਨ ਸਿੰਘ ਫਿਲੌਰ ਨੇ ਦੱਸਿਆ ਕਿ ਇਸ ਉਦੇਸ਼ ਦੀ ਪੂਰਤੀ ਲਈ ਚੇਤਨਾ ਫੈਲਾ ਕੇ ਕੁਦਰਤੀ ਸਾਧਨਾਂ ਦੀ ਸੁਰੱਖਿਆ, ਸੈਰ ਸਪਾਟੇ ਦੀ ਗਤੀਵਿਧੀਆ ਤੇ ਸਾਧਨਾਂ ਦੀ ਵਿਭਿੰਨਤਾ ਅਤੇ ਸਥਾਨਕ ਲੋਕਾਂ ਦੀ ਸ਼ਮੂਲੀਅਤ ਨਾਲ ਸੈਰ ਸਪਾਟੇ ਦੇ ਵਿਕਾਸ ਨੂੰ ਮੁੱਖ ਨਿਸ਼ਾਨਾ ਬਣਾਇਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਈਕੋ-ਟੂਰਿਜਮ ਨੀਤੀ ਦਾ ਟੀਚਾ ਆਮ ਲੋਕਾਂ ਨੂੰ ਸਬੰਧਤ ਸਰਕਾਰੀ ਵਿਭਾਗਾਂ ਨਾਲ ਮਿਲ ਕੇ ਇਸ ਦ ਵਿਕਾਸ ਲਈ ਅਜਿਹੀ ਯੋਜਨਾ ਤਿਆਰ ਕਰਨਾ ਹੈ ਜਿਸ ਨਾਲ ਸਮਾਜਿਕ ਤੇ ਆਰਥਿਕ ਪੱਧਰ 'ਤੇ ਸੂਬੇ ਨੂੰ ਲਾਭ ਹੋਵੇ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਈਕੋ-ਟੂਰਿਜ਼ਮ ਲਈ ਕਈ ਸਥਾਨਾਂ ਦੀ ਚੋਣ ਵੀ ਕਰ ਲਈ ਗਈ ਹੈ ਅਤੇ ਪਾਰਕਾਂ ਤੇ ਹੋਰ ਸੈਰ ਵਾਲੀਆਂ ਥਾਵਾਂ ਵੀ ਕੁਝ ਲਈਆਂ ਗਈਆਂ ਹਨ।
ਉਨ੍ਹਾਂ ਕਿਹਾ ਕਿ ਅਜਿਹੀਆਂ ਵੱਖ-ਵੱਖ ਥਾਵਾਂ 'ਤੇ ਰਿਹਾਇਸ਼, ਸਹਾਇਤਾ ਤੇ ਸੂਚਨਾ ਕੇਂਦਰ, ਟਰੈਕਿੰਗ ਰੂਟਾਂ, ਅਡਵੇਚਰ ਖੇਡਾਂ ਅਤੇ ਹੋਰ ਸਾਜ਼ੋ ਸਮਾਨ ਲਈ ਵਿਕਾਸ ਕਾਰਜ ਤੇ ਪਹਿਲ ਕਦਮੀਆਂ ਆਰੰਭ ਕੀਤੀਆਂ ਗਈਆਂ ਹਨ। ਅਜਿਹੀਆਂ ਕਈ ਥਾਵਾਂ ਦੀ ਨਿਸ਼ਾਨਦੇਹੀ ਜੰਗਲਾਤ ਤੇ ਵਣ ਜੀਵ ਰੱਖਿਆ ਵਿਭਾਗ ਵਲੋਂ ਕਰ ਲਈ ਗਈ ਹੈ। ਸੈਰ ਸਪਾਟਾ ਮੰਤਰੀ ਨੇ ਦੱਸਿਆ ਕਿ ਗੁਰਦਾਸਪੁਰ ਜਿਲੇ ਦੇ ਕੇਸ਼ੋਪੁਰ ਜਲਗਾਹ ਨੂੰ ਸਰਕਾਰ ਵਲੋਂ ਸੈਰ ਸਪਾਟੇ ਲਈ ਵਿਕਸਤ ਕੀਤਾ ਜਾ ਰਿਹਾ ਹੈ। 850 ਏਕੜ ਵਿਚ ਫੈਲੀ ਇਸ ਥਾਂ 'ਤੇ ਸਾਈਬੇਰੀਆ ਤੇ ਕੇਂਦਰੀ ਏਸ਼ੀਆ ਤੋਂ ਬਹੁਤ ਖੂਬਸੂਰਤ ਪ੍ਰਵਾਸੀ ਪੰਛੀ ਆਉਂਦੇ ਹਨ। ਉਨ੍ਹਾਂ ਕਿਹਾ ਕਿ ਕੇਸ਼ੋਪੁਰ ਨੂੰ ਈਕੋ-ਟੂਰਿਜ਼ਮ ਵਜੋਂ ਹੋਰ ਨਿਖਾਰਿਆ ਜਾਵੇਗਾ ਅਤੇ ਇਥੇ ਬੁਨਿਆਦੀ ਢਾਂਚੇ, ਬਰਡ ਸੇਂਚਰੀ ਤੇ ਸੈਲਾਨਿਆ ਲਈ ਹੋਰ ਸਹੂਲਤਾਂ ਸਮੇਤ ਕੇਸ਼ੋਪੁਰ ਦੀ ਕਾਇਆ ਕਲਪ ਲਈ ਸਮੂਹ ਸੁਵਿਧਾਵਾਂ ਪ੍ਰਦਾਨ ਕੀਤੀਆਂ ਜਾਣਗੀਆਂ। ਊਨ੍ਹਾਂ ਕਿਹਾ ਕਿ ਈਕੋ-ਟੂਰਿਜਮ ਦੇ ਵਿਕਾਸ ਲਈ ਸੂਬੇ ਦੀਆਂ ਅਜਿਹੀਆਂ ਹੋਰ ਢੁਕਵਿਆਂ ਥਾਵਾਂ ਵੀ ਲੱਭੀਆਂ ਜਾਣਗੀਆਂ ਜੋ ਹਾਲੇ ਵੀ ਲੋਕਾਂ ਦੀਆਂ ਨਜ਼ਰਾਂ ਵਿਚ ਨਹੀਂ ਆਇਆ। ਉਨ੍ਹਾਂ ਕਿਹਾ ਕਿ ਕੇਸ਼ੋਪੁਰ ਜਲਗਾਹ ਦੀ ਕਾਇਆ ਕਲਪ ਲਈ ਜੰਗਲਾਤ ਵਿਭਾਗ ਵਲੋਂ ਅਪ੍ਰੈਲ 2013 ਵਿਚ ਪੜਾਅ ਵਾਰ ਪ੍ਰਾਜੈਕਟ ਸ਼ੁਰੂ ਕੀਤਾ ਜਾ ਚੁੱਕਾ ਹੈ ਜਿਹੜਾ ਕਿ ਸਾਲ 2016 ਤੱਕ ਪੂਰਾ ਹੋਵੇਗਾ।