ਮੁੰਬਈ ਵਿੱਚ ਹਾਲ ਹੀ ਦੌਰਾਨ ਹੋਈ ਪ੍ਰਸਿੱਧ ਮਾਰ੍ਸ ਇੰਟਰਨੈਸ਼ਨਲ ਸਪੈਲਿੰਗ ਬੀ ਚੈਂਪੀਅਨਸ਼ਿਪ 2026 ਵਿੱਚ ਚਿਤਕਾਰਾ ਇੰਟਰਨੈਸ਼ਨਲ ਸਕੂਲ (ਸੀ.ਆਈ.ਐਸ.) ਦੇ ਵਿਦਿਆਰਥੀਆਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਸਕੂਲ ਅਤੇ ਇਲਾਕੇ ਦਾ ਨਾਮ ਅੰਤਰਰਾਸ਼ਟਰੀ ਪੱਧਰ ‘ਤੇ ਰੌਸ਼ਨ ਕੀਤਾ। ਵਿਸ਼ਵ ਪੱਧਰ ਦੀ ਇਸ ਮੁਕਾਬਲੇਬਾਜ਼ੀ ਵਿੱਚ ਹਜ਼ਾਰਾਂ ਵਿਦਿਆਰਥੀਆਂ ਨੇ ਵੱਖ-ਵੱਖ ਪੱਧਰਾਂ ‘ਤੇ ਭਾਗ ਲਿਆ। ਮੁਕਾਬਲੇ ਦੌਰਾਨ ਸਪੈਲਿੰਗ, ਉਚਾਰਣ, ਸ਼ਬਦ ਭੰਡਾਰ, ਵਰਬਲ ਰੀਜ਼ਨਿੰਗ ਅਤੇ ਭਾਸ਼ਾਈ ਯੋਗਤਾ ਦੀ ਜਾਂਚ ਕੀਤੀ ਗਈ।
ਸੀ.ਆਈ.ਐਸ. ਪੰਚਕੂਲਾ ਦੇ ਵਿਦਿਆਰਥੀ ਆਕਾਸ਼ ਨਿਮਵਾਲ ਨੇ ਕੈਟੇਗਰੀ-1 ਵਿੱਚ 100 ਵਿੱਚੋਂ ਪੂਰੇ 100 ਅੰਕ ਹਾਸਲ ਕਰਦੇ ਹੋਏ ਅੰਤਰਰਾਸ਼ਟਰੀ ਪੱਧਰ ‘ਤੇ ਪਹਿਲਾ ਸਥਾਨ ਪ੍ਰਾਪਤ ਕੀਤਾ। ਆਕਾਸ਼ ਨੇ 2024-25 ਸੈਸ਼ਨ ਦੌਰਾਨ ਇਸ ਮੁਕਾਬਲੇ ਵਿੱਚ ਭਾਗ ਲੈ ਕੇ ਕਵਾਲੀਫਾਈ ਕੀਤਾ ਸੀ, ਜਦੋਂ ਉਹ ਪਹਿਲੀ ਕਲਾਸ ਦੇ ਵਿਦਿਆਰਥੀ ਸਨ।
ਪੂਰੇ ਸਾਲ ਦੌਰਾਨ ਲਗਾਤਾਰ ਕੜੀ ਮਿਹਨਤ ਅਤੇ ਤਿਆਰੀ ਦੇ ਨਾਲ ਉਸਨੇ ਅੰਤਰਰਾਸ਼ਟਰੀ ਪੱਧਰ ‘ਤੇ ਪਹਿਲਾ ਸਥਾਨ ਪ੍ਰਾਪਤ ਕੀਤਾ। ਵਰਤਮਾਨ ਵਿੱਚ ਉਹ ਤੀਜੀ ਕਲਾਸ ਵਿੱਚ ਅਧਿਐਨ ਕਰ ਰਹੇ ਹਨ। ਆਪਣੀ ਸਫਲਤਾ ਬਾਰੇ ਆਕਾਸ਼ ਨੇ ਕਿਹਾ ਕਿ ਲਗਾਤਾਰ ਅਭਿਆਸ ਅਤੇ ਮਾਤਾ-ਪਿਤਾ, ਦਾਦਾ-ਦਾਦੀ ਅਤੇ ਅਧਿਆਪਕਾਂ ਦੀ ਹੌਸਲਾ ਅਫਜ਼ਾਈ ਨੇ ਉਸਨੂੰ ਇਸ ਮੰਜ਼ਿਲ ਤੱਕ ਪਹੁੰਚਾਇਆ।
ਇਸ ਤੋਂ ਇਲਾਵਾ, ਸੀ.ਆਈ.ਐਸ. ਪੰਚਕੂਲਾ ਦੀ ਦੂਜੀ ਜਮਾਤ ਦੀ ਵਿਦਿਆਰਥਣ ਅੰਜਲੀ ਡੇ ਨੇ ਕੈਟੇਗਰੀ-2 ਵਿੱਚ 62 ਅੰਕ ਪ੍ਰਾਪਤ ਕਰਕੇ “ਬੱਡਿੰਗ ਸਟਾਰ” ਦਾ ਖਿਤਾਬ ਆਪਣੇ ਨਾਮ ਕੀਤਾ। ਪੰਚਕੂਲਾ ਕੈਂਪਸ ਦੇ 2023-24 ਬੈਚ ਦੇ ਵਿਦਿਆਰਥੀਆਂ ਨੇ ਵੀ ਮਹੱਤਵਪੂਰਨ ਪ੍ਰਾਪਤੀਆਂ ਦਰਜ ਕੀਤੀਆਂ।
ਆਇਰਾ ਮਹਿਤਾ ਨੇ ਕੈਟੇਗਰੀ-1 ਵਿੱਚ 80 ਅੰਕ ਹਾਸਲ ਕਰਕੇ ਦੂਜਾ ਸਥਾਨ ਪ੍ਰਾਪਤ ਕੀਤਾ, ਜਦਕਿ ਸ਼ੌਰਿਆ ਸਲੂਜਾ ਨੇ 58 ਅੰਕ ਲੈ ਕੇ ਅੱਠਵਾਂ ਸਥਾਨ ਹਾਸਲ ਕੀਤਾ। ਚਿਤਕਾਰਾ ਇੰਟਰਨੈਸ਼ਨਲ ਸਕੂਲਜ਼ ਦੀ ਵਾਈਸ ਪ੍ਰੈਜ਼ੀਡੈਂਟ ਡਾ. ਨਿਯਤੀ ਚਿਤਕਾਰਾ ਨੇ ਵਿਦਿਆਰਥੀਆਂ ਨੂੰ ਵਧਾਈ ਦਿੰਦਿਆਂ ਕਿਹਾ ਕਿ ਇਹ ਉਪਲਬਧੀ ਉਨ੍ਹਾਂ ਦੀ ਮਹਿਨਤ, ਬੌਧਿਕ ਯੋਗਤਾ ਅਤੇ ਲਗਨ ਦਾ ਪ੍ਰਤੀਕ ਹੈ।
ਉਨ੍ਹਾਂ ਕਿਹਾ ਕਿ ਸਕੂਲ ਵਿਦਿਆਰਥੀਆਂ ਨੂੰ ਵਿਸ਼ਵ ਪੱਧਰ ‘ਤੇ ਮੁਕਾਬਲੇ ਯੋਗ ਅਤੇ ਭਵਿੱਖ ਲਈ ਤਿਆਰ ਕਰਨ ਲਈ ਵਚਨਬੱਧ ਹੈ। ਮੁਕਾਬਲੇ ਦੌਰਾਨ ਵਿਦਿਆਰਥੀਆਂ ਦੀ ਸਮਾਨਾਰਥੀ ਅਤੇ ਉਲਟਾਰਥਕ ਸ਼ਬਦਾਂ, ਸੁਣਨ ਸਮਝ, ਉਚਾਰਣ, ਪਾਰਟਸ ਆਫ ਸਪੀਚ ਅਤੇ ਆਡੀਓ ਆਧਾਰਿਤ ਸਮਝ ਦੀ ਜਾਂਚ ਕੀਤੀ ਗਈ।
ਕਈ ਕਠਿਨ ਮੁਲਾਂਕਣ ਅਤੇ ਮੁਕਾਬਲੇ ਦੇ ਪੜਾਅ ਸਫਲਤਾਪੂਰਵਕ ਪਾਰ ਕਰਨ ਤੋਂ ਬਾਅਦ ਹੀ ਚੁਣੇ ਹੋਏ ਫਾਈਨਲਿਸਟ ਇਸ ਪ੍ਰਤਿਸ਼ਠਿਤ ਅੰਤਰਰਾਸ਼ਟਰੀ ਚੈਂਪੀਅਨਸ਼ਿਪ ਲਈ ਯੋਗ ਕਰਾਰ ਦਿੱਤੇ ਗਏ। ਇਹ ਸਮਾਗਮ ਪਹਿਲਾਂ ਦੁਬਈ ਵਿੱਚ ਕਰਵਾਇਆ ਜਾਣਾ ਸੀ, ਪਰ ਪ੍ਰੋਗਰਾਮ ਵਿੱਚ ਤਬਦੀਲੀਆਂ ਕਾਰਨ ਬਾਅਦ ਵਿੱਚ ਇਸਦਾ ਆਯੋਜਨ ਮੁੰਬਈ ਵਿੱਚ ਕੀਤਾ ਗਿਆ।