ਲੋਕ ਨਿਰਮਾਣ ਮੰਤਰੀ ਜਨਮੇਜਾ ਸਿੰਘ ਸੇਖੋਂ ਨੇ ਕਿਹਾ ਕਿ ਖੰਨਾ-ਨਵਾਂਸ਼ਹਿਰ ਰੋਡ 'ਤੇ ਮਾਛੀਵਾੜਾ ਤੇ ਰਾਹੋਂ ਵਿਚਾਲੇ ਉਧੋਵਾਲ ਪਿੰਡ ਕੋਲ ਪੈਂਦੀ ਸੜਕ ਦਾ ਮਾਮਲਾ ਹੱਲ ਕਰ ਲਿਆ ਗਿਆ ਅਤੇ ਹੁਣ ਵਿਭਾਗ ਵੱਲੋਂ ਜਲਦ ਹੀ ਇਸ ਟੋਟੇ ਨੂੰ ਸੜਕ ਦਾ ਰੂਪ ਦੇ ਕੇ ਮਾਲਵੇ ਨੂੰ ਮਾਝਾ-ਦੋਆਬਾ ਖੇਤਰ ਨਾਲ ਜੋੜਦੀ ਇਸ ਸੜਕ ਦੇ ਰਾਹਗੀਰਾਂ ਨੂੰ ਵੱਡੀ ਰਾਹਤ ਮਿਲੇਗੀ। ਸ. ਸੇਖੋਂ ਨੇ ਇਹ ਗੱਲ ਅੱਜ ਇਥੇ ਪੰਜਾਬ ਸਿਵਲ ਸਕੱਤਰੇਤ ਵਿਖੇ ਆਪਣੇ ਦਫਤਰ ਵਿਖੇ ਭਾਰਤੀ ਕਿਸਾਨ ਯੂਨੀਅਨ ਦੇ ਪ੍ਰਧਾਨ ਸ. ਬਲਬੀਰ ਸਿੰਘ ਰਾਜੇਵਾਲ ਤੇ ਯੂਥ ਅਕਾਲੀ ਆਗੂ ਸ. ਰੁਪਿੰਦਰ ਸਿੰਘ ਬੈਣੀਪਾਲ ਦੀ ਅਗਵਾਈ ਵਿੱਚ ਆਏ ਇਸ ਜਗ੍ਹਾਂ ਦੇ ਮਾਲਕ ਤਿੰਨ ਭਰਾਵਾਂ ਨੂੰ ਸਨਮਾਨਤ ਕਰਨ ਉਪਰੰਤ ਕਹੀ। ਸੇਖੋਂ ਨੇ ਦੱਸਿਆ ਕਿ 2002 ਵਿੱਚ ਇਹ ਸੜਕ ਬਣਾਈ ਜਾ ਰਹੀ ਸੀ। ਮਾਛੀਵਾੜਾ ਤੇ ਰਾਹੋਂ ਵਿਚਾਲੇ ਉਧੋਵਾਲ ਪਿੰਡ ਕੋਲ ਤਿੰਨ ਭਰਾਵਾਂ ਗੁਰਦੇਵ ਸਿੰਘ, ਤਰਲੋਚਨ ਸਿੰਘ ਤੇ ਗੁਰਮੀਤ ਸਿੰਘ ਦੀ ਜ਼ਮੀਨ ਪੈਂਦੀ ਸੀ ਜਿਨ੍ਹਾਂ ਨੇ 2006 ਵਿੱਚ ਹਾਈ ਕੋਰਟ ਤੋਂ ਸਟੇਅ ਲੈ ਲਈ ਸੀ। ਉਨ੍ਹਾਂ ਦੱਸਿਆ ਕਿ ਸ. ਰਾਜੇਵਾਲ ਤੇ ਸ. ਬੈਣੀਪਾਲ ਦੀਆਂ ਕੋਸ਼ਿਸ਼ਾਂ ਸਦਕਾ ਤਿੰਨ ਭਰਾਵਾਂ ਨੇ ਹਾਈ ਕੋਰਟ ਤੋਂ ਕੇਸ ਵਾਪਸ ਲੈ ਲਿਆ ਸੀ ਜਿਸ ਕਾਰਨ ਸਟੇਅ ਟੁੱਟ ਗਈ ਸੀ।
ਸੇਖੋਂ ਨੇ ਸਥਾਨਕ ਆਗੂਆਂ ਅਤੇ ਤਿੰਨੇ ਭਰਾਵਾਂ ਦੀ ਇਸ ਪਹਿਲਕਦਮੀ ਦੀ ਸਲਾਹੁਤਾ ਕਰਦਿਆਂ ਇਸ ਨੇਕ ਕੰਮ ਲਈ ਵਧਾਈ ਦਿੱਤੀ। ਉਨ੍ਹਾਂ ਕਿਹਾ ਕਿ ਹਾਈ ਕੋਰਟ ਦੀ ਸਟੇਅ ਕਾਰਨ ਤਿੰਨ ਭਰਾਵਾਂ ਦੀ ਮਲਕੀਅਤ ਵਾਲੀ ਜਗ੍ਹਾਂ 'ਤੇ ਥੋੜੇ ਜਿਹੇ ਟੋਟੇ ਵਿੱਚ ਸੜਕ ਨਾ ਬਣਨ ਕਾਰਨ ਜਿੱਥੇ ਦੁਰਘਟਨਾਵਾਂ ਹੁੰਦੀਆਂ ਸਨ ਉਥੇ ਮਾਲਵੇ ਨੂੰ ਮਾਝਾ ਤੇ ਦੋਆਬਾ ਖੇਤਰ ਨਾਲ ਜੋੜਦੀ ਇਸ ਸੜਕ ਦੇ ਰਾਹਗੀਰਾਂ ਨੂੰ ਕਾਫੀ ਪ੍ਰੇਸ਼ਾਨੀ ਹੁੰਦੀ ਸੀ। ਉਨ੍ਹਾਂ ਸਥਾਨਕ ਵਾਸੀਆਂ ਨੂੰ ਵਿਸ਼ਵਾਸ ਦਿਵਾਇਆ ਕਿ ਇਸ ਟੋਟੇ 'ਤੇ ਸੜਕ ਦਾ ਨਿਰਮਾਣ ਜਲਦ ਹੀ ਕੀਤਾ ਜਾਵੇਗਾ।ਇਸ ਮੌਕੇ ਲੋਕ ਨਿਰਮਾਣ ਮੰਤਰੀ ਸ. ਸੇਖੋਂ ਨੂੰ ਕੋਰਟ ਵਿੱਚੋਂ ਕੇਸ ਵਾਪਸ ਲੈਣ ਵਾਲੇ ਪੱਤਰ ਦੀ ਕਾਪੀ ਵੀ ਦਿੱਤੀ ਗਈ। ਇਸ ਉਪਰੰਤ ਸ. ਸੇਖੋਂ ਨੇ ਗੁਰਦੇਵ ਸਿੰਘ, ਤਰਲੋਚਨ ਸਿੰਘ ਤੇ ਗੁਰਮੀਤ ਸਿੰਘ ਨੂੰ ਸਿਰੋਪਾਓ ਦੇ ਕੇ ਸਨਮਾਨਤ ਕੀਤਾ। ਇਸ ਮੌਕੇ ਨਗਰ ਕੌਂਸਲ ਸਮਰਾਲਾ ਦੇ ਸਾਬਕਾ ਪ੍ਰਧਾਨ ਗਿਆਨੀ ਮੋਹਿੰਦਰ ਸਿੰਘ, ਸ. ਆਲਮਦੀਪ ਸਿੰਘ ਤੇ ਸ. ਤਜਿੰਦਰ ਸਿੰਘ ਵੀ ਹਾਜ਼ਰ ਸਨ।