ਪੰਜਾਬ ਸਰਕਾਰ ਵਲੋਂ ਰਾਜਸਥਾਨ ਤੇ ਸਰਹਿੰਦ ਨਹਿਰਾਂ ਦੀ ਮੁਰੰਮਤ ਰੀਲਾਇਨਿੰਗ ਦਾ ਕੰਮ ਜਲਦੀ ਸ਼ੁਰੂ ਕਰ ਦਿੱਤਾ ਜਾਵੇਗਾ, ਇਸ ਪ੍ਰਾਜੈਕਟ 'ਤੇ 1400 ਕਰੋੜ ਰੁਪਏ ਖ਼ਰਚ ਕੀਤੇ ਜਾਣਗੇ। ਇਹ ਪ੍ਰਗਟਾਵਾ ਕਰਦਿਆਂ ਪੰਜਾਬ ਦੇ ਸਿੰਚਾਈ ਮੰਤਰੀ ਜਨਮੇਜਾ ਸਿੰਘ ਸੇਖੋਂ ਨੇ ਦੱਸਿਆ ਕਿ ਰਾਜਸਥਾਨ ਤੇ ਸਰਹਿੰਦ ਨਹਿਰਾਂ ਦੀ ਮੁਰੰਮਤ ਸਬੰਧੀ ਟੈਂਡਰ ਜਲਦ ਮੰਗੇ ਜਾ ਰਹੇ ਹਨ ਅਤੇ ਇਹ ਕਾਰਜ ਆਉਣ ਵਾਲੇ ਤਿੰਨ ਸਾਲਾਂ 'ਚ ਮੁਕੰਮਲ ਕਰ ਲਿਆ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਸ. ਪਰਕਾਸ਼ ਸਿੰਘ ਬਾਦਲ ਨਹਿਰਾਂ 'ਚ ਪੈ ਰਹੇ ਗੰਦੇ ਪਾਣੀ ਬਾਰੇ ਗੰਭੀਰ ਹਨ ਅਤੇ ਇਸ ਸਬੰਧੀ ਸ. ਬਾਦਲ ਵਲੋਂ ਵਾਤਾਵਰਣ ਕੰਟਰੋਲ ਬੋਰਡ ਨੂੰ ਲਿਖਤੀ ਹਦਾਇਤਾਂ ਦਿੱਤੀਆਂ ਗਈਆਂ ਹਨ।
ਸੇਖੋਂ ਨੇ ਦੱਸਿਆ ਕਿ ਗੰਦੇ ਪਾਣੀ ਨੂੰ ਸਿੰਚਾਈ ਲਈ ਵਰਤਣ ਹਿੱਤ ਸੀਵਰੇਜ਼ ਟਰੀਟਮੈਂਟ ਪਲਾਂਟ ਲਗਾਏ ਜਾ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਸਰਕਾਰ ਵਲੋਂ ਦੁਆਬਾ ਖੇਤਰ ਵਿਚ ਖੇਤੀ ਨੂੰ ਹੁਲਾਰਾ ਦੇਣ ਲਈ ਇੱਕ ਬਹੁਮੰਤਵੀ ਪ੍ਰਾਜੈਕਟ ਮਨਜ਼ੂਰ ਕੀਤਾ ਗਿਆ ਹੈ, ਜਿਸ ਤਹਿਤ ਬਿਸਤ ਦੋਆਬ ਨਹਿਰ ਤੇ ਇਸਦੀਆਂ ਸਹਾਇਕ ਨਹਿਰਾਂ ਦਾ ਕਾਇਆ ਕਲਪ ਲਈ 211 ਕਰੋੜ ਰੁਪਏ ਖ਼ਰਚ ਕੀਤੇ ਜਾਣਗੇ। ਇਸ ਪ੍ਰਾਜੈਕਟ ਦੇ ਮੁਕੰਮਲ ਹੋਣ ਨਾਲ ਇਸ ਨਹਿਰ ਦੀ ਵਰਤਮਾਨ ਸਮੇਂ ਦੀ ਸਿੰਚਾਈ ਸਮਰੱਥਾ ਵਿਚ 6 ਗੁਣਾ ਵਾਧਾ ਹੋਵੇਗਾ। ਜ਼ਿਕਰਯੋਗ ਹੈ ਕਿ ਅਜੋਕੇ ਸਮੇਂ ਨਹਿਰ ਦੀ ਸਿੰਚਾਈ ਸਮਰੱਥਾ 30364 ਹੈਕਟੇਅਰ ਹੈ, ਜੋ ਕਿ ਨਵੀਨੀਕਰਨ ਪਿੱਛੋਂ ਵਧਕੇ 172981 ਹੈਕਟੇਅਰ ਹੋ ਜਾਵੇਗੀ। ਸ. ਸੇਖੋਂ ਨੇ ਅੱਗੇ ਦੱਸਿਆ ਕਿ ਉਨ੍ਹਾਂ ਦੱਸਿਆ ਕਿ ਇੱਕ ਵੱਖਰੀ ਯੋਜਨਾ ਤਹਿਤ ਜਲੰਧਰ ਬਰਾਂਚ ਦੇ ਨਵੀਨੀਕਰਨ ਪ੍ਰਾਜੈਕਟ ਨੂੰ ਵੀ ਮਨਜ਼ੂਰੀ ਦਿੱਤੀ ਗਈ, ਜਿਸ ਨਾਲ ਇਸ ਰਾਹੀਂ ਕੀਤੇ ਜਾਂਦੇ ਸਿੰਚਾਈ ਖੇਤਰ ਵਿਚ 158416 ਹੈਕਟੇਅਰ ਦਾ ਵਾਧਾ ਹੋਵੇਗਾ। ਇਸ ਤੋਂ ਇਲਾਵਾ ਨਸਰਾਲਾ ਚੋਅ 'ਤੇ ਇਕ ਵੱਡਾ ਲਾਂਘਾ ਬਣਾਉਣ ਨੂੰ ਵੀ ਮਨਜ਼ਰੀ ਦੇ ਦਿੱਤੀ ਗਈ ਹੈ।