ਖੇਤੀਬਾਡ਼ੀ ਅਤੇ ਕਿਸਾਨ ਭਲਾਈ ਪੰਜਾਬ ਦੇ ਡਾਇਰੈਕਟਰ ਡਾ. ਗੁਰਵਿੰਦਰ ਸਿੰਘ ਵੱਲੋਂ ਮਿਲੇ ਟੈਲੀਫੋਨ ਸੰਦੇਸ਼ ਅਨੁਸਾਰ ਕਾਰਵਾਈ ਕਰਦਿਆਂ ਡਾ ਕਰਨਜੀਤ ਸਿੰਘ ਗਿੱਲ ਮੁੱਖ ਖੇਤੀਬਾਡ਼ੀ ਅਫ਼ਸਰ ਫ਼ਰੀਦਕੋਟ ਡਾ. ਅਰਸ਼ਦੀਪ ਕੌਰ ਏ ਡੀ ਓ (ਇਨਫੋਰਸਮੈਂਟ) ਅਤੇ ਡਾ.ਲਖਬੀਰ ਸਿੰਘ ਏ ਡੀ ਓ (ਟੀ ਏ) ਵਲੋਂ ਪੁਲਿਸ ਥਾਣਾ ਜੈਤੋ ਵਿਖੇ ਟਾਟਾ ਏਸ 'ਚ ਫੜੀਆਂ ਦਵਾਈਆਂ ਦੀ ਪੜਤਾਲ ਕੀਤੀ।
ਬਲਵਿੰਦਰ ਸਿੰਘ ਏ.ਐੱਸ.ਆਈ ਦੀ ਹਾਜ਼ਰੀ ਵਿਚ ਖੇਤੀਬਾੜੀ ਟੀਮ ਵੱਲੋਂ ਪੜਤਾਲ ਕਰਨ ਤੇ ਪਤਾ ਲੱਗਾ ਕਿ ਮੈਸ. ਗਰੀਨ ਐਗਰੋਕੈਮੀਕਲਜ਼ ਅਹਿਮਦਾਬਾਦ ਵੱਲੋਂ ਮੈਨੂਫੈਕਚਰ ਅਤੇ ਮਾਰਕੀਟ ਕੀਤੀਆਂ ਉੱਲੀ ਨਾਸ਼ਕ ਦਵਾਈਆਂ (ਬੈਚ ਨੰਬਰ -9 ਏ. ਸੀ. ਜੁਲਾਈ/22 ਤੋਂ ਜੂਨ/24 ਤੱਕ) ਅਜੌਕਸੀਸਟਰੋਬਿਨ 11% + ਟੈਬੂਕੋਨਾਜ਼ੋਲ 18.3% ਡਬਲਿਊ ਡਬਲਿਊ ਐਸ. ਸੀ. (ਸਿਡੋਨ) ਦੇ 500 ਲਿਟਰ 50 ਡੱਬਿਆਂ ਵਿੱਚ ਫੜੀ ਗਈ।
ਮੌਕੇ ਤੇ ਮੌਜੂਦ ਟਾਟਾ ਏਸ ਦੇ ਡਰਾੲੀਵਰ ਗੁਰਸੇਵਕ ਸਿੰਘ ਬਠਿੰਡਾ ਅਤੇ ਕ੍ਰਿਸ਼ਨ ਕੁਮਾਰ ਪਿੰਡ ਜੀਦਾ ਕੋਲ ਇਸ ਉੱਲੀ ਨਾਸ਼ਕ ਦਵਾਈ ਦਾ ਕੋਈ ਪੱਕਾ ਬਿੱਲ ਨਹੀਂ ਸੀ ਅਤੇ ਨਾ ਹੀ ਕੋਈ ਹੋਰ ਜਰੂਰੀ ਕਾਗਜ਼ਾਤ ਸਨ ।ਇਨ੍ਹਾਂ ਵਿਅਕਤੀਆਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਇਹ ਦਵਾਈ ਵੀ.ਆਰ.ਐੱਲ ਟਰਾਂਸਪੋਰਟ ਬਠਿੰਡਾ ਤੋਂ ਚੁੱਕੀ ਹੈ ਅਤੇ ਪਿੰਡ ਜਲਾਲ ਪਹੁੰਚਦੀ ਕਰਨੀ ਸੀ ਅਤੇ ਇਹ ਦਵਾਈ ਜਸਵਿੰਦਰ ਸਿੰਘ ਵਾਸੀ ਬਠਿੰਡਾ ਅਤੇ ਬਖਸ਼ੀਸ਼ ਸਿੰਘ ਉਰਫ ਸ਼ੀਸ਼ਾ ਵਾਸੀ ਜੀਦਾ ਕੋਲੋਂ ਪ੍ਰਾਪਤ ਕੀਤੀ ਹੈ।
ਪੜਤਾਲ ਕਰਨ ਤੇ ਪਤਾ ਲੱਗਾ ਕਿ ਇਸ ਦਵਾਈ ਵਾਲੀ ਕੰਪਨੀ ਮੈਸੇ ਗ੍ਰੀਨ ਐਗਰੋਕੈਮੀਕਲਜ਼ ਦੀ ਪੰਜਾਬ ਵਿੱਚ ਵੇਚਣ ਜਾਂ ਬਣਾਉਣ ਦੀ ਕੋਈ ਪਰਮਿਸ਼ਨ ਨਹੀਂ ਹੈ। ਇਸ ਦਵਾਈ ਦੇ ਬੈਚ ਜੀ ਏ ਸੀ /01 ਦਾ ਸੈਂਪਲ ਮੌਕੇ ਤੇ ਭਰ ਲਿਆ। ਜਿਸ ਨੂੰ ਲੈਬਾਰਟਰੀ ਤੋਂ ਟੈਸਟ ਕਰਵਾਇਆ ਜਾਵੇਗਾ। ਇਨਸੈਕਟੀਸਾਈਡਸ ਐਕਟ 1968 ਦੀ ਧਾਰਾ 21(1)(ਡੀ )ਤਹਿਤ ਇਸ ਨੂੰ ਸੀਲ ਕੀਤਾ ਗਿਆ ਅਤੇ ਥਾਣਾ ਬਾਜਾਖਾਨਾ ਦੀ ਸਪੁਰਦਗੀ ਵਿੱਚ ਦੇ ਦਿੱਤਾ ਗਿਆ।
ਡਰਾਈਵਰ ਗੁਰਸੇਵਕ ਸਿੰਘ ਅਤੇ ਕ੍ਰਿਸ਼ਨ ਕੁਮਾਰ ਕੋਲ ਕੋਈ ਪੱਕਾ ਬਿਲ ਜਾਂ ਕਾਗਜ਼ ਨਾ ਹੋਣ ਕਰਕੇ ਅਤੇ ਇਸ ਕੰਪਨੀ ਦੀ ਪੰਜਾਬ ਵਿੱਚ ਪਰਮਿਸ਼ਨ ਨਾ ਹੋਣ ਕਰਕੇ ਮੁੱਖ ਅਫ਼ਸਰ ਥਾਣਾ ਬਾਜਾਖਾਨਾ ਨੂੰ ਉਪਰੋਕਤ ਵਿਅਕਤੀਆਂ ਖਿਲਾਫ਼ ਇਨਸੈਕਟੀਸਾਈਡ ਐਕਟ 1968 ਦੀ ਧਾਰਾ (29)(1)ਸੀ ਤਹਿਤ ਬਣਦੀ ਕਾਨੂੰਨੀ ਕਾਰਵਾਈ ਕਰਨ ਲਈ ਲਿਖ ਦਿੱਤਾ ਗਿਆ। ਜਿਸ ਅਨੁਸਾਰ ਥਾਣੇ ਵਲੋਂ ਸ਼ੱਕੀ ਵਿਅਕਤੀਆਂ ਖ਼ਿਲਾਫ਼ ਐਫਆਈਆਰ ਦਰਜ ਕਰ ਦਿੱਤੀ ਗਈ ਹੈ।
ਇਸ ਦੀ ਮੁਕੰਮਲ ਰਿਪੋਰਟ ਉੱਚ ਅਧਿਕਾਰੀਆਂ ਨੂੰ ਭੇਜ ਦਿੱਤੀ ਗਈ ਹੈ। ਜਿਸ ਅਨੁਸਾਰ ਉਨ੍ਹਾਂ ਵੱਲੋਂ ਪੂਰੇ ਪੰਜਾਬ ਵਿੱਚ ਇਸ ਕੰਪਨੀ ਦੇ ਗੁਦਾਮਾਂ ਆਦਿ ਪੜਤਾਲ ਸ਼ੁਰੂ ਕਰ ਦਿੱਤੀ ਗਈ ਹੈ। ਡਰਾਈਵਰ ਗੁਰਸੇਵਕ ਸਿੰਘ ਅਤੇ ਕ੍ਰਿਸ਼ਨ ਕੁਮਾਰ ਜੀਦਾ ਪੁਲਿਸ ਹਿਰਾਸਤ ਵਿਚ ਹਨ ।