ਰਾਵੀ ਦਰਿਆ ‘ਚ ਆਏ ਭਿਅੰਕਰ ਹੜ ਕਾਰਣ ਧੁੱਸੀ ਬੰਨ੍ਹ ‘ਚ ਪਾੜ ਪੈਣ ਕਾਰਣ ਸਭ ਤੋਂ ਪਹਿਲਾਂ ਪਾਣੀ ਦੀ ਮਾਰ ਹੇਠ ਝੰਭੇ ਗਏ ਹਲਕਾ ਅਜਨਾਲਾ ਤਹਿਤ ਪੈਂਦੇ ਜ਼ਿਲਾ੍ਹ ਅੰਮ੍ਰਿਤਸਰ ਦੇ ਆਖਰੀ ਪਿੰਡ ਘੋਹਨੇਵਾਲਾ ਵਿਖੇ ਹਲਕਾ ਵਿਧਾਇਕ ਤੇ ਸਾਬਕਾ ਕੈਬਨਿਟ ਮੰਤਰੀ ਸ. ਕੁਲਦੀਪ ਸਿੰਘ ਧਾਲੀਵਾਲ ਵਲੋਂ ਮੁਢਲੀਆਂ ਸਿਹਤ ਸੇਵਾਵਾਂ ਦੀ ਬਹਾਲੀ ਲਈ ਸਿਵਲ ਡਿਸਪੈਂਸਰੀ ਦੀ ਸਾਫ ਸਫਾਈ ਲਈ ਖੁੱਦ ਅਗਵਾਈ ਕਰਨ ਸਮੇਤ ਸਿਹਤ ਸੁਰੱਖਿਆ ਦੇ ਮੱਦੇਨਜ਼ਰ ਘੋਹਨੇਵਾਲਾ ਦੇ ਗੁਆਂਢੀ ਪਿੰਡ ਗੱਗੜ ਵਿਖੇ ਖੁੱਦ ਮੱਛਰ ਮਾਰਨ ਵਾਲੀ ਦਵਾਈ ਦੀ ਮਸ਼ੀਨ ਨਾਲ ਫੌਗਿੰਗ ਕੀਤੀ।
ਹੜ੍ਹ ਪੀੜਤਾਂ ਵਲੋਂ ਸੰਭਾਵੀ ਬਿਮਾਰੀਆਂ ਦੇ ਮਹਿੰਗੇ ਇਲਾਜ ਦਾ ਮੁੱਦਾ ਉਠਾਏ ਜਾਣ ਦੇ ਜੁਆਬ ‘ਚ ਸ. ਧਾਲੀਵਾਲ ਨੇ ਹੜ੍ਹ ਪੀੜਤਾਂ ਨੂੰ ਭਰੋਸਾ ਦਿੱਤਾ ਕਿ ਪਹਿਲਾਂ ਤਾਂ ਉਨ੍ਹਾਂ ਦੀ ਪ੍ਰਮਾਤਮਾ ਅੱਗੇ ਅਰਦਾਸ ਹੈ ਕਿ ਹੁਣ ਤੱਕ ਕਿਸੇ ਵਿਸ਼ੇਸ਼ ਵੱਡੇ ਰੋਗਾਂ ਤੋਂ ਬਚਿਆ ਹੋਇਆ ਹੜ੍ਹ ਪੀੜਤ ਹਲਕਾ ਅਜਨਾਲਾ ਦੇ ਕਿਸੇ ਵੀ ਵਿਅਕਤੀ ਨੂੰ ਕੋਈ ਬੱਜ਼ਰ ਰੋਗ ਨਾ ਲੱਗੇ, ਜੇਕਰ ਕੋਈ ਅਜਿਹਾ ਰੋਗ ਲੱਗ ਜਾਂਦਾ ਹੈ ਤਾਂ ਵੱਡੇ ਪ੍ਰਾਈਵੇਟ ਹਸਪਤਾਲਾਂ ‘ਚੋਂ ਮਹਿੰਗੇ ਇਲਾਜ ਲਈ ਰੋਗੀ ਵਿਅਕਤੀ ਨੂੰ ਪੈਸੇ ਦੀ ਥੁੜ ਅੜਿੱਕੇ ਨਹੀਂ ਆਵੇਗੀ, ਕਿਉਂਕਿ ਅਗਲੇ ਮਹੀਨੇ 2 ਅਕਤੂਬਰ ਤੋਂ ਪੰਜਾਬ ਦੇ ਹਰ ਉਸ ਪਰਿਵਾਰ ਦਾ ਵੀ ਭਾਵੇਂ ਨਿੱਜੀ ਜਾਂ ਸਰਕਾਰੀ ਨੌਕਰੀ, ਪੈਨਸ਼ਨਰ, ਇਨਕਮ ਟੈਕਸ ਅਦਾ ਕਰਨ ਵਾਲਾ, ਵੱਡੇ ਸ਼ਾਹੂਕਾਰ, ਦੁਕਾਨਦਾਰ ਆਦਿ ਕੋਈ ਵੀ ਪਰਿਵਾਰ ਸ਼ਾਮਲ ਹੋਵੇ, ਦਾ 10 ਲੱਖ ਰੁਪਏ ਤੱਕ ਮੁੱਖ ਮੰਤਰੀ ਪੰਜਾਬ ਮੁਫਤ ਇਲਾਜ ਬੀਮਾ ਕਰਨ ਦੀ ਰਸਮੀ ਤੌਰ ਤੇ ਮੁਹਿੰਮ ਵਿੱਢੀ ਜਾ ਰਹੀ ਹੈ।
ਜਿਸ ‘ਚ ਹਲਕਾ ਅਜਨਾਲਾ ਦੇ ਹੜ੍ਹਾਂ ਤੋਂ ਪ੍ਰਭਾਵਿਤ 100 ਪਿੰਡਾਂ ਸਮੇਤ ਪੰਜਾਬ ਭਰ ਦੇ ਹੜ੍ਹਾਂ ਦੀ ਮਾਰ ਹੇਠ ਸ਼ਨਾਖਤ ਕੀਤੇ ਗਏ 2303 ਪਿੰਡਾਂ ਨੂੰ ਪਹਿਲ ਦੇ ਅਧਾਰ ਤੇ ਮੁੱਖ ਮੰਤਰੀ ਮੁਫਤ ਇਲਾਜ ਬੀਮਾ ਸਕੀਮ ਦੇ ਘੇਰੇ ‘ਚ ਲਿਆਉਣ ਲਈ ਬੀਮਾ ਸਕੀਮ ਕਾਰਡ ਬਣਾਏ ਜਾਣਗੇ। ਵਿਧਾਇਕ ਤੇ ਸਾਬਕਾ ਮੰਤਰੀ ਸ. ਧਾਲੀਵਾਲ ਨੇ ਹੜ੍ਹ ਪੀੜਤਾਂ ਨੂੰ ਇਹ ਵੀ ਭਰੋਸਾ ਦਿੱਤਾ ਕਿ ਸਿਹਤ ਸੁਰੱਖਿਆ ਪੱਖੋਂ ਹਰੇਕ ਹੜ ਪ੍ਰਭਾਵਿਤ ਪਿੰਡ ਨੂੰ ਮਜਬੂਤ ਕਰਨ ਲਈ ਫੌਗਿੰਗ ਸ਼ੁਰੂ ਕੀਤੀ ਗਈ ਹੈ।
ਮੁਫਤ ਇਲਾਜ ਲਈ ਮੈਡੀਕਲ ਕੈਂਪ ਵੀ ਬਰਾਬਰ ਲਗਾਉਣ ਦਾ ਆਗਾਜ਼ ਕੀਤਾ ਗਿਆ ਹੈ, ਐਮਰਜੰਸੀ ਹਾਲਤਾਂ ‘ਚ ਮਰੀਜ ਨੂੰ ਔਖੇ ਪੈਂਢੇ ਵਾਲੇ ਸ਼ਹਿਰਾਂ ਜਾਂ ਮਹਾਂਨਗਰਾਂ ‘ਚ ਇਲਾਜ ਲਈ ਲਿਜਾਉਣ ਲਈ ਬਕਾਇਦਾ 550 ਮੈਡੀਕਲ ਐਂਬੂਲੈਸਾਂ ਤਾਇਨਾਤ ਕੀਤੀਆਂ ਗਈਆਂ ਹਨ। ਉਨ੍ਹਾਂ ਨੇ ਇਹ ਵੀ ਪ੍ਰਗਟਾਵਾ ਕੀਤਾ ਕਿ ਅੱਜ ਤੋਂ 5 ਦਿਨ ਬਾਅਦ ਤੱਕ ਪਿੰਡਾਂ, ਖੇਤਾਂ, ਬੰਬੀਆਂ , ਸਿਹਤ ਡਿਸਪੈਂਸਰੀਆਂ, ਸਕੂਲਾਂ, ਹੋਰ ਸਰਕਾਰੀ ਇਮਾਰਤਾਂ ਸਮੇਤ ਹੋਰ ਸਰਕਾਰੀ ਇਮਾਰਤਾਂ ਨੂੰ 24 ਸਤੰਬਰ ਤੱਕ ਗਾਰ ਤੇ ਮਲਬੇ ਤੋਂ ਮੁਕਤ ਕੀਤੇ ਜਾਣ ਦਾ ਟੀਚਾ ਰੱਖਿਆ ਗਿਆ ਹੈ।
ਉਨ੍ਹਾਂ ਨੇ ਹੜ੍ਹ ਪੀੜਤਾਂ ਦੇ ਨਿੱਕੇ ਮੋਟੇ ਸ਼ੰਕਿਆਂ ਨੂੰ ਨਵਿਰਤ ਕਰਦਿਆਂ ਸਪੱਸ਼ਟ ਕੀਤਾ ਕਿ ਮੁੱਖ ਮੰਤਰੀ ਪੰਜਾਬ ਸ. ਭਗਵੰਤ ਸਿੰਘ ਮਾਨ ਦੀ ਅਗਵਾਈ ‘ਚ ਆਮ ਆਦਮੀ ਪਾਰਟੀ ਦੀ ਸਰਕਾਰ ਇਸ ਔਖੀ ਘੜੀ ‘ਚ ਹੜ੍ਹ ਪੀੜਤਾਂ ਦੇ ਨਾਲ ਮਜ਼ਬੂਤ ਚਟਾਨ ਵਾਂਗ ਖੜੀ ਹੈ। ਅਤੇ ਫਸਲਾਂ ਦੇ ਖਰਾਬੇ , ਪਸ਼ੂਆਂ, ਨੁਕਸਾਨੇ ਗਏ ਘਰਾਂ ਆਦਿ ਦਾ ਮੁਆਵਜਾ ਦੇਣ ਲਈ ਸੂਬਾ ਮਾਨ ਸਰਕਾਰ ਕਤਾਰ ‘ਚ ਖੜੇ ਅਖੀਰਲੇ ਪ੍ਰਭਾਵਿਤ ਵਿਅਕਤੀ ਨੂੰ ਹਰ ਹੀਲੇ ਮੁਆਵਜਾ ਲਈ ਵਚਣਬੱਧ ਹੈ।