ਪੰਜਾਬ ਪ੍ਰਦੇਸ਼ ਕਾਂਗਰਸ ਨੇ ਐਤਵਾਰ ਨੂੰ ਲੈਫਟੀਨੇਂਟ ਜਨਰਲ ਕੁਲਦੀਪ ਸਿੰਘ ਬਰਾੜ 'ਤੇ ਹੋਏ ਕਾਤਿਲਾਨਾ ਹਮਲੇ 'ਤੇ ਭਾਰਤੀਆ ਜਨਤਾ ਪਾਰਟੀ ਦੀ ਮੌਕਾਪ੍ਰਸਤ ਚੁੱਪੀ 'ਤੇ ਵਰ੍ਹਦੇ ਹੋਏ ਖੂਬ ਨਿੰਦਾ ਕੀਤੀ ਹੈ। ਪੰਜਾਬ ਕਾਂਗਰਸ ਦੇ ਜਨਰਲ ਸਕੱਤਰ ਤੇ ਧੂਰੀ ਤੋਂ ਐਮ.ਐਲ.ਏ ਅਰਵਿੰਦ ਖੰਨਾ ਨੇ ਇਥੇ ਜਾਰੀ ਬਿਆਨ 'ਚ ਕਿਹਾ ਹੈ ਕਿ ਲੱਗਦਾ ਹੈ ਕਿ ਭਾਜਪਾ ਨੇ ਪੰਜਾਬ ਦੇ ਅੰਦਰ ਤੇ ਇਸਦੇ ਬਾਹਰ ਦੇ ਹਾਲਾਤਾਂ ਤੋਂ ਬੇਖਬਰ ਬਣਦੇ ਹੋਏ ਆਪਣਾ ਚੇਹਰਾ ਰੇਤ ਨੂੰ ਪਾ ਦਿੱਤਾ ਹੈ। ਜੋ ਸਰਕਾਰ 'ਚ ਆਪਣੀ ਹੌਂਦ ਨੂੰ ਦਾਅ 'ਤੇ ਨਹੀਂ ਲਗਾਉਣਾ ਚਾਹੁੰਦੀ। ਭਾਜਪਾ ਦੇ ਵੱਡੇ ਵੱਡੇ ਦਾਅਵਿਆਂ ਦਾ ਮਖੌਲ ਉਡਾਉਂਦੇ ਹੋਏ ਉਨ੍ਹਾਂ ਨੇ ਕਿਹਾ ਕਿ ਜਿਸ ਢੰਗ ਨਾਲ ਭਾਜਪਾ ਨੇ ਅਜਿਹੇ ਕੌਮੀ ਪੱਧਰ 'ਤੇ ਗੰਭੀਰ ਮਾਮਲੇ 'ਤੇ ਚੁੱਪੀ ਬਣਾਏ ਰੱਖੀ ਹੈ। ਇਸਨੇ ਸਿਰਫ ਪਾਰਟੀ ਪਾਸੋਂ ਆਪਣੀ ਨੀਤੀ ਤੇ ਸਿਧਾਂਤਾਂ 'ਤੇ ਬਣੇ ਰਹਿਣ ਦੀ ਬਜਾਏ ਸਰਕਾਰ 'ਚ ਬਣੇ ਰਹਿਣ ਦੀ ਮੌਕਾਪ੍ਰਸਤੀ ਨੂੰ ਦਰਸਾਇਆ ਹੈ। ਖੰਨਾ ਨੇ ਕਿਹਾ ਕਿ ਇਹ ਪਹਿਲੀ ਵਾਰ ਨਹੀਂ ਹੈ, ਜਦੋਂ ਭਾਜਪਾ ਨੇ ਕੌਮੀ ਹਿੱਤਾਂ ਤੋਂ ਜਿਆਦਾ ਸਿਆਸੀ ਮੌਕਾਪ੍ਰਸਤੀ ਨੂੰ ਪ੍ਰਮੁੱਖਤਾ ਦਿੱਤੀ ਹੈ।
ਹਾਲ ਹੀ ਵਿੱਚ ਵੀ ਜਦੋਂ ਆਪ੍ਰੇਸ਼ਨ ਬਲੂਸਟਾਰ ਮੈਮੋਰੀਅਲ ਬਣਾਏ ਜਾਣ ਦੇ ਮੁੱਦੇ 'ਤੇ ਸ੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਪੰਜਾਬ ਸਰਕਾਰ ਵੱਲੋਂ ਸਮਰਥਨ ਦੇਣ ਦਾ ਫੈਸਲਾ ਕੀਤਾ ਗਿਆ, ਭਾਜਪਾ ਇਸਦਾ ਹਿੱਸਾ ਸੀ। ਜਦਕਿ ਹੁਣ ਜਦੋਂ ਕੌਮੀ ਹਿੱਤ ਲਈ ਆਪਣੀ ਜਿੰਦਗੀ ਨੂੰ ਦਾਅ 'ਤੇ ਲਗਾਉਣ ਵਾਲੇ ਫੌਜ ਦੇ ਜਨਰਲ 'ਤੇ ਲੰਡਨ 'ਚ ਹਮਲਾ ਕੀਤਾ ਗਿਆ, ਭਾਜਪਾ ਨੇ ਇਕ ਵਾਰ ਫਿਰ ਤੋਂ ਬੇਸ਼ਰਮੀ ਦਿਖਾਈ ਤੇ ਚੁੱਪੀ ਬਣਾਈ ਰੱਖੀ ਹੈ। ਕਾਂਗਰਸ ਜਨਰਲ ਸਕੱਤਰ ਨੇ ਭਾਜਪਾ ਨੂੰ ਇਸ ਗੰਭੀਰ ਮੁੱਦੇ 'ਤੇ ਆਪਣੇ ਪੱਖ ਨੂੰ ਸਪੱਸ਼ਟ ਕਰਨ ਨੂੰ ਕਿਹਾ ਹੈ, ਜਿਹੜਾ ਪੰਜਾਬ ਦੇ ਹਾਲਾਤ 'ਤੇ ਸਿੱਧਾ ਪ੍ਰਭਾਵ ਪਾਉਂਦਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਭਾਜਪਾ ਨੇ ਪੰਜਾਬ 'ਚ ਬਣਾਏ ਜਾ ਰਹੇ ਰਹੇ ਹਾਲਾਤਾਂ ਪ੍ਰਤੀ ਜਾਂ ਤਾਂ ਅੱਖਾਂ ਬੰਦ ਕਰੀਆਂ ਹੋਈਆਂ ਹਨ, ਜਾਂ ਫਿਰ ਆਪਣੀ ਮਨਜੂਰੀ ਦੇ ਦਿੱਤੀ ਹੈ। ਜੋ ਪੰਜਾਬ ਲਈ ਖਤਰਨਾਕ ਸਿੱਧ ਹੋ ਸਕਦਾ ਹੈ। ਇਸੇ ਤਰ੍ਹਾਂ ਖੰਨਾ ਨੇ ਆਤੰਕ ਦੀ ਇਸ ਕਾਰਵਾਈ ਦੇ ਖਿਲਾਫ ਸਾਫ ਤੌਰ 'ਤੇ ਸਾਹਮਣੇ ਨਾ ਆਉਣ ਤੇ ਬਿਨ੍ਹਾਂ ਕਿਸੇ ਝਿਝਕ ਤੋਂ ਇਸਦੀ ਨਿੰਦਾ ਨਾ ਕਰਨ ਨੂੰ ਲੈ ਕੇ ਸ੍ਰੋਮਣੀ ਅਕਾਲੀ ਦਲ ਦੀ ਅਲੋਚਨਾ ਕੀਤੀ ਹੈ।