ਡਿਪਟੀ ਕਮਿਸ਼ਨਰ ਜਸਪ੍ਰੀਤ ਸਿੰਘ ਨੇ ਅੱਜ ਲੈਦਰ ਕੰਪਲੈਕਸ ਵਿਖੇ ਸਥਾਪਿਤ ਚਮੜਾ ਉਦਯੋਗ ਦੀਆਂ ਇਕਾਈਆਂ ਦੇ ਨੁਮਾਇੰਦਿਆਂ ਨਾਲ ਸਮੀਖਿਆ ਮੀਟਿੰਗ ਕਰਦਿਆਂ ਪੰਜਾਬ ਪ੍ਰਦੂਸ਼ਣ ਕੰਟਰੋਲ ਬੋਰਡ ਦੇ ਅਧਿਕਾਰੀਆਂ ਨੂੰ ਕਿਹਾ ਕਿ ਉਹ ਵਿਭਾਗ ਦੇ ਤਕਨੀਕੀ ਮਾਹਿਰਾਂ, ਉਦਯੋਗ ਨਾਲ ਸਬੰਧਿਤ ਨੁਮਾਇੰਦਿਆਂ ਸਮੇਤ ਡੇਰਾਬੱਸੀ ਵਿਖੇ ਨਿੰਬੂਆਂ ਸਾਈਟ ਦਾ ਦੌਰਾ ਕਰਨ।
ਜ਼ਿਲ੍ਹਾ ਪ੍ਰਸ਼ਾਸਕੀ ਕੰਪਲੈਕਸ ਵਿਖੇ ਪ੍ਰਦੂਸ਼ਣ ਕੰਟਰੋਲ ਬੋਰਡ ਦੇ ਅਧਿਕਾਰੀਆਂ, ਚਮੜਾ ਉਦਯੋਗ ਅਤੇ ਨਿੰਬੂਆਂ ਗਰੀਨ ਫੀਲਡ ਲਿਮਟਿਡ ਦੇ ਨੁਮਾਇੰਦਿਆਂ ਦੀ ਸਾਂਝੀ ਸਮੀਖਿਆ ਮੀਟਿੰਗ ਦੌਰਾਨ ਡਿਪਟੀ ਕਮਿਸ਼ਨਰ ਨੇ ਕਿਹਾ ਕਿ ਜਲਦ ਨਿੰਬੂਆਂ ਸਾਈਟ ਦਾ ਦੌਰਾ ਕਰਕੇ ਉਦਯੋਗ ਦੇ ਮਸਲਿਆਂ ਦਾ ਢੁਕਵਾਂ ਹੱਲ ਕੱਢਿਆ ਜਾਵੇ।
ਉਨ੍ਹਾਂ ਨੇ ਲੈਦਰ ਇੰਡਸਟਰੀ ਦੇ ਲਏ ਗਏ ਤਾਜ਼ਾ ਸੈਂਪਲਾਂ ਦੀਆਂ ਰਿਪੋਰਟਾਂ ’ਤੇ ਤਸੱਲੀ ਪ੍ਰਗਟਾਉਂਦਿਆਂ ਉਦਯੋਗਿਕ ਇਕਾਈਆਂ ਨੂੰ ਕਿਹਾ ਕਿ ਉਹ ਇਨ੍ਹਾਂ ਮਾਪਦੰਡਾਂ ਨੂੰ ਬਰਕਰਾਰ ਰੱਖਣ। ਉਨ੍ਹਾਂ ਨੇ ਚਮੜਾ ਉਦਯੋਗ ਵਲੋਂ ਪ੍ਰਦੂਸ਼ਣ ਕੰਟਰੋਲ ਬੋਰਡ ਅਤੇ ਹੋਰਨਾਂ ਰੈਗੂਲੇਟਰੀ ਏਜੰਸੀਆਂ ਵਲੋਂ ਤੈਅ ਮਾਪਦੰਡਾਂ ਲਈ ਸਹਿਯੋਗ ਦੇਣ ਲਈ ਲੈਦਰ ਇੰਡਸਟਰੀ ਦੀ ਸ਼ਲਾਘਾ ਕੀਤੀ।
ਪੀ.ਪੀ.ਸੀ.ਬੀ. ਦੇ ਜ਼ੋਨਲ ਐਸ.ਈ. ਸੰਦੀਪ ਬਹਿਲ ਨੇ ਜਾਣੂੰ ਕਰਵਾਇਆ ਕਿ ਲੈਦਰ ਇੰਡਸਟਰੀ ਦੇ ਨਿੰਬੂਆਂ ਗਰੀਨ ਫੀਲਡ ਲਿਮਟਿਡ, ਜੋ ਕਿ ਉਦਯੋਗਾਂ ਦਾ ਹੀ ਇਕ ਐਸ.ਪੀ.ਵੀ. ਹੈ, ਨਾਲ ਕੁਝ ਮਸਲੇ ਹਨ ਜਿਹੜੇ ਕਿ ਜਲਦੀ ਹੱਲ ਕੀਤੇ ਜਾਣਗੇ। ਉਨ੍ਹਾਂ ਦੱਸਿਆ ਕਿ ਨਿੰਬੂਆਂ ਵਿਖੇ ਹਾਨੀਕਾਰਕ ਰਹਿੰਦ-ਖੂੰਹਦ ਪ੍ਰਬੰਧਨ ਦਾ ਡੰਪ ਹੈ ਅਤੇ ਲੈਦਰ ਇੰਡਸਟਰੀ ਇਸ ਦੀ ਟਰਾਂਸਪੋਰਟੇਸ਼ਨ ਦਾ ਰੇਟ ਘੱਟ ਕਰਵਾਉਣਾ ਚਾਹੁੰਦੀ ਹੈ ਕਿਉਂਕਿ ਮੌਜੂਦਾ ਸਮੇਂ ਇੰਡਸਟਰੀ ਔਖੇ ਸਮੇਂ ਵਿਚੋਂ ਲੰਘ ਰਹੀ ਹੈ।
ਡਿਪਟੀ ਕਮਿਸ਼ਨਰ ਜੋ ਕਿ ਚਮੜਾ ਉਦਯੋਗ ਨਾਲ ਸਬੰਧਿਤ ਮਸਲਿਆਂ ਅਤੇ ਮਾਪਦੰਡਾਂ ਨੂੰ ਲਾਗੂ ਕਰਵਾਉਣ ਲਈ ਕਮੇਟੀ ਦੇ ਚੇਅਰਮੈਨ ਹਨ ਨੇ ਕਿਹਾ ਕਿ ਦੋਵਾਂ ਪਾਸਿਆਂ ਦੇ ਨੁਮਾਇੰਦਿਆਂ ਅਤੇ ਪੰਜਾਬ ਪ੍ਰਦੂਸ਼ਣ ਕੰਟਰੋਲ ਬੋਰਡ ਦੇ ਤਕਨੀਕੀ ਮਾਹਿਰਾਂ ਨਾਲ ਦੌਰੇ ਉਪਰੰਤ ਢੁਕਵਾਂ ਹੱਲ ਯਕੀਨੀ ਬਣਾਇਆ ਜਾਵੇ। ਇਸ ਮੌਕੇ ਉਦਯੋਗ ਵਿਭਾਗ ਦੇ ਓ.ਐਸ.ਡੀ. ਐਸ.ਪੀ.ਲੌਂਗੀਆ, ਲੈਦਰ ਇੰਡਸਟਰੀ ਕਮੇਟੀ ਦੇ ਪ੍ਰਧਾਨ ਹੀਰਾ ਲਾਲ ਵਰਮਾ ਤੋਂ ਇਲਾਵਾ ਕਾਰਜਕਾਰੀ ਮੈਂਬਰ ਸਟੀਫ਼ਨ ਕਲੇਰ, ਦੀਪਕ ਚਾਵਲਾ, ਜਾਗੀਰੀ ਲਾਲ ਤੇ ਹੋਰ ਮੌਜੂਦ ਸਨ।