ਲੋਕ ਸਭਾ ਹਲਕਾ ਬਠਿੰਡਾ ਦੇ ਪਿੰਡਾਂ ਅਤੇ ਸ਼ਹਿਰਾਂ ਅੰਦਰ ਵਿਕਾਸ ਮੁੱਦੇ ਨੇ ਸ਼੍ਰੋਮਣੀ ਅਕਾਲੀ ਦਲ ਅਤੇ ਭਾਜਪਾ ਗਠਜੋੜ ਦੇ ਸਾਂਝੇ ਉਮੀਦਵਾਰ ਬੀਬਾ ਹਰਸਿਮਰਤ ਕੌਰ ਬਾਦਲ ਦੀ ਸਿਆਸੀ ਸਥਿਤੀ ਬਹੁਤ ਜਿਆਦਾ ਮਜ਼ਬੂਤ ਬਣਾ ਦਿੱਤੀ ਹੈ। ਅਕਾਲੀ ਦਲ ਦੀ ਉਮੀਦਵਾਰ ਬੀਬਾ ਹਰਸਿਮਰਤ ਕੌਰ ਦੀ ਚੋਣ ਮੁਹਿੰਮ ਵਿੱਚ ਵਿਕਾਸ ਮੁੱਦਾ ਸਥਾਨਕ ਲੋਕਾਂ ਉਤੇ ਜਾਦੂਮਈ ਤਰੀਕੇ ਨਾਲ ਸਿਰ ਚੜ੍ਹ ਬੋਲਣ ਲੱਗਾ ਹੈ ਜਿਸ ਕਰਕੇ ਇੱਥੇ ਚੋਣ ਮੁਕਾਬਲਾ ਇੱਕ ਪਾਸੜ ਹੋ ਗਿਆ ਹੈ। ਪੰਜਾਬ ਸਰਕਾਰ ਦੇ ਕੈਬਨਿਟ ਮੰਤਰੀ ਸ. ਜਨਮੇਜਾ ਸਿੰਘ ਸੇਖੋਂ ਨੇ ਕਿਹਾ ਕਿ ਪੰਜਾਬ ਦੇ ਮੁੱਖ ਮੰਤਰੀ ਸ. ਪਰਕਾਸ਼ ਸਿੰਘ ਬਾਦਲ, ਉਪ ਮੁੱਖ ਮੰਤਰੀ ਸ. ਸੁਖਬੀਰ ਸਿੰਘ ਬਾਦਲ ਅਤੇ ਮੈਂਬਰ ਪਾਰਲੀਮੈਂਟ ਬੀਬਾ ਹਰਸਿਮਰਤ ਕੌਰ ਬਾਦਲ ਦੀਆਂ ਕੋਸ਼ਿਸਾਂ ਅਤੇ ਮਿਹਨਤ ਸਦਕਾ ਲੋਕ ਸਭਾ ਹਲਕਾ ਬਠਿੰਡਾ ਵਿਕਾਸ ਪੱਖੋਂ ਦੇਸ਼ ਦਾ ਨੰਬਰ ਇੱਕ ਹਲਕਾ ਬਣ ਚੁੱਕਾ ਹੈ। ਅਕਾਲੀ ਨੇਤਾ ਨੇ ਕਿਹਾ ਕਿ ਹੁਣ ਕੇਂਦਰ ਵਿੱਚ ਐਨ.ਡੀ.ਏ ਦੀ ਸ਼੍ਰੀ ਨਰਿੰਦਰ ਮੋਦੀ ਦੀ ਅਗਵਾਈ ਹੇਠ ਬਣਨ ਵਾਲੀ ਸਰਕਾਰ ਦੇ ਕਾਰਜਕਾਲ ਵਿੱਚ ਪੰਜਾਬ ਨੂੰ ਭਾਰਤ ਦਾ ਨੰਬਰ ਇੱਕ ਮਾਡਲ ਸੂਬੇ ਵਜੋਂ ਦੇਸ਼ ਦੇ ਨਕਸ਼ੇ ਉਤੇ ਉਭਾਰਿਆ ਜਾਵੇਗਾ।
ਅਕਾਲੀ ਨੇਤਾ ਨੇ ਦਾਅਵਾ ਕੀਤਾ ਹੈ ਕਿ ਲੋਕ ਸਭਾ ਹਲਕਾ ਬਠਿੰਡਾ ਅੰਦਰ ਹੋਏ ਵਿਕਾਸ ਕਾਰਜਾਂ ਕਰਕੇ ਇਹ ਹਲਕਾ ਪਹਿਲਾਂ ਹੀ ਆਪਣੀ ਰਾਸ਼ਟਰੀ ਪਛਾਣ ਬਣਾ ਚੁੱਕਿਆ ਹੈ। ਸ. ਸੇਖੋਂ ਨੇ ਕਿਹਾ ਕਿ ਬਠਿੰਡਾ ਦੇ ਮੁਕਾਬਲੇ ਨਹਿਰੂ ਗਾਂਧੀ ਪਰਿਵਾਰ ਦੇ ਜੱਦੀ ਪੁਸ਼ਤੀ ਸਮਝੇ ਜਾਂਦੇ ਉੱਤਰ ਪ੍ਰਦੇਸ਼ ਦਾ ਅਮੇਠੀ ਹਲਕਾ ਜਿੱਥੋ ਸ਼੍ਰੀ ਰਾਹੁਲ ਗਾਂਧੀ ਚੋਣ ਲੜ ਰਿਹਾ ਹੈ ਸਿੱਖਿਆ, ਸੜਕਾਂ, ਰੁਜ਼ਗਾਰ, ਸਿਹਤ ਸਹੂਲਤਾਂ ਅਤੇ ਬਿਜਲੀ ਆਦਿ ਖੇਤਰ ਵਿੱਚ ਇੱਕ ਹਜ਼ਾਰ ਗੁਣਾਂ ਪਛੜਿਆ ਹੋਇਆ ਹੈ। ਦੇਸ਼ ਦੀ ਅਜਾਦੀ ਤੋਂ ਬਾਅਦ ਲਗਾਤਾਰ ਗਾਂਧੀ ਪਰਵਾਰ ਇਸ ਹਲਕੇ ਤੋਂ ਚੋਣ ਲੜਦਾ ਆ ਰਿਹਾ ਹੈ ਪਰ ਅਜੇ ਤੱਕ ਸਥਾਨਕ ਲੋਕਾਂ ਨੂੰ ਪੀਣ ਵਾਲਾ ਪਾਣੀ ਤੱਕ ਵੀ ਨਹੀਂ ਦਿੱਤਾ ਜਾ ਸਕਿਆ। ਬਠਿੰਡਾ ਦੇ ਹਲਕੇ ਵਿੱਚ ਮੁੱਖ ਮੰਤਰੀ ਸ. ਪਰਕਾਸ਼ ਸਿੰਘ ਬਾਦਲ ਦੀ ਅਗਵਾਈ ਹੇਠ ਸ਼੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਰਿਫਾਇਨਰੀ, ਸ਼੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਥਰਮਲ ਪਲਾਂਟ ਤਲਵੰਡੀ ਸਾਬੋ, ਥਰਮਲ ਪਲਾਂਟ ਗੋਬਿੰਦਪੁਰਾ, ਕੇਂਦਰੀ ਯੂਨੀਵਰਸਿਟੀ ਬਠਿੰਡਾ, ਅੰਤਰ ਰਾਸ਼ਟਰੀ ਖੇਡ ਸਟੇਡੀਅਮ ਦੀ ਸਥਾਪਨਾ, ਕਾਟਨ ਖੇਤਰ ਹੋਣ ਕਰਕੇ ਟੈਕਸਟਾਇਲ ਹੱਬ ਬਣਾਉਂਣ ਲਈ ਯੋਜਨਾ ਤਿਆਰ ਕਰਨੀ, ਬਠਿੰਡੇ ਨੂੰ ਅੰਤਰ ਰਾਸ਼ਟਰੀ ਹਵਾਈ ਸੇਵਾ ਨਾਲ ਜੋੜਨਾ, ਸਿੱਖਿਆ ਖੇਤਰ ਵਿੱਚ ਯੂਨੀਵਰਸਿਟੀਆਂ, ਕਾਲਜਾਂ ਅਤੇ ਸਕੂਲਾਂ ਦਾ ਜਾਲ ਵਿਛਾਉਣਾ, ਰੇਲਵੇ ਦੇ ਓਵਰ ਅਤੇ ਅੰਡਰ ਬਰਿੱਜ ਬਣਾਉਣੇ ਅਤੇ ਚਹੁੰ ਮਾਰਗੀ ਸੜਕਾਂ ਬਣਾਉਣੀਆ ਅਜਿਹੇ ਵੱਡੇ ਪ੍ਰੋਜੈਕਟਰ ਸਥਾਪਤ ਕੀਤੇ ਗਏ ਹਨ ਜਿਹਨਾਂ ਨਾਲ ਬਠਿੰਡਾ ਉਤਰੀ ਭਾਰਤ ਦਾ ਵਿਕਾਸ ਅਤੇ ਰੋਜ਼ਗਾਰ ਦੇਣ ਵਾਲਾ ਹੱਬ ਬਣ ਚੁੱਕਿਆ ਹੈ। ਅਕਾਲੀ ਨੇਤਾ ਨੇ ਕਿਹਾ ਕਿ ਬਠਿੰਡਾ ਦੇ ਲੋਕਾਂ ਵੱਲੋਂ ਵਿਕਾਸ ਮੁੱਦੇ ਉਤੇ ਬੀਬਾ ਹਰਸਿਮਰਤ ਕੌਰ ਬਾਦਲ ਦੀ ਚੋਣ ਮੁਹਿੰਮ ਵਿੱਚ ਸ਼ਾਮਿਲ ਹੋ ਕੇ ਉਨ੍ਹਾਂ ਨੂੰ ਭਰਵਾਂ ਸਮਰਥਨ ਦਿੱਤਾ ਜਾ ਰਿਹਾ ਹੈ। ਬੀਬਾ ਹਰਸਿਮਰਤ ਦੇ ਮੁਕਾਬਲੇ ਕਾਂਗਰਸ ਦੇ ਉਮੀਦਵਾਰ ਮਨਪ੍ਰੀਤ ਬਾਦਲ ਨੂੰ ਸਥਾਨਕ ਲੋਕਾਂ ਵੱਲੋਂ ਕੋਈ ਹੁੰਗਾਰਾ ਨਹੀਂ ਦਿੱਤਾ ਜਾ ਰਿਹਾ। ਉਨ੍ਹਾਂ ਕਿ ਬਠਿੰਡੇ ਦੇ ਲੋਕ ਵਿਕਾਸ ਅਤੇ ਲੱਛੇਦਾਰ ਭਾਸ਼ਣਾਂ ਵਾਲੇ ਸੁਪਨਿਆ ਵਿੱਚ ਬੁਨਿਆਦੀ ਅੰਤਰ ਨੂੰ ਸਮਝਣ ਦੇ ਸਮਰੱਥ ਹਨ। ਮਨਪ੍ਰੀਤ ਬਾਦਲ ਦੀਆਂ ਚੋਣ ਮੀਟਿੰਗਾਂ ਵਿਚੋਂ ਵਿਕਾਸ ਮੁੱਦਾ ਗਾਇਬ ਰਹਿੰਦਾ ਹੈ ਉਹ ਕੇਵਲ ਆਪਣੀ ਸ਼ਾਇਰੋ-ਸ਼ੇਅਰੀ ਵਾਲੀ ਸਿਆਸੀ ਰੁਚੀ ਨੂੰ ਪੂਰਾ ਕਰ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਮਨਪ੍ਰੀਤ ਉਹ ਵਿਆਕਤੀ ਹੈ ਜਿਹੜਾ ਵਿੱਤ ਮੰਤਰੀ ਹੁੰਦੇ ਹੋਏ ਕਿਸਾਨਾਂ ਨੂੰ ਟਿਊਵੈੱਲਾਂ ਲਈ ਦਿੱਤੀ ਜਾਂਦੀ ਮੁਫ਼ਤ ਸਕੀਮ ਸਮੇਤ ਗਰੀਬਾ ਨੂੰ ਦਿੱਤੀਆ ਜਾਣ ਵਾਲੀਆ ਉਹ ਸਾਰੀਆ ਸਹੂਲਤਾਂ ਵਾਪਿਸ ਲੈਣ ਦੀ ਵਕਾਲਤ ਕਰਦਾ ਰਿਹਾ ਹੈ ਜਿਹਨਾਂ ਉਤੇ ਪੰਜਾਬ ਸਰਕਾਰ ਸਬਸਿਡੀ ਦੇ ਰਹੀ ਸੀ। ਅਕਾਲੀ ਨੇਤਾ ਨੇ ਦਆਵਾ ਕੀਤਾ ਬਠਿੰਡੇ ਦੇ ਵੋਟਰ ਵਿਕਾਸ ਨੂੰ ਮੁੱਖ ਰੱਖਦੇ ਹੋਏ ਬੀਬਾ ਹਰਸਿਮਰਤ ਕੌਰ ਬਾਦਲ ਨੂੰ ਰਿਕਾਰਡ ਤੋੜ ਜਿੱਤ ਦਿਵਾ ਕੇ ਦੇਸ਼ ਦੀਆਂ ਚੋਣਾਂ ਵਿੱਚ ਇੱਕ ਨਵਾਂ ਇਤਿਹਾਸ ਸਿਰਜਣਗੇ ਜਿੱਥੇ ਮਨਪ੍ਰੀਤ ਸਮੇਤ ਚੋਣ ਲੜਨ ਵਾਲੇ ਸਾਰੇ ਵਿਰੋਧੀ ਉਮੀਦਵਾਰਾਂ ਦੀਆਂ ਜਮਾਨਤਾਂ ਜਬਤ ਹੋਣਗੀਆਂ।