ਭਾਸ਼ਾ ਵਿਭਾਗ ਪੰਜਾਬ ਜ਼ਿਲ੍ਹਾ ਫਾਜ਼ਿਲਕਾ ਵੱਲੋਂ ਅਜ਼ਾਦੀ ਦੇ ਅੰਮ੍ਰਿਤ ਮਹਾਂਉਤਸਵ ਸਬੰਧੀ ਪ੍ਰੋਗਰਾਮਾਂ ਦੀ ਲੜੀ ਤਹਿਤ ਐੱਮ. ਆਰ. ਸਰਕਾਰੀ ਕਾਲਜ ਫਾਜ਼ਿਲਕਾ ਵਿਖੇ 'ਸਾਵਣ ਕਵੀ ਦਰਬਾਰ' ਦਾ ਆਯੋਜਨ ਕੀਤਾ ਗਿਆ। ਇਸ ਕਵੀ ਦਰਬਾਰ ਦੀ ਪ੍ਰਧਾਨਗੀ ਪੰਜਾਬੀ ਦੇ ਉੱਘੇ ਕਵੀ ਗੁਰਤੇਜ ਕੋਹਾਰਵਾਲਾ ਜੀ ਨੇ ਕੀਤੀ ਅਤੇ ਇਸ ਵਿੱਚ ਫਾਜ਼ਿਲਕਾ, ਫਿਰੋਜ਼ਪੁਰ ਅਤੇ ਸ਼੍ਰੀ ਮੁਕਤਸਰ ਸਾਹਿਬ ਜ਼ਿਲ੍ਹਿਆਂ ਤੋਂ ਉੱਘੇ ਕਵੀਆਂ ਨੇ ਸ਼ਿਰਕਤ ਕੀਤੀ। ਕਵੀ ਦਰਬਾਰ ਦਾ ਆਰੰਭ ਜ਼ਿਲ੍ਹਾ ਭਾਸ਼ਾ ਅਫ਼ਸਰ ਫਾਜ਼ਿਲਕਾ ਸ਼੍ਰੀ ਭੁਪਿੰਦਰ ਉਤਰੇਜਾ ਜੀ ਨੇ ਆਏ ਹੋਏ ਮਹਿਮਾਨਾਂ, ਕਵੀਆਂ ਅਤੇ ਸਰੋਤਿਆਂ ਦਾ ਸੁਆਗਤ ਕਰਕੇ ਕੀਤਾ।
ਇਸ ਤੋਂ ਬਾਅਦ ਕਵੀਆਂ ਨੇ ਆਪਣੀਆਂ ਰਚਨਾਵਾਂ ਪੇਸ਼ ਕਰਦਿਆਂ ਸਾਰੇ ਹੀ ਮਹੌਲ ਨੂੰ ਕਵਿਤਾ ਦੇ ਰੰਗ ਵਿਚ ਰੰਗ ਦਿੱਤਾ। ਇਨ੍ਹਾਂ ਵਿੱਚੋਂ ਮੁੱਖ ਕਵੀ ਸ਼੍ਰੀ ਹਰਮੀਤ ਵਿਦਿਆਰਥੀ, ਸ. ਰਿਸ਼ੀ ਹਿਰਦੇਪਾਲ, ਸ. ਹਰਦੀਪ ਢਿੱਲੋਂ, ਸ਼੍ਰੀ ਆਤਮਾ ਰਾਮ ਰੰਜਨ, ਸ. ਪਰਮਜੀਤ ਢਿੱਲੋਂ, ਸ਼੍ਰੀ ਸੁਖਦੇਵ ਅਬੋਹਰ, ਸ਼੍ਰੀਮਤੀ ਮੀਨਾ ਮਹਿਰੋਕ, ਸ਼੍ਰੀ ਸੰਦੀਪ ਆਰਿਆ, ਸ਼੍ਰੀ ਮਨਜੀਤ ਸੂਖਮ ਤੇ ਪਵਨਦੀਪ ਚੌਹਾਨ ਸਨ। ਮੰਚ ਦਾ ਸੰਚਾਲਨ ਸ਼੍ਰੀ ਸੁਖਦੇਵ ਅਬੋਹਰ ਜੀ ਦੁਆਰਾ ਕੀਤਾ ਗਿਆ। ਕਵੀ ਦਰਬਾਰ ਦੀ ਪ੍ਰਧਾਨਗੀ ਕਰ ਰਹੇ ਸ. ਗੁਰਤੇਜ ਕੋਹਾਰਵਾਲਾ ਜੀ ਵੱਲੋਂ ਆਪਣੀ ਕਵਿਤਾ ਦੇ ਰੰਗ ਬਿਖੇਰਨ ਦੇ ਨਾਲ-ਨਾਲ ਇਲਾਕੇ ਦੇ ਕਵੀਆਂ, ਸਰੋਤਿਆਂ ਅਤੇ ਜ਼ਿਲ੍ਹਾ ਭਾਸ਼ਾ ਦਫ਼ਤਰ ਦੀ ਟੀਮ ਨੂੰ ਕਵੀ ਦਰਬਾਰ ਦੀ ਸਫ਼ਲਤਾ ਲਈ ਵਧਾਈ ਵੀ ਦਿੱਤੀ।
ਇਸ ਸਮਾਗਮ ਵਿਚ ਬਤੌਰ ਵਿਸ਼ੇਸ਼ ਮਹਿਮਾਨ ਜ਼ਿਲ੍ਹਾ ਭਾਸ਼ਾ ਅਫ਼ਸਰ ਫ਼ਿਰੋਜ਼ਪੁਰ ਡਾ. ਜਗਦੀਪ ਸੰਧੂ, ਸ. ਰਮੇਸ਼ਵਰ ਸਿੰਘ ਕਟਾਰਾ ਅਤੇ ਪ੍ਰਿੰਸੀਪਲ ਐੱਮ. ਆਰ. ਸਰਕਾਰੀ ਕਾਲਜ ਸ਼੍ਰੀ ਹਰਮੇਸ਼ ਲਾਲ ਪਾਲ ਜੀ ਸ਼ਾਮਲ ਹੋਏ। ਇਹਨਾ ਤੋਂ ਇਲਾਵਾ ਇਲਾਕੇ ਦੀਆਂ ਪ੍ਰਮੁੱਖ ਸਖਸ਼ੀਅਤਾਂ ਪ੍ਰਿੰ. ਗੁਰਮੀਤ ਸਿੰਘ, ਡਾ. ਵਿਜੇ ਪ੍ਰਵੀਨ, ਮਨਜਿੰਦਰ ਤਨੇਜਾ, ਜਤਿੰਦਰ ਆਰਿਆ, ਵਿਜੇਅੰਤ ਜੁਨੇਜਾ, ਵਿਕਾਸ ਬੱਤਰਾ, ਗੋਰਾ ਸ਼ਰਮਾ, ਕੁਲਬੀਰ ਸਿੰਘ, ਵਜੀਰ ਚੰਦ, ਵਿਕਾਸ ਕੰਬੋਜ ਅਤੇ ਹੋਰ ਮਾਣਯੋਗ ਸ਼ਖ਼ਸੀਅਤਾਂ ਨੇ ਇਸ ਕਵੀ ਦਰਬਾਰ ਵਿੱਚ ਹਾਜਰੀ ਲਵਾਈ।
ਇਸ ਮੌਕੇ ਐਡਵੋਕੇਟ ਜਸ਼ਨਦੀਪ ਤਰੀਕਾ ਵੱਲੋਂ ਲਿਖੀ ਗਈ ਕਿਤਾਬ 'ਮੁੱਢਲੀ ਕਨੂੰਨੀ ਜਾਣਕਾਰੀ' ਅਤੇ ਸ੍ਰੀ ਆਤਮਾ ਰਾਮ ਰੰਜਨ ਜੀ ਵੱਲੋਂ ਸੰਪਾਦਿਤ ਰਸਾਲੇ 'ਪਰਵਾਜ਼' ਦਾ ਕਵਿਸ਼ਰੀ ਵਿਸ਼ੇਸ਼ ਅੰਕ ਵੀ ਲੋਕ ਅਰਪਣ ਕੀਤਾ ਗਿਆ। ਸਮਾਗਮ ਦੇ ਅੰਤ ਵਿੱਚ ਖੋਜ ਅਫ਼ਸਰ ਫਾਜ਼ਿਲਕਾ ਸ. ਪਰਮਿੰਦਰ ਸਿੰਘ ਰੰਧਾਵਾ ਜੀ ਵੱਲੋਂ ਆਏ ਹੋਏ ਮਹਿਮਾਨਾਂ, ਕਵੀਆਂ ਅਤੇ ਸਰੋਤਿਆਂ ਦਾ ਧੰਨਵਾਦ ਕੀਤਾ ਗਿਆ ਅਤੇ ਆਏ ਹੋਏ ਮਹਿਮਾਨਾਂ ਅਤੇ ਕਵੀਆਂ ਨੂੰ ਭਾਸ਼ਾ ਵਿਭਾਗ ਫਾਜ਼ਿਲਕਾ ਵੱਲੋਂ ਸਨਮਾਨ ਚਿੰਨ ਭੇਂਟ ਕੀਤੇ ਗਏ।