ਚੰਡੀਗੜ੍ਹ ਸਥਿਤ ਸੈਕਟਰ 42 ਦੀ ਝੀਲ 'ਤੇ ਛਠ ਪੂਜਾ ਦੇ ਪਾਵਨ ਅਵਸਰ ਤੋਂ ਬਾਅਦ ਅੱਜ ਤੜਕਸਾਰ ਚੰਡੀਗੜ੍ਹ ਵੈਲਫੇਅਰ ਟਰੱਸਟ ਵੱਲੋਂ ਸਾਫ਼-ਸਫ਼ਾਈ ਅਭਿਆਨ ਵਿੱਢਿਆ ਗਿਆ। ਚੰਡੀਗੜ੍ਹ ਵੈਲਫ਼ੇਅਰ ਟਰੱਸਟ ਦੇ ਸੰਸਥਾਪਕ ਸ. ਸਤਨਾਮ ਸਿੰਘ ਸੰਧੂ ਦੀ ਅਗਵਾਈ ਹੇਠ ਟਰੱਸਟ ਦੇ ਵੱਡੀ ਗਿਣਤੀ ਵਾਲੰਟੀਅਰ ਸੇਵਾ ਭਾਵਨਾ ਨਾਲ ਇਸ ਮੁਹਿੰਮ ਦਾ ਹਿੱਸਾ ਬਣੇ।
ਜ਼ਿਕਰਯੋਗ ਹੈ ਕਿ ਐਤਵਾਰ ਸ਼ਾਮ ਚੰਡੀਗੜ੍ਹ ਵਿਖੇ ਸੈਕਟਰ 42 ਦੀ ਝੀਲ 'ਤੇ ਪੂਰਵਾਂਚਲ ਅਤੇ ਬਿਹਾਰ ਨਾਲ ਸਬੰਧਿਤ ਸ਼ਰਧਾਲੂਆਂ ਨੇ ਆਸਥਾ ਦੇ ਪ੍ਰਤੀਕ ਛਠ ਪੂਜਾ ਸਮਾਗਮਾਂ 'ਚ ਹਾਜ਼ਰੀ ਭਰਦਿਆਂ ਭਗਵਾਨ ਭਾਸਕਰ ਅਤੇ ਛੱਠੀ ਮਾਤਾ ਦਾ ਆਸ਼ੀਰਵਾਦ ਹਾਸਲ ਕੀਤਾ। ਇਸ ਵਿਸ਼ਾਲ ਸਮਾਗਮ 'ਚ ਬਿਹਾਰ ਅਤੇ ਪੂਰਵਾਂਚਲ ਭਾਈਚਾਰੇ ਨਾਲ ਸਬੰਧਿਤ 70 ਹਜ਼ਾਰ ਤੋਂ ਵੱਧ ਸ਼ਰਧਾਲੂਆਂ ਨੇ ਸ਼ਿਰਕਤ ਕੀਤੀ।
ਜ਼ਿਕਰਯੋਗ ਹੈ ਕਿ ਸੂਰਜ ਦੀ ਉਪਾਸਨਾ ਦਾ ਚਾਰ ਦਿਨਾਂ ਦਾ ਛੱਠ ਪੂਜਾ ਤਿਉਹਾਰ ਸੈਕਟਰ-42 ਦੀ ਝੀਲ 'ਤੇ 'ਨਹਾਏ ਖਾਏ' ਦੀ ਰੀਤੀ ਰਿਵਾਜ ਅਤੇ ਚੜ੍ਹਦੇ ਸੂਰਜ ਨੂੰ ਅਰਘ ਭੇਂਟ ਕਰਕੇ ਸੋਮਵਾਰ ਸਵੇਰ ਸ਼ਰਧਾਪੂਰਕ ਸੰਪੰਨ ਹੋਇਆ। ਇਸ ਉਪਰੰਤ ਚੰਡੀਗੜ੍ਹ ਵੈਲਫ਼ੇਅਰ ਟਰੱਸਟ ਦੇ ਸੰਸਥਾਪਕ ਸ. ਸਤਨਾਮ ਸਿੰਘ ਸੰਧੂ ਦੀ ਅਗਵਾਈ ਤਹਿਤ ਟਰੱਸਟ ਦੇ 150 ਤੋਂ ਵੱਧ ਵਾਲੰਟੀਅਰਾਂ ਵੱਲੋਂ ਝੀਲ 'ਤੇ ਸਾਫ਼-ਸਫ਼ਾਈ ਮੁਹਿੰਮ ਚਲਾਈ ਗਈ। ਟਰੱਸਟ ਦੇ ਵਾਲੰਟੀਅਰਾਂ ਵੱਲੋਂ 6 ਘੰਟੇ ਦੇ ਸਮੇਂ ਦੌਰਾਨ ਹੀ ਝੀਲ ਨੇੜੇ ਸਥਿਤ ਪੌੜੀਆਂ, ਪਾਰਕ ਅਤੇ ਪਾਰਕਿੰਗ ਏਰੀਆ ਦੀ ਮੁਕੰਮਲ ਸਫ਼ਾਈ ਕੀਤੀ ਗਈ।
ਪੂਰਵਾਂਚਲ ਅਤੇ ਬਿਹਾਰ ਨਾਲ ਸਬੰਧਿਤ ਭਾਈਚਾਰੇ ਨੂੰ ਪਾਵਨ ਤਿਉਹਾਰ ਦੀਆਂ ਸ਼ੁਭਕਾਮਨਾਵਾਂ ਦਿੰਦਿਆਂ ਟਰੱਸਟ ਦੇ ਸੰਸਥਾਪਕ ਸ. ਸਤਨਾਮ ਸਿੰਘ ਸੰਧੂ ਨੇ ਕਿਹਾ ਕਿਹਾ ਕਿ ਮੂਲ ਰੂਪ 'ਚ ਛਠ ਪੂਜਾ ਦਾ ਪਾਵਨ ਤਿਉਹਾਰ ਚੜ੍ਹਦੇ ਅਤੇ ਡੂਬਦੇ ਸੂਰਜ ਦੀ ਉਪਾਸਨਾ ਨਾਲ ਜੁੜਿਆ ਹੈ ਜੋ ਸਾਡੇ ਜੀਵਨ ਵਿੱਚ ਉਤਰਾਅ-ਚੜ੍ਹਾਅ ਦਾ ਪ੍ਰਤੀਕ ਹੈ। ਉਨ੍ਹਾਂ ਦੱਸਿਆ ਕਿ ਟਰੱਸਟ ਦੇ ਵੱਡੀ ਗਿਣਤੀ ਵਾਲੰਟੀਅਰ ਆਸਥਾ ਭਾਵਨਾ ਨਾਲ ਇਸ ਸਫ਼ਾਈ ਅਭਿਆਨ ਨਾਲ ਜੁੜੇ ਹਨ।
ਸ. ਸੰਧੂ ਦੱਸਿਆ ਕਿ ਲਗਭਗ ਪਿਛਲੇ ਇੱਕ ਵਰ੍ਹੇ ਤੋਂ ਚੰਡੀਗੜ੍ਹ ਨਗਰ ਨਿਗਮ ਅਤੇ ਪ੍ਰਸ਼ਾਸਨ ਦੇ ਸਹਿਯੋਗ ਨਾਲ ਟਰੱਸਟ ਵੱਲੋਂ ਸਮੇਂ ਸਮੇਂ 'ਤੇ ਸਾਫ਼-ਸਫ਼ਾਈ ਮੁਹਿੰਮ ਵਿੱਢੀਆਂ ਗਈਆਂ ਹਨ ਤਾਂ ਜੋ ਸਿਟੀ ਬਿਊਟੀਫੁੱਲ ਨੂੰ ਸੁੰਦਰਤਾ ਅਤੇ ਸਵੱਛਤਾ ਪੱਖੋਂ ਨੰਬਰ ਇੱਕ 'ਤੇ ਕਾਇਮ ਕੀਤਾ ਜਾ ਸਕੇ। ਉਨ੍ਹਾਂ ਦੱਸਿਆ ਕਿ ਸਵੱਛਤਾ ਰੈਕਿੰਗ 'ਚ ਚੰਡੀਗੜ੍ਹ ਸ਼ਹਿਰ 66ਵੇਂ ਸਥਾਨ 'ਤੇ 12 ਸਥਾਨ 'ਤੇ ਪਹੁੰਚ ਗਿਆ ਹੈ ਅਤੇ ਨਿਰਸੰਦੇਹ ਸ਼ਹਿਰ ਵਾਸੀਆਂ ਦੇ ਸਹਿਯੋਗ ਨਾਲ ਜਲਦ ਹੀ ਚੰਡੀਗੜ੍ਹ ਪਹਿਲੇ ਸਥਾਨ 'ਤੇ ਕਾਬਜ਼ ਹੋਵੇਗਾ।
ਫ਼ੋਟੋ ਕੈਪਸ਼ਨ: ਚੰਡੀਗੜ੍ਹ ਵੈਲਫ਼ੇਅਰ ਟਰੱਸਟ ਵੱਲੋਂ ਛਠ ਪੂਜਾ ਦੇ ਪਾਵਨ ਅਵਸਰ ਮੌਕੇ ਤੋਂ ਬਾਅਦ ਸੈਕਟਰ 42 ਦੀ ਝੀਲ 'ਤੇ ਚਲਾਈ ਸਵੱਛਤਾ ਮੁਹਿੰਮ ਦੌਰਾਨ ਸਫ਼ਾਈ ਕਰਦੇ ਟਰੱਸਟ ਦੇ ਸੰਸਥਾਪਕ ਸ. ਸਤਨਾਮ ਸਿੰਘ ਸੰਧੂ ਅਤੇ ਵਾਲੰਟੀਅਰ।