ਕ੍ਰਿਕੇਟ ਦੇ ਮੈਦਾਨ ਵਿੱਚ ਆਪਣੀ ਫ਼ਿਰਕੀ ਦੇ ਫੇਰ ਵਿੱਚ ਵੱਡੇ-ਵੱਡੇ ਧੁਰੰਦਰਾਂ ਨੂੰ ਫਸਾਉਣ ਤੋਂ ਬਾਅਦ 'ਟਰਬਨੇਟਰ' ਹਰਭਜਨ ਸਿੰਘ ਉਰਫ਼ 'ਭੱਜੀ' ਉੱਪਰ ਵੀ ਹੁਣ ਫ਼ਿਲਮੀ ਰੰਗ ਚੜ੍ਹਨਾ ਸ਼ੁਰੂ ਹੋ ਚੁੱਕਾ ਹੈ। ਪਿਛਲਾ ਕਾਫ਼ੀ ਸਮਾਂ ਟੀਮ ਤੋਂ ਬਾਹਰ ਰਹਿਣ ਕਰਕੇ ਉਸਦਾ ਮੇਲ-ਜੋਲ ਪੰਜਾਬੀ ਫ਼ਿਲਮ ਨਿਰਮਾਤਾਵਾਂ ਨਾਲ ਹੁੰਦਾ ਰਿਹਾ ਤੇ ਪਹਿਲੀ ਵਾਰ ਉਹ ਜਨਤਕ ਤੌਰ 'ਤੇ 'ਸਿੰਘ ਵਰਸਜ਼ ਕੌਰ' ਦੇ ਸੰਗੀਤ ਰਿਲੀਜ਼ ਸਮਾਰੋਹ ਦੌਰਾਨ ਚੰਡੀਗੜ੍ਹ ਵਿਖੇ ਗਿੱਪੀ ਗਰੇਵਾਲ ਨਾਲ ਨਜ਼ਰ ਆਇਆ। ਉਸ ਦਿਨ ਤੋਂ ਹੀ ਅਫ਼ਵਾਹਾਂ ਦਾ ਬਜ਼ਾਰ ਗਰਮ ਹੋ ਗਿਆ ਸੀ ਕਿ ਹੁਣ ਜਲਦੀ ਹੀ ਭੱਜੀ ਕਿਸੇ ਨਾ ਕਿਸੇ ਫ਼ਿਲਮ ਵਿੱਚ ਜ਼ਰੂਰ ਨਜ਼ਰ ਆਉਣ ਵਾਲਾ ਹੈ। ਦਰਸ਼ਕਾਂ ਦਾ ਸ਼ੱਕ ਉਸ ਵੇਲੇ ਯਕੀਨ ਵਿੱਚ ਬਦਲ ਗਿਆ ਜਦ ਉਹ ਪੁਲਿਸ ਇੰਸਪੈਕਟਰ ਦੀ ਵਰਦੀ ਪਾਈ 'ਭਾਅ ਜੀ ਇਨ ਪ੍ਰੌਬਲਮ' ਫ਼ਿਲਮ ਦੇ ਸੈੱਟ 'ਤੇ ਨਜ਼ਰ ਆਇਆ। ਉਸ ਤੋਂ ਬਾਅਦ ਤਾਂ ਜਨਤਕ ਤੌਰ 'ਤੇ ਹੀ ਇਹ ਐਲਾਨ ਹੀ ਹੋ ਗਿਆ ਕਿ ਉਹ ਬਾਲੀਵੁੱਡ ਅਦਾਕਾਰ ਅਕਸ਼ੈ ਕੁਮਾਰ ਅਤੇ ਗੁਰਪ੍ਰੀਤ ਘੁੱਗੀ ਦੁਆਰਾ ਨਿਰਮਤ ਫ਼ਿਲਮ 'ਭਾਅ ਜੀ ਇਨ ਪ੍ਰੌਬਲਮ' ਵਿੱਚ ਇੱਕ ਪੁਲਿਸ ਅਧਿਕਾਰੀ ਦੀ ਭੂਮਿਕਾ ਅਦਾ ਕਰ ਰਿਹਾ ਹੈ। ਇਸ ਵੇਲੇ ਫ਼ਿਲਮ ਦੀ ਸ਼ੂਟਿੰਗ ਚੰਡੀਗੜ੍ਹ ਦੇ ਆਸ-ਪਾਸ ਚੱਲ ਰਹੀ ਹੈ ਤੇ 'ਭੱਜੀ' ਨੇ ਆਸਟ੍ਰੇਲੀਆ ਨਾਲ ਭਾਰਤ ਦੀ ਚੱਲ ਰਹੀ ਟੈਸਟ ਲੜੀ ਤੋਂ ਪਹਿਲਾਂ ਹੀ ਇਸ ਫ਼ਿਲਮ ਵਿੱਚ ਆਪਣਾ ਕਿਰਦਾਰ ਅਦਾ ਕਰ ਦਿੱਤਾ ਹੈ।
'ਰਾਊਂਡ ਸਕੁਆਇਰ ਪ੍ਰੋਡਕਸ਼ਨਜ਼' ਦੇ ਬੈਨਰ ਹੇਠ 'ਚੱਕ ਦੇ ਫ਼ੱਟੇ' ਅਤੇ 'ਕੈਰੀ ਆਨ ਜੱਟਾ' ਫ਼ੇਮ ਨਿਰਦੇਸ਼ਕ ਸਮੀਪ ਕੰਗ ਦੁਆਰਾ ਨਿਰਦੇਸ਼ਤ ਇਸ ਫ਼ਿਲਮ ਦਾ ਹੀਰੋ ਗਿੱਪੀ ਗਰੇਵਾਲ ਤੇ ਹੀਰੋਇਨ ਰਾਗਿਨੀ ਖੰਨਾ ਹੈ। ਹੋਰਨਾਂ ਅਦਾਕਾਰਾਂ ਵਿੱਚ ਓਮ ਪੁਰੀ, ਅਵਤਾਰ ਗਿੱਲ, ਗੁਰਪ੍ਰੀਤ ਘੁੱਗੀ, ਬੀ.ਐੱਨ. ਸ਼ਰਮਾ, ਕਰਮਜੀਤ ਅਨਮੋਲ, ਖ਼ੁਸ਼ਬੂ, ਗੌਰੀ, ਨਿਸ਼ਾ ਬਾਨੋ ਅਤੇ ਕੁਲਦੀਪ ਸ਼ਰਮਾ ਆਦਿ ਸ਼ਾਮਲ ਹਨ। ਸੁਣਨ ਵਿੱਚ ਆਇਆ ਹੈ ਕਿ 'ਭੱਜੀ' ਦੇ ਨਾਲ ਖ਼ੁਦ ਅਕਸ਼ੈ ਕੁਮਾਰ ਵੀ ਇਸ ਫ਼ਿਲਮ ਵਿੱਚ ਮਹਿਮਾਨ ਭੂਮਿਕਾ ਵਿੱਚ ਨਜ਼ਰ ਆਉਣ ਵਾਲਾ ਹੈ।
ਹਲਾਂਕਿ 'ਭੱਜੀ' ਤੋਂ ਪਹਿਲਾਂ ਵੀ ਕਈ ਨਾਮੀਂ ਕ੍ਰਿਕੇਟ ਖਿਡਾਰੀਆਂ ਨੇ ਫ਼ਿਲਮੀ ਚਕਾਚੌਂਧ ਵਿੱਚ ਫਸ ਕੇ ਫ਼ਿਲਮੀ ਹੀਰੋ ਬਣਨ ਦੀ ਕੋਸ਼ਿਸ਼ ਕੀਤੀ ਹੈ ਪਰ ਉਹ ਸਭ ਅਸਫ਼ਲ ਹੀ ਰਹੇ ਹਨ। ਹੁਣ ਆਪਣੀ ਇਸ ਨਵੀਂ ਭੂਮਿਕਾ ਨਾਲ 'ਭੱਜੀ' ਕਿੰਨਾ ਕੁ ਨਿਆਂ ਕਰ ਪਾਉਂਦਾ ਹੈ ਇਹ ਤਾਂ ਆਉਣ ਵਾਲਾ ਵਕਤ ਹੀ ਦੱਸੇਗਾ ਪਰ ਫ਼ਿਲਹਾਲ ਭੱਜੀ ਫ਼ਿਲਮੀ ਦੁਨੀਆਂ ਵਿੱਚ ਪ੍ਰਵੇਸ਼ ਕਰ ਕੇ ਬਹੁਤ ਖ਼ੁਸ਼ ਅਤੇ ਉਤਸ਼ਾਹਿਤ ਹੈ। ਜੇਕਰ ਸੂਤਰਾਂ ਦੀ ਮੰਨੀਏ ਤਾਂ ਜਲਦੀ ਹੀ 'ਭੱਜੀ' ਆਪਣੀ ਹੋਮ ਪ੍ਰੋਡਕਸ਼ਨਜ਼ ਹੇਠ ਇੱਕ ਪੰਜਾਬੀ ਫ਼ਿਲਮ ਬਣਾਉਣ ਜਾ ਰਿਹਾ ਹੈ ਜਿਸ ਲਈ ਕਿ ਉਸਨੇ ਮੁੱਢਲੀਆਂ ਤਿਆਰੀਆਂ ਵੀ ਮੁਕੰਮਲ ਕਰ ਲਈਆਂ ਹਨ।