ਪੰਜਾਬ ਸਰਕਾਰ ਵੱਲੋਂ ਵਾਤਾਵਰਣ ਦੀ ਸਾਂਭ-ਸੰਭਾਲ ਲਈ ਕੀਤੇ ਜਾ ਰਹੇ ਉਪਰਾਲਿਆਂ ਤਹਿਤ ਇਨ ਸੀਟੂ ਸਕੀਮ ਅਧੀਨ ਜਿਲੇ ਦੇ ਕਿਸਾਨਾਂ ਨੂੰ ਪਰਾਲੀ ਸਾਂਭਣ ਵਾਸਤੇ ਖੇਤੀ ਮਸ਼ੀਨਰੀ ਸਬਸਿਡੀ ਉਤੇ ਦਿੱਤੀ ਜਾ ਰਹੀ ਹੈ। ਇਹ ਸਬਸਿਡੀ ਪ੍ਰਾਪਤ ਕਰਨ ਲਈ ਕਿਸਾਨਾਂ, ਸੁਸਾਇਟੀਆਂ, ਪੰਚਾਇਤਾਂ ਵੱਲੋਂ ਆਈਆਂ ਦਰਖਾਸਤਾਂ ਦੇ ਡਰਾਅ ਅੱਜ ਡਿਪਟੀ ਕਮਿਸ਼ਨਰ ਸ੍ਰੀ ਮੋਨੀਸ਼ ਕੁਮਾਰ ਵੱਲੋਂ ਕਿਸਾਨਾਂ ਦੇ ਅਧਿਕਾਰੀਆਂ ਦੀ ਹਾਜ਼ਰੀ ਵਿਚ ਕੱਢੇ ਗਏ।
ਡਾ. ਹਰਪਾਲ ਸਿੰਘ ਪੰਨੂੰ ਮੁੱਖ ਖੇਤੀਬਾੜੀ ਅਧਿਕਾਰੀ ਨੇ ਦੱਸਿਆ ਕਿ ਇਸ ਮੌਕੇ ਲੀਡ ਬੈਂਕ ਮੈਨੇਜਰ ਸ੍ਰੀ ਆਰ ਕੇ ਪਰਿੰਦਾ, ਕੇ ਵੀ ਕੇ ਦੇ ਸਹਾਇਕ ਪ੍ਰੋਫੈਸਰ ਸ੍ਰੀ ਬਲਵਿੰਦਰ ਕੁਮਾਰ, ਬਲਾਕ ਖੇਤੀਬਾੜੀ ਅਧਿਕਾਰੀ ਪੱਟੀ ਡਾ. ਭੁਪਿੰਦਰ ਸਿੰਘ, ਅਗਾਂਹ ਵਧੂ ਕਿਸਾਨ ਗੁਰਬਿੰਦਰ ਸਿੰਘ ਅਤੇ ਹੋਰ ਮੋਹਤਬਰ ਹਾਜ਼ਰ ਸਨ। ਉਨਾਂ ਦੱਸਿਆ ਕਿ ਡਰਾਅ ਕੰਪਿਊਟਰ ਰੈਡਮਾਈਜੇਸ਼ਨ ਨਾਲ ਕੱਢੇ ਗਏ, ਜਿੰਨਾ ਵਿਚ ਸੁਪਰ ਸੀਡਰ, ਹੈਪੀ ਸੀਡਰ, ਮਲਚਰ, ਪੈਡੀ ਚੌਪਰ, ਜ਼ੋਰੀ ਡਰਿਲ, ਐਮ ਬੀ ਪਲੋ, ਸੁਪਰ ਐਸ ਐਮ ਐਸ, ਸਰਬ ਮਾਸਟਰ, ਕਰਾਪ ਰੀਪਰ, ਬੇਲਰ,ਰੇਕ ਅਤੇ ਹੋਰ ਖੇਤੀ ਸੰਦ ਸ਼ਾਮਿਲ ਸਨ।
ਉਨਾਂ ਦੱਸਿਆ ਕਿ ਓ ਬੀ ਸੀ ਸ੍ਰੇਣੀ ਨੂੰ ਜਨਰਲ ਸ਼ੇ੍ਰਣੀ ਵਿਚ ਹੀ ਵਿਚਾਰਿਆ ਗਿਆ, ਕਿਉਂਕਿ ਉਕਤ ਸਕੀਮ ਵਿਚ ਓ ਬੀ ਸੀ ਦਾ ਕੋਈ ਵੱਖਰਾ ਰਾਖਵਾਂਕਰਨ ਨਹੀਂ ਸੀ। ਇਸੇ ਤਰਾਂ ਕੁੱਝ ਕਿਸਾਨਾਂ ਵੱਲੋਂ ਪਹਿਲੀ ਤੇ ਦੂਸਰੀ ਤਰਜੀਹ ਦੇ ਸੰਦਾਂ ਲਈ ਬਿਨੈ ਕੀਤਾ ਗਿਆ ਸੀ, ਜਿੰਨਾ ਵਿਚੋਂ ਫਿਲਹਾਲ ਪਹਿਲੀ ਤਰਜੀਹ ਨੂੰ ਹੀ ਲਿਆ ਗਿਆ ਹੈ ਅਤੇ ਹੋਰ ਟੀਚੇ ਪ੍ਰਾਪਤ ਹੋਣ ਮਗਰੋਂ ਦੂਸਰੀ ਤਰਜੀਹ ਦੇ ਸੰਦਾਂ ਉਤੇ ਵਿਚਾਰ ਕੀਤਾ ਜਾਵੇਗਾ। ਐਸ ਸੀ ਸ਼੍ਰੇਣੀ ਵਿਚ ਕੇਵਲ 13 ਅਰਜ਼ੀਆਂ ਪ੍ਰਾਪਤ ਹੋਈਆਂ, ਜਦਕਿ ਕੁੱਲ ਮਸ਼ੀਨਾਂ 23 ਸਨ।
ਇਸ ਤਰਾਂ ਇਸ ਸ੍ਰੇਣੀ ਵਿਚ ਬਿਨੈ ਕਰਨ ਵਾਲੇ ਕਿਸਾਨਾਂ ਨੂੰ ਦੋਵੇਂ ਤਰਜੀਹਾਂ ਦੇ ਸੰਦਾਂ ਲਈ ਚੋਣ ਕਰ ਲਈ ਗਈ। ਸਹਿਕਾਰੀ ਸੁਸਾਇਟੀਆਂ ਵਿਚੋਂ ਕੇਵਲ ਤਿੰਨ ਸੁਸਾਇਟੀਆਂ ਨੇ ਹੀ ਬਿਨੈ ਕੀਤਾ। ਇਸੇ ਤਰਾਂ ਗ੍ਰਾਮ ਪੰਚਾਇਤਾਂ ਲਈ 94 ਅਰਜ਼ੀਆਂ ਆਈਆਂ, ਜਿੰਨਾ ਨੂੰ ਪ੍ਰਵਾਨ ਕਰ ਲਿਆ ਗਿਆ। ਐਫ. ਪੀ ਓ ਵੱਲੋਂ 24 ਅਰਜ਼ੀਆਂ ਆਈਆਂ, ਜੋ ਕਿ ਬਲਾਕ ਅਧਿਕਾਰੀ ਦੁਆਰਾ ਸਹੀ ਪਾਏ ਜਾਣ ਉਤੇ ਪ੍ਰਵਾਨ ਕਰ ਲਈਆਂ ਜਾਣਗੀਆਂ। ਉਨਾਂ ਦੱਸਿਆ ਕਿ ਇਸ ਵਾਰ ਕਿਸਾਨਾਂ ਨੇ ਹਰੇਕ ਤਰਾਂ ਦੇ ਖੇਤੀ ਸੰਦ ਲਈ ਉਤਸ਼ਾਹ ਵਿਖਾਇਆ ਅਤੇ ਸੰਦਾਂ ਦੇ ਟੀਚਿਆਂ ਤੋਂ ਕਈ ਗੁਣਾ ਵੱਧ ਅਰਜ਼ੀਆਂ ਸਾਨੂੰ ਪ੍ਰਾਪਤ ਹੋਈਆਂ, ਜਿਸ ਕਾਰਨ ਅਸੀਂ ਡਰਾਅ ਕੱਢ ਕੇ ਸੰਦਾਂ ਲਈ ਬਿਨੈਕਾਰਾਂ ਦੀ ਚੋਣ ਕੀਤੀ।