ਪੰਜਾਬ ਦੇ ਸੈਰ ਸਪਾਟਾ ਅਤੇ ਸੱਭਿਆਚਾਰ ਮੰਤਰੀ ਸਰਵਨ ਸਿੰਘ ਫਿਲੌਰ ਸਮਾਜ ਵਿਚ ਵੱਧ ਰਹੇ ਜ਼ੁਰਮਾਂ ਬਾਰੇ ਆਮ ਲੋਕਾਂ ਨੂੰ ਜਾਗਰੂਕ ਕਰਨ ਦੀ ਲੋੜ 'ਤੇ ਜ਼ੋਰ ਦਿੱਤਾ ਹੈ ਅਤੇ ਇਸ ਦੇ ਨਾਲ ਹੀ ਉਨ੍ਹਾ ਵਿਚ ਰਾਸ਼ਟਰਵਾਦ ਦੀ ਭਾਵਨਾ ਪੈਦਾ ਕਰਨ ਦੀ ਗੱਲ ਵੀ ਆਖੀ ਤਾਂ ਜੋ ਸਮਾਜ ਨੂੰ ਜ਼ੁਰਮਾਂ ਤੋਂ ਮੁਕਤ ਅਤੇ ਸਿਹਤਮੰਦ ਅਤੇ ਭਾਈਚਾਰਕ ਮਾਹੌਲ ਬਣਾਇਆ ਜਾ ਸਕੇ। ਕੈਨੇਡਾ ਅਤੇ ਭਾਰਤ ਵਿਚ ਚਲਦੇ ਝੰਜਾਰ ਟੀ ਵੀ ਚੈਨਲ ਲਈ ਰਾਜਪੂਤ ਫ਼ਿਲਮ ਪ੍ਰੋਡਕਸ਼ਨ ਵਲੋਂ ਤਿਆਰ ਕੀਤੇ ਗਏ ਟੀ ਵੀ ਸੀਰੀਅਲ ਵਾਰਦਾਤ ਨੂੰ ਸਥਾਨਕ ਪ੍ਰੈਸ ਕਲਬ ਵਿਖੇ ਲਾਂਚ ਕਰਨ ਦੇ ਮੌਕੇ ਇਕੱਠ ਨੂੰ ਸੰਬੋਧਤ ਕਰਦੇ ਹੋਏ ਸ. ਫਿਲੋਰ ਨੇ ਕਿਹਾ ਕਿ ਜ਼ੁਰਮਾਂ ਨਾਲ ਸਬੰਧਤ ਲੜੀਵਾਰ ਨਾਟਕਾਂ ਰਾਹੀਂ ਲੋਕਾਂ ਵਿਚ ਸਿਰਫ ਜਾਗਰੂਕਤਾ ਜਾਣ ਦਾ ਉਦੇਸ਼ ਨਹੀ ਹੋਣਾ ਚਾਹੀਦਾ ਸਗੋ ਉਨ੍ਹਾਂ ਨੂੰ ਇਸ ਸਬੰਧ ਵਿਚ ਸਿੱਖਿਅਤ ਵੀ ਕਰਨਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਗੁਰੂਆਂ , ਪੀਰਾਂ ਦੀ ਧਰਤੀ ਹੈ ਅਤੇ ਇਹ ਭਾਰਤ ਵਿਚ ਇਕ ਸ਼ਾਤੀ ਪੂਰਨ ਖੇਤਰ ਹੈ। ਪਰ ਫਿਰ ਵੀ ਅਜਿਹੇ ਲੜੀਵਾਰਾਂ ਰਾਹੀਂ ਲੋਕਾਂ ਵਿਚ ਨਿਘਰ ਰਹੀਆਂ ਮਾਨਵੀ ਕਦਰਾਂ ਕੀਮਤਾਂ ਨੂੰ ਮਜ਼ਬੂਤ ਕੀਤਾ ਜਾ ਸਕਦਾ ਹੈ।
ਉਨ੍ਹਾਂ ਨੇ ਪੰਜਾਬ ਦੇ ਨੋਜਵਾਨਾਂ ਨੂੰ ਨਸ਼ਿਆਂ ਅਤੇ ਹੋਰ ਸਮਾਜਕ ਨਿਘਾਰਾਂ ਤੋਂ ਦੂਰ ਰਹਿਣ ਲਈ ਆਖਿਆ ਅਤੇ ਉਨ੍ਹਾਂ ਨੂੰ ਰਾਜ ਦੀਆਂ ਅਮੀਰ ਕਦਰਾਂ ਕੀਮਤਾਂ ਨੂੰ ਬਣਾਈ ਰੱਖਣ ਲਈ ਅੱਗੇ ਆਉਣ ਲਈ ਸਮਾਜ ਵਿਚ ਨਿੱਘਰ ਰਹੀਆਂ ਮਨੁਖੀ ਕਦਰਾ ਕੀਮਤਾਂ 'ਤੇ ਚਿੰਤਾ ਪ੍ਰਗਟ ਕਰਦੇ ਹੋਏ ਸ. ਫਿਲੋਰ ਨੇ ਕਿਹਾ ਕਿ ਮੌਜੂਦਾ ਸਿੱਖਿਆ ਪ੍ਰਣਾਲੀ ਵਿਚ ਨੈਤਿਕ ਕਦਰਾਂ ਕੀਮਤਾਂ ਆਧਾਰਤ ਸਿੱਖਿਆ ਲਾਗੂ ਕਰਕੇ ਇਸ ਵਿਚ ਇਨਕਲਾਬੀ ਤਬਦੀਲੀ ਲਿਆÀਣ ਦੀ ਲੋੜ ਹੈ ਤਾਂ ਜੋ ਵਿਦਿਆਰਥੀਆਂ ਦਾ ਮਨ ਦੇਸ਼ ਲਈ ਕੁਝ ਵਧੀਆਂ ਕਰਨ ਨੂੰ ਤਰਾਸ਼ਿਆ ਜਾ ਸਕੇ। ਜ਼ੁਰਮਾਂ ਨੂੰ ਨੰਗਾ ਕਰਨ ਲਈ ਇਲੈਕਟਰਾਨਿਕ ਮੀਡੀਆ ਅਤੇ ਪ੍ਰਿੰਟ ਮੀਡੀਆ ਦੀ ਭੂਮਿਕਾ ਦੀ ਸਰਾਹਨਾ ਕਰਦੇ ਹੋਏ ਸ. ਫਿਲੌਰ ਨੇ ਕਿਹਾ ਕਿ ਮੀਡੀਆ ਨੂੰ ਜ਼ੁਰਮਾਂ ਨੂੰ ਘਟਾਉਣ ਲਈ ਭੁਮਿਕਾ ਨਿਭਾਉਣੀ ਚਾਹੀਦੀ ਹੈ। ਉਨ੍ਹਾਂ ਕਿਹਾ ਕਿ ਮੀਡੀਆ ਦੀ ਸਰਗਰਮ ਭੂਮਿਕਾ ਦੇ ਨਾਲ ਇਹ ਜ਼ੁਰਮ ਨੰਗ ਹੋ ਰਹੇ ਹਨ ਅਤੇ ਉਨ੍ਹਾਂ ਵਿਰੁਧ ਜ਼ਰੂਰੀ ਕਾਰਵਾਈ ਕੀਤੀ ਜਾ ਰਹੀ ਹੈ। ਇਸ ਮੌਕੇ ਬੋਲਦੇ ਹੋਏ ਕੈਨੇਡਾ ਦੇ ਸਾਬਕਾ ਸੰਸਦ ਮੈਂਬਰ ਸ੍ਰੀ ਗੁਰਬਖਸ਼ ਸਿੰਘ ਮੱਲੀ ਨੇ ਕਿਹਾ ਕਿ ਜ਼ੁਰਮ ਵਿਸ਼ਵ ਭਰ ਵਿਚ ਚਿੰਤਾ ਦਾ ਵਿਸ਼ਾ ਹੈ ਅਤੇ ਇਨ੍ਹਾਂ ਉੱਪਰ ਜਨਤਕ ਹਿੱਤਾ ਦੇ ਮੱਦੇਨਜ਼ਰ ਨਿਯੰਤਰਨ ਕੀਤਾ ਜਾਣਾ ਬਹੁਤ ਜ਼ਰੂਰੀ ਹੈ।