ਪੰਜਾਬ ਸਰਕਾਰ ਨੇ ਜੇਲਾਂ ਵਿਚ ਮੋਬਾਈਲ ਫੋਨਾਂ, ਨਸ਼ਿਆਂ ਅਤੇ ਹੋਰਨਾਂ ਪਾਬੰਦੀਸ਼ੁਦਾ ਚੀਜਾਂ ਦੀ ਰੋਕਥਾਮ ਲਈ ਸਖਤ ਕਦਮ ਚੁੱਕੇ ਹਨ।ਇਸ ਲਈ ਜੇਲਾਂ ਵਿਚ ਸਾਬਕਾ ਪੇਸਕੋ, ਹੋਮ ਗਾਰਡ ਅਤੇ ਪੰਜਾਬ ਪੁਲਿਸ ਦੇ 1100 ਵਾਧੂ ਜਵਾਨ ਤੈਨਾਤ ਕੀਤੇ ਗਏ ਹਨ।ਇਸ ਦੇ ਕਾਰਨ ਜੇਲਾਂ ਵਿਚ ਚੈਕਿੰਗ ਵਧੀ ਹੈ ਜੇਲਾਂ ਵਿਚ ਮਾੜੇ ਅਨਸਰਾਂ ਵਿਚ ਨੂੰ ਕਾਫੀ ਠੱਲ ਪਈ ਹੈ।ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਜੇਲਾਂ ਬਾਰੇ ਮੰਤਰੀ ਪੰਜਾਬ ਸਰਵਨ ਸਿੰਘ ਫਿਲੌਰ ਨੇ ਦੱਸਿਆ ਕਿ ਜੇਲਾਂ ਵਿਚ ਵਾਧੂ ਸੁਰੱਖਿਆ ਮੁਲਾਜਮਾਂ ਦੀ ਤੈਨਾਤੀ ਦੇ ਚਲਦਿਆਂ ਅਚਨਚੇਤ ਚੈਕਿੰਗ ਕਾਫੀ ਵਧਾਈ ਗਈ ਹੈ ਜਿਸ ਦੇ ਸਾਰਥਕ ਨਤੀਜੇ ਸਾਹਮਣੇ ਆ ਰਹੇ ਹਨ।ਉਨਾਂ ਦੱਸਿਆ ਕਿ ਦਸੰਬਰ ਮਹੀਨੇ ਦੌਰਾਨ ਵੱਖ ਵੱਖ ਜੇਲਾਂ ਵਿਚੋਂ 36 ਕਿਸਮ ਦੇ ਨਸ਼ੇ 68 ਮੋਬਾਈਲ ਫੋਨ ਬਰਾਮਦ ਕਤੇ ਗਏ ਹਨ।ਉਨਾਂ ਜੇਲ ਅਧਿਕਾਰੀਆਂ ਨੂੰ ਸਖਤ ਨਿਰਦੇਸ਼ ਦਿੰਦੇ ਹੋਏ ਕਿਹਾ ਕਿ ਡਿਉਟੀ ਵਿਚ ਕੁਤਾਹੀ ਕਿਸੇ ਵੀ ਕੀਮਤ ਤੇ ਬਰਦਾਸ਼ਤ ਨਹੀਂ ਕੀਤੀ ਜਾਵੇਗੀ ਅਤੇ ਜੇਕਰ ਕਿਸੇ ਪੱਧਰ ਤੇ ਕੋਈ ਕੁਤਾਹੀ ਪਾਈ ਗਈ ਤਾਂ ਉਸ ਵਿਰੁਧ ਸਖਤ ਕਾਰਵਾਈ ਕੀਤੀ ਜਾਵੇਗੀ।
ਸ. ਫਿਲੌਰ ਨੇ ਦੱਸਿਆ ਕਿ ਜੇਲਾਂ ਅੰਦਰ ਪਾਬੰਦੀਸ਼ੁਦਾ ਵਸਤਾਂ ਦੀ ਰੋਕਥਾਮ ਲਈ ਐਕਸਰੇ ਮਸ਼ੀਨਾਂ ਅਤੇ ਮੈਟਲ ਡਿਕਟੈਕਟਰ ਲਾਏ ਗਏ ਹਨ ਅਤੇ ਇਹ ਸਾਰੀਆਂ ਜੇਲਾਂ ਵਿਚ ਲਾਏ ਜਾਣਗੇ।ਇਸ ਦੇ ਨਾਲ ਹੀ ਮੋਬਾਈਲ ਜੈਮਰ ਵੀ ਲਾਏ ਜਾ ਰਹੇ ਹਨ ਅਤੇ ਇਹ ਪਟਿਆਲਾ ਅਤੇ ਸੰਗਰੂਰ ਵਿਖੇ ਸਥਾਪਿਤ ਕੀਤੇ ਜਾ ਚੁੱਕੇ ਹਨ।ਉਨਾਂ ਦੱਸਿਆ ਕਿ ਇਹ ਜਲਦ ਹੀ ਗੁਰਦਾਸਪੁਰ ਜੇਲ ਵਿਚ ਸਥਾਪਿਤ ਕੀਤੇ ਜਾਣਗੇ ਅਤੇ ਬਾਕੀ ਸਾਰੀ ਜੇਲਾਂ ਵਿਚ ਵੀ ਜੈਮਰ ਲਾ ਦਿੱਤੇ ਜਾਣਗੇ।ਮੰਤਰੀ ਨੇ ਦੱਸਿਆ ਕਿ ਜੇਲ਼ਾਂ ਵਿਚ ਵਧੀਆ ਸਿਹਤ ਸੇਵਾਵਾਂ ਅਤੇ ਸੁਰੱਖਿਆ ਸਹੁਲਤਾਂ ਪ੍ਰਦਾਨ ਕਰਨ ਲਈ ਜੇਲ ਅਧਿਕਾਰੀਆਂ ਨੂੰ ਫੰਡ ਮੁਹੱਈਆ ਕਰਵਾਏ ਜਾ ਰਹੇ ਹਨ।ਇਸ ਦੇ ਨਾਲ ਹੀ ਜੇਲਾਂ ਵਿਚ ਕੈਦੀਆਂ ਦੀ ਨਿਰਧਾਰਤ ਗਿਣਤੀ ਤੋਂ ਵਾਧੂ ਕੈਦੀਆਂ ਨੂੰ ਰੱਖਣ ਦੀ ਸਥਿੱਤੀ ਨਾਲ ਨਜਿੱਠਣ ਲਈ 5 ਨਵੀਆਂ ਜੇਲਾਂ ਦੀ ਸਥਾਪਨਾ ਕੀਤੀ ਜਾ ਰਹੀ।ਫਿਲੌਰ ਨੇ ਕਿਹਾ ਕਿ ਹੁਣ ਤੱਕ ਉਨਾਂ ਕਈ ਜੇਲਾਂ ਦਾ ਦੌਰਾ ਕੀਤਾ ਹੈ ਅਤੇ ਹੁਣ ਜਲਦ ਹੀ ਉਹ ਪੂਰੇ ਸੂਬੇ ਦੀਆਂ ਜੇਲਾਂ ਦੀ ਚੈਕਿੰਗ ਸ਼ੁਰੂ ਕਰਨ ਜਾ ਰਹੇ ਹਨ।ਇਸ ਲਈ ਉਨਾਂ ਜੇਲ ਅਧਿਕਾਰੀਆਂ ਹਦਾਇਤਾਂ ਜਾਰੀ ਕਰਦਿਆਂ ਕਿਹਾ ਕਿ ਉਨਾਂ ਦੇ ਦੌਰੇ ਮੋਕੇ ਪਾਈਆਂ ਗਈਆਂ ਖਾਮੀਆਂ ਲਈ ਅਧਾਕਰੀਆਂ ਦੀ ਜਵਾਬਦੇਹੀ ਨਿਰਧਾਰਤ ਕੀਤੀ ਜਾਵੇਗੀ ਅਤੇ ਕੋਈ ਵੀ ਬਹਾਨੇਬਾਜੀ ਨਹੀਂ ਚੱਲੇਗੀ।