ਪ੍ਰਧਾਨ ਮਹਾਂਲੇਖਾਕਾਰ (ਲੇਖਾ ਪ੍ਰੀਖਿਆ), ਪੰਜਾਬ ਦਾ ਦਫ਼ਤਰ, ਮੈਗਸੀਪਾ (MGSIPA), ਸੈਕਟਰ-26, ਚੰਡੀਗੜ੍ਹ ਵਿਖੇ ਆਡਿਟ ਦਿਵਸ 2025 ਦੇ ਜਸ਼ਨਾ ਦੇ ਹਿੱਸੇ ਵਜੋਂ, "ਸਥਾਨਕ ਸ਼ਾਸਨ ਨੂੰ ਮਜ਼ਬੂਤ ਕਰਨ ਵਿੱਚ ਲੇਖਾ ਪ੍ਰੀਖਿਆ ਦੀ ਭੂਮਿਕਾ" ਉੱਤੇ ਇੱਕ ਇਤਿਹਾਸਿਕ ਸਮਾਗਮ ਦਾ ਆਯੋਜਨ ਕਰ ਰਿਹਾ ਹੈ। ਇਹ ਪਹਿਲਕਦਮੀ ਰਾਜ ਭਰ ਦੀਆਂ ਸਥਾਨਕ ਸੰਸਥਾਵਾਂ ਵਿੱਚ ਪਾਰਦਰਸ਼ਿਤਾ, ਜਵਾਬਦੇਹੀ, ਅਤੇ ਚੰਗੇ ਸ਼ਾਸਨ ਨੂੰ ਉਤਸ਼ਾਹਿਤ ਕਰਨ ਲਈ ਸੰਸਥਾ ਦੀ ਦ੍ਰਿੜ ਵਚਨਬੱਧਤਾ ਨੂੰ ਦਰਸਾਉਂਦੀ ਹੈ।
ਪੰਜਾਬ ਵਿਧਾਨ ਸਭਾ ਦੇ ਮਾਨਯੋਗ ਸਪੀਕਰ ਸ਼੍ਰੀ ਕੁਲਤਾਰ ਸਿੰਘ ਸੰਧਵਾਂ ਮੁੱਖ ਮਹਿਮਾਨ ਵਜੋਂ ਪ੍ਰੋਗਰਾਮ ਦੀ ਸ਼ੋਭਾ ਵਧਾਉਣਗੇ, ਜਦਕਿ ਸ਼੍ਰੀ ਪੀਪੀਐੱਲ ਬੁਧਰਾਮ, ਚੇਅਰਮੈਨ, ਪੰਚਾਇਤ ਰਾਜ ਸੰਸਥਾਵਾਂ 'ਤੇ ਕਮੇਟੀ, ਅਤੇ ਸ਼੍ਰੀ ਕੁਲਵੰਤ ਸਿੰਘ, ਚੇਅਰਮੈਨ, ਸਥਾਨਕ ਨਿਕਾਇਆਂ 'ਤੇ ਕਮੇਟੀ, ਨੂੰ ਵਿਸ਼ੇਸ਼ ਮਹਿਮਾਨ ਵਜੋਂ ਸੱਦਾ ਦਿੱਤਾ ਗਿਆ ਹੈ। ਇਸ ਮੌਕੇ ਸਥਾਨਕ ਸਰਕਾਰ, ਪੰਚਾਇਤ ਤੇ ਗ੍ਰਾਮੀਣ ਵਿਕਾਸ ਵਿਭਾਗਾਂ ਦੇ ਸੀਨੀਅਰ ਅਧਿਕਾਰੀ, ਸ਼ਹਿਰੀ ਤੇ ਗ੍ਰਾਮੀਣ ਸਥਾਨਕ ਨਿਕਾਇਆਂ ਦੇ ਚੁਣੇ ਹੋਏ ਨੁਮਾਇੰਦੇ ਅਤੇ ਭਾਰਤੀ ਲੇਖਾ ਤੇ ਲੇਖਾ ਪਰੀਖਿਆ ਵਿਭਾਗ ਦੇ ਅਧਿਕਾਰੀ ਵੀ ਮੌਜੂਦ ਰਹਿਣਗੇ।
ਇਸ ਪ੍ਰੋਗਰਾਮ ਦਾ ਮੁੱਖ ਉਦੇਸ਼ ਸ਼ਾਸਨ ਮਾਹਿਰਾਂ, ਆਡਿਟ ਪੇਸ਼ੇਵਰਾਂ ਅਤੇ ਪੰਚਾਇਤ ਰਾਜ ਸੰਸਥਾਵਾਂ ਤੇ ਸ਼ਹਿਰੀ ਸਥਾਨਕ ਨਿਕਾਇਆਂ ਦੇ ਨੁਮਾਇੰਦਿਆਂ ਨੂੰ ਇੱਕੋ ਮੰਚ ’ਤੇ ਲਿਆਉਣਾ ਹੈ। ਇਹ ਇਸ ਗੱਲ ’ਤੇ ਵੀ ਚਾਨਣਾ ਪਾਵੇਗਾ ਕਿ ਸਖ਼ਤ ਆਡਿਟ ਪ੍ਰਕਿਰਿਆ ਵਿੱਤੀ ਅਨੁਸ਼ਾਸਨ, ਪ੍ਰਦਰਸ਼ਨ ਮੁਲਾਂਕਣ ਅਤੇ ਜ਼ਮੀਨੀ ਪੱਧਰ ’ਤੇ ਸੇਵਾ ਪ੍ਰਦਾਨ ਵਿੱਚ ਸੁਧਾਰ ਲਈ ਨੀਂਹ ਪੱਥਰ ਵਜੋਂ ਕਿਵੇਂ ਕੰਮ ਕਰਦੀ ਹੈ।
ਆਡਿਟ ਦਿਵਸ ਭਾਰਤ ਦੀ ਸਰਵੋੱਚ ਲੇਖਾ ਪ੍ਰੀਖਿਆ ਸੰਸਥਾ ਦੀ ਸਥਾਪਨਾ ਦੀ ਯਾਦ ਦਿਵਾਉਂਦਾ ਹੈ ਤੇ ਰਾਸ਼ਟਰੀ ਵਿਕਾਸ ਤੇ ਸ਼ਾਸਨ ਸੁਧਾਰ ਵਿੱਚ ਇੱਕ ਭਰੋਸੇਯੋਗ ਭਾਈਵਾਲ ਵਜੋਂ ਇਸ ਦੀ ਮਹੱਤਵਪੂਰਨ ਭੂਮਿਕਾ ਦਾ ਜਸ਼ਨ ਮਨਾਉਂਦਾ ਹੈ। ਦਫ਼ਤਰ, ਪ੍ਰਧਾਨ ਮਹਾਲੇਖਾਕਾਰ (ਲੇਖਾ ਪ੍ਰੀਖਿਆ), ਪੰਜਾਬ ਸਾਰੇ ਹਿੱਸੇਦਾਰਾਂ ਨੂੰ ਸਥਾਨਕ ਸ਼ਾਸਨ ਦੇ ਇੱਕ ਮਜ਼ਬੂਤ ਢਾਂਚੇ ਵੱਲ ਹਿੱਸਾ ਲੈਣ, ਵਿਚਾਰ ਕਰਨ ਤੇ ਸਹਿਯੋਗ ਕਰਨ ਲਈ ਸੱਦਾ ਦਿੰਦਾ ਹੈ।