ਪੰਜਾਬ ਇੰਜੀਨੀਅਰਿੰਗ ਕਾਲਜ (ਮਾਨਿਤ ਯੂਨੀਵਰਸਿਟੀ), ਚੰਡੀਗੜ੍ਹ ਦੇ ‘ਸਪੀਕਰਜ਼ ਐਸੋਸੀਏਸ਼ਨ ਐਂਡ ਸਟਡੀ ਸਰਕਲ’ ਕਲੱਬ ਨੇ 18-19 ਅਪ੍ਰੈਲ, 2026 ਨੂੰ ਉੱਤਰੀ ਖੇਤਰ ਦੇ ਪ੍ਰਮੁੱਖ ਮਾਡਲ ਯੂਨਾਈਟਿਡ ਨੇਸ਼ਨਜ਼ ਪ੍ਰੋਗਰਾਮਾਂ ਵਿੱਚੋਂ ਇੱਕ ‘ਪੇਕ ਐਮਯੂਐਨ’ ਦੇ 13ਵੇਂ ਸੰਸਕਰਣ ਦਾ ਸ਼ੁਭ ਆਰੰਭ ਕੀਤਾ। ਇਹ ਆਯੋਜਨ ਵਿਦਿਆਰਥੀ ਕਲਿਆਣ ਦੇ ਡੀਨ ਡਾ. ਡੀ.ਆਰ. ਪ੍ਰਜਾਪਤੀ ਅਤੇ ਸਹਿ-ਡੀਨ ਡਾ. ਪੁਨੀਤ ਚਾਵਲਾ ਦੇ ਮਾਰਗਦਰਸ਼ਨ ਅਤੇ ਸਹਿਯੋਗ ਨਾਲ ਸੰਪੰਨ ਹੋਇਆ।
ਉਦਘਾਟਨ ਸਮਾਰੋਹ ਦੀ ਸ਼ੋਭਾ ਕਲੱਬ ਦੀ ਇੰਚਾਰਜ ਪ੍ਰੋਫੈਸਰ ਸੁਸ਼ਰੀ ਅਮਨਦੀਪ ਕੌਰ ਨੇ ਵਧਾਈ। ਆਪਣੇ ਸੰਬੋਧਨ ਦੌਰਾਨ ਸੁਸ਼ਰੀ ਕੌਰ ਨੇ ਵਰਤਮਾਨ ਭੂ-ਰਾਜਨੀਤਿਕ ਤਣਾਅ ਦਾ ਜ਼ਿਕਰ ਕਰਦੇ ਹੋਏ ਆਧੁਨਿਕ ਵਿਸ਼ਵ ਪੱਧਰ ਦੇ ਪ੍ਰਸੰਗ ਵਿੱਚ ਸੰਯੁਕਤ ਰਾਸ਼ਟਰ ਦੀ ਮਹੱਤਤਾ ਉਤੇ ਜ਼ੋਰ ਦਿੱਤਾ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਅੰਤਰਰਾਸ਼ਟਰੀ ਅਮਨ ਅਤੇ ਸੁਰੱਖਿਆ ਬਣਾਈ ਰੱਖਣ ਵਿੱਚ ਨੌਜਵਾਨਾਂ ਦੀ ਸਾਂਝੀ ਜ਼ਿੰਮੇਵਾਰੀ ਨੂੰ ਵੀ ਉਜਾਗਰ ਕੀਤਾ।
ਪੰਜਾਬ ਇੰਜੀਨੀਅਰਿੰਗ ਕਾਲਜ ਦੇ ਮਿਊਜ਼ਿਕ ਕਲੱਬ ਦੀਆਂ ਸੁਰੀਲੀਆਂ ਪੇਸ਼ਕਾਰੀਆਂ ਨੇ ਪ੍ਰਤੀਨਿਧੀਆਂ ਨੂੰ ਜੋਸ਼ ਨਾਲ ਭਰ ਦਿੱਤਾ। ਇਸ ਤੋਂ ਬਾਅਦ ਵੱਖ-ਵੱਖ ਕਮੇਟੀਆਂ ਦੇ ਸੈਸ਼ਨ ਸ਼ੁਰੂ ਹੋਏ, ਜਿਨ੍ਹਾਂ ਵਿੱਚ ਸੰਯੁਕਤ ਰਾਸ਼ਟਰ ਮਨੁੱਖੀ ਅਧਿਕਾਰ ਕੌਂਸਲ, ਸੰਯੁਕਤ ਰਾਸ਼ਟਰ ਸੁਰੱਖਿਆ ਕੌਂਸਲ, ਸੰਯੁਕਤ ਰਾਸ਼ਟਰ ਮਹਿਲਾ ਸਥਿਤੀ ਆਯੋਗ, ਆਲ ਇੰਡੀਆ ਪਾਲਿਟੀਕਲ ਪਾਰਟੀਜ਼ ਮੀਟਿੰਗ ਅਤੇ ਸੰਯੁਕਤ ਰਾਸ਼ਟਰ ਮਹਾਸਭਾ ਸ਼ਾਮਲ ਸਨ।
ਹਰ ਕਮੇਟੀ ਨੇ ਗੰਭੀਰ ਅਤੇ ਬੌਧਿਕ ਚਰਚਾ ਰਾਹੀਂ ਮਹੱਤਵਪੂਰਨ ਵਿਸ਼ਵ ਪੱਧਰੀ ਮੁੱਦਿਆਂ ‘ਤੇ ਵਿਚਾਰ-ਵਟਾਂਦਰਾ ਕੀਤਾ। ਇਕ ਵਿਲੱਖਣ ਪੱਖ ਸ਼ਾਮਲ ਕਰਦੇ ਹੋਏ ਅੰਤਰਰਾਸ਼ਟਰੀ ਪ੍ਰੈਸ ਕਮੇਟੀ ਨੇ ਫੋਟੋਗ੍ਰਾਫੀ, ਕਾਰਟੂਨ ਅਤੇ ਪੱਤਰਕਾਰਤਾ ਰਾਹੀਂ ਰਚਨਾਤਮਕਤਾ ਨੂੰ ਉਤਸ਼ਾਹਿਤ ਕੀਤਾ।
ਇਸ ਪ੍ਰੋਗਰਾਮ ਵਿੱਚ ਨੇਸ਼ਨਲ ਇੰਸਟੀਚਿਊਟ ਆਫ ਟੈਕਨੋਲੋਜੀ ਜਲੰਧਰ, ਆਰਮੀ ਇੰਸਟੀਚਿਊਟ ਆਫ ਲਾ ਮੋਹਾਲੀ, ਸੇਂਟ ਜੌਨਜ਼ ਹਾਈ ਸਕੂਲ, ਬੀ.ਵੀ.ਸੀ. ਅਤੇ ਮਾਊਂਟ ਕਾਰਮਲ ਵਰਗੀਆਂ ਵੱਖ-ਵੱਖ ਕਾਲਜਾਂ, ਯੂਨੀਵਰਸਿਟੀਆਂ ਅਤੇ ਸਕੂਲਾਂ ਦੇ 150 ਤੋਂ ਵੱਧ ਵਿਦਿਆਰਥੀਆਂ ਨੇ ਭਾਗ ਲਿਆ। ਇਸ ਆਯੋਜਨ ਦੇ ਪ੍ਰਾਯੋਜਕ ਭਾਰਤੀ ਜੀਵਨ ਬੀਮਾ ਨਿਗਮ, ਮੈਕਡੋਨਾਲਡਜ਼, ਹਾਈਪਡਿਨ ਅਤੇ ਬਲੂਓਰਾ ਸਨ।
ਦੋਹਾਂ ਦਿਨਾਂ ਵਿੱਚ ਕੁੱਲ 5 ਸੈਸ਼ਨਾਂ ਦੇ ਆਯੋਜਨ ਤੋਂ ਬਾਅਦ ਪ੍ਰਸਤਾਵਾਂ ਦੇ ਮਸੌਦੇ ਤਿਆਰ ਕੀਤੇ ਗਏ ਅਤੇ ਕਈ ਪ੍ਰਸਤਾਵ ਪਾਸ ਕੀਤੇ ਗਏ। ਅਖੀਰਲੇ ਦਿਨ ਪ੍ਰੋਗਰਾਮ ਦੇ ਸੈਕ੍ਰੇਟੇਰੀਅਟ ਵੱਲੋਂ ਸਮਾਪਨ ਸਮਾਰੋਹ ਆਯੋਜਿਤ ਕੀਤਾ ਗਿਆ, ਜਿਸ ਵਿੱਚ ਉੱਤਮ ਪ੍ਰਦਰਸ਼ਨ ਕਰਨ ਵਾਲੇ ਭਾਗੀਦਾਰਾਂ ਨੂੰ ਸਨਮਾਨਿਤ ਕੀਤਾ ਗਿਆ ਅਤੇ ਆਯੋਜਕ ਟੀਮ ਦਾ ਧੰਨਵਾਦ ਕੀਤਾ ਗਿਆ।
ਇਸ ਸਫਲ ਦੋ-ਦਿਵਸੀਏ ਸੰਮੇਲਨ ਰਾਹੀਂ ‘ਪੇਕਮਨ’ ਨੇ ਤੇਜ਼ੀ ਨਾਲ ਬਦਲਦੇ ਭੂ-ਰਾਜਨੀਤਿਕ ਮਾਹੌਲ ਵਿੱਚ ਸੰਵਾਦ ਅਤੇ ਕੂਟਨੀਤੀ ਦੀ ਮਹੱਤਤਾ ਨੂੰ ਇੱਕ ਵਾਰ ਫਿਰ ਸਾਬਤ ਕੀਤਾ।