ਜਗਮੀਤ ਸਿੰਘ ਬਰਾੜ ਦਾ ਮਲੇਰਕੋਟਲਾ 'ਚ ਇਕ ਸ਼ਾਨਦਾਰ ਰੋਡ ਸ਼ੋਅ ਨਾਲ ਸਵਾਗਤ ਕੀਤਾ ਗਿਆ, ਜਿਹੜਾ ਲੋਕ ਹਿੱਤ ਅਭਿਆਨ ਤੇ ਆਮ ਆਦਮੀ ਪਾਰਟੀ ਦੀਆਂ ਲੋਕਲ ਯੂਨਿਟਾਂ ਵੱਲੋਂ ਸਾਂਝੇ ਤੌਰ 'ਤੇ ਅਯੋਜਿਤ ਕੀਤਾ ਗਿਆ ਸੀ। ਰੋਡ ਸ਼ੋਅ ਸ਼ਹਿਰ ਦੇ ਮੁੱਖ ਬਜ਼ਾਰਾਂ ਤੋਂ ਹੁੰਦਾ ਹੋਇਆ ਨਿਕਲਿਆ, ਜਿਸਦਾ ਸਥਾਨਕ ਨਿਵਾਸੀਆਂ ਵੱਲੋਂ ਕਈ ਸਥਾਨਾਂ 'ਤੇ ਫੁੱਲਾਂ ਦੀਆਂ ਵਰਖਾ ਕਰਕੇ ਸਵਾਗਤ ਕੀਤਾ ਗਿਆ।ਬਾਅਦ 'ਚ ਬਰਾੜ ਨੇ ਆਪ ਤੇ ਲੋਕ ਹਿੱਤ ਅਭਿਆਨ ਦੇ ਵਰਕਰਾਂ ਨੂੰ ਹੋਟਲ ਇੰਪਾਇਰ 'ਚ ਸੰਬੋਧਨ ਕਰਦਿਆ ਉਨ੍ਹਾਂ ਵੱਲੋਂ ਚੋਣਾਂ ਦੌਰਾਨ ਸ਼ਾਨਦਾਰ ਜਿੱਤ ਦਰਜ਼ ਕਰਨ ਲਈ ਕੀਤੀ ਜਾ ਰਹੀ ਮਿਹਨਤ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਨੇ ਕਿਹਾ ਕਿ ਮਲੇਰਕੋਟਲਾ ਦੇ ਲੋਕਾਂ ਤੋਂ ਮਿੱਲੇ ਪਿਆਰ ਤੇ ਵਰਕਰਾਂ ਅਤੇ ਸਮਰਥਕਾਂ ਵਿਚਾਲੇ ਉਤਸਾਹ ਨੂੰ ਦੇਖ ਕੇ ਉਹ ਬਹੁਤ ਪ੍ਰਭਾਵਿਤ ਹੋਏ ਹਨ, ਜਿਹੜੇ ਆਪ ਦੀ ਰਿਕਾਰਡ ਅੰਤਰ ਨਾਲ ਜਿੱਤ ਪੁਖਤਾ ਕਰਨਗੇ।ਇਸ ਮੌਕੇ ਉਨ੍ਹਾਂ ਨੇ ਮਲੇਰਕੋਟਲਾ 'ਚ ਸਾਰੇ ਧਰਮਾਂ ਵਿਚਾਲੇ ਆਪਸੀ ਭਾਈਚਾਰੇ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਨੇ ਕਿਹਾ ਕਿ ਮਲੇਰਕੋਟਲਾ ਧਰਮਾਂ ਤੇ ਨਸਲਾਂ ਦਾ ਸੰਗਮ ਹੈ, ਉਹ ਭਾਰਤ ਤੇ ਪਾਕਿਸਤਾਨ ਦੇ ਆਗੂਆਂ ਨੂੰ ਮੁੜ ਕੇ ਗੱਲਬਾਤ ਦੀ ਪ੍ਰੀਕ੍ਰਿਆ ਸ਼ੁਰੂ ਕਰਨ ਦੀ ਅਪੀਲ ਕਰਦੇ ਹਨ। ਸਰਹੱਦ ਪਾਰ ਅੱਤਵਾਦ, ਸਰਜੀਕਲ ਫੌਜ਼ੀ ਹਮਲੇ, ਪਾਣੀ ਰੋਕਣ, ਲੋਕਾਂ ਨੂੰ ਇਕ ਦੂਜੇ ਨਾਲ ਮਿਲਣ ਤੋਂ ਰੋਕਣ ਨਾਲ ਕੋਈ ਹੱਲ ਨਹੀਂ ਨਿਕਲਣ ਵਾਲਾ।
ਇਸ ਦੌਰਾਨ ਆਪਣੇ ਤਿੰਨ ਰੋਜ਼ਾ ਸਰਹੱਦੀ ਕੈਂਪਾਂ ਦੇ ਦੌਰੇ ਦਾ ਜ਼ਿਕਰ ਕਰਦਿਆਂ ਉਨ੍ਹਾਂ ਨੇ ਕਿਹਾ ਕਿ ਭਾਵੇਂ 1947 ਹੋਵੇ, 1965 ਜਾਂ ਫਿਰ 1971, ਦੋਵੇਂ ਪਾਸੇ ਸੱਭ ਤੋਂ ਜ਼ਿਆਦਾ ਨੁਕਸਾਨ ਪੰਜਾਬੀਆਂ ਦਾ ਹੋਇਆ ਹੈ। ਪੰਜਾਬ ਵੰਡਿਆ ਗਿਆ, ਪੰਜਾਬੀ ਮਾਰੇ ਗਏ, ਪੰਜਾਬ ਨੇ ਸੱਭ ਤੋਂ ਜ਼ਿਆਦਾ ਬੁਰਾ ਵਕਤ ਝੇਲਿਆ। ਅੱਜ ਇਕ ਵਾਰ ਫਿਰ ਤੋਂ ਪੰਜਾਬ ਫੌਜ਼ ਨਾਲ ਪਹਿਲੀ ਕਤਾਰ 'ਚ ਖੜ੍ਹਿਆ ਹੈ, ਪਰ ਕੀ ਪੰਜਾਬ ਦੇ ਬਲਿਦਾਨ ਦਾ ਸਾਡੀ ਸਰਕਾਰ ਨੇ ਮੁੱਲ ਪਾਇਆ ਹੈ?ਸਰਹੱਦੀ ਜ਼ਿਲ੍ਹਿਆਂ ਤੇ ਸ਼ਰਨਾਰਥੀ ਕੈਂਪਾਂ ਦਾ ਜ਼ਿਕਰ ਕਰਦਿਆਂ ਉਨ੍ਹਾਂ ਨੇ ਕਿਹਾ ਕਿ ਲੋਕ ਪ੍ਰੇਸ਼ਾਨ ਤੇ ਡਰੇ ਹੋਏ ਹਨ। ਉਨ੍ਹਾਂ ਨੇ ਹਜ਼ਾਰਾਂ ਟਰਾਲੀਆਂ ਤੇ ਛੋਟੇ ਟਰੱਕਾਂ ਨੂੰ ਸਮਾਨ ਭਰ ਕੇ ਕੈਂਪਾਂ ਵੱਲ ਜਾਂਦੇ ਦੇਖਿਆ ਹੈ, ਜਿਥੇ ਬਹੁਤ ਘੱਟ ਇੰਤਜਾਮ ਹਨ ਤੇ ਕੋਈ ਜਾਣਕਾਰੀ ਨਹੀਂ ਹੈ। ਇਹ ਸਥਾਨਕ ਲੋਕਾਂ ਵਿਚਾਲੇ ਡਰ ਤੇ ਭੈਅ ਪੈਦਾ ਕਰ ਰਿਹਾ ਹੈ।ਉਨ੍ਹਾਂ ਨੇ ਅਖੀਰ 'ਚ ਕਿਹਾ ਕਿ ਕਿਸਾਨ ਪਹਿਲਾਂ ਹੀ ਲੋਨਾਂ ਦੇ ਭਾਰ ਹੇਠਾਂ ਦੱਬੇ ਹੋਏ ਹਨ, ਜਿਨ੍ਹਾਂ ਨੂੰ ਹੁਣ ਖੜ੍ਹੀਆਂ ਫਸਲਾਂ ਛੱਡਣ ਲਈ ਮਜ਼ਬੂਰ ਹੋਣਾ ਪਿਆ ਹੈ। ਅਜਿਹੇ 'ਚ ਜੇ ਸਰਕਾਰ ਨੇ ਤੁਰੰਤ ਮੁਆਵਜ਼ਾ ਨਾ ਦਿੱਤਾ, ਤਾਂ ਪੰਜਾਬ ਦੀ ਪੇਂਡੂ ਅਰਥ ਵਿਵਸਥਾ ਹੋਰ ਹੇਠਾਂ ਖਿਸਕ ਜਾਵੇਗੀ, ਜੋ ਆਉਂਦਿਆਂ ਦਿਨਾਂ 'ਚ ਹੋਰ ਖੁਦਕੁਸ਼ੀਆਂ ਦਾ ਕਾਰਨ ਬਣੇਗੀ। ਅੱਜ ਅਸੀਂ ਗਾਂਧੀ ਜਯੰਤੀ ਤੇ ਲਾਲ ਬਹਾਦਰ ਸ਼ਾਸਤਰੀ ਦਾ ਜਨਮ ਦਿਨ ਮਨਾਉਂਦੇ ਹਾਂ, ਇਸ ਲਈ ਗਾਂਧੀ ਦਾ ਸ਼ਾਂਤੀ ਤੇ ਸ਼ਾਸਤਰੀ ਦਾ ਜੈ ਜਵਾਨ, ਜੈ ਕਿਸਾਨ ਦਾ ਸੰਦੇਸ਼ ਨਾਲ ਚੱਲਣਾ ਚਾਹੀਦਾ ਹੈ। ਅਸੀਂ ਉੜੀ ਤੇ ਪਠਾਨਕੋਟ 'ਚ ਆਪਣੇ ਸ਼ਹੀਦਾਂ ਦਾ ਬਦਲਾ ਲੈ ਲਿਆ ਹੈ, ਹੁਣ ਸਾਨੂੰ ਕਿਸਾਨਾਂ ਨਾਲ ਖੜ੍ਹਨਾ ਚਾਹੀਦਾ ਹੈ।