ਮਾਤਾ ਸਾਹਿਬ ਕੌਰ ਸਪੋਰਟਸ ਕਲੱਬ ਜਰਖੜ ਵੱਲੋਂ 30ਵਾਂ ਕੌਮੀ ਪੱਧਰ ਦਾ ਕੋਕਾਕੋਲ ਏਵਨ ਸਾਈਕਲ ਜਰਖੜ ਖੇਡ ਫੈਸਟੀਵਲ ਦਾ ਅੱਜ ਰੰਗਾਰੰਗ ਆਗਾਜ਼ ਹੋਇਆ, ਓਲੰਪਿਕ ਪੱਧਰ ਦੀਆਂ ਖੇਡਾਂ ਵਰਗੀ ਸੁੰਦਰਤਾ ਦਾ ਭੁਲੇਖਾ ਪਾ ਰਿਹਾ ਜਰਖੜ ਸਟੇਡੀਅਮ ਦਾ ਦ੍ਰਿਸ਼ ਤਾਂ ਦੇਖਿਆਂ ਹੀ ਫਬਦਾ ਸੀ।ਜਰਖੜ ਖੇਡਾਂ ਦੀ ਸ਼ੁਰੂਆਤ ਵੱਖ-ਵੱਖ ਟੀਮਾਂ ਦੇ ਮਾਰਚ ਪਾਸਟ ਤੋਂ ਹੋਈ, ਜਿਸ ਵਿਚ ਭਾਈ ਨਗਾਹੀਆਂ ਸਿੰਘ ਕਾਲਜ ਆਲਮਗੀਰ, ਕਲਗੀਧਰ ਅਕੈਡਮੀ ਦੁਗੱਰੀ, ਦਸਮੇਸ਼ ਪਬਲਿਕ ਸਕੂਲ ਕੈਂਡ, ਲਵਲੀ ਯੁਨੀਵਰਸਿਟੀ ਜਲੰਧਰ ਆਦਿ ਹੋਰ ਟੀਮਾਂ ਨੇ ਮਾਰਚ ਪਾਸਟ 'ਚ ਹਿੱਸਾ ਲਿਆ, ਜਦਕਿ ਓਲੰਪਿਕ ਖੇਡ ਮਸ਼ਾਲ ਅਤੇ ਖੇਡ ਭਾਵਨਾ ਏਵਨ ਸਾਈਕਲ ਰੈਲੀ ਖਿਡਾਰੀਆਂ ਦੇ ਕਾਫਲੇ ਦੇ ਰੂਪ ਵਿਚ ਗੁਰਦੁਆਰਾ ਆਲਮਗੀਰ ਤੋਂ ਚੱਲ ਕੇ ਜਰਖੜੇ ਪਿੰਡ ਸਟੇਡੀਅਮ ਪੁੱਜੀ। ਇਸ ਖੇਡ ਭਾਵਨਾ ਰੈਲੀ ਨੂੰ ਮਨਦੀਪ ਸਿੰਘ ਐਮ.ਡੀ. ਏਵਨ ਸਾਈਰਲ ਨੇ ਰਵਾਨਾ ਕੀਤਾ ਅਤੇ ਖੇਡ ਮਸ਼ਾਲ ਨੂੰ ਅੰਤਰਾਸ਼ਟਰੀ ਸਾਈਕਲਸਿਟ ਜਗਦੀਪ ਸਿੰਘ ਕਾਹਲੋਂ ਅਤੇ ਅੰਤਰਾਸ਼ਟਰੀ ਬਾਡੀ ਬਿਲਡਰ ਮੁਨੀਸ਼ ਕੁਮਾਰ ਨੇ ਜਗਾਇਆ, ਜਦਕਿ ਖੇਡਾਂ ਦਾ ਉਦਘਾਟਨ ਵਿਧਾਇਕ ਦਰਸ਼ਨ ਸਿੰਘ ਸ਼ਿਵਾਲਿਕ ਨੇ ਝੰਡਾ ਲਹਿਰਾ ਕੇ ਕੀਤਾ। ਇਸ ਮੌਕੇ ਕਲਗੀਧਰ ਅਕੈਡਮੀ ਦੀਆਂ ਬੱਚੀਆਂ ਨੇ 'ਦੇਹ ਸ਼ਿਵਾ ਬਰਮੋਹਿ, ਸ਼ੁਭ ਕਰਮਨ ਤੇ ਕਬੰਹੂ ਨਾ ਟਰੋਂ' ਸ਼ਬਦ ਪੜ੍ਹ ਕੇ ਖੇਡਾਂ ਦੀ ਸ਼ੁਰੂਆਤ ਕੀਤੀ। ਇਸ ਮੌਕੇ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਦੇ ਮਾਮਲੇ ਵਿਚ ਸਮੂਹ ਪ੍ਰਬੰਧਕਾਂ ਅਤੇ ਖਿਡਾਰੀਆਂ ਨੇ ਦੋ ਮਿੰਟ ਦਾ ਮੋਨ ਧਾਰ ਕੇ ਪੰਜਾਬ ਦੀ ਸੁੱਖ ਸ਼ਾਂਤੀ ਦੀ ਅਰਦਾਸ ਕੀਤੀ।
ਇਸ ਤੋਂ ਇਲਾਵਾ ਭਾਈ ਨਗਾਹੀਆ ਕਾਲਜ ਦੀਆਂ ਲੜਕੀਆਂ ਨੇ ਗਿੱਧਾ ਅਤੇ ਜਨਰੇਸ਼ਨ ਆਫ ਇੰਡੀਆ ਵੱਲੋਂ ਪੇਸ਼ ਕੀਤੇ ਬਾਡੀ ਬਿਲਡਿੰਗ ਸ਼ੋਅ ਨੇ ਉਦਘਾਟਨੀ ਸਮਾਰੋਹ ਨੂੰ ਹੋਰ ਵੀ ਸੁਹਾਵਣਾ ਕੀਤਾ। ਇਸ ਮੌਕੇ ਕਲੱਬ ਦੇ ਚੇਅਰਮੈਨ ਨਰਿੰਦਰਪਾਲ ਸਿੰਘ ਸਿੱਧੂ ਅਤੇ ਮੁੱਖ ਪ੍ਰਬੰਧਕ ਜਗਰੂਪ ਸਿੰਘ ਜਰਖੜ ਨੇ ਆਏ ਮਹਿਮਾਨਾਂ ਅਤੇ ਖਿਡਾਰੀਆਂ ਨੂੰ ਜੀ ਆਇਆ ਨੂੰ ਆਖਿਆ। ਇਸ ਮੌਕੇ ਦਰਸ਼ਨ ਸਿੰਘ ਐਮ.ਡੀ. ਜੋਸ਼ ਟਰੈਕਟਰ, ਹਰਦਿਆਲ ਸਿੰਘ ਅਮਨ, ਹਰਪ੍ਰੀਤ ਸਿੰਘ ਸ਼ਿਵਾਲਿਕ, ਦਪਿੰਦਰ ਸਿੰਘ ਡਿੰਪੀ, ਪਰਮਜੀਤ ਸਿੰਘ ਨੀਟੂ, ਸਰਪੰਚ ਬਲਵਿੰਦਰ ਸਿੰਘ ਮਹਿਮੂਦਪੁਰਾ, ਦਲਜੀਤ ਸਿੰਘ ਜਰਖੜ ਕੈਨੇਡਾ, ਬਾਈ ਸੁਰਜੀਤ ਸਿੰਘ ਸਾਹਨੇਵਾਲ, ਹਰਪਪਾਲ ਸਿੰਘ ਲਹਿਲ, ਹੈਰੀ ਗੁਜੱਰਵਾਲ, ਐਡਵੋਕੇਟ ਹਰਕੰਵਲ ਸਿੰਘ, ਇਸੰਪੈਕਟਰ ਬਲਬੀਰ ਸਿੰਘ ਹੀਰ, ਪ੍ਰਿੰ. ਪ੍ਰੇਮ ਸਿੰਗਲਾ, ਗੁਰਮੀਤ ਸਿੰਘ ਰਣੀਆ ਗਾਂਧੀ, ਅਜੀਤ ਸਿੰਘ ਲਾਦੀਆਂ ਆਦਿ ਇਲਾਕੇ ਦੀਆਂ ਉੱਘੀਆਂ ਸਖਸ਼ੀਅਤਾਂ ਹਾਜਰ ਸਨ।
ਮਾਤਾ ਸਾਹਿਬ ਕੌਰ ਗੋਲਡ ਹਾਕੀ ਕੱਪ ਟੂਰਨਾਮੈਂਟ ਵਿਚ (ਕੁੜੀਆਂ) ਦੇ ਪਹਿਲੇ ਮੈਚ 'ਚ ਸਰਕਾਰੀ ਕਾਲਜ ਲੁਧਿਆਣਾ ਨੇ ਲਵਲੀ ਪ੍ਰੋਫੈਸ਼ਨਲ ਯੁਨੀਵਰਸਿਟੀ ਨੂੰ 6-0 ਨਾਲ ਹਰਾਇਆ ਅਤੇ ਦੂਜੇ ਮੈਚ 'ਚ ਖਾਲਸਾ ਕਾਲਜ ਨੇ ਕਿਲਾ ਰਾਏਪੁਰ ਨੂੰ 4-2 ਨਾਲ ਹਰਾਇਆ। ਜਦਕਿ ਅੰਡਰ-17 (ਲੜਕੇ) ਹਾਕੀ ਵਿਚ ਢੋਲਣ ਨੇ ਬਹਾਦਰਗੜ੍ਹ ਨੂੰ 8-0 ਨਾਲ, ਦੂਜੇ ਮੈਚ ਵਿਚ ਯੁਵਾ ਹਾਕੀ ਕਲੱਬ ਕੈਂਥਲ ਹਰਿਆਣਾ ਨੇ ਘਵੱਦੀ ਨੂੰ 7-4 ਨਾਲ, ਤੀਜੇ ਮੈਚ ਵਿਚ ਗਿੱਲ ਹਾਕੀ ਕਲੱਬ ਖਹਿਰਾ ਨੇ ਜੈ ਭਾਰਤ ਅਕੈਡਮੀ ਕੁਰੂਕੁਸ਼ੇਤਰਾ ਨੂੰ 6-4 ਨਾਲ, ਚੌਥੇ ਮੈਚ 'ਚ ਜਗਤਾਰ ਇਲੈਵਨ ਜਰਖੜ ਨੇ ਨਾਭਾ ਨੂੰ 5-1 ਨਾਲ ਹਰਾਇਆ। ਲੀਗ ਦੇ ਮੈਚਾਂ ਵਿਚ ਜਗਤਾਰ ਇਲੈਵਨ, ਸ਼ਾਹਬਾਦ ਹਾਕੀ ਅਕੈਡਮੀ ਹਰਿਆਣਾ ਤੋਂ 4-5 ਨਾਲ ਹਾਰੀ। ਪੁਰਸ਼ ਵਰਗ ਓਪਨ ਹਾਕੀ ਨਾਕਆਊਟ ਦੇ ਪਹਿਲੇ ਮੈਚ ਵਿਚ ਸੰਤ ਫਤਹਿ ਸਿੰਘ ਕਲੱਬ ਢੋਲਣ ਨੇ ਬੀ.ਐਮ.ਸੀ. ਕਲੱਬ ਛਾਜਲੀ ਨੂੰ 5-2 ਨਾਲ ਹਰਾਇਆ, ਦੂਜੇ ਮੈਚ ਵਿਚ ਮੋਗਾ ਨੂੰ ਅਮਲੋਹ ਨੇ 2-0 ਨਾਲ ਹਰਾਇਆ। 66ਵੀਂ ਪੰਜਾਬ ਬਾਸਕਟਬਾਲ ਸਟੇਟ ਚੈਂਪੀਅਨਸ਼ਿਪ ਦੇ ਪਹਿਲੇ ਮੈਚ ਵਿਚ ਲੁਧਿਆਣਾ ਨੇ ਮਾਨਸਾ ਨੂੰ 49-32 ਨਾਲ ਹਰਾ ਕੇ ਜੇਤੂ ਸ਼ੁਰੂਆਤ ਕੀਤਾ। ਹੈਂਡਬਾਲ ਵਿਚ ਅੰਮ੍ਰਿਤਸਰ ਨੇ ਅਮਲੋਹ ਨੂੰ 22-18 ਨਾਲ ਹਰਾਇਆ।
ਇਸ ਮੌਕੇ ਜਗਦੇਵ ਸਿੰਘ ਜੱਸੋਵਾਲ ਦੀ ਯਾਦ ਨੂੰ ਸਮਰਪਿਤ ਸੱਭਿਆਚਾਰ ਮੇਲੇ ਵਿਚ ਲੋਕ ਗਾਇਕ ਸੀ.ਜੇ. ਮੱਲ੍ਹੀ, ਸੰਦੀਪ ਭੰਮਰਾ, ਲਵੀ ਢੀਂਡਸਾ, ਕੁਲਵਿੰਦਰ ਗਿੱਲ, ਇੰਡੀ ਬਲਿੰਗ (ਆਈ.ਬੀ.ਪੀ.ਟੀਮ), ਗੁਰਇੱਕਬਾਠ, ਸੋਨੀ ਬੁਟੱਰ, ਜਿੰਦ ਰੀਹਲ, ਸ਼ੈਂਕੀ, ਲਾਡੀ ਨਿਸ਼ਾਨ, ਸ਼ਰਨ ਢਿੱਲੋਂ ਮਿਊਜ਼ਿਕ ਡਾਇਰੈਕਟਰ, ਇਸ਼ਮੀਤ ਨਰੂਲਾ, ਬਾਈ ਡੈਵੀ ਸਿੰਘ, ਹਰਪ੍ਰੀਤ ਬੁਟੱਰ, ਹੈਪੀ ਜੱਸੋਵਾਲ ਆਦਿ ਨੇ ਦੇਰ ਰਾਤ ਤੱਕ ਦਰਸ਼ਕਾਂ ਦਾ ਮਨੋਰੰਜਨ ਕੀਤਾ। ਭਲਕੇ 22 ਜਨਵਰੀ ਨੂੰ ਜਿੱਥੇ ਸਾਈਕਲਿੰਗ ਦੇ ਮੁਕਾਬਲੇ ਮੁੱਖ ਖਿੱਚ ਦੇ ਕੇਂਦਰ ਹੋਣਗੇ, ਉੱਥੇ ਹੈਂਡਬਾਲ, ਬਾਸਕਚਬਾਲ, ਕਬੱਡੀ ਆਦਿ ਖੇਡਾਂ ਕੇ ਕੁਆਟਰ ਫਾਈਨਲ ਮੁਕਾਬਲੇ ਕਰਵਾਏ ਜਾਣਗੇ, ਜਦਕਿ ਵਿੱਤ ਮੰਤਰੀ ਪਰਮਿੰਦਰ ਸਿੰਘ ਢੀਂਡਸਾ ਮੁੱਖ ਮਹਿਮਾਨ ਵਜੋਂ ਪੁਜੱਣਗੇ। ਇਨ੍ਹਾਂ ਖੇਡਾਂ ਦੇ ਫਾਈਨਲ ਮੁਕਾਬਲੇ 23 ਜਨਵਰੀ ਹੋਣਗੇ, ਇਸ ਮੌਕੇ ਸੂਫੀ ਗਾਇਕ ਕੰਵਰ ਗਰੇਵਾਲ ਦਾ ਖੁੱਲ੍ਹਾ ਅਖਾੜਾ ਲੱਗੇਗਾ।