ਪੰਜਾਬ ਰਾਜ 'ਭੁਵਨ ਪੰਜਾਬ ਪੋਰਟਲ' ਲਾਂਚ ਕਰਨ ਵਾਲਾ ਦੇਸ਼ ਦਾ ਮੋਹਰੀ ਸੂਬਾ ਬਣ ਗਿਆ ਹੈ।ਇਹ ਪੋਰਟਲ ਅੱਜ ਇਥੇ ਪੁਲਾੜ ਤਕਨੀਕ 'ਤੇ ਅਧਾਰਿਤ ਵੱਖ-ਵੱਖ ਵਿਧੀਆਂ ਉਤਸ਼ਾਹਤ ਕਰਨ ਲਈ ਰੱਖੀ ਪੰਜਾਬ ਸਟੇਟ ਮੀਟ ਦੋਰਾਨ ਲਾਂਚ ਕੀਤਾ ਗਿਆ ਜੋ ਕਿ ਲੋਕਾਂ ਨੂੰ ਰਾਜ ਨਾਲ ਸਬੰਧਤ ਵੱਖ-ਵੱਖ ਤਰ੍ਹਾਂ ਦੀਆਂ ਲੋਕ ਸੇਵਾਵਾਂ ਦੀ ਮੁਕੰਮਲ ਜਾਣਕਾਰੀ ਮੁਹੱਈਆ ਕਰਵਾਏਗਾ।ਪੰਜਾਬ ਰਿਮੋਟ ਸੈਨਸਿੰਗ ਸੈਂਟਰ (ਪੀ.ਆਰ.ਐਸ. ਸੀ.)ਵਲੋਂ ਭਾਰਤੀ ਪੁਲਾੜ ਖੋਜ ਸੰਸਥਾ (ਇਸਰੋ) ਅਤੇ ਪੁਲਾੜ ਵਿਭਾਗ ਭਾਰਤ ਸਰਕਾਰ ਦੇ ਸਹਿਯੋਗ ਨਾਲ ਕਰਵਾਈ ਸਟੇਟ ਮੀਟ ਦੀ ਸੁਰੂਆਤ ਕਰਦਿਆਂ ਪੀ.ਆਰ.ਐਸ. ਸੀ.ਦੇ ਡਾਇਰੈਕਟਰ ਬਰਿਜੈਦਰਾ ਪਤਰੇਆ ਨੇ ਕਿਹਾ ਕਿ ਅਜੋਕੇ ਯੁੱਗ 'ਚ ਯੋਜਨਾਵਾਂ ਅਤੇ ਭਵਿੱਖ ਦੀਆਂ ਚੁਨੌਤੀਆਂ ਦੇ ਸੰਦਰਭ 'ਚ ਪੁਲਾੜ ਤਕਨੀਕ ਹਰ ਖੇਤਰ 'ਚ ਬਹੁਤ ਹੀ ਅਸਰਦਾਰ ਅਤੇ ਕਾਰਗਰ ਸਿੱਧ ਹੋ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਪੁਲਾੜ ਤਕਨੀਕ ਅਤੇ ਭੁਗੋਲਿਕ ਜਾਣਕਾਰੀ ਵਿਧੀ (ਜੀ.ਆਈ.ਐਸ.) ਰਾਹੀਂ ਕੁਦਰਤੀ, ਸਮਾਜਿਕ, ਸਭਿਆਚਾਰਕ ਭਿੰਨਤਾਵਾਂ ਨੂੰ ਸਮਝਣ ਵਿੱਚ ਸਹਾਈ ਹੋਣ ਦੇ ਨਾਲ-ਨਾਲ ਭਵਿੱਖ ਦੀਆਂ ਚੁਨੋਤੀਆਂ ਲਈ ਢੁਕਵੇਂ ਖਾਕੇ ਤਿਆਰ ਕੀਤੇ ਜਾ ਸਕਦੇ ਹਨ।ਇਸ ਮੌਕੇ ਪੰਜਾਬ ਦੇ ਖ਼ਜ਼ਾਨਾ ਅਤੇ ਯੋਜਨਾ ਮੰਤਰੀ ਸ਼੍ਰੀ ਪਰਮਿੰਦਰ ਸਿੰਘ ਢੀਂਡਸਾ ਨੇ ਪੁਲਾੜ ਤਕਨੀਕ ਨੂੰ ਅਜੋਕੇ ਯੁੱਗ ਦਾ ਬਹੁਤ ਹੀ ਅਹਿੰਮ ਅੰਗ ਦਸਦੀਆਂ ਕਿਹਾ ਕਿ ਪ੍ਰਸ਼ਾਸਨਿਕ ਕੰਮਾਂ ਅਤੇ ਵਿਕਾਸ ਦੇ ਖੇਤਰ ਵਿੱਚ ਅਜਿਹੀਆਂ ਤਕਨੀਕਾਂ ਸਮੇਂ ਦੀ ਮੁੱਖ ਮੰਗ ਹਨ।
ਉਨ੍ਹਾਂ ਸਾਇੰਸਦਾਨਾਂ, ਸਬੰਧਤ ਵਿਭਾਗਾਂ ਤੋਂ ਇਲਾਵਾ ਦੇਸ਼ ਦੇ ਸੂਬਿਆਂ ਨੂੰ ਅਜਿਹੇ ਤਕਨੀਕੀ ਕਦਮ ਪੁੱਟਣ ਅਤੇ ਸਾਧਨ ਜੁਟਾਉਣ ਦੀ ਲੋੜ 'ਤੇ ਜ਼ੋਰ ਦਿੱਤਾ ਜਿਨ੍ਹਾਂ ਨਾਲ ਗਰੀਬ, ਆਮ ਅਤੇ ਲੋੜਵੰਦ ਲੋਕਾਂ ਨੂੰ ਭਰਪੂਰ ਫਾਇਦਾ ਹੋ ਸਕੇ। ਉਨ੍ਹਾਂ ਕਿਹਾ ਕਿ ਅਜਿਹੀਆਂ ਤਕਨੀਕਾਂ ਖੇਤੀਬਾੜੀ, ਪੇਂਡੂ ਅਤੇ ਸ਼ਹਿਰੀ ਵਿਕਾਸ ਦੀਆਂ ਯੋਜਨਾਵਾਂ ਨੂੰ ਨਵੀਂ ਦਿੱਖ ਦੇ ਸਕਦੇ ਹਨ।ਉਦਘਾਟਨੀ ਭਾਸ਼ਣ ਦੋਰਾਨ ਵਧੀਕ ਮੁੱਖ ਸਕੱਤਰ (ਵਿਕਾਸ) ਸ਼੍ਰੀ ਸੁਰੇਸ਼ ਕੁਮਾਰ ਨੇ ਪੁਲਾੜ ਤਕਨੀਕ ਨੂੰ ਖੇਤੀਬਾੜੀ, ਕੁਦਰਤੀ ਸੋਮੇਂ ਪ੍ਰਬੰਧਨ ਅਤੇ ਸ਼ਹਿਰੀ ਵਿਕਾਸ ਲਈ ਬਹੁਤ ਹੀ ਮਹੱਤਵਪੂਰਨ ਖੇਤਰ ਦੱਸਿਆ । ਉਨ੍ਹਾਂ ਕਿਹਾ ਕਿ ਇਸ ਤਕਨੀਕ ਰਾਹੀਂ ਪ੍ਰਸ਼ਾਸਨਿਕ ਅਤੇ ਚੰਗੇਰੇ ਫੈਸਲੇ ਲੈਣ ਦੀਆਂ ਪ੍ਰਕ੍ਰਿਆਵਾਂ ਬਹੁਤ ਹੀ ਸੁਖਾਲੀਆਂ ਹੋ ਸਕਦੀਆਂ ਹਨ। ਉਨ੍ਹਾਂ ਆਈ.ਸੀ.ਟੀ. ਅਤੇ ਪੁਲਾੜ ਤਕਨੀਕ ਨੂੰ ਸੰਗਠਿਤ ਕਰਨ ਦੀ ਲੋੜ ਤੇ ਜ਼ੋਰ ਦਿੰਦਿਆਂ ਕਿਹਾ ਕਿ ਇਸ ਨਾਲ ਸਰਕਾਰ ਨੂੰ ਲੋਕਾਂ ਲਈ ਲੋੜੀਂਦੀਆਂ ਅਤੇ ਪ੍ਰਵਾਨਿਤ ਨੀਤੀਆਂ ਘੜਣ 'ਚ ਹੋਰ ਸੌਖ ਹੋ ਸਕਦੀ ਹੈ।ਸਕੱਤਰ ਸਾਇੰਸ, ਤਕਨਾਲੋਜੀ ਅਤੇ ਵਾਤਾਵਰਣ ਸ਼੍ਰੀ ਜਸਪਾਲ ਸਿੰਘ ਨੇ ਪੁਲਾੜ ਅਤੇ ਭੁਗੋਲਿਕ ਜਾਣਕਾਰੀ ਨੂੰ ਪ੍ਰੋਸੈਸ ਕਰਨ, ਇਕੱਠੀ ਕਰਨ ਆਦਿ ਬਾਰੇ ਸਾਇੰਸ ਦੀ ਪ੍ਰਸ਼ਾਸਨਿਕ ਕੰਮਾਂ 'ਚ ਲੋੜ ਬਾਰੇ ਸੈਸ਼ਨ ਦੀ ਪ੍ਰਧਾਨਗੀ ਕੀਤੀ। ਉਨ੍ਹਾਂ ਕਿਹਾ ਕਿ ਪੁਲਾੜ ਤਕਨੀਕ ਹਰ ਕਿਸਮ ਦੀ ਯੋਜਨਾ ਸਰਗਰਮੀ ਅਤੇ ਸੋਮਿਆਂ ਦੇ ਪ੍ਰਬੰਧਨ ਦੀ ਕੁੰਜੀ ਹੈ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਜੀ.ਆਈ.ਐਸ ਵੈਬ ਅਪਲੀਕੇਸ਼ਨ ਪ੍ਰੋਜੈਕਟ ਜਿਸ ਵਿੱਚ ਵੱੱਖ-ਵੱਖ ਵਿਭਾਗਾਂ ਨਾਲ ਸਬੰਧਤ ਡਾਟਾ ਮੋਜੂਦ ਹੈ ਨੂੰ ਪੀ.ਆਰ.ਐਸ. ਸੀ. ਵਲੋਂ ਜੀ.ਆਈ.ਐਸ. ਤਹਿਤ ਲਿਆਂਦਾ ਜਾ ਰਿਹਾ ਹੈ ਜੋ ਕਿ ਯੋਜਨਾਬੰਦੀ ਦੇ ਖੇਤਰ 'ਚ ਬਹੁਤ ਲਾਹੇਵੰਦ ਸਿੱਧ ਹੋਵੇਗਾ।ਇਸੇ ਦੋਰਾਨ ਡਾ. ਬੀ.ਐਸ. ਗੋਹੀਲ ਅਤੇ ਡਾ. ਪੀ.ਜੀ. ਦਿਵਾਕਰ, ਦੋਵੇਂ ਸਾਇੰਸਦਾਨ ਇਸਰੋ, ਨੇ ਪੁਲਾੜ ਤਕਨੀਕ ਬਾਰੇ ਅਹਿਮ ਵਿਚਾਰ ਰੱਖੇ।